Doˆ-iˇ 39 - Akha

Piˇ ma deuˬ-euˬ dm gʼaˬ dm lmˇ guꞈ-euˬ

¹ Piˇ ma deuˬ muiˬ-eu shawˇ-eu jawˇ duˬ-ahˇ uˇ leˇ ngeh dm-eu gʼaˇ duˬ, nyoeˇ leuˬ leuˬ-eu, neˇ naˆ naˆ-eu hawˇ-eu, neˇ tseuˆ ni gʼeh-eu saˬ kahˇ deuˬ zaꞈ-awˇ, haw muiˬ dui dui-eu dm gʼaˬ dm lmˇ deuˬ aˬ yawꞈ ma guꞈ-euˬ meh. Sahˬpaˬ miˬyehˇ Moˇseˬ-ahˇ dawˬ biꞈ taˬ-euˬ loꞈ-ehˇ, Aˬloˬ gʼaˇ duˬ aˬ yawꞈ maꞈ dm gʼaˬ dm lmˇ guꞈ-euˬ meh.

² Shawˇ jehˆ ni gʼeh-eu saˬ paˇ, nyoeˇ leuˬ leuˬ-eu, neˇ naˆ naˆ-eu hawˇ-eu, neˇ tseuˆ ni gʼeh-eu saˬ paˇ deuˬ hawˇ-eu, shuiˇ saˬ kahˇ yuˇ-awˇ, pehˇ kʼahˬ pehˇ nymˇ aˬ yawꞈ maꞈ guꞈ-euˬ meh.

³ Shawˇ jehˆ ni gʼeh-eu saˬ paˇ, nyoeˇ leuˬ leuˬ-eu, neˇ naˆ naˆ-eu hawˇ-eu, neˇ tseuˆ ni gʼeh-eu saˬ paˇ deuˬ kʼoeˇ taˆ aˇ boꞈ boꞈ-eu gʼaˇ duˬ, baˬ lehˇ ni gʼeh-eu shuiˇ shuiˇ yaˆ tehˆ-awˇ, shuiˇ shuiˇ caˆ tehˬ doˆ-euˬ meh.

⁴ Pehˇ kʼahˬ pehˇ nymˇ kʼoeˇ pehˇ tawꞈ gʼeu tawꞈ nya ni, baꞈ pu aˇ caˆ nyiˬ caˆ jahˇ-awˇ, baꞈ pu-euˬ kʼoeˇ paˆ maˇ paˆ-ehˇ guꞈ tsoꞈ-eu meh.

⁵ Sahˬpaˬ Miˬyehˇ neh Moˇseˬ-ahˇ dawˬ biꞈ taˬ-euˬ loꞈ-ehˇ, pehˇ kʼahˬ pehˇ nymˇ guꞈ-eu saˬ paˇ hawˇ-eu saˬ kahˇ kʼoeˇ jeˬ neh, joꞈ paꞈ tiꞈ kahˇ zaꞈ-awˇ, pehˇ kʼahˬ aˬ yawꞈ-ahˇ guꞈ tsoꞈ-euˬ meh.

⁶ Neˇ tseuˆ ni gʼeh-eu kʼaˬ lo sehˇ deuˬ lehˬ hmˬ-awˇ, shuiˇ iˇ puˬ laꞈ kʼoeˇ dawˆ ahˇ taˬ-euˬ meh. Kʼaˬ lo sehˇ kʼoeˇ deuˬ kʼoeˇ taˆ, Yaˬkoˆ-euˬ aˬ li tseˇ nyiꞈ li-euˬ tsawˇ myahˇ deuˬ yaw muiˬ paˬ-ehˇ toeˬ boꞈ taˬ-euˬ meh.

⁷ Sahˬpaˬ Miˬyehˇ neh Moˇseˬ-ahˇ dawˬ biꞈ taˬ-euˬ loꞈ-ehˇ, Iˇsaˬleˬlaˆ tsawˇ jeuˬ tseˇ nyiꞈ jeuˬ-euˬ dah zaˇ pyeuꞈ-eu gʼaˇ duˬ, kʼaˬ lo sehˇ ahˇ-eu shuiˇ iˇ puˬ kʼoeˇ, baꞈ pu aˇ caˆ-ahˇ tsoꞈ-euˬ meh.

