Doˆ-iˇ 32 - Akha

Shuiˇ mawˇ neˇ mawˇ kawˇ

¹ Gawˬ jawˬ-ahˇ neh Moˇseˬ maˬ zaꞈ ka le ni gʼawˬ myahˇ ni jawˇ gaˇ Iˇsaˬleˬlaˆ tsawˇ haˬ deuˬ ya mawˇ ngeh, Aˬloˬ-euˬ dawˬ peh aˬ yawꞈ maꞈ uiˬ leˇ-awˇ, heu loꞈ-ehˇ ehˇ nehˬ-euˬ meh. “Aˬ dui maꞈ-ahˇ Iˇjiˇtuˆ miˇ kʼahˬ laꞈ kʼoeˇ neh sheuˬ doˆ nehˬ laꞈ-euˬ Moˇseˬ heu gʼaˬ-ahˇ aˬ jeˬ gʼeh-euˬ lehˇ maˬ paˇ ehˇ nya ngaˇ. Teu miˇ neh, aˬ dui maꞈ-ahˇ bi sheuˬ gʼeh-eu gʼaˇ duˬ, miˬ yehˇ tiˬ gʼaˬ aˬ dui tehˆ kaˇ-euˇ.”

² Kʼoeˇ ngeh, “Naw maꞈ-euˬ miˬ zaˬ deuˬ hawˇ-eu aˬ buˇ aˬ li deuˬ geuꞈ luꞈ-eu shuiˇ naˬ bawˇ naˬ yoˆ deuˬ lehˆ doˆ-awˇ, ngaˇ jawˇ gaˇ yuˇ laꞈ-awˬ” lehˇ, aˬ yawꞈ maꞈ-ahˇ Aˬloˬ ehˇ nehˬ-euˬ meh.

³ Kʼoeˇ naˇ, tsawˇ haˬ dawˬ tawˆ luꞈ, yawˬ ha kʼaˇ geuꞈ luꞈ-eu shuiˇ naˬ bawˇ naˬ yoˆ deuˬ lehˆ doˆ jiˇ-awˇ, Aˬloˬ jawˇ gaˇ yuˇ laꞈ-euˬ meh.

⁴ Shuiˇ naˬ yoˆ kʼoeˇ deuˬ aˬ yawꞈ puiˆ guiˇ-awˇ, mawˇ neˇ mawˇ gaw mawˇ kawˇ kʼaˇ-euˬ meh. Kʼoeˇ ngeh, “Iˇsaˬleˬlaˆ tsawˇ haˬ deuˬ-oˇ, heu-aˬ, Iˇjiˇtuˆ miˇ kʼahˬ laꞈ kʼoeˇ neh aˬ dui-ahˇ sheuˬ doˆ nehˬ laꞈ-euˬ aˬ dui-euˬ miˬ yehˇ meh” lehˇ aˬ yawꞈ maꞈ ehˇ-eu meh.

⁵ Kʼoeˇ naˇ, shuiˇ mawˇ neˇ mawˇ kawˇ-euˬ mehˬ shi, lawˇ duˬ tiˬ hmˬ Aˬloˬ tsoˆ-awˇ, “Ni shawˬ nah Sahˬpaˬ Miˬyehˇ-ahˇ taˬ huiˬ taˬ mahˇ-eu bawˬ-iˬ gʼeh ma” lehˇ, Iˇsaˬleˬlaˆ tsawˇ haˬ deuˬ-ahˇ guˇ gaˬ nehˬ-euˬ meh.

