Doˆ-iˇ 40 - Akha

Sahˬpaˬ Miˬyehˇ jawˇ-eu Sehˬ gʼawˆ tsoˆ-awˇ a nehˬ-euˬ

¹ Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

² “Ba la yaw beh siˬ yaw beh nah-ahˇ, Sahˬpaˬ Miˬyehˇ jawˇ-eu Sehˬ gʼawˆ tsoˆ-awˬ.

³ Zahˇ dawˬ kʼoꞈ dawˬ tseˇ dawˬ dawˆ ahˇ taˬ-euˬ Dawˬ ma saˇ jaˇ Bahˬ keuˆ kʼoeˇ, kʼoeˇ gaˇ bi jaˆ-awˇ, saˬ paˇ lawˆ kaˬ taw-awˬ.

⁴ Hawˬ jeh ciˬ ahˇ-awˇ, kʼoeˇ gaˇ taꞈ leˇ-eu keu ka deuˬ ciˬ daˆ taˬ-awˬ. Tsiˇ kʼmˬ doꞈ taˬ duˬ kʼawꞈ yuˇ ahˇ-awˇ, tsiˇ kʼmˬ deuˬ ciˬ daˆ taˬ-awˬ.

⁵ Shuiˇ neh jahˇ taˬ-euˬ yaw saw jeˬ doꞈ damˬ-eu lawˇ duˬ kʼoeˇ, dawˬ ma saˇ jaˇ bahˬ keuˆ mehˬ shi baꞈ taˬ-awˇ, sehˬ gʼawˆ gʼoˆ kʼehˬ-ahˇ saˬ paˇ taw-awˬ.

⁶ Miˬ dzaˬ dzah puiˆ-awˇ lawˇ-eu jeˬ lawˇ-eu lawˇ duˬ kʼoeˇ hmˬ, sehˬ gʼawˆ mehˬ shi baꞈ taˬ-awˬ.

⁷ Aˬ kuiˇ aˬ laꞈ dzuiꞈ shawˇ-eu sehˇ byehˇ-ahˇ, Sehˬ gʼawˆ hawˇ-eu lawˇ duˬ yaw kaˬ-ahˇ bi jaˆ-awˇ, iˇ cuꞈ kʼawꞈ ahˇ taˬ-awˬ.

⁸ Sehˬ gʼawˆ jawˬ jawˬ-ehˇ yaˇ kmˇ mˇ lahˇ-awˇ, yaˇ kmˇ gʼoˆ kʼehˬ-ahˇ saˬ paˇ taw-awˬ.

⁹ “Sehˬ gʼawˆ hawˇ-eu kʼoeˇ gaˇ kʼaˇ taꞈ leˇ-eu keu ka deuˬ bi muiˬ bi shawˇ laˇ-eu gʼaˇ duˬ, muiˬ-eu shawˇ-eu tsiˇ lehꞈ-awˇ, Sahˬpaˬ Miˬyehˇ-ahˇ a nehˬ-awˬ.

¹⁰ Kʼoeˇ loꞈ-ehˇ jahˇ gʼaˬ naˇ, lawˇ duˬ hawˇ-eu lawˇ duˬ-ahˇ taꞈ leˇ-eu keu ka dawˬ tawˆ luꞈ kʼawꞈ, maˇ maˇ ni bi muiˬ bi shawˇ laˇ-eu gʼaˇ duˬ, tsiˇ lehꞈ-awˇ, Sahˬpaˬ Miˬyehˇ-ahˇ a nehˬ-awˬ.

¹¹ Sehˇ byehˇ hawˇ-eu sehˇ byehˇ-euˬ aˬ kuiˇ kʼawꞈ, kʼoeˇ loꞈ-ehˇ jahˇ-awˇ a nehˬ-awˬ.

¹² “Aˬloˬ hawˇ-eu aˬ yawꞈ-euˬ aˬ li deuˬ-ahˇ Sehˬ gʼawˆ gʼoˆ kʼehˬ-ahˇ sheuˬ laꞈ-awˇ, iˇ cuꞈ dzuiꞈ shawˇ-eu zahˇ jahˇ-awˬ lehˇ ehˇ nehˬ-awˬ.

¹³ Aˬloˬ-ahˇ piˇ ma-euˬ dm gʼaˬ dm lmˇ bi dm-awˇ, tsiˇ lehꞈ nehˬ-awˬ. Ngaˬ-euˬ gaˇ mˇ-eu piˇ ma geuꞈ-eu gʼaˇ duˬ, kʼoeˇ loꞈ-ehˇ jahˇ-awˇ, aˬ yawꞈ-euˬ gʼawˇ mawˇ ngaˬ-ahˇ a nehˬ laꞈ-awˬ.

¹⁴ Aˬ yawꞈ-euˬ aˬ li deuˬ sheuˬ laꞈ-awˇ, pehˇ kʼahˬ bi dm-awˬ.

