Doˆ-iˇ 30 - Akha

Yaw saw jeˬ doꞈ damˬ-eu lawˇ duˬ

¹ “Aˬkaˬshaˇ daˇ kawˬ yuˇ-awˇ, yaw saw jeˬ doꞈ damˬ-eu lawˇ duˬ tiˬ hmˬ jahˇ-awˬ.

² Tiˬ caˆ oeˬ bawˬ byah ni taꞈ-awˇ, yaw goˇ paw nyiˬ caˆ bi goˇ-awˬ. Laꞈ coeˇ oeˬ coeˇ-ahˇ tsoꞈ doˆ-eu uˬ coeˇ oeˬ kahˬ kʼawꞈ, tiˬ poˆ tehꞈ-ehˇ, lawˇ duˬ aˬ yawꞈ-ahˇ bi tsoꞈ tawꞈ-awˬ.

³ Lawˇ duˬ-euˬ uˬ dzo pyawˬ naˬ oeˬ pyawˬ luꞈ hawˇ-eu, uˬ coeˇ deuˬ-ahˇ maˇ jawˆ ni gʼeh-eu shuiˇ yaw-awˇ, lawˇ duˬ jawˬ jawˬ-ehˇ shuiˇ daˇ bahˇ bahˇ-awˬ.

⁴ Shuiˇ daˇ kʼahˇ nyiˬ kʼahˇ jahˇ-awˇ, kʼaˆ baꞈ kawˬ cawˬ ahˇ-awˇ baꞈ nya ni, lawˇ duˬ kʼoeˇ paˆ ma paˆ-ehˇ, shuiˇ daˇ bahˇ-euˬ laꞈ oˆ paw dzeˇ, laꞈ naˬ loꞈ-ehˇ jahˇ tsoꞈ-awˬ.

⁵ Aˬkaˬshaˇ daˇ kawˬ neh kʼaˆ baꞈ kawˬ jahˇ-awˇ, shuiˇ yaw-awˬ.

⁶ Dawˬ ma saˇ jaˇ bahˬ keuˆ-ahˇ lawˆ kaˬ taw paˆ taˬ-euˬ saˬ paˇ-euˬ laꞈ nyiˇ paw, lawˇ duˬ kʼoeˇ hmˬ bi jaˆ-awˬ. Kʼoeˇ tsahˇ-ahˇ ngaˇ naw maꞈ-ahˇ tahˬ puˬ le ma.

⁷ Yawˬ shawˬ na luꞈ, Aˬloˬ tsiˇ kʼmˬ laˆ saˆ doꞈ laˇ ngeh, lawˇ duˬ kʼoeˇ hmˬ kʼoeˇ taˆ, yaw saw jeˬ aˬ yawꞈ ya doꞈ taˬ meh.

⁸ Uˬ ciꞈ uˬ taw paw aˬ yawꞈ tsiˇ kʼmˬ laˆ saˆ doꞈ laˇ ngeh kʼawꞈ, kʼoeˇ loꞈ-ehˇ ya jahˇ meh. Mehˬ hu paw dehꞈ daˆ leꞈ-eu aˇ yamˬ laꞈ kʼoeˇ, yaw saw jeˬ doꞈ-awˇ damˬ-eu heu, tiˬ jawˇ-iˬ maˬ ya bi tsehˆ leˇ-a.

⁹ Maˬ doꞈ kʼmˬ-eu yaw saw jeˬ maˬ ehˇ, jeˬ zaˬ sehꞈ-awˇ lawˇ-eu jeˬ maˬ ehˇ, dzaˬ la gʼo cehˇ lawˇ-eu jeˬ maˬ ehˇ, lawˇ duˬ kʼoeˇ hmˬ kʼoeˇ taˆ maˬ ya jahˇ-a. Kʼoeˇ-euˬ kʼoeˇ taˆ aˬ gaꞈ dzaˇ uiˇ shehˆ daˆ-awˇ maˬ ya lawˇ-a.

¹⁰ Iˬ baˇ ya buˬ-iˇ ni, tiˬ kʼoꞈ tiˬ poˆ sehꞈ-awˇ lawˇ-euˬ jeˬ zaˬ-eu shiˬ yuˇ-awˇ, lawˇ duˬ kʼoeˇ hmˬ-euˬ uˬ coeˇ oeˬ kahˬ-ahˇ toeˬ lehꞈ-eu laꞈ kʼoeˇ, lawˇ duˬ shawˇ-eu zahˇ Aˬloˬ ya mˇ meh. Mehˬ hu paw dehꞈ daˆ leꞈ-eu aˇ yamˬ laꞈ kʼoeˇ, yawˬ kʼoꞈ na luꞈ kʼoeˇ loꞈ-ehˇ ya mˇ meh. Lawˇ duˬ heu hmˬ-aˬ, maˇ maˇ ni shawˇ jehˆ ni gʼeh-awˇ, Sahˬpaˬ Miˬyehˇ pyeuꞈ-eu ngaˬ-ahˇ damˬ nehˬ taˬ-euˬ lawˇ duˬ ya bi pyeuꞈ meh.”