Kʼahˬ-ahˇ dehˬ daˬ duˬ guꞈ-euˬ

⁸ Pehˇ kʼahˬ pehˇ nymˇ guꞈ-euˬ saˬ kahˇ hawˇ-eu saˬ paˇ kʼoeˇ jeˬ yuˇ-awˇ, kʼahˬ-ahˇ dehˬ daˬ duˬ aˬ yawꞈ maꞈ guꞈ-awˇ, pehˇ kʼahˬ pehˇ nymˇ-ahˇ boꞈ-euˬ loꞈ-ehˇ aˇ boꞈ boꞈ-euˬ meh.

⁹ Kˇoeˇ-aˬ, byaˆ dmˇ taˬ-awˇ, tiˬ toˇ oeˬ bawˬ byah-eu meh.

¹⁰ Kʼoeˇ-euˬ kʼoeˇ taˆ, aˇ poeˬ kʼaˆ-eu kʼaˬ lo sehˇ aˇ cehˆ oeˬ cehˆ aˬ yawꞈ maꞈ guꞈ tsoꞈ-euˬ meh. Yaw beh cehˆ-ahˇ, yaw neˇ neˇ-ehˇ gʼeh-eu kʼaˬ lo sehˇ, shuiˇ nyehˆ ni gʼeh-eu kʼaˬ lo sehˇ hawˇ-eu, neˇ shuiˇ shuiˇ-eu kʼaˬ lo sehˇ,

¹¹ nyiˬ cehˆ tiˬ cehˆ-ahˇ nyoeˇ naˆ naˆ-eu kʼaˬ lo sehˇ, nyoeˇ leuˬ leuˬ-eu kʼaˬ lo sehˇ hawˇ-eu gʼahˇ dui dui-eu kʼaˬ lo sehˇ,

¹² smˬ cehˆ tiˬ cehˆ-ahˇ neˇ leuˬ leuˬ-eu kʼaˬ lo sehˇ, pyuˇ deuˬ ni gʼeh-eu kʼaˬ lo sehˇ hawˇ-eu, neˇ naˆ naˆ-eu kʼaˬ lo sehˇ,

¹³ oeˬ cehˆ tiˬ cehˆ-ahˇ nyoeˇ shuiˇ shuiˇ-eu kʼaˬ lo sehˇ, neˇ tseuˆ ni gʼeh-eu kʼaˬ lo sehˇ hawˇ-eu, yaw shehꞈ gʼawˬ mya jeˬ ahˇ-eu kʼaˬ lo sehˇ heu deuˬ guꞈ tsoꞈ-euˬ meh. Kʼaˬ lo sehˇ kʼoeˇ deuˬ-ahˇ, shuiˇ iˇ puˬ laꞈ kʼoeˇ dawˆ ahˇ-euˬ meh.

¹⁴ Iˇsaˬleˬlaˆ tsawˇ jeuˬ tseˇ nyiꞈ jeuˬ-euˬ dahˬ zaˇ bi pyeuꞈ-eu gʼaˇ duˬ, kʼaˬ lo sehˇ aˬ yawꞈ siˬ yawꞈ kʼoeˇ taˆ, Yaˬkoˆ-euˬ aˬ li tiˬ gʼaˬ-euˬ tsawˇ myahˇ toeˬ boꞈ taˬ-euˬ meh.

¹⁵ Kʼahˬ-ahˇ dehˬ daˬ duˬ-ahˇ tsoꞈ-eu gʼaˇ duˬ, aˇ caˆ caˆ yeuꞈ-ahˇ duˇ-eu shuiˇ caˆ caˆ yeuꞈ aˬ yawꞈ maꞈ jahˇ-euˬ meh.

¹⁶ Shuiˇ iˇ puˬ nyiˬ siˬ hawˇ-eu, shuiˇ laꞈ behˬ nyiˬ behˬ yuˇ-awˇ, kʼahˬ-ahˇ dehˬ daˬ duˬ-euˬ laꞈ taˆ paw laꞈ coeˇ nyiˬ pyawˬ-ahˇ guꞈ tsoꞈ-euˬ meh.

