Doˆ-iˇ 29 - Akha

Aˬloˬ hawˇ-eu aˬ yawꞈ-euˬ aˬ li deuˬ-ahˇ piˇ ma aˇ yaˬ biꞈ-eu gaˇ kawˆ mehˬ-euˬ tsoˆ-euˬ

¹ “Aˬloˬ hawˇ-eu aˬ yawꞈ-euˬ aˬ li deuˬ, ngaˬ-eu gaˇ mˇ-eu piˇ ma geuꞈ-eu gʼaˇ duˬ, nawˇ heu loꞈ-ehˇ jahˇ-awˇ ya a nehˬ meh. Maˇ byawꞈ maˬ baw-eu mawˇ neˇ mawˇ gaw zaˬ tiˬ mawˇ hawˇ-eu yawˇ aˬ buˬ tiˬ mawˇ yuˇ-awˬ.

² Muiˬ dui dui-eu cehˇ meu yuˇ-awˇ, dehˬ tseˬ maˬ keuˬ ni, saˬ loˬ tsiˇ neh kaˬ muˇ jahˇ-awˬ. Tsiˇ maˬ keuˬ-eu kaˬ muˇ deuˬ kʼawꞈ jahˇ-awˇ, tsiˇ lehꞈ-euˬ kaˬ muˇ aˇ yaˆ yaˆ zaˬ deuˬ kʼawꞈ jahˇ-awˬ.

³ Mawˇ neˇ mawˇ gaw zaˬ kʼoeˇ mawˇ hawˇ-eu yawˇ aˬ buˬ kʼoeˇ mawˇ ngaˬ-ahˇ naw maꞈ lawˇ ngeh, kaˬ muˇ kʼoeˇ deuˬ kʼawꞈ, kʼa sa-ahˇ dawˆ ahˇ-awˇ lawˇ-awˬ.

⁴ “Aˬloˬ hawˇ-eu aˬ yawꞈ-euˬ aˬ li deuˬ-ahˇ, ngaˇ jawˇ-eu sehˬ gʼawˆ gʼoˆ kʼehˬ-ahˇ sheuˬ laꞈ-awˇ, iˇ cuꞈ dzuiꞈ-awˇ gʼawˇ mawˇ shawˇ-eu zahˇ jahˇ-awˬ lehˇ ehˇ nehˬ-awˬ.

⁵ Piˇ ma-euˬ dm gʼaˬ dm lmˇ deuˬ pyeuꞈ-eu, laꞈ kʼoeˇ dm-eu pehˇ kʼahˬ, pehˇ kʼahˬ pehˇ nymˇ, kʼoeˇ taˆ dm daˆ-eu pehˇ kʼahˬ pehˇ mahˇ, kʼahˬ-ahˇ dehˬ daˬ duˬ hawˇ-eu, joꞈ paꞈ, heu deuˬ Aˬloˬ-ahˇ bi dm-awˬ.

⁶ Aˬ yawꞈ-ahˇ uˬ dzahˬ bi dzahˬ-awˇ, ‘Sahˬpaˬ Miˬyehˇ-ahˇ a nehˬ taˬ-euˬ’ lehˇ boꞈ taˬ-euˬ muiˬ-eu shawˇ-eu pehˇ gʼawˆ kʼoeˇ hmˬ uˬ dzahˬ-ahˇ paꞈ tawꞈ nehˬ-awˬ.

⁷ Kʼoeˇ naˇ, tseˇ doˆ-euˬ tsawˇ haˬ-ahˇ lehꞈ-eu tsiˇ yuˇ-awˇ, aˬ yawꞈ-euˬ uˬ duˬ-ahˇ shehˆ daˆ-awˇ, lehꞈ nehˬ-awˬ.

⁸ “Aˬ yawꞈ-euˬ aˬ li deuˬ sheuˬ laꞈ-awˇ, pehˇ kʼahˬ bi dm-awˬ.

⁹ Aˬ yawꞈ maꞈ-euˬ joꞈ-ahˇ joꞈ tsiˬ bi paꞈ-awˇ, uˬ duˬ-ahˇ uˬ kʼoˆ bi kʼoˆ-awˬ. Naw maˬ kʼoeˇ loꞈ-ehˇ jahˇ-awˇ, Aˬloˬ hawˇ-eu aˬ yawꞈ-euˬ aˬ li deuˬ-ahˇ aˇ yaˬ ya biꞈ meh. Aˬ yawꞈ maꞈ hawˇ-eu, aˬ yawꞈ maꞈ-euˬ zaˬ deuˬ uˆ deuˬ-aˬ, mˬ maˬ maˬ byaˆ zaˇ ziˇ, ngaˬ-euˬ piˇ ma ya geuꞈ meh.