⁶ Yawˬ nah yawˬ uˬ shawˬ yaw naꞈ-ehˇ, miˬ dzaˬ dzah puiˆ-awˇ lawˇ-eu jeˬ lawˇ-eu gʼaˇ duˬ jeˬ zaˬ deuˬ maˬ ehˇ, cawˬ cawˬ taꞈ-eu lawˇ-eu jeˬ lawˇ-eu gʼaˇ duˬ jeˬ zaˬ deuˬ maˬ ehˇ, aˬ yawꞈ maꞈ yuˇ laꞈ-euˬ meh. Aˬ yawꞈ maꞈ bawˬ-iˬ gʼeh ngeh, dzaˬ yehꞈ dawˇ yehꞈ-awˇ lawꞈ gʼa-eu uˬ taꞈ, kʼaˬ miˬ sheu taꞈ-euˬ meh.

⁷ Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh. “Yaw kawˇ ma-ehˇ gʼoꞈ ka-iˇ-awˬ. Aˬ jeˬ miˇ neh ehˇ naˇ, Iˇjiˇtuˆ miˇ kʼahˬ laꞈ kʼoeˇ nawˬ neh sheuˬ doˆ laꞈ-euˬ tsawˇ haˬ deuˬ iˬ baˇ mˇ-awˇ ngaˬ-ahˇ puiˬ luꞈ meh.

⁸ Ngaˬ neh aˬ yawꞈ maꞈ-ahˇ bi cah-euˬ gaˇ ma-ahˇ aˬ yawꞈ maꞈ byehˇ dzeh gʼaˬ-euˬ meh. Aˬ yawꞈ maꞈ shuiˇ mawˇ neˇ mawˇ kawˇ kʼaˇ doˆ-awˇ, uˬ duˬ tahˬ-eu uˬ taꞈ, lawˇ-eu shehˇ-eu jeˬ kʼawꞈ mˇ luꞈ meh. Kʼoeˇ-aˬ, aˬ yawꞈ maꞈ-ahˇ Iˇjiˇtuˆ miˇ kʼahˬ laꞈ kʼoeˇ neh sheuˬ doˆ nehˬ laꞈ-euˬ aˬ yawꞈ maꞈ-euˬ miˬyehˇ meh lehˇ, aˬ yawꞈ maꞈ ehˇ luꞈ meh.

⁹ Tsawˇ haˬ heu deuˬ nui ma aˇ naˆ ni gʼahˇ-eu ngaˇ siˬ nya ma.

¹⁰ Nymˬ-mˇ poˆ-aˬ, ngaˬ-ahˇ taˬ laˆ tsoeˬ. Aˬ yawꞈ maꞈ-ahˇ ngaˇ nui ma pehˇ laˇ taˬ-euˬ miˇ neh, laˆ cawˆ nehˬ ma. Kʼoeˇ naˇ, nawˇ hawˇ-eu nawˬ-euˬ zaˬ nawˬ-euˬ uˆ deuˬ-ahˇ, huiˬ-eu tsawˇ jeuˬ ngaˇ bi pyeuꞈ laˇ ma.”

¹¹ Ehˇ kʼawꞈ, Moˇseˬ-aˬ, aˬ yawꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ shaˇ-eu laꞈ kʼoeˇ, heu loꞈ-ehˇ ehˇ-eu meh. “Sahˬpaˬ Miˬyehˇ-oˇ, huiˬ dui dui-eu nawˬ-euˬ baoˬ-ahˇ gʼoe-awˇ, Iˇjiˇtuˆ miˇ kʼahˬ laꞈ kʼoeˇ nawˬ neh ka kʼoꞈ doˆ laꞈ-euˬ nawˬ-eu tsawˇ haˬ deuˬ-ahˇ aˬ jeˬ miˇ neh nawˇ teu naˆ naˆ-ehˇ nui ma pehˇ te.

