Doˆ-iˇ 7 - Akha

¹ Sahˬpaˬ Miˬyehˇ ehˇ-eu, “Sahˬ paˬ kʼoeˇ gʼaˬ-euˬ mehˬ shi nawˬ-ahˇ ngaˇ Miˬyehˇ loꞈ-ehˇ bi pyeuꞈ-awˇ, Aˬloˬ-aˬ Miˬyehˇ gʼaˇ duˬ ngehˬ dah-eu bawˇlawˇpeh loꞈ-ehˇ, nawˬ-eu dah zaˇ, sahˬ paˬ kʼoeˇ gʼaˬ-ahˇ dawˬ ngehˬ cawˬ tehꞈ-a.

² Ngaˬ neh nawˬ-ahˇ kʼaˇ ehˇ nehˬ-euˬ jeˬ dawˬ tawˆ luꞈ, Aˬ loˬ-ahˇ dzawˇ nehˬ-awˬ. Iˇsaˬleˬlaˆ tsawˇ haˬ-ahˇ aˬ yawꞈ-euˬ miˇ kʼahˬ laꞈ kʼoeˇ neh bi doˆ-iˇ-awˬ lehˇ, sahˬ paˬ kʼoeˇ gʼaˬ-ahˇ Aˬloˬ ehˇ nehˬ tehꞈ-a.

³ Ehˇ kʼawꞈ, sahˬ paˬ kʼoeˇ gʼaˬ nui ma gʼahˇ ni ngaˇ jahˇ nehˬ-awˇ, Iˇjiˇtuˆ miˇ kʼahˬ kʼoeˇ taˆ guˆ dui dui laˇ paˬ-ehˇ gʼeh-eu gʼawˬ mya jeˬ ngaˇ bi keuˆ le kʼawꞈ, naw nyaꞈ-euˬ ehˇ dawˬ-ahˇ aˬ yawꞈ maˬ naˇ haˬ ni jawˇ tehꞈ-a.

⁴ Kʼoeˇ naˇ, kʼaˆ dui dui-eu kʼehˬ-eu kʼaˆ-eu jeˬ Iˇjiˇtuˆ miˇ kʼahˬ kʼoeˇ taˆ ngaˇ bi keuˆ le-awˇ, ngaˬ-euˬ tsawˇ jeuˬ tsawˇ ca deuˬ-ahˇ Iˇjiˇtuˆ miˇ kʼahˬ laꞈ kʼoeˇ neh, ngaˇ sheuˬ doˆ gʼeh ma.

⁵ Iˇjiˇtuˆ miˇ kʼahˬ kʼoeˇ taˆ ngaˬ-euˬ aˬ laꞈ cawˬ ja-awˇ, Iˇsaˬleˬlaˆ tsawˇ haˬ-ahˇ Iˇjiˇtuˆ miˇ kʼahˬ laꞈ kʼoeˇ neh sheuˬ doˆ gʼeh ngeh, ngaˇ-aˬ, Sahˬpaˬ Miˬyehˇ pyeuꞈ-eu gaˇ kawˆ Iˇjiˇtuˆ tsawˇ haˬ deuˬ ya siˬ tehꞈ-a.”

⁶ Sahˬpaˬ Miˬyehˇ aˬ yawꞈ nyaꞈ-ahˇ dawˬ biꞈ nehˬ-euˬ loꞈ-ehˇ, Moˇseˬ hawˇ-eu Aˬloˬ mˇ-euˬ meh.

⁷ Sahˬ paˬ kʼoeˇ gʼaˬ-ahˇ aˬ yawꞈ nyaꞈ dawˬ ngehˬ cawˬ ngeh, Moˇseˬ-euˬ aˇ kʼoꞈ yehꞈ tseˇ kʼoꞈ jaˆ-awˇ, Aˬloˬ-euˬ aˇ kʼoꞈ yehꞈ tseˇ smˇ kʼoꞈ jaˆ-eu meh.