¹⁰ “Mawˇ neˇ mawˇ gaw kʼoeˇ mawˇ-ahˇ, ngaˇ jawˇ-eu sehˬ gʼawˆ mehˬ shi tsahˇ laꞈ-awˇ, mawˇ neˇ kʼoeˇ mawˇ-euˬ uˬ duˬ kʼoeˇ taˆ aˬ laꞈ cawˬ daˆ-awˬ lehˇ Aˬloˬ hawˇ-eu aˬ yawꞈ-euˬ aˬ li deuˬ-ahˇ ehˇ nehˬ-awˬ.

¹¹ Muiˬ-eu shawˇ-eu ngaˬ-euˬ jawˇ duˬ pyeuꞈ-eu sehˬ gʼawˆ gʼoˆ kʼehˬ kʼoeˇ tsahˇ-ahˇ, mawˇ neˇ mawˇ gaw kʼoeˇ mawˇ sehꞈ-awˬ.

¹² Mawˇ neˇ kʼoeˇ mawˇ-euˬ shiˬ ui cuiˆ yuˇ-awˇ, nawˬ-euˬ laꞈ noeˇ neh lawˇ duˬ-euˬ uˬ coeˇ-ahˇ lehꞈ-awˬ. Dzeˇ-eu shiˬ deuˬ yuˇ-awˇ, lawˇ duˬ dawˬ pehˬ-ahˇ shehˬ-awˬ.

¹³ Kʼoeˇ naˇ, tsahˬ nahˬ uˇ jiˇ-ahˇ kʼaˇ dawꞈ-eu tsiˇ maˬ ehˇ, muiˬ dui dui-eu shaˬ tsahˬ ui cuiˆ maˬ ehˇ, gʼawˬ siˬ nyiˬ siˬ hawˇ-eu gʼawˬ siˬ-ahˇ dawꞈ-eu tsiˇ maˬ ehˇ, yuˇ-awˇ, lawˇ duˬ kʼoeˇ taˆ puiˇ-awˇ, ngaˬ-ahˇ lawˇ-awˬ.

¹⁴ Ehˇ kʼawꞈ, mawˇ neˇ kʼoeˇ mawˇ-euˬ shaˬ jiˇ, baˆ kʼoˆ hawˇ-eu, baw uˇ baw ma deuˬ-ahˇ sehˬ gʼawˆ-euˬ laꞈ nyiˇ paw keuˬ puiˆ-awˬ. Heu-aˬ, piˇ ma deuˬ-euˬ iˬ baˇ shawˇ-eu lawˇ-euˬ jeˬ pyeuꞈ-eu meh.

¹⁵ “Yawˇ aˬ buˬ tiˬ mawˇ tsahˇ-awˇ, Aˬloˬ hawˇ-eu aˬ yawꞈ-euˬ aˬ li deuˬ-ahˇ, yawˇ kʼoeˇ mawˇ-euˬ uˬ duˬ kʼoeˇ taˆ aˬ laꞈ cawˬ daˆ-awˬ lehˇ ehˇ nehˬ-awˬ.

¹⁶ Yawˇ kʼoeˇ mawˇ sehꞈ-awˇ, lawˇ duˬ-euˬ oeˬ paw pyawˬ luꞈ-ahˇ, yawˇ zaˬ shiˬ shehˆ-awˬ.

¹⁷ Kʼoeˇ naˇ, yawˇ kʼoeˇ mawˇ-ahˇ pyaˆ-awˇ deuˆ-awˬ. Tsahˬ nahˬ uˇ jiˇ hawˇ-eu aˬ kuiˇ tsiˬ shawˇ-awˇ, shaˬ jiˇ kʼoeˇ taˆ bi jaˆ-awˬ.

¹⁸ Yawˇ kʼoeˇ mawˇ mawˇ lah-ehˇ, lawˇ duˬ kʼoeˇ taˆ puiˆ-awˬ. Heu-aˬ, dzaˬ dzaˬ dawˇ dawˇ lawˇ-eu jeˬ pyeuꞈ-awˇ, lawˇ-euˬ yaw saꞈ kʼoeˇ-ahˇ ngaˇ nui ma tsaˬ-eu ma.

¹⁹ “Yawˇ aˬ buˬ yawˬ mawˇ yawˬ paˇ tsahˇ laꞈ-awˬ. Kʼoeˇ mawˇ-aˬ, a nehˬ-eu jeˬ gʼaˇ duˬ pyeuꞈ-eu meh. Yawˇ kʼoeˇ mawˇ-euˬ uˬ duˬ kʼoeˇ taˆ aˬ laꞈ cawˬ daˆ-awˬ lehˇ, Aˬloˬ hawˇ-eu aˬ yawꞈ-euˬ aˬ li deuˬ-ahˇ ehˇ nehˬ-awˬ.

