Doˆ-iˇ 5 - Akha

Moˇseˬ hawˇ-eu Aˬloˬ sahˬ paˬ-ahˇ tahˬ puˬ-iˇ-euˬ

¹ Kʼoeˇ naˇ, Moˇseˬ hawˇ-eu Aˬloˬ aˬ nyaꞈ Iˇjiˇtuˆ sahˬ paˬ jawˇ gaˇ iˇ-awˇ, heu loꞈ-ehˇ ehˇ nehˬ-euˬ meh. “ ‘Bawˇ tsahˬ bawˇ dahˇ laꞈ kʼoeˇ iˇ-awˇ, ngaˬ-ahˇ taˬ huiˬ taˬ mahˇ-eu bawˬ-iˬ jahˇ-eu gʼaˇ duˬ, ngaˬ-euˬ tsawˇ haˬ deuˬ-ahˇ pyehˬ nehˬ-awˬ’ lehˇ, Iˇsaˬleˬlaˆ tsawˇ haˬ-euˬ Sahˬpaˬ Miˬyehˇ nawˬ-ahˇ ehˇ-eu meh.”

² Ehˇ kʼawꞈ, sahˬ paˬ kʼoeˇ gʼaˬ ehˇ-eu, “Aˬ yawꞈ-euˬ ehˇ dawˬ-ahˇ ngaˇ naˇ haˬ-awˇ, Iˇsaˬleˬlaˆ tsawˇ haˬ-ahˇ pyehˬ nehˬ paˬ-ehˇ, Sahˬpaˬ Miˬyehˇ ehˇ-eu aˬ suˇ gʼaˬ-a. Sahˬpaˬ Miˬyehˇ-ahˇ ngaˇ maˬ siˬ. Iˇsaˬleˬlaˆ tsawˇ haˬ-ahˇ kʼawꞈ ngaˇ maˬ pyehˬ nehˬ.”

³ Kʼoeˇ ngeh, Moˇseˬ hawˇ-eu Aˬloˬ sahˬ paˬ kʼoeˇ gʼaˬ-ahˇ ehˇ nehˬ-eu, “Heˬbyehˇ tsawˇ haˬ-euˬ Miˬyehˇ nga maꞈ-ahˇ pah mehˬ le-euˬ meh. Bawˇ tsahˬ bawˇ dahˇ-ahˇ iˇ-awˇ, nga maꞈ-euˬ Sahˬpaˬ Miˬyehˇ-ahˇ lawˇ-eu shehˇ-eu gʼaˇ duˬ, nga maꞈ-ahˇ aˇ yamˬ smˬ nah biꞈ nehˬ laꞈ-awˬ. Nga maꞈ kʼoeˇ loꞈ-ehˇ maˬ mˇ naˇ, naˇ-eu gawˇ-eu jeˬ baˬ da neh maˬ ngeuˇ naˇ, miˬ siˬ miˬ kaˆ baˬ da neh nga maꞈ ya shiˇ jiˇ ni aˬ yawꞈ jahˇ tehꞈ-a.”

⁴ Ehˇ kʼawꞈ, sahˬ paˬ kʼoeˇ gʼaˬ aˬ yawꞈ nyaꞈ-ahˇ ehˇ-eu, “Aˬ jeˬ miˇ neh tsawˇ haˬ heu deuˬ-ahˇ gaˇ maˬ bi mˇ ni, naw nyaꞈ sheuˬ-awˇ iˇ-eu gʼeh te. Zaˬ kʼaˆ kʼoeˇ deuˬ-ahˇ gaˇ paˇ bi mˇ-iˇ-awˬ.

⁵ Naw maꞈ tsawˇ haˬ Iˇjiˇtuˆ tsawˇ haˬ myaˆ maˬ tseˇ myaˬ laˇ-euˬ miˇ neh, gaˇ maˬ mˇ ni byehˇ-eu gʼeh te loˇ.”

⁶ Kʼoeˇ ngeh nah laꞈ kʼoeˇ, zaˬ kʼaˆ-ahˇ uˆ lahˇ-eu yaw huiˬ deuˬ-ahˇ maˬ ehˇ, zaˬ kʼaˆ deuˬ gaˇ mˇ gaˇ haw-eu Iˇsaˬleˬlaˆ tsawˇ haˬ deuˬ-ahˇ maˬ ehˇ, sahˬ paˬ heu loꞈ-ehˇ dawˬ biꞈ-euˬ meh.

⁷ “Aˬ kaˇ naˇ, tsawˇ haˬ kʼoeˇ deuˬ-ahˇ tsaˬ byaˆ puiˆ-eu gʼaˇ duˬ gʼo yoeˬ taˬ paˇ biꞈ. Aˬ yawꞈ maꞈ yawˬ haˇ yawˬ ha gʼo yoeˬ bi poˆ uiˬ laˬ-iˇ law.