¹⁷ Shuiˇ shuiˇ caˆ nyiˬ caˆ yuˇ-awˇ, shuiˇ laꞈ behˬ kʼoeˇ nyiˬ behˬ-ahˇ tsoꞈ-euˬ meh.

¹⁸ Shuiˇ shuiˇ caˆ kʼoeˇ nyiˬ caˆ-euˬ mehˬ dzaˬ yuˇ-awˇ, shuiˇ iˇ puˬ kʼoeˇ nyiˬ siˬ-ahˇ paˇ tsoꞈ-euˬ meh. Kʼoeˇ loꞈ-ehˇ jahˇ-awˇ, pehˇ kʼahˬ pehˇ nymˇ baꞈ pu aˇ caˆ-euˬ mehˬ shi bi tsoꞈ-euˬ meh.

¹⁹ Shuiˇ laꞈ behˬ nyiˬ hmˬ aˬ yawꞈ maꞈ paˇ jahˇ-awˇ, pehˇ kʼahˬ pehˇ nymˇ-euˬ laꞈ oˆ tehˬ ni, kʼahˬ-ahˇ dehˬ daˬ duˬ-euˬ laꞈ oˆ paw laꞈ coeˇ nyiˬ coeˇ-ahˇ, laꞈ kʼoeˇ paw jeˬ-ehˇ guꞈ tsoꞈ-euˬ meh.

²⁰ Shuiˇ laꞈ behˬ nyiˬ behˬ paˇ jahˇ-awˇ, pehˇ kʼahˬ pehˇ nymˇ-euˬ baꞈ pu aˇ caˆ laˬ oˆ dzaˬ-euˬ mehˬ shi, mehˬ dzaˬ-ahˇ tehˬ ni, muiˬ dui dui-eu joꞈ paꞈ-euˬ kʼoeˇ taˆ paw guꞈ tsoꞈ-euˬ meh.

²¹ Sahˬpaˬ Miˬyehˇ neh Moˇseˬ-ahˇ dawˬ biꞈ taˬ-euˬ loꞈ-ehˇ, kʼahˬ-ahˇ dehˬ daˬ duˬ kʼoeˇ hmˬ maˬ ga ka le-ehˇ, joꞈ paꞈ-euˬ kʼoeˇ taˆ paw dzeˇ jaˆ ziˬ nya ni, kʼahˬ-ahˇ dehˬ daˬ duˬ-ahˇ tsoꞈ-eu shuiˇ laꞈ behˬ deuˬ hawˇ-eu, pehˇ kʼahˬ pehˇ nymˇ-ahˇ tsoꞈ-eu shuiˇ laꞈ behˬ deuˬ-ahˇ, nyoeˇ leuˬ leuˬ-eu aˇ caˆ neh aˬ yawꞈ maꞈ paꞈ tawꞈ-euˬ meh.

Piˇ ma-euˬ dm gʼaˬ dm lmˇ nui deuˬ

²² Pehˇ kʼahˬ pehˇ nymˇ-euˬ kʼoeˇ taˆ dm daˆ-eu pehˇ kʼahˬ pehˇ mahˇ kahˇ lah ni, nyoeˇ leuˬ leuˬ-eu saˬ kahˇ neh zaꞈ taˬ-euˬ meh.

²³ Uˬ duˬ cawˬ ahˇ duˬ pyeuꞈ-eu pehˇ kʼahˬ-euˬ kawˬ lahˇ maˇ byoe maˬ ya pyaˬ-iˇ ni, mehˬ dzaˬ jawˬ jawˬ-ehˇ, saˬ paˇ neh siˬ dahˬ caw-euˬ meh.

²⁴ Pehˇ kʼahˬ pehˇ mahˇ pehˇ dahˬ caw caw-ehˇ, nyoeˇ leuˬ leuˬ-eu, neˇ naˆ naˆ-eu, neˇ tseuˆ ni gʼeh-eu hawˇ-eu, shawˇ jehˆ ni gʼeh-eu saˬ kahˇ neh aˇ boꞈ boꞈ-euˬ meh.

