Doˆ-iˇ 38 - Akha

Miˬ dzaˬ dzah puiˆ-awˇ lawˇ-eu lawˇ duˬ jahˇ-euˬ

¹ Miˬ dzaˬ dzah puiˆ-awˇ lawˇ-eu jeˬ lawˇ-eu gʼaˇ duˬ, aˬ kaˬ shaˇ daˇ kawˬ neh lawˇ duˬ tiˬ hmˬ aˬ yawꞈ jahˇ-euˬ meh. Lawˇ duˬ kʼoeˇ hmˬ ngaˬ caˆ oeˬ bawˬ byah-awˇ, smˬ caˆ goˇ-eu meh.

² Lawˇ duˬ-euˬ uˬ duˬ laꞈ coeˇ oeˬ pyawˬ-ahˇ, lawˇ duˬ-ahˇ tiˬ poˆ tehꞈ-ehˇ tsoꞈ tawꞈ-eu uˬ coeˇ oeˬ hmˬ jahˇ tsoꞈ-awˇ, guiˬ shuiˇ yaw-euˬ meh.

³ Lawˇ duˬ-ahˇ zmˬ-eu keu ka deuˬ pyeuꞈ-eu mui za, laꞈ yoeˬ tsoꞈ-eu kuˬ tseuˆ, naˬ bo, shaˬ jiˇ kuˆ seuˬ hawˇ-eu, miˬ dzaˬ kʼmˬ maˬ heu deuˬ dawˬ tawˆ luꞈ-ahˇ, guiˬ shuiˇ neh jahˇ-euˬ meh.

⁴ Guiˬ shuiˇ shmˇ kaˇ tiˬ hmˬ aˬ yawꞈ jahˇ-awˇ, lawˇ duˬ-euˬ daˇ bahˇ laꞈ oˆ, lawˇ duˬ-euˬ gʼawˇ pah nyiˬ paˆ-ehˇ jahˇ tsoꞈ-euˬ meh.

⁵ Lawˇ duˬ-ahˇ baꞈ nya ni, daˇ kʼahˇ oeˬ kʼahˇ jahˇ-awˇ, lawˇ duˬ-euˬ laꞈ coeˇ oeˬ pyawˬ-ahˇ laꞈ naˬ jahˇ tsoꞈ-euˬ meh.

⁶ Aˬ kaˬ shaˇ daˇ kawˬ neh kʼaˆ baꞈ kawˬ jahˇ-awˇ, guiˬ shuiˇ yaw-euˬ meh.

⁷ Kʼoeˇ naˇ, kʼaˆ baꞈ kawˬ kʼoeˇ yuˇ-awˇ, lawˇ duˬ-euˬ kʼoeˇ paˆ maˇ paˆ tsoꞈ-eu laꞈ naˬ-ahˇ cawˬ ahˇ-euˬ meh. Lawˇ duˬ kʼoeˇ hmˬ-ahˇ teˇ byaꞈ neh taꞈ-awˇ, coˇ hoˇ ni bi dahˇ-euˬ meh.

Guiˬ shuiˇ sehˇ byehˇ jahˇ-euˬ

⁸ Sahˬpaˬ Miˬyehˇ jawˇ-eu Sehˬ gʼawˆ-euˬ gʼoˆ kʼehˬ-ahˇ gaˇ mˇ-eu zaˬ miˬ zaˬ deuˬ-euˬ kʼaw teuꞈ ba la deuˬ yuˇ uiˬ-awˇ, guiˬ shuiˇ sehˇ byehˇ hawˇ-eu kʼoeˇ-euˬ aˬ kuiˇ jahˇ-euˬ meh.

Sahˬpaˬ Miˬyehˇ jawˇ-eu Sehˬ gʼawˆ-ahˇ yaˇ kmˇ mˇ lahˇ-euˬ

⁹ Sahˬpaˬ Miˬyehˇ jawˇ-eu Sehˬ gʼawˆ-ahˇ yaˇ kmˇ mˇ lahˇ-eu gʼaˇ duˬ, shawˇ jehˆ ni gʼeh-eu saˬ kahˇ neh saˬ paˇ zaꞈ-euˬ meh. Laꞈ oˆ paw pyawˬ-ahˇ taw lahˇ-eu saˬ paˇ-aˬ, nyiˬ tseˇ ngaˬ lmˇ byah-eu meh.