Aˬloˬ-euˬ gawˬ yoeˬ

⁸ Moˇseˬ hawˇ-eu Aˬloˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

⁹ “Naw nyaꞈ-ahˇ Sahˬpaˬ Miˬyehˇ neh kʼehˇ gʼeh leꞈ-euˬ ngeuˇ naˇ, kʼaˆ jeˬ-ehˇ gʼeh-eu jeˬ mˇ mehˬ haw sheˇ lehˇ sahˬ paˬ kʼoeˇ gʼaˬ naw nyaꞈ-ahˇ kʼehˇ laˇ naˇ, ‘Sahˬ paˬ-euˬ mehˬ shi nawˬ-euˬ gawˬ yoeˬ pyehˬ dzeh-awˬ’ lehˇ Aˬloˬ-ahˇ ehˇ nehˬ-awˬ. Gawˬ yoeˬ kʼoeˇ aˇ lawˇ pyeuꞈ-iˇ tehꞈ-a.”

¹⁰ Kʼoeˇ naˇ, Moˇseˬ hawˇ-eu Aˬloˬ aˬ nyaꞈ sahˬ paˬ jawˇ gaˇ iˇ-awˇ, Sahˬpaˬ Miˬyehˇ neh dawˬ biꞈ-euˬ loꞈ-ehˇ mˇ-iˇ-euˬ meh. Sahˬ paˬ hawˇ-eu aˬ yawꞈ-euˬ gaˇ mˇ-eu yaw huiˬ yaw mahˇ deuˬ-euˬ mehˬ shi, Aˬloˬ gawˬ yoeˬ pyeh dzeh ngeh, gawˬ yoeˬ kʼoeˇ aˇ lawˇ pyeuꞈ-iˇ-euˬ meh.

¹¹ Kʼoeˇ ngeh, sahˬ paˬ kʼoeˇ gʼaˬ, mah loˬ nya-eu deuˬ hawˇ-eu, zaˬ siˬ nui gahˇ ahˇ dui dui-eu aˬ yawꞈ-euˬ tsawˇ haˬ deuˬ kuˇ uiˬ-awˇ, tsawˇ haˬ kʼoeˇ deuˬ kʼawꞈ, aˬ yawꞈ maꞈ-euˬ mah loˬ loˬ-eu tsawˇ gahˇ-ahˇ gʼoe-awˇ, Aˬloˬ neh mˇ-euˬ jeˬ mˇ mehˬ nehˬ-euˬ meh.

¹² Aˬ yawꞈ maꞈ yawˬ gʼaˬ na luꞈ, yawˬ ha-euˬ gawˬ yoeˬ pyehˬ dzeh ngeh, gawˬ yoeˬ kʼoeˇ deuˬ aˇ lawˇ pyeuꞈ jiˇ-euˬ meh. Ehˇ kʼawꞈ, aˬ yawꞈ maꞈ-euˬ gawˬ yoeˬ kʼoeˇ deuˬ-ahˇ, Aˬloˬ-euˬ gawˬ yoeˬ neh myoꞈ ahˇ jiˇ nehˬ-euˬ meh.

¹³ Ehˇ kʼawꞈ, Sahˬpaˬ Miˬyehˇ neh ehˇ taˬ-euˬ loꞈ-ehˇ, sahˬ paˬ kʼoeˇ gʼaˬ nui ma gʼahˇ-awˇ, Moˇseˬ hawˇ-eu Aˬloˬ-euˬ ehˇ dawˬ-ahˇ maˬ naˇ haˬ ni jawˇ-euˬ meh.

Iˇjiˇtuˆ miˇ kʼahˬ kʼoeˇ taˆ shaˬ zahˬ guˆ gaˆ keuˆ le-euˬ

¹⁴ Kʼoeˇ naˇ, Moˇseˬ-ahˇ Sahˬpaˬ Miˬyehˇ ehˇ nehˬ-eu, “Sahˬ paˬ heu gʼaˬ nui ma gʼahˇ dui dui-awˇ, Iˇsaˬleˬlaˆ tsawˇ haˬ deuˬ-ahˇ maˬ bi doˆ-iˇ ni jawˇ-eu meh.