²⁵ Kʼoeˇ naˇ, maˇ jawˆ ni gʼeh-eu shuiˇ neh jaˇ cuˇ tehˆ-awˇ, pehˇ kʼahˬ pehˇ mahˇ pehˇ dahˬ caw caw-ehˇ, aˇ siˬ aˇ boꞈ deuˬ-euˬ yaw kaˬ-ahˇ guꞈ tsoꞈ-euˬ meh.

²⁶ Sahˬpaˬ Miˬyehˇ neh Moˇseˬ-ahˇ dawˬ biꞈ taˬ-euˬ loꞈ-ehˇ, aˇ siˬ aˇ boꞈ tiˬ boꞈ yaw kʼaˬ-ahˇ, shuiˇ jaˇ cuˇ tiˬ siˬ guꞈ tsoꞈ-euˬ meh.

²⁷ Aˬloˬ hawˇ-eu aˬ yawꞈ-euˬ aˬ li deuˬ gʼaˇ duˬ, pehˇ kʼahˬ maˬ ehˇ,

²⁸ uˬ dzahˬ hawˇ-eu uˬ kʼoˆ maˬ ehˇ, laꞈ di laꞈ cuˬ maˬ ehˇ, shawˇ jehˆ ni gʼeh-eu saˬ paˇ neh guꞈ-euˬ meh.

²⁹ Kʼoeˇ naˇ, nyoeˇ leuˬ leuˬ-eu, neˇ naˆ naˆ-eu, neˇ tseuˆ ni gʼeh-eu hawˇ-eu, shawˇ jehˆ ni gʼeh-eu saˬ paˇ neh joꞈ tsiˬ guꞈ-awˇ, aˇ boꞈ boꞈ-euˬ meh. Sahˬpaˬ Miˬyehˇ neh Moˇseˬ-ahˇ dawˬ biꞈ taˬ-euˬ loꞈ-ehˇ, kʼoeˇ deuˬ-ahˇ aˬ yawꞈ maꞈ guꞈ-euˬ meh.

³⁰ Sahˬpaˬ Miˬyehˇ-ahˇ a nehˬ-eu saˇ kiˇ pyeuꞈ-eu gʼaˇ duˬ, maˇ jawˆ ni gʼeh-eu shuiˇ neh pehˇ gʼawˆ tiˬ hmˬ aˬ yawꞈ maꞈ tehˆ-awˇ, kʼoeˇ-euˬ kʼoeˇ taˆ ‘Sahˬpaˬ Miˬyehˇ-ahˇ a nehˬ taˬ-euˬ’ lehˇ toeˬ boꞈ-euˬ meh.

³¹ Moˇseˬ-ahˇ Sahˬpaˬ Miˬyehˇ neh dawˬ biꞈ taˬ-euˬ loꞈ-ehˇ, nyoeˇ leuˬ leuˬ-eu aˇ caˆ neh, uˬ dzahˬ-euˬ mehˬ shi pehˇ gʼawˆ kʼoeˇ hmˬ paˬ tawꞈ taˬ-euˬ meh.

Gaˇ mˇ jiˇ-euˬ

³² Aˇ saˬ saˬ laˇ ngeh, Sahˬpaˬ Miˬyehˇ jawˇ-eu sehˬ gʼawˆ-ahˇ taꞈ leˇ-eu gaˇ dawˬ tawˆ luꞈ mˇ gʼaˬ jiˇ-euˬ meh. Sahˬpaˬ Miˬyehˇ neh Moˇseˬ-ahˇ dawˬ biꞈ taˬ-euˬ loꞈ-ehˇ, Iˇsaˬleˬlaˆ tsawˇ haˬ deuˬ mˇ-euˬ meh.

³³ Sehˬ gʼawˆ hawˇ-eu kʼoeˇ gaˇ taꞈ leˇ-eu keu ka dawˬ tawˆ luꞈ, Moˇseˬ jawˇ gaˇ aˬ yawꞈ maꞈ yuˇ laꞈ-euˬ meh. Kuˆ seuˬ, teˇ byaꞈ, laꞈ law, kʼawˇ zeuˇ, zeuˇ dahˇ,