Sahˬpaˬ Miˬyehˇ jawˇ-eu Sehˬ gʼawˆ gʼaˇ duˬ doˆ-eu ka-eu

¹¹ Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

¹² “Naw maꞈ Iˇsaˬleˬlaˆ tsawˇ haˬ deuˬ-euˬ tsawˇ seˬ yuˇ luꞈ ngeh, tsawˇ haˬ yawˬ gʼaˬ na luꞈ, yawˬ ha-euˬ gʼawˇ mawˇ shaˬ zahˬ guˆ gaˆ maˬ ya puˬ ni, yawˬ ha gʼaˇ duˬ yawˬ ha aˇ poeˬ ya dawˆ meh.

¹³ Tsawˇ seˬ yuˇ ngeh tsawˇ myahˇ kʼaˇ dawˆ-euˬ tsawˇ haˬ dawˬ tawˆ luꞈ, yawˬ ha-ahˇ kʼaˇ doˇ-eu loꞈ-ehˇ pyuˇ ya dawˆ meh. Tsawˇ haˬ yawˬ gʼaˬ na luꞈ, kʼoeˇ loꞈ-ehˇ pyuˇ dawˆ-awˇ, ngaˬ-ahˇ ya damˬ meh.

¹⁴ Nyiˬ tseˇ kʼoꞈ laꞈ taˆ paw-euˬ kʼaˬ dzeˇ zaˬ dawˬ tawˆ luꞈ, tsawˇ seˬ gʼoˆ ngeh tsawˇ myahˇ ya dawˆ-awˇ, yawˬ ha-ahˇ doˇ-eu pyuˇ kʼawꞈ, tiˬ poˆ tehꞈ-ehˇ ya dawˆ meh.

¹⁵ Yawˬ ha-euˬ gʼawˇ mawˇ gʼaˇ duˬ pyuˇ dawˆ ngeh, smˇ muiˬ deuˬ maˬ ya dawˆ dzehˬ-ehˇ, iˇ shaˬ deuˬ kʼawꞈ maˬ ya dawˆ teˬ-a.

¹⁶ Iˇsaˬleˬlaˆ tsawˇ haˬ deuˬ jawˇ gaˇ, pyuˇ heu deuˬ taꞈ uiˬ-awˇ, ngaˇ jawˇ-eu sehˬ gʼawˆ gʼaˇ duˬ zmˬ-awˬ. Heu-aˬ, aˬ yawꞈ maꞈ neh, yawˬ ha-euˬ gʼawˇ mawˇ gʼaˇ duˬ taꞈ uiˬ taˬ-euˬ pyuˇ pyeuꞈ-awˇ, aˬ yawꞈ maꞈ-ahˇ ngaˇ noeˬ keuˆ-eu laꞈ kʼoeˇ haw piˇ nehˬ ma.”

Guiˬ shuiˇ sehˇ byehˇ

¹⁷ Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

¹⁸ “Guiˬ shuiˇ aˬ kuiˇ tsoꞈ-eu guiˬ shuiˇ sehˇ byehˇ tiˬ hmˬ jahˇ-awˬ. Sehˇ byehˇ kʼoeˇ-ahˇ, sehˬ gʼawˆ hawˇ-eu lawˇ duˬ-euˬ yaw kaˬ-ahˇ bi jaˆ-awˇ, iˇ cuꞈ shehˆ ahˇ taˬ-awˬ.

¹⁹ Aˬloˬ hawˇ-eu aˬ yawꞈ-euˬ aˬ li deuˬ, iˇ cuꞈ kʼoeˇ neh aˬ kuiˇ aˬ laꞈ ya dzuiꞈ shawˇ meh.

²⁰ Sehˬ gʼawˆ-ahˇ uˇ leˇ ngeh maˬ ehˇ, dzaˬ dzaˬ dawˇ dawˇ lawˇ-eu gʼaˇ duˬ, lawˇ duˬ dawˬ peh le ngeh maˬ ehˇ, aˬ yawꞈ maꞈ maˬ ya shiˇ-eu gʼaˇ duˬ, aˬ myah luꞈ kʼoeˇ loꞈ-ehˇ ya dzuiꞈ shawˇ meh.