¹⁵ Kʼoeˇ miˇ neh, uˬ shawˬ paw Niˬlaˇ lawˇ baˬ-ahˇ aˬ yawꞈ oe ka ngeh, aˬ yawꞈ-ahˇ tahˬ puˬ-iˇ-awˬ. Aˇ lawˇ pyeuꞈ-eu gawˬ yoeˬ kʼoeˇ hmˬ yuˇ-awˇ, lawˇ baˬ lawˇ deh-ahˇ, aˬ yawꞈ-ahˇ loꞈ-iˇ-awˬ.

¹⁶ Kʼoeˇ naˇ, sahˬ paˬ kʼoeˇ gʼaˬ-ahˇ heu loꞈ-ehˇ ehˇ nehˬ-awˬ. ‘Heˬbyehˇ tsawˇ haˬ-euˬ Miˬyehˇ pyeuꞈ-eu Sahˬpaˬ Miˬyehˇ ngaˬ-ahˇ kʼehˇ gʼeh leꞈ-awˇ, bawˇ tsahˬ bawˇ dahˇ-ahˇ aˬ yawꞈ-ahˇ uˬ duˬ bi tahˬ laˇ-eu gʼaˇ duˬ, aˬ yawꞈ-euˬ tsawˇ haˬ deuˬ-ahˇ pyehˬ nehˬ-awˬ lehˇ bi ehˇ le-euˬ meh. Ehˇ kʼawꞈ, iˬ nah keuˆ ni nawˇ maˬ naˇ haˬ ni jawˇ-eu meh.

¹⁷ Sahˬ paˬ-oˇ, nymˬ-mˇ poˆ jawˇ-aˬ, aˬ yawꞈ mˇ-eu lehˇ lehˬ hmˬ taˬ-euˬ jeˬ baˬ da neh, aˬ yawꞈ aˬ suˇ gʼaˬ pyeuꞈ-eu nawˇ ya siˬ tehꞈ-a lehˇ Sahˬpaˬ Miˬyehˇ ehˇ-eu meh. Haw yawˬ. Ngaˇ tuˆ tehˬ luꞈ-eu gawˬ yoeˬ heu hmˬ neh Niˬlaˇ lawˇ baˬ iˇ cuꞈ-ahˇ ngaˇ juiꞈ ngeh, iˇ cuꞈ kʼoeˇ shiˬ pyeuꞈ jiˇ tehꞈ-a’ lehˇ ehˇ nehˬ-awˬ.

¹⁸ Niˬlaˇ lawˇ baˬ laꞈ kʼoeˇ uˇ-eu ngaˬ shaˬ deuˬ shiˇ-awˇ, iˇ cuꞈ kʼoeˇ yaw buꞈ behꞈ laꞈ-eu miˇ neh, Iˇjiˇtuˆ tsawˇ haˬ deuˬ iˇ cuꞈ kʼoeˇ maˬ dawˇ nahˇ-ehˇ ya shaˬ tehꞈ-a.”

¹⁹ Moˇseˬ-ahˇ Sahˬpaˬ Miˬyehˇ ehˇ nehˬ-eu, “Gawˬ yoeˬ kʼoeˇ hmˬ yuˇ-awˇ, Iˇjiˇtuˆ miˇ kʼahˬ laꞈ kʼoeˇ kʼaˇ jaˆ-eu iˇ cuꞈ lawˇ baˬ deuˬ, iˇ cuꞈ uiˇ kʼehˬ deuˬ hawˇ-eu iˇ cuꞈ lah deuˬ kʼoeˇ taˆ cawˬ ja-awˬ lehˇ Aˬloˬ-ahˇ ehˇ nehˬ-awˬ. Iˇ cuꞈ kʼoeˇ deuˬ shiˬ pyeuꞈ jiˇ-awˇ, miˇ kʼahˬ kʼahˬ lah ni shiˬ tehꞈ-ehˇ jaˆ tehꞈ-a. Daˇ kawˬ teˇ byaꞈ neh taꞈ taˬ-euˬ shehˇ byehˇ deuˬ hawˇ-eu, kʼaˬ lo neh jahˇ taˬ-euˬ mui deuˇ oeˬ lahˬ deuˬ laꞈ kʼoeˇ kʼaˇ dahˬ-eu iˇ cuꞈ dawˬ tawˆ luꞈ-ahˇ keuˆ ni, shiˬ pyeuꞈ jiˇ tehꞈ-a” lehˇ ehˇ nehˬ-euˬ meh.