¹⁰ Saˬ paˇ kʼoeˇ taw-eu gʼaˇ duˬ, pyuˇ kuˆ seuˬ deuˬ, pyuˇ laꞈ law tsoꞈ-eu guiˬ shuiˇ kʼawˇ zeuˇ nyiˬ tseˇ zeuˇ hawˇ-eu, guiˬ shuiˇ zeuˇ dahˇ nyiˬ tseˇ dahˇ jahˇ-euˬ meh.

¹¹ Laꞈ taˆ paw pyawˬ gʼaˇ duˬ kʼawꞈ, kʼoeˇ loꞈ-ehˇ jahˇ-euˬ meh.

¹² Nahˇ ma doˆ kʼehˬ paw pyawˬ-ahˇ taw-eu gʼaˇ duˬ, saˬ paˇ tseˇ nyiꞈ lmˇ nui paˆ, pyuˇ kuˆ seuˬ hawˇ-eu pyuˇ laꞈ law tsoꞈ-eu kʼawˇ zeuˇ tseˇ zeuˇ hawˇ-eu, zeuˇ dahˇ tseˇ dahˇ jahˇ-euˬ meh.

¹³ Sehˬ gʼawˆ gʼoˆ kʼehˬ pyawˇ-eu nahˇ ma doˆ kʼehˬ paw pyawˬ-ahˇ taw-eu gʼaˇ duˬ, saˬ paˇ tseˇ nyiꞈ lmˇ lehˬ hmˬ-euˬ meh.

¹⁴ Gʼoˆ kʼehˬ-euˬ aˇ maˇ paw pyawˬ-ahˇ taw-eu gʼaˇ duˬ, saˬ paˇ smˬ lmˇ nui paˆ uˬ taꞈ tiˬ caˆ, kʼawˇ zeuˇ smˬ zeuˇ hawˇ-eu zeuˇ dahˇ smˬ dahˇ lehˬ hmˬ-euˬ meh.

¹⁵ Aˇ caˇ paw pyawˬ gʼaˇ duˬ kʼawꞈ, kʼoeˇ loꞈ-ehˇ lehˬ hmˬ-euˬ meh.

¹⁶ Taw lahˇ-eu gʼaˇ duˬ, saˬ paˇ dawˬ tawˆ luꞈ, shawˇ jehˆ ni gʼeh-eu saˬ paˇ tehꞈ meh.

¹⁷ Sehˬ gʼawˆ-ahˇ yaˇ kmˇ mˇ lahˇ-eu gʼaˇ duˬ, kʼawˇ zeuˇ dawˬ tawˆ luꞈ guiˬ shuiˇ neh jahˇ-awˇ, kuˆ seuˬ, laꞈ law hawˇ-eu, kʼawˇ zeuˇ-euˬ uˬ dzo-ahˇ tsoꞈ-eu uˬ kʼoˆ deuˬ-ahˇ, pyuˇ neh jahˇ-euˬ meh. Sehˬ gʼawˆ jawˬ jawˬ-ehˇ ka tuˇ taˬ-euˬ kʼawˇ zeuˇ kʼoeˇ deuˬ-ahˇ, pyuˇ laꞈ law diˬ-euˬ meh.

¹⁸ Yaˇ kmˇ gʼoˆ kʼehˬ-ahˇ taw-eu gʼaˇ duˬ, nyoeˇ leuˬ leuˬ-eu, neˇ naˆ naˆ-eu hawˇ-eu neˇ tseuˆ ni gʼeh-eu saˬ kahˇ deuˬ neh zaꞈ-awˇ, aˇ boꞈ boꞈ taˬ-euˬ shawˇ jehˆ ni gʼeh-eu saˬ paˇ lehˬ hmˬ-euˬ meh. Saˬ paˇ kʼoeˇ dzeh kʼawꞈ, Sehˬ gʼawˆ yaˇ kmˇ mˇ lahˇ gaˇ taw-eu saˬ paˇ kʼoeˇ deuˬ loꞈ-ehˇ, yaw mahˇ paw ngaˬ lmˇ, yaw goˇ paw tiˬ lmˇ uˬ taꞈ tiˬ caˆ byah-eu meh.