²¹ Aˬ yawꞈ maꞈ maˬ ya shiˇ-eu gʼaˇ duˬ, aˬ kuiˇ aˬ laꞈ ya dzuiꞈ shawˇ-eu jeˬ pyeuꞈ-eu meh. Heu-aˬ, aˬ yawꞈ maꞈ hawˇ-eu aˬ yawꞈ maꞈ-euˬ zaˬ deuˬ uˆ deuˬ mˬ maˬ maˬ byaˆ zaˇ ziˇ ya mˇ-eu zahˇ sahˇ kʼoꞈ tiˬ jeˬ meh.”

Tseˇ doˆ-euˬ deuˬ-ahˇ lehꞈ-eu tsiˇ

²² Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

²³ “Muiˬ dui dui-eu yaw saw jeˬ pyeuꞈ-eu, muˇ laˬ dzaˇ uiˇ smˇ jawꞈ-i koꞈ kaˇ, saw dui dui-eu cawˬ kʼaˬ cawˬ piˇ tiˬ jawꞈ-i yehꞈ kaˇ, saw dui dui-eu pawˬ coeˇ tiˬ jawꞈ-i yehꞈ kaˇ,

²⁴ cawˬ kʼaˬ cawˬ piˇ yawˬ jeˬ yawˬ smˇ jawꞈ-i koꞈ kaˇ, heu deuˬ-ahˇ, kaˇ daˬ-ahˇ tsaˬ ni saˆ byah-awˇ, saˬ loˬ tsiˇ maˇ tsaꞈ oeˬ tsaꞈ lehˬ hmˬ taˬ-awˬ.

²⁵ Tseˇ doˆ-euˬ deuˬ-ahˇ lehꞈ-eu tsiˇ pyeuꞈ laˇ ni, heu deuˬ dawˬ tawˆ luˬ keuˬ-awˬ.

²⁶ Ngaˇ jawˇ-eu sehˬ gʼawˆ maˬ ehˇ, dawˬ ma saˇ jaˇ bahˬ keuˆ maˬ ehˇ,

²⁷ hawˬ jeh hawˇ-eu kʼmˬ maˬ oeˬ tsaꞈ deuˬ maˬ ehˇ, tsiˇ kʼmˬ doꞈ taˬ duˬ hawˇ-eu kʼoeˇ gaˇ zmˬ-eu keu ka deuˬ maˬ ehˇ, yaw saw jeˬ doꞈ-awˇ damˬ-eu lawˇ duˬ maˬ ehˇ,

²⁸ miˬ dzaˬ dzah puiˆ-awˇ lawˇ-eu jeˬ lawˇ-eu lawˇ duˬ maˬ ehˇ, kʼoeˇ gaˇ zmˬ-eu keu ka deuˬ maˬ ehˇ, aˬ kuiˇ aˬ laꞈ dzuiꞈ shawˇ duˬ sehˇ byehˇ hawˇ-eu sehˇ byehˇ aˬ kuiˇ maˬ ehˇ, kʼoeˇ deuˬ dawˬ tawˆ luꞈ-ahˇ tsiˇ lehꞈ ngeh, tsiˇ kʼoeˇ neh lehꞈ-awˬ.

²⁹ Myawˬ kʼoeˇ deuˬ-ahˇ, kʼoeˇ loꞈ-ehˇ jahˇ-awˇ a nehˬ ngeh, maˇ maˇ ni muiˬ laˇ shawˇ laˇ-awˇ, kʼoeˇ gaˇ kʼaˇ toeˬ ciˆ leˇ-eu tsawˇ haˬ aˬ geu gʼaˬ maˬ kaˬ, nui jeˬ aˬ geu jeˬ maˬ kaˬ, yaw muiˬ yaw shawˇ-euˬ baoˬ kʼoeˇ baˬ da neh, guˬ leˇ tehꞈ-a.

³⁰ Kʼoeˇ naˇ, Aˬloˬ hawˇ-eu aˬ yawꞈ-euˬ aˬ li deuˬ-ahˇ tsiˇ lehꞈ-awˇ, ngaˬ-euˬ gaˇ mˇ-eu piˇ ma bi geuꞈ-eu gʼaˇ duˬ, aˇ yaˬ biꞈ nehˬ-awˬ.

³¹ Iˇsaˬleˬlaˆ tsawˇ haˬ deuˬ-ahˇ nawˇ heu loꞈ-ehˇ ehˇ nehˬ-awˬ. ‘Tseˇ doˆ-euˬ deuˬ-ahˇ lehꞈ-eu muiˬ-eu shawˇ-eu tsiˇ kʼoeˇ jeˬ-aˬ, mehˬ hu paw dehꞈ daˆ leꞈ-eu aˇ yamˬ laꞈ kʼoeˇ, ngaˬ-euˬ gʼaˇ duˬ aˬ myah luꞈ ya zmˬ-eu tsiˇ pyeuꞈ-eu meh.