⁸ Ehˇ kʼawꞈ, tsaˬ byaˆ tehˆ-eu paw tiˬ siˬ tehꞈ-ehˇ kʼawꞈ maˬ bi teˬ-iˇ ni, dzeuˇ laˇ ngeh aˬ yawꞈ maꞈ kʼaˇ tehˆ-euˬ myaˆ ni bi tehˆ doˆ-awˬ. Aˬ yawꞈ maꞈ-euˬ kʼaˆ behˆ pyaˇ-awˇ gaˇ maˬ mˇ loꞈ-eu miˇ neh, aˬ yawꞈ maꞈ-euˬ Miˬyehˇ-ahˇ lawˇ-eu shehˇ-eu gʼaˇ duˬ bi iˇ laꞈ lehˇ, ngaˬ-ahˇ shaˇ luꞈ-eu meh.

⁹ Aˬ yawꞈ maꞈ-ahˇ mehˇ shuiˇ shuiˇ-eu tsawˇ haˬ deuˬ-euˬ ehˇ dawˬ-ahˇ naˇ haˬ-eu maˬ dah gaˇ keuˆ ni gaˇ bi mˇ dui dui-awˬ.”

¹⁰ Zaˬ kʼaˆ-ahˇ uˆ lahˇ-eu deuˬ hawˇ-eu, zaˬ kʼaˆ deuˬ gaˇ mˇ gaˇ haw-eu Iˇsaˬleˬlaˆ tsawˇ haˬ deuˬ doˆ-iˇ-awˇ, Iˇsaˬleˬlaˆ tsawˇ haˬ deuˬ-ahˇ heu loꞈ-ehˇ ehˇ nehˬ-iˇ-euˬ meh. “Naw maꞈ-ahˇ gʼo yoeˬ maˬ paˇ biꞈ ma lehˇ sahˬ paˬ ehˇ-eu meh.

¹¹ Yawˬ haˇ yawˬ ha gʼo yoeˬ kʼaˇ jaˆ gaˇ iˇ-awˇ poˆ uiˬ laˬ-iˇ-awˬ. Ehˇ kʼawꞈ, tsaˬ byaˆ tehˆ-eu paw, dzeuˇ laˇ ngeh naw maꞈ kʼaˇ tehˆ doˆ-euˬ loꞈ-ehˇ, maˬ bi teˬ-iˇ ni ya tehˆ doˆ meh lehˇ sahˬ paˬ ehˇ-eu meh.”

¹² Kʼoeˇ ngeh, tsawˇ haˬ kʼoeˇ deuˬ, Iˇjiˇtuˆ miˇ kʼahˬ doe ni iˇ-awˇ gʼo yoeˬ poˆ uiˬ laˬ-iˇ-euˬ meh.

¹³ Dzeuˇ laˇ ngeh aˬ yawꞈ maꞈ-ahˇ gʼo yoeˬ biꞈ-awˇ, tsaˬ byaˆ bi tehˆ ngeh kʼaˇ tehˆ doˆ-euˬ myaˆ ni, nymˬ-mˇ kʼawꞈ tehˆ doˆ nya-eu gʼaˇ duˬ, zaˬ kʼaˆ-ahˇ uˆ lahˇ-eu tsawˇ haˬ kʼoeˇ deuˬ, aˬ yawꞈ maꞈ-ahˇ gaˇ yaw kʼaˆ-ehˇ bi mˇ-euˬ meh.

¹⁴ Zaˬ kʼaˆ-ahˇ uˆ lahˇ-eu tsawˇ haˬ kʼoeˇ deuˬ, zaˬ kʼaˆ deuˬ gaˇ mˇ gaˇ bi haw-euˬ Iˇsaˬleˬlaˆ tsawˇ haˬ deuˬ-ahˇ, “Dzeuˇ laˇ ngeh naw maꞈ tsaˬ byaˆ tehˆ doˆ-euˬ myaˆ ni nymˬ-mˇ aˬ jeˬ miˇ neh maˬ tehˆ doˆ nya ta” lehˇ ehˇ-awˇ diˬ-euˬ meh.

¹⁵ Kʼoeˇ ngeh, gaˇ mˇ gaˇ haw-eu tsawˇ haˬ kʼoeˇ deuˬ sahˬ paˬ jawˇ gaˇ iˇ-awˇ ehˇ-eu, “Sahˬ paˬ-oˇ, aˬ jeˬ miˇ neh nga maꞈ-ahˇ heu loꞈ-ehˇ jahˇ nehˬ laꞈ te.