¹² Nawˇ-aˬ, nawˬ-euˬ tsawˇ haˬ deuˬ-ahˇ, gawˬ jawˬ gawˬ duˇ kʼoeˇ taˆ sehꞈ dzeh jiˇ-awˇ, laˆ piˬ laˆ byoˆ jiˇ mawꞈ-eu miˇ neh, Iˇjiˇtuˆ miˇ kʼahˬ laꞈ kʼoeˇ neh sheuˬ doˆ gʼeh-euˬ nga lehˇ Iˇjiˇtuˆ tsawˇ haˬ deuˬ bi ehˇ-eu loˇ. Nui ma pehˇ-eu taˬ leˇ-awˬ. Luˬ-iˇ seˇ-iˇ-eu heu nawˬ-euˬ tsawˇ haˬ deuˬ kʼoeˇ taˆ maˬ ya bi keuˆ le ni, nawˬ-euˬ nui ma noeˬ paˇ-awˬ.

¹³ Aˬbyaˬhaˬ, Iˇtsaˆ hawˇ-eu, Yaˬkoˆ-ahˇ noeˬ keuˆ-awˬ. Aˬ yawꞈ maꞈ nehˬ-ehˇ nawˇ dawˬ ma saˇ jaˇ dzaˬ-awˇ, aˬ yawꞈ maꞈ-euˬ zaˬ deuˬ uˆ deuˬ, mˬ kʼoeˇ taˆ tsehˬ-eu aˬ guiˇ loꞈ-ehˇ bi myaˬ bi behˇ laˇ-awˇ, nawˬ neh aˬ yawꞈ maꞈ-ahˇ biꞈ ma lehˇ saˇ jaˇ dzaˬ taˬ-euˬ miˇ kʼahˬ dawˬ tawˆ luꞈ, aˬ yawꞈ maꞈ-euˬ zaˬ deuˬ-ahˇ mˬ maˬ maˬ byaˆ zaˇ ziˇ biꞈ tsehˆ ma lehˇ ehˇ taˬ-euˬ gaˇ noeˬ keuˆ-awˬ.”

¹⁴ Kʼoeˇ ngeh, Sahˬpaˬ Miˬyehˇ nui ma noeˬ paˇ-awˇ, aˬ yawꞈ neh noeˬ tsehˆ taˬ-euˬ luˬ-iˇ seˇ-iˇ-eu jeˬ, aˬ yawꞈ-euˬ tsawˇ haˬ deuˬ kʼoeˇ taˆ maˬ bi keuˆ le ni, bi dzeuˇ-iˇ-euˬ meh.

¹⁵ Nyiˬ paw paˆ luꞈ zahˇ dawˬ kʼoꞈ dawˬ boꞈ ahˇ taˬ-euˬ kʼaˬ lo teˇ byaꞈ nyiˬ byaꞈ-ahˇ Moˇseˬ baꞈ-awˇ, gawˬ jawˬ laꞈ oˆ zaꞈ ka-iˇ-euˬ meh.

¹⁶ Kʼaˬ lo teˇ byaꞈ kʼoeˇ Miˬyehˇ neh jahˇ-awˇ, zahˇ dawˬ kʼoꞈ dawˬ kʼoeˇ deuˬ kʼawꞈ, Miˬyehˇ neh toeˬ boꞈ taˬ-euˬ meh.

¹⁷ Iˇsaˬleˬlaˆ tsawˇ haˬ deuˬ lawꞈ gʼa luꞈ-eu teˇ saˇ-ahˇ Yawˇshuˆ ya gaˬ ngeh, “Iˇsaˬleˬlaˆ tsawˇ haˬ-euˬ jawˇ duˬ-ahˇ, guiˇ deuˆ luꞈ-eu teˇ saˇ ngaˬ-ahˇ gaˬ laˇ nya” lehˇ, Moˇseˬ-ahˇ ehˇ nehˬ-euˬ meh.

¹⁸ Moˇseˬ ehˇ-eu, “Teˇ saˇ kʼoeˇ-aˬ, guiˇ deuˆ-eu gʼaˬ leˇ-euˬ miˇ neh guˇ-eu teˇ saˇ-ahˇ maˬ duˇ nya. Guiˇ deuˆ-eu maˬ gʼaˬ leˇ-euˬ miˇ neh guˇ-eu teˇ saˇ-ahˇ kʼawꞈ maˬ duˇ nya. Kʼoeˇ-aˬ, caˇ dawˬ caˇ-eu teˇ saˇ miˇ-a.”