¹⁵ Aˬ yawꞈ maꞈ-euˬ aˬ da-ahˇ tsiˇ lehꞈ nehˬ-euˬ loꞈ-ehˇ, aˬ yawꞈ maꞈ mehˇ nmˇ-ahˇ kʼawꞈ, ngaˬ-euˬ gaˇ mˇ-eu piˇ ma bi geuꞈ-eu gʼaˇ duˬ, tsiˇ lehꞈ nehˬ-awˬ. Aˬ yawꞈ maꞈ-ahˇ kʼoeˇ loꞈ-ehˇ tsiˇ lehꞈ nehˬ-euˬ baˬ da neh, mˬ maˬ maˬ byaˆ zaˇ ziˇ aˬ yawꞈ maꞈ piˇ ma ya geuꞈ tehꞈ-a.”

¹⁶ Sahˬpaˬ Miˬyehˇ neh dawˬ kʼaˇ biꞈ taˬ-euˬ loꞈ-ehˇ, yawˬ jeˬ na luꞈ-ahˇ Moˇseˬ mˇ-euˬ meh.

¹⁷ Iˇjiˇtuˆ miˇ kʼahˬ-ahˇ neh aˬ yawꞈ maꞈ doˆ laˇ-euˬ nyiˬ kʼoꞈ tiˬ kʼoꞈ ba la yaw beh siˬ, yaw beh nah-ahˇ, Sahˬpaˬ Miˬyehˇ jawˇ-eu sehˬ gʼawˆ tsoˆ-euˬ meh.

¹⁸ Moˇseˬ-aˬ, zeuˇ dahˇ dahˇ-awˇ, teˇ byaꞈ byoe du tsahˬ-euˬ meh. Kʼoeˇ naˇ, laꞈ law diˬ-awˇ, kʼawˇ zeuˇ ka tuˇ-euˬ meh.

¹⁹ Sahˬpaˬ Miˬyehˇ neh dawˬ biꞈ taˬ-eu loꞈ-ehˇ, sehˬ gʼawˆ-ahˇ nyiˬ tiˆ joe kaˬ taˬ-euˬ meh.

²⁰ Kʼoeˇ naˇ, kʼaˬ lo teˇ byaꞈ nyiˬ byaꞈ yuˇ-awˇ, Dawˬ ma saˇ jaˇ Bahˬ keuˆ laꞈ kʼoeˇ dawˆ ahˇ taˬ-euˬ meh. Bahˬ keuˆ-ahˇ tsoꞈ-eu laꞈ duꞈ-ahˇ baꞈ kawˬ cawˬ ahˇ-awˇ, bahˬ keuˆ kʼmˬ pymˬ pymˬ tehˬ-euˬ meh.

²¹ Kʼoeˇ naˇ, Bahˬ keuˆ-ahˇ Sehˬ gʼawˆ laꞈ kʼoeˇ baꞈ uˇ-awˇ, saˬ paˇ lawˆ kaˬ taw-euˬ meh. Sahˬpaˬ Miˬyehˇ neh dawˬ kʼaˇ biꞈ taˬ-eu loꞈ-ehˇ jahˇ-awˇ, dawˬ ma saˇ jaˇ bahˬ keuˆ-ahˇ taw lahˇ taˬ-euˬ meh.

²² Sehˬ gʼawˆ laꞈ kʼoeˇ taw paˆ taˬ-euˬ saˬ paˇ lawˆ kaˬ laꞈ nyiˇ paw, laꞈ taˆ pyawˬ-ahˇ, Moˇseˬ hawˬ jeh ciˬ taˬ-euˬ meh.

²³ Kʼoeˇ naˇ, Sahˬpaˬ Miˬyehˇ neh dawˬ biꞈ taˬ-euˬ loꞈ-ehˇ, Sahˬpaˬ Miˬyehˇ-ahˇ lawˇ nehˬ-euˬ kaˬ muˇ-ahˇ, hawˬ jeh kʼoeˇ taˆ ciˬ daˆ-euˬ meh.

²⁴ Sehˬ gʼawˆ laꞈ kʼoeˇ, laꞈ taˆ paw pyawˬ-ahˇ bi jaˆ-euˬ hawˬ jeh nehˬ-ehˇ toˆ dawˇ-ehˇ, laꞈ oˆ paw pyawˬ-ahˇ tsiˇ kʼmˬ doꞈ taˬ duˬ bi jaˆ-euˬ meh.

²⁵ Kʼoeˇ naˇ, Sahˬpaˬ Miˬyehˇ neh dawˬ biꞈ taˬ-euˬ loꞈ-ehˇ, Sahˬpaˬ Miˬyehˇ-euˬ mehˬ shi, aˬ yawꞈ tsiˇ kʼmˬ doꞈ-euˬ meh.

²⁶ Sehˬ gʼawˆ laꞈ kʼoeˇ, lawˆ kaˬ taw paˆ taˬ-euˬ saˬ paˇ-euˬ mehˬ shi, shuiˇ neh jahˇ taˬ-euˬ lawˇ duˬ bi jaˆ-euˬ meh.