¹⁹ Saˬ paˇ kʼoeˇ dzeh-ahˇ, guiˬ shuiˇ zeuˇ dahˇ oeˬ dahˇ kʼoeˇ taˆ ka tuˇ taˬ-euˬ kʼawˇ zeuˇ oeˬ zeuˇ kʼoeˇ taˆ taw-euˬ meh. Kʼawˇ zeuˇ kʼoeˇ oeˬ zeuˇ-euˬ kuˆ seuˬ deuˬ, uˬ dzo-ahˇ tsoꞈ-eu uˬ kʼoˆ deuˬ hawˇ-eu, laꞈ law deuˬ-ahˇ pyuˇ neh jahˇ-euˬ meh.

²⁰ Sehˬ gʼawˆ tsoˆ gaˇ hawˇ-eu Sehˬ gʼawˆ yaˇ kmˇ mˇ lahˇ gaˇ zmˬ-eu taꞈ cmˬ dawˬ tawˆ luꞈ, guiˬ shuiˇ neh tehꞈ-ehˇ jahˇ taˬ-euˬ meh.

Sahˬpaˬ Miˬyehˇ jawˇ-eu Sehˬ gʼawˆ tsoˆ gaˇ geuꞈ-euˬ myawˬ deuˬ

²¹ Heu-aˬ, zahˇ dawˬ kʼoꞈ dawˬ tseˇ dawˬ boꞈ taˬ-euˬ kʼaˬ lo teˇ byaꞈ nyiˬ byaꞈ dawˆ ahˇ taˬ-euˬ Sahˬpaˬ Miˬyehˇ jawˇ-eu Sehˬ gʼawˆ tsoˆ gaˇ geuꞈ-euˬ myawˬ deuˬ-euˬ jaˇ laˇ meh. Heu deuˬ-ahˇ zmˬ-eu gʼaˇ duˬ, Moˇseˬ dawˬ biꞈ-awˇ, piˇ ma Aˬloˬ-euˬ aˬ li Iˇdaˬmaˬ neh mehˬ nehˬ-euˬ loꞈ-ehˇ, Leˬbiˇ tsawˇ haˬ deuˬ neh jaˇ laˇ heu hmˬ boꞈ doˆ-euˬ meh.

²² Yuˇdaˆ tsawˇ haˬ Huˇyaˆ-euˬ oeˬ paˬ pyeuꞈ-awˇ, Uˇliˆ-euˬ aˬ li pyeuꞈ-eu Baˬzeˬlaˇ-aˬ, Sahˬpaˬ Miˬyehˇ neh dawˬ kʼaˇ biꞈ taˬ-euˬ yawˬ jeˬ na luꞈ mˇ-euˬ meh.

²³ Aˬ yawꞈ-ahˇ caw ba-eu gʼaˬ pyeuꞈ-eu Daˬ tsawˇ haˬ Aˬhiˇsaˬmaˇ-euˬ aˬ li Oˬhoˬliˆ-aˬ, ba jiˬ pyeuꞈ-eu uˬ taꞈ, gʼawˬ mya jeˬ noeˬ doˆ mˇ doˆ nya-awˇ, shawˇ jehˆ ni gʼeh-eu saˬ paˇ, nyoeˇ leuˬ leuˬ-eu, neˇ naˆ naˆ-eu hawˇ-eu, neˇ tseuˆ ni gʼeh-eu saˬ paˇ deuˬ zaꞈ-eu gʼaˬ kʼawꞈ pyeuꞈ-eu meh.

²⁴ Muiˬ-eu shawˇ-eu Sehˬ gʼawˆ gʼaˇ duˬ, Sahˬpaˬ Miˬyehˇ-ahˇ damˬ nehˬ-eu shuiˇ dawˬ tawˆ luꞈ, kaˇ daˬ-ahˇ tsaˬ ni saˆ haw ngeh, koꞈ yaˇ jawꞈ-i byah-eu meh.