¹⁹ Iˇsaˬleˬlaˆ tsawˇ haˬ deuˬ-euˬ jawˇ duˬ dawˬ peh Moˇseˬ zaꞈ ka keuˆ-iˇ-awˇ, mawˇ neˇ mawˇ kawˇ hawˇ-eu tsawˇ haˬ kʼoeˇ deuˬ gaˇ nyeh nyeh luꞈ gaˇ ya mawˇ ngeh, nui ma pehˇ dui dui-euˬ meh. Kʼoeˇ gaˇ, gawˬ jawˬ dawˬ dahˬ-ahˇ, aˬ yawꞈ baꞈ luꞈ-eu kʼaˬ lo teˇ byaꞈ baꞈ dzeh ka gʼeh-awˇ, bi paˆ-iˇ-euˬ meh.

²⁰ Aˬ yawꞈ maꞈ neh jahˇ taˬ-euˬ mawˇ neˇ mawˇ kawˇ kʼoeˇ aˬ yawꞈ yuˇ-awˇ, miˬ dzaˬ-ahˇ puiˆ guiˇ-euˬ meh. Kʼoeˇ naˇ, lehˬ meuˇ lehˬ loeˇ jiˇ-awˇ, iˇ cuꞈ laꞈ kʼoeˇ byaˆ ahˇ-awˇ, Iˇsaˬleˬlaˆ tsawˇ haˬ deuˬ-ahˇ, iˇ cuꞈ kʼoeˇ bi dawˇ-euˬ meh.

²¹ Kʼoeˇ naˇ, “Tsawˇ haˬ heu deuˬ-ahˇ heu naˆ naˆ-ehˇ guˆ laˇ paˬ-ehˇ gʼeh-eu iˬ baˇ nawˇ ya bi mˇ ni, aˬ yawꞈ maꞈ nawˬ-ahˇ aˬ jeˬ jahˇ nehˬ laꞈ taˬ” lehˇ, Aˬloˬ-ahˇ Moˇseˬ naˇ haˬ-euˬ meh.

²² Aˬloˬ ehˇ-eu, “Ngaˬ-euˬ kʼoeˇ taˆ iˬ baˇ taˬ taˬ. Tsawˇ haˬ heu deuˬ maˬ muiˬ maˬ jaˬ-eu jeˬ aˇ naˆ ni mˇ mawꞈ-eu nawˇ siˬ nya-eu meh.

²³ Aˬ yawꞈ maꞈ ngaˇ jawˇ gaˇ laˇ-awˇ, ‘Aˬ dui maꞈ-ahˇ Iˇjiˇtuˆ miˇ kʼahˬ laꞈ kʼoeˇ neh sheuˬ doˆ nehˬ laꞈ-euˬ Moˇseˬ heu gʼaˬ-ahˇ aˬ jeˬ gʼeh-euˬ lehˇ maˬ paˇ ehˇ nya ngaˇ. Teu miˇ neh, nga maꞈ gʼaˇ duˬ, nga maꞈ-ahˇ bi sheuˬ gʼeh-eu miˬyehˇ tiˬ gʼaˬ tehˆ nehˬ laꞈ-awˬ’ lehˇ ehˇ laˇ-euˬ meh.

²⁴ Kʼoeˇ ngeh, ‘Naw maꞈ nehˬ-ehˇ jaˆ-eu shuiˇ myawˬ guˇ deuˬ yuˇ uiˬ laꞈ-awˬ’ lehˇ, aˬ yawꞈ maꞈ-ahˇ ngaˇ ehˇ nehˬ-eu ma. Shuiˇ myawˬ guˇ kʼaˇ jaˆ-eu tsawˇ haˬ deuˬ, shuiˇ myawˬ guˇ yuˇ-awˇ, ngaˬ-ahˇ biꞈ laˇ-euˬ meh. Shuiˇ myawˬ guˇ kʼoeˇ deuˬ ngaˇ yuˇ-awˇ, miˬ dzaˬ-ahˇ dawˆ puiˆ ngeh, mawˇ neˇ mawˇ kawˇ heu hmˬ pyeuꞈ doˆ laˇ-euˬ meh.”