³² Tsiˇ kʼoeˇ jeˬ-ahˇ, piˇ ma maˬ ngeuˇ-eu tsawˇ haˬ kʼoeˇ taˆ maˬ ya shehˆ daˆ-a. Tsiˇ kʼoeˇ jahˇ doˆ ngeh keuˬ-euˬ myawˬ kʼoeˇ deuˬ paˇ keuˬ-awˇ, kʼoeˇ gaˇ duˇ-eu tsiˇ nui jeˬ maˬ ya jahˇ doˆ-a. Kʼoeˇ-aˬ, muiˬ-eu shawˇ-eu jeˬ pyeuꞈ-eu baˬ da neh, muiˬ-eu shawˇ-eu jeˬ loꞈ-ehˇ, naw maꞈ ya taˬ huiˬ meh.

³³ Tsiˇ kʼoeˇ jeˬ-ahˇ duˇ-eu tsiˇ jahˇ doˆ-euˬ tsawˇ haˬ aˬ geu gʼaˬ maˬ kaˬ, piˇ ma maˬ ngeuˇ-eu tsawˇ haˬ tiˬ gʼaˬ na kʼoeˇ taˆ tsiˇ kʼoeˇ shehˆ daˆ nehˬ-euˬ tsawˇ haˬ aˬ geu gʼaˬ maˬ kaˬ, ngaˬ-euˬ tsawˇ haˬ lehˇ ngaˇ maˬ paˇ sawˇ nehˬ meh’ lehˇ ehˇ nehˬ-awˬ.”

Doꞈ damˬ-eu yaw saw jeˬ

³⁴ Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh. “Saw dui dui-eu yaw saw jeˬ pyeuꞈ-eu, muˇ laˬ, aˬ nyoˆ nyoˆ kʼawꞈ, gaˬ baˬ naˬ hawˇ-eu shawˇ jehˆ ni gʼeh-eu lawˇ baˬ heu deuˬ tiˬ kawˆ myaˆ ni yuˇ-awˬ.

³⁵ Kʼoeˇ deuˬ yuˇ-awˇ, gʼawˇ mawˇ-ahˇ bi saw-eu tsiˇ yaw saw jeˬ jahˇ-eu loꞈ-ehˇ, doꞈ damˬ-eu yaw saw jeˬ jahˇ doˆ-awˬ. Muiˬ laˇ shawˇ laˇ-awˇ, shawˇ jehˆ ni bi pyeuꞈ-iˇ-eu gʼaˇ duˬ, saˬ deuꞈ ui cuiˆ dawˆ-awˬ.

³⁶ Kʼoeˇ loꞈ-ehˇ jahˇ gʼaˬ ngeh, ui cuiˆ yuˇ doˆ-awˇ, kʼaˬ lehˇ loꞈ-ehˇ tahˬ loeˇ-awˬ. Tahˬ loeˇ gʼaˬ-euˬ kʼoeˇ ngaˇ jawˇ-eu sehˬ gʼawˆ laꞈ kʼoeˇ yuˇ laꞈ-awˇ, dawˬ ma saˇ jaˇ bahˬ keuˆ dawˬ peh byaˆ shehˬ-awˬ. Doꞈ damˬ-eu yaw saw jeˬ heu-ahˇ, maˇ maˇ ni muiˬ-eu shawˇ-eu jeˬ loꞈ-ehˇ taˬ huiˬ taˬ mahˇ-awˬ.

³⁷ Doꞈ damˬ-eu yaw saw jeˬ heu jahˇ doˆ gaˇ keuˬ-euˬ myawˬ deuˬ yuˇ-awˇ, kʼoeˇ gaˇ duˇ-eu yaw saw jeˬ naw maꞈ maˬ ya jahˇ geuꞈ-a. Doꞈ damˬ-eu yaw saw jeˬ kʼoeˇ-aˬ, ngaˬ-ahˇ damˬ nehˬ gʼaˬ-euˬ muiˬ-eu shawˇ-eu jeˬ pyeuꞈ-eu meh lehˇ naw maꞈ siˬ nya-awˇ, taˬ huiˬ taˬ mahˇ-awˬ.

³⁸ Tsawˇ haˬ tiˬ gʼaˬ na, kʼoeˇ gaˇ duˇ-eu yaw saw jeˬ jahˇ-awˇ, yawˬ ha-euˬ gʼawˇ mawˇ yaw saw bi saw-eu gʼaˇ duˬ zmˬ naˇ, tsawˇ haˬ kʼoeˇ gʼaˬ-ahˇ ngaˬ-euˬ tsawˇ haˬ lehˇ maˬ paˇ sawˇ ma.”