²⁰ Sahˬpaˬ Miˬyehˇ neh dawˬ biꞈ-euˬ loꞈ-ehˇ, Moˇseˬ hawˇ-eu Aˬloˬ mˇ-euˬ meh. Sahˬ paˬ hawˇ-eu aˬ yawꞈ-euˬ gaˇ mˇ-eu yaw huiˬ yaw mahˇ deuˬ-euˬ mehˬ shi, Aˬloˬ gawˬ yoeˬ baꞈ diˇ-awˇ, Niˬlaˇ lawˇ baˬ iˇ cuꞈ-ahˇ juiꞈ ngeh, lawˇ baˬ kʼoeˇ gawˆ-euˬ iˇ cuꞈ dawˬ tawˆ luꞈ shiˬ pyeuꞈ jiˇ-euˬ meh.

²¹ Lawˇ baˬ kʼoeˇ gawˆ laꞈ kʼoeˇ uˇ-eu ngaˬ shaˬ deuˬ shiˇ-awˇ, iˇ cuꞈ behꞈ laꞈ dui dui-eu miˇ neh, Iˇjiˇtuˆ tsawˇ haˬ deuˬ lawˇ baˬ kʼoeˇ gawˆ-euˬ iˇ cuꞈ maˬ dawˇ nya-a.

²² Kʼoeˇ ngeh, sahˬ paˬ kʼoeˇ gʼaˬ-euˬ mah loˬ nya-eu tsawˇ haˬ deuˬ kʼawꞈ, aˬ yawꞈ maꞈ-euˬ mah loˬ tsawˇ gahˇ-ahˇ gʼoe-awˇ, Aˬloˬ neh mˇ-euˬ jeˬ mˇ mehˬ nehˬ nya-eu miˇ neh, sahˬ paˬ kʼoeˇ gʼaˬ nui ma maˬ paˇ laˇ-ehˇ, dzeuˇ laˇ ngeh loꞈ-ehˇ nui ma gʼahˇ-eu meh. Sahˬpaˬ Miˬyehˇ neh ehˇ taˬ-euˬ loꞈ-ehˇ, Moˇseˬ hawˇ-eu Aˬ loˬ-euˬ ehˇ dawˬ-ahˇ, sahˬ paˬ kʼoeˇ gʼaˬ maˬ naˇ haˬ ni jawˇ-eu meh.

²³ Aˬ yawꞈ-euˬ nymˇ nymˇ ma-ahˇ aˬ yawꞈ gʼoꞈ leˇ-awˇ, aˬ yawꞈ-ahˇ tiˬ jeˬ-iˬ maˬ deuˬ leˇ ni, tiˬ jeˬ-iˬ maˬ gʼeh-eu loꞈ-ehˇ jawˇ leˇ-euˬ meh.

²⁴ Lawˇ baˬ kʼoeˇ gawˆ-euˬ iˇ cuꞈ maˬ dawˇ nya-eu miˇ neh, Iˇjiˇtuˆ tsawˇ haˬ dawˬ tawˆ luꞈ, lawˇ baˬ kʼoeˇ gawˆ lawˇ deh caw caw-ehˇ, iˇ cuꞈ kʼawꞈ dawˇ-eu gʼaˇ duˬ lah duˬ duˬ-euˬ meh.

²⁵ Sahˬpaˬ Miˬyehˇ neh lawˇ baˬ kʼoeˇ gawˆ-ahˇ kʼoeˇ loꞈ-ehˇ bi pyeuꞈ laˇ-euˬ shiꞈ nah byah laˇ-euˬ meh.