²⁵ Aˬloˬ neh Iˇsaˬleˬlaˆ tsawˇ haˬ deuˬ-ahˇ gaˇ ma sheuˬ bahˬ-awˇ, maˬ ha lahˇ nya ni bi pyeuꞈ-iˇ-euˬ uˬ taꞈ, aˬ yawꞈ maꞈ-ahˇ muiˇ-eu deuˬ mehˬ shi shaꞈ dawˇ duˬ doˆ laˇ taˬ-euˬ gaˇ Moˇseˬ ya mawˇ-euˬ meh.

²⁶ Kʼoeˇ miˇ neh, Iˇsaˬleˬlaˆ tsawˇ haˬ deuˬ jawˇ-eu pu lahˇ kʼehˬ dawˬ peh aˬ yawꞈ yawꞈ-awˇ, “Sahˬpaˬ Miˬyehˇ jawˇ paw pyawˬ-eu tsawˇ haˬ yawˬ gʼaˬ na luꞈ heu gaˇ laˇ-awˬ” lehˇ guˇ-euˬ meh. Kʼoeˇ ngeh, Leˬbiˇ tsawˇ haˬ dawˬ tawˆ luꞈ aˬ yawꞈ jawˇ gaˇ uiˬ laˇ jiˇ-euˬ meh.

²⁷ Aˬ yawꞈ maꞈ-ahˇ Moˇseˬ ehˇ nehˬ-eu, “Naw maꞈ yawˬ gʼaˬ na luꞈ, yawˬ ha-euˬ mi cehˇ shaꞈ-awˇ, dzahˇ huˬ-ahˇ neh dzahˇ dahˬ-ahˇ doˆ ni, yawˬ ha-euˬ aˬ yuiꞈ aˬ nyiˇ deuˬ, yawˬ ha-euˬ cawˬ deuˬ, yawˬ ha-euˬ dawˬ peh jawˇ-euˬ tsawˇ haˬ deuˬ-ahˇ sehꞈ-awˬ lehˇ, Iˇsaˬleˬlaˆ tsawˇ haˬ deuˬ-euˬ Miˬyehˇ pyeuꞈ-eu Sahˬpaˬ Miˬyehˇ naw maꞈ-ahˇ dawˬ biꞈ-eu meh.”

²⁸ Leˬbiˇ tsawˇ haˬ deuˬ aˬ yawꞈ ehˇ dawˬ naˇ haˬ-awˇ, kʼoeˇ ngeh nah laꞈ kʼoeˇ, tsawˇ haˬ smˬ heˇ gʼaˬ byah ni sehꞈ dzeh-euˬ meh.

²⁹ Leˬbiˇ tsawˇ haˬ deuˬ-ahˇ Moˇseˬ ehˇ nehˬ-eu, “Iˬ nah naw maꞈ yawˬ ha-euˬ aˬ li deuˬ, yawˬ ha-euˬ aˬ yuiꞈ aˬ nyiˇ deuˬ-ahˇ sehꞈ-eu laꞈ kʼoeˇ, Sahˬpaˬ Miˬyehˇ-euˬ gaˇ laꞈ kʼoeˇ, piˇ ma deuˬ loꞈ-ehˇ naw maꞈ-euˬ gʼawˇ mawˇ a nehˬ-euˬ miˇ neh, Sahˬpaˬ Miˬyehˇ naw maꞈ-ahˇ guiˬ lahˬ biꞈ nehˬ gʼaˬ-euˬ meh.”