²⁷ Kʼoeˇ naˇ, Sahˬpaˬ Miˬyehˇ neh dawˬ biꞈ taˬ-euˬ loꞈ-ehˇ, yaw saw jeˬ doꞈ damˬ-euˬ meh.

²⁸ Sehˬ gʼawˆ gʼoˆ kʼehˬ-ahˇ, saˬ paˇ sheu taw-euˬ meh.

²⁹ Kʼoeˇ naˇ, miˬ dzaˬ dzah puiˆ-awˇ lawˇ-eu jeˬ lawˇ-eu lawˇ duˬ kʼoeˇ, sehˬ gʼawˆ gʼoˆ kʼehˬ-ahˇ taw taˬ-euˬ saˬ paˇ-euˬ mehˬ shi bi jaˆ-euˬ meh. Sahˬpaˬ Miˬyehˇ neh dawˬ biꞈ taˬ-euˬ loꞈ-ehˇ, miˬ dzaˬ dzah puiˆ-awˇ lawˇ-eu jeˬ hawˇ-eu, dzaˬ la gʼo cehˇ lawˇ-eu jeˬ, lawˇ duˬ kʼoeˇ hmˬ kʼoeˇ taˆ lawˇ-euˬ meh.

³⁰ Sehˬ gʼawˆ hawˇ-eu lawˇ duˬ kʼoeˇ hmˬ-euˬ yaw kaˬ-ahˇ, aˬ kuiˇ aˬ laꞈ dzuiꞈ shawˇ-eu sehˇ byehˇ bi jaˆ-euˬ meh.

³¹ Moˇseˬ, Aˬloˬ hawˇ-eu, Aˬloˬ-euˬ aˬ li deuˬ, kʼoeˇ gaˇ aˬ kuiˇ aˬ laꞈ dzuiꞈ shawˇ-euˬ meh.

³² Sahˬpaˬ Miˬyehˇ neh dawˬ biꞈ taˬ-euˬ loꞈ-ehˇ, Sehˬ gʼawˆ laꞈ kʼoeˇ aˬ yawꞈ maꞈ kʼaˇ uˇ leˇ ngeh, aˬ kuiˇ aˬ laꞈ dzuiꞈ shawˇ-euˬ meh.

³³ Sehˬ gʼawˆ hawˇ-eu lawˇ duˬ-euˬ jawˬ jawˬ-ehˇ Moˇseˬ yaˇ kmˇ mˇ jawˬ-awˇ, yaˇ kmˇ gʼoˆ kʼehˬ-ahˇ saˬ paˇ sheu taw taˬ-euˬ meh. Kʼoeˇ loꞈ-ehˇ jahˇ-awˇ, Moˇseˬ gaˇ mˇ jiˇ-euˬ meh.

Sahˬpaˬ Miˬyehˇ jawˇ-eu Sehˬ gʼawˆ kʼoeˇ taˆ jaˆ-eu mˬ dmˇ

³⁴ Kʼoeˇ naˇ, Sehˬ gʼawˆ-ahˇ mˬ dmˇ dehˬ kaˬ le-awˇ, Sahˬpaˬ Miˬyehˇ zaꞈ uˇ le-euˬ miˇ neh, aˬ yawꞈ-euˬ yaw shehꞈ kʼahˬ sehˇ Sehˬ gʼawˆ tiˬ byah ni jaˆ luꞈ-eu meh.

³⁵ Kʼoeˇ miˇ neh, Sehˬ gʼawˆ laꞈ kʼoeˇ Moˇseˬ maˬ uˇ leˇ nya-a.

³⁶ Mˬ dmˇ kʼoeˇ Sehˬ gʼawˆ-ahˇ gʼawˬ-iˇ ngeh hawˇ-eu, Iˇsaˬleˬlaˆ tsawˇ haˬ deuˬ mehˬ hu paw gaˇ ma doˆ-iˇ-euˬ meh.

³⁷ Mˬ dmˇ kʼoeˇ Sehˬ gʼawˆ kʼoeˇ taˆ kʼaˇ jaˆ kʼoeˇ keuˆ ni, aˬ yawꞈ maꞈ maˬ luˆ-iˇ-a.

³⁸ Aˬ yawꞈ maꞈ doe doe-ehˇ jawˇ jawˇ-ehˇ cah-euˬ aˇ nah aˇ yamˬ laꞈ kʼoeˇ, Sahˬpaˬ Miˬyehˇ jawˇ-eu saˇ kiˇ pyeuꞈ-eu mˬ dmˇ kʼoeˇ, nah gʼahˇ paw Sehˬ gʼawˆ kʼoeˇ taˆ jaˆ-awˇ, uˬ ciꞈ paw mˬ dmˇ laꞈ kʼoeˇ miˬ dzaˬ doꞈ luꞈ-eu meh.