³⁴ sehˬ gʼawˆ-ahˇ dehˬ kaˬ-eu gʼaˇ duˬ naˬ yawˬ neˇ taˬ-euˬ ciꞈ myehꞈ baˆ kʼoˆ, shawˇ jehˆ ni gʼeh-eu shaˬ kʼoˆ, sehˬ gʼawˆ laꞈ kʼoeˇ taw-eu gʼaˇ duˬ saˬ paˇ,

³⁵ kʼaˬ lo teˇ byaꞈ dawˆ ahˇ taˬ-euˬ dawˬ ma saˇ jaˇ bahˬ keuˆ, bahˬ keuˆ kʼmˬ pymˬ, bahˬ keuˆ baꞈ kawˬ,

³⁶ hawˬ jeh, hawˬ jeh-ahˇ taꞈ-eu kʼmˬ maˬ oeˬ tsaꞈ, Miˬyehˇ-ahˇ lawˇ-eu kaˬ muˇ,

³⁷ maˇ jawˆ ni gʼeh-eu shuiˇ neh jahˇ taˬ-euˬ tsiˇ kʼmˬ doꞈ taˬ duˬ, tsiˇ kʼmˬ, tsiˇ kʼmˬ doꞈ taˬ duˬ-ahˇ taꞈ leˇ-eu keu ka deuˬ, tsiˇ kʼmˬ doꞈ-eu tsiˇ,

³⁸ shuiˇ neh jahˇ taˬ-euˬ lawˇ duˬ, tseˇ doˆ-euˬ deuˬ-ahˇ lehꞈ-eu tsiˇ, doꞈ-awˇ damˬ-eu yaw saw jeˬ, sehˬ gʼawˆ gʼoˆ kʼehˬ-ahˇ taw-eu saˬ paˇ,

³⁹ guiˬ shuiˇ neh jahˇ taˬ-euˬ lawˇ duˬ hawˇ-eu kʼoeˇ-euˬ guiˬ shuiˇ shmˇ kaˇ, lawˇ duˬ baꞈ kawˬ, lawˇ duˬ kʼoeˇ hmˬ-ahˇ taꞈ leˇ-eu keu ka deuˬ, aˬ kuiˇ aˬ laꞈ dzuiꞈ shawˇ-eu sehˇ byehˇ hawˇ-eu sehˇ byehˇ-euˬ aˬ kuiˇ,

⁴⁰ sehˬ gʼawˆ-ahˇ yaˇ kmˇ mˇ lahˇ-eu gʼaˇ duˬ saˬ paˇ, kʼawˇ zeuˇ hawˇ-eu zeuˇ dahˇ deuˬ, yaˇ kmˇ laˇ gʼoˆ-ahˇ taw-eu saˬ paˇ hawˇ-eu kʼoeˇ-euˬ aˇ caˆ, sehˬ gʼawˆ gʼaˇ duˬ taꞈ cmˬ ,

⁴¹ piˇ ma Aˬloˬ hawˇ-eu aˬ yawꞈ-euˬ aˬ li deuˬ bi dm-eu gʼaˇ duˬ, piˇ ma deuˬ muiˬ-eu shawˇ-eu jawˇ duˬ-ahˇ uˇ leˇ ngeh dm-eu haw muiˬ dui dui-eu pehˇ kʼahˬ deuˬ, heu deuˬ-ahˇ aˬ yawꞈ maꞈ yuˇ laꞈ-euˬ meh.

⁴² Sahˬpaˬ Miˬyehˇ neh Moˇseˬ-ahˇ dawˬ biꞈ taˬ-euˬ loꞈ-ehˇ, Iˇsaˬleˬlaˆ tsawˇ haˬ deuˬ yawˬ jeˬ na luꞈ mˇ gʼaˬ-euˬ meh.

⁴³ Yawˬ jeˬ na luꞈ-ahˇ Moˇseˬ pyehˆ tseˇ haw ngeh, Sahˬpaˬ Miˬyehˇ neh dawˬ kʼaˇ biꞈ taˬ-eu loꞈ-ehˇ aˬ yawꞈ maꞈ mˇ gʼaˬ taˬ jiˇ-euˬ gaˇ ya mawˇ-euˬ meh. Kʼoeˇ naˇ, aˬ yawꞈ maꞈ-ahˇ Moˇseˬ dawˬ ngehˬ gʼeh nehˬ-euˬ meh.