³⁰ Yawˬ nah yawˬ, Iˇsaˬleˬlaˆ tsawˇ haˬ deuˬ-ahˇ Moˇseˬ ehˇ nehˬ-eu, “Guˆ dui dui laˇ paˬ-ehˇ gʼeh-eu iˬ baˇ naw maꞈ mˇ gʼaˬ-euˬ meh. Ehˇ kʼawꞈ, gawˬ jawˬ-ahˇ, Sahˬpaˬ Miˬyehˇ jawˇ gaˇ, nymˬ-mˇ ngaˇ tiˬ poˆ paˇ daˆ leˇ ma. Naw maꞈ iˬ baˇ ya buˬ-iˇ ni, ngaˇ jahˇ nya-eu maˬ siˬ.”

³¹ Kʼoeˇ naˇ, Sahˬpaˬ Miˬyehˇ jawˇ gaˇ Moˇseˬ paˇ le-awˇ, heu loꞈ-ehˇ ehˇ nehˬ leˇ-euˬ meh. “Tsawˇ haˬ heu deuˬ guˆ laˇ paˬ-ehˇ gʼeh-eu iˬ baˇ mˇ gʼaˬ-euˬ meh. Aˬ yawꞈ maꞈ shuiˇ neh miˬyehˇ tehˆ-awˇ, uˬ duˬ tahˬ-euˬ meh.

³² Gʼawˬ shaˬ gaˬ-eu laꞈ kʼoeˇ, aˬ yawꞈ maꞈ-ahˇ iˬ baˇ pyehˬ nehˬ-awˬ. Ehˇ kʼawꞈ, aˬ yawꞈ maꞈ-ahˇ nawˇ iˬ baˇ maˬ pyehˬ nehˬ coeˇ naˇ, nawˬ-euˬ tsawˇ haˬ deuˬ-euˬ tsawˇ myahˇ boꞈ ahˇ taˬ-euˬ sahˬ boꞈ laꞈ kʼoeˇ ahˇ-eu ngaˬ-euˬ tsawˇ myahˇ shiˆ byoˆ-awˬ.”

³³ Sahˬpaˬ Miˬyehˇ ehˇ-eu, “Ngaˬ-ahˇ mˇ lehˬ-euˬ tsawˇ haˬ deuˬ-euˬ tsawˇ myahˇ deuˬ tehꞈ-ehˇ, ngaˬ-euˬ sahˬ boꞈ laꞈ kʼoeˇ ngaˇ shiˆ byoˆ ma.

³⁴ Nymˬ-mˇ nawˇ gʼoꞈ ka-iˇ-awˇ, ngaˬ neh nawˬ-ahˇ mehˬ nehˬ-euˬ jawˇ duˬ-ahˇ, tsawˇ haˬ heu deuˬ-ahˇ sheuˬ gʼeh-awˬ. Ngaˬ-euˬ mˬ taˆ gʼaˬ kʼehˇ naw maꞈ-ahˇ sheuˬ gʼeh tehꞈ-a. Ehˇ kʼawꞈ, tsawˇ haˬ heu deuˬ iˬ baˇ mˇ gʼaˬ-euˬ miˇ neh, aˬ yawꞈ maꞈ-ahˇ ngaˇ ya kʼehˬ nehˬ-eu aˇ nah keuˆ le tehꞈ-a.”

³⁵ Kʼoeˇ naˇ, Sahˬpaˬ Miˬyehˇ neh Iˇsaˬleˬlaˆ tsawˇ haˬ deuˬ kʼoeˇ taˆ naˇ-eu gawˇ-eu jeˬ bi keuˆ le-euˬ meh. Aˬ jeˬ miˇ neh ehˇ naˇ, shuiˇ mawˇ neˇ mawˇ kawˇ maˬ tehˆ kʼoeˇ maˬ juˬ ni, Aˬloˬ-ahˇ aˬ yawꞈ maꞈ kaˬ naˬ-euˬ meh.