²⁵ Iˇsaˬleˬlaˆ tsawˇ jeuˬ-euˬ tsawˇ seˬ yuˇ ngeh, tsawˇ myahˇ kʼaˇ dawˆ-euˬ tsawˇ haˬ deuˬ jawˇ gaˇ za-euˬ pyuˇ deuˬ, nyiˬ heˇ nyiˬ tseˇ jawꞈ-i byah-eu meh.

²⁶ Heu-aˬ, Iˇsaˬleˬlaˆ tsawˇ jeuˬ-euˬ tsawˇ seˬ jaˇ laˇ laꞈ kʼoeˇ tsawˇ myahˇ kʼaˇ ahˇ-eu tsawˇ haˬ dawˬ tawˆ luꞈ, yawˬ ha-ahˇ kʼaˇ doˇ-eu loꞈ-ehˇ, kaˇ daˬ-ahˇ tsaˬ ni taꞈ uiˬ taˬ-euˬ pyuˇ meh. Jaˇ laˇ laꞈ kʼoeˇ tsawˇ myahˇ ahˇ-eu, nyiˬ tseˇ kʼoꞈ laˬ taˆ paw-euˬ tsawˇ haˬ dawˬ tawˆ luꞈ, koꞈ seh smˬ heˇ ngaˬ yaˇ ngaˬ tseˇ gʼaˬ byah-eu meh.

²⁷ Pyuˇ kʼoeˇ deuˬ laˬ kʼoeˇ, muiˬ-eu shawˇ-eu sehˬ gʼawˆ tsoˆ gaˇ hawˇ-eu, sehˬ gʼawˆ yaˇ kmˇ mˇ gaˇ geuꞈ-eu zeuˇ dahˇ tiˬ yaˇ dahˇ jahˇ-eu gʼaˇ duˬ, nyiˬ heˇ oeˬ tseˇ jawꞈ-i zmˬ-euˬ meh. Zeuˇ dahˇ tiˬ dahˇ-euˬ nyiˬ tseˇ jawꞈ-i oeˬ kaˇ byah-eu meh.

²⁸ Dzehˬ laˇ taˬ-euˬ pyuˇ tseˇ yehꞈ jawꞈ-i-ahˇ, kʼawˇ zeuˇ-euˬ laꞈ law deuˬ, kuˆ seuˬ deuˬ hawˇ-eu, kʼawˇ zeuˇ-euˬ uˬ dzo-ahˇ tsahˬ-eu uˬ kʼoˆ deuˬ, Baˬzeˬlaˇ neh jahˇ-euˬ meh.

²⁹ Sahˬpaˬ Miˬyehˇ-ahˇ damˬ nehˬ-eu guiˬ shuiˇ deuˬ tiˬ heˇ oeˬ yaˇ ngaˬ tseˇ ngaˬ jawꞈ-i byah-eu meh.

³⁰ Guiˬ shuiˇ kʼoeˇ deuˬ yuˇ-awˇ, Sahˬpaˬ Miˬyehˇ jawˇ-eu Sehˬ gʼawˆ gʼoˆ kʼehˬ kʼawˇ zeuˇ deuˬ maˬ ehˇ, guiˬ shuiˇ shmˇ kaˇ tsoꞈ-eu guiˬ shuiˇ neh jahˇ taˬ-euˬ lawˇ duˬ maˬ ehˇ, lawˇ duˬ kʼoeˇ hmˬ-euˬ keu ka dawˬ tawˆ luꞈ maˬ ehˇ,

³¹ sehˬ gʼawˆ-ahˇ yaˇ kmˇ mˇ lahˇ gaˇ hawˇ-eu yaˇ kmˇ gʼoˆ kʼehˬ-ahˇ geuꞈ-eu zeuˇ dahˇ deuˬ maˬ ehˇ, sehˬ gʼawˆ tsoˆ gaˇ hawˇ-eu yaˇ kmˇ mˇ lahˇ gaˇ kʼaˇ loˬ-eu taꞈ cmˬ deuˬ maˬ ehˇ, jahˇ-euˬ meh.