¹⁶ Nga maꞈ-ahˇ gʼo yoeˬ maˬ biꞈ laꞈ ni tsaˬ byaˆ bi tehˆ laꞈ-euˬ uˬ taꞈ, aˬ cawˬ diˬ gaˇ nga maꞈ ya daˬ luꞈ-eu ma. Gaˇ kawˆ heu nawˬ-euˬ aˬ laꞈ laꞈ kʼoeˇ jaˆ-eu meh.”

¹⁷ Ehˇ kʼawꞈ, aˬ yawꞈ maꞈ-ahˇ sahˬ paˬ ehˇ nehˬ-eu, “Naw maꞈ yaw doeˇ doeˇ-awˇ, gaˇ maˬ mˇ mawꞈ-eu miˇ neh, naw maꞈ-euˬ Sahˬpaˬ Miˬyehˇ-ahˇ lawˇ-eu shehˇ-eu gʼaˇ duˬ bi iˇ laꞈ lehˇ ngaˬ-ahˇ shaˇ-eu meh.

¹⁸ Naw maꞈ-ahˇ gʼo yoeˬ maˬ paˇ biꞈ ma. Ehˇ kʼawꞈ, dzeuˇ laˇ ngeh naw maꞈ tsaˬ byaˆ kʼaˇ tehˆ doˆ-euˬ loꞈ-ehˇ, nymˬ-mˇ kʼawꞈ maˬ bi teˬ-iˇ ni ya tehˆ doˆ meh.”

¹⁹ Dzeuˇ laˇ ngeh aˬ yawꞈ maꞈ tsaˬ byaˆ kʼaˇ tehˆ doˆ-euˬ myaˆ ni, nymˬ-mˇ kʼawꞈ aˬ yawꞈ nah yawꞈ ya tehˆ doˆ meh lehˇ sahˬ paˬ ehˇ ngeh, shaˬ dui dui-eu jeˬ aˬ yawꞈ maꞈ kʼoeˇ taˆ keuˆ le-euˬ gaˇ kawˆ, gaˇ mˇ gaˇ haw-eu Iˇsaˬleˬlaˆ tsawˇ haˬ kʼoeˇ deuˬ noeˬ siˬ-euˬ meh.

²⁰ Aˬ yawꞈ maꞈ doˆ-iˇ ngeh, Moˇseˬ hawˇ-eu Aˬloˬ aˬ nyaꞈ aˬ yawꞈ maꞈ-ahˇ loꞈ luꞈ gaˇ ya mawˇ-euˬ meh.

²¹ Moˇseˬ hawˇ-eu Aˬloˬ-ahˇ aˬ yawꞈ maꞈ ehˇ nehˬ-eu, “Naw nyaꞈ neh mˇ-euˬ gaˇ-ahˇ, Sahˬpaˬ Miˬyehˇ mawˇ luꞈ meh. Iˇjiˇtuˆ sahˬ paˬ hawˇ-eu, aˬ yawꞈ-euˬ gaˇ mˇ-eu yaw huiˬ yaw mahˇ deuˬ nga maꞈ-ahˇ bye ni naw nyaꞈ jahˇ-euˬ miˇ neh, Sahˬpaˬ Miˬyehˇ naw nyaꞈ-ahˇ kʼehˬ nehˬ tehꞈ-a. Naw nyaꞈ-aˬ, nga maꞈ-ahˇ bi sehꞈ-eu lehˇ, Iˇjiˇtuˆ tsawˇ haˬ-euˬ aˬ laꞈ-ahˇ mi cehˇ nmꞈ ahˇ nehˬ gaˇ duˇ meh.”

Sahˬpaˬ Miˬyehˇ-ahˇ Moˇseˬ teh ngehˬ-euˬ

²² Kʼoeˇ naˇ, Sahˬpaˬ Miˬyehˇ jawˇ gaˇ Moˇseˬ gʼoꞈ leˇ-awˇ, heu loꞈ-ehˇ ehˇ nehˬ-euˬ meh. “Sahˬpaˬ Miˬyehˇ-oˇ, aˬ jeˬ miˇ neh nawˬ-euˬ tsawˇ haˬ deuˬ-ahˇ bi shaˬ bi zahˬ luꞈ te. Aˬ jeˬ miˇ neh nawˇ ngaˬ-ahˇ heu gaˇ bi oe teˬ.

²³ Iˇjiˇtuˆ sahˬ paˬ jawˇ gaˇ ngaˇ iˇ-awˇ, dawˬ ngehˬ cawˬ-euˬ ngeh nah neh, Iˇsaˬleˬlaˆ tsawˇ haˬ-ahˇ aˬ yawꞈ kʼehˬ nehˬ kʼaˆ nehˬ luꞈ meh. Ehˇ kʼawꞈ, aˬ yawꞈ maꞈ-ahˇ ngehˬ maˬ gʼeh ni nawˇ aˬ joˆ-ehˇ jawˇ tehˬ coeˇ-eu nya.”