²⁰ Yawˇ kʼoeˇ mawˇ sehꞈ gʼaˬ naˇ, shiˬ ui cuiˆ yuˇ-awˇ, Aˬloˬ hawˇ-eu aˬ yawꞈ-euˬ aˬ li deuˬ-euˬ aˇ maˇ paw naˬ paꞈ naˬ dzaˬ-ahˇ maˬ ehˇ, aˇ maˇ laꞈ laꞈ ma-ahˇ maˬ ehˇ, aˇ maˇ kuiˇ kuiˇ ma-ahˇ maˬ ehˇ, lehꞈ-awˬ. Dzeˇ-eu shiˬ deuˬ yuˇ-awˇ, lawˇ duˬ-euˬ oeˬ paw pyawˬ luꞈ-ahˇ shehˆ-awˬ.

²¹ Lawˇ duˬ kʼoeˇ taˆ jaˆ-eu shiˬ ui cuiˆ hawˇ-eu, tseˇ doˆ-euˬ tsawˇ haˬ-ahˇ lehꞈ-eu tsiˇ ui cuiˆ yuˇ-awˇ, Aˬloˬ hawˇ-eu aˬ yawꞈ-euˬ aˬ li deuˬ-ahˇ maˬ ehˇ, aˬ yawꞈ maꞈ-euˬ dm gʼaˬ dm lmˇ deuˬ-ahˇ maˬ ehˇ, byaˆ shehˬ-awˬ. Kʼoeˇ loꞈ-ehˇ jahˇ-eu jeˬ-aˬ, Aˬloˬ maˬ ehˇ, aˬ yawꞈ-euˬ aˬ li deuˬ maˬ ehˇ, aˬ yawꞈ maꞈ-euˬ dm gʼaˬ dm lmˇ deuˬ maˬ ehˇ, ngaˬ-ahˇ a nehˬ-eu jeˬ pyeuꞈ-eu meh.

²² “Yawˇ aˬ buˬ kʼoeˇ mawˇ-euˬ tsiˇ maˬ ehˇ, tsiˇ dawꞈ myaˬ-eu dawˬ miˬ maˬ ehˇ, tsahˬ nahˬ uˇ jiˇ deuˬ-ahˇ dawꞈ-eu tsiˇ maˬ ehˇ, muiˬ dui dui-eu shaˬ tsahˬ ui cuiˆ maˬ ehˇ, gʼawˬ siˬ nyiˬ siˬ hawˇ-eu gʼawˬ siˬ-ahˇ dawꞈ-eu tsiˇ maˬ ehˇ, saˬ pyaˬ aˇ maˇ paw pyaˬ maˬ ehˇ, yehˬ doˆ-awˬ.

²³ Ngaˬ-ahˇ lawˇ nehˬ-eu kʼa sa laꞈ kʼoeˇ ahˇ-eu kaˬ muˇ kʼoeˇ, tiˬ jeˬ-euˬ tiˬ siˬ yuˇ doˆ-awˬ. Saˬ loˬ tsiˇ keuˬ-eu kaˬ muˇ tiˬ siˬ, maˬ keuˬ-eu jeˬ tiˬ siˬ hawˇ-eu, kaˬ muˇ aˇ yaˆ yaˆ zaˬ tiˬ siˬ yuˇ doˆ-awˬ.

²⁴ Dzaˬ dzaˬ dawˇ dawˇ heu deuˬ dawˬ tawˆ luꞈ, Aˬloˬ hawˇ-eu aˬ yawꞈ-euˬ aˬ li deuˬ bi yuˇ-awˇ, muiˬ dui dui-eu laꞈ sawˬ damˬ-eu loꞈ-ehˇ ngaˬ-ahˇ damˬ-awˬ lehˇ, aˬ yawꞈ maꞈ-ahˇ ehˇ nehˬ-awˬ.

²⁵ Kʼoeˇ naˇ, aˬ yawꞈ maꞈ yuˇ luꞈ-eu kʼoeˇ deuˬ yuˇ doˆ-awˇ, miˬ dzaˬ-ahˇ dzah puiˆ-awˇ lawˇ-eu jeˬ lawˇ taˬ-euˬ kʼoeˇ taˆ lawˇ daˆ gʼeh-awˬ. Lawˇ-eu heu jeˬ-aˬ, dzaˬ dzaˬ dawˇ dawˇ lawˇ-eu jeˬ pyeuꞈ-awˇ, kʼoeˇ-euˬ yaw saꞈ-ahˇ ngaˇ nui ma tsaˬ-eu meh.

²⁶ “Yawˇ heu mawˇ-euˬ kʼahˬ yuˇ-awˇ, muiˬ dui dui-eu laꞈ sawˬ loꞈ-ehˇ, ngaˬ-ahˇ damˬ-awˬ. Heu-aˬ, nawˬ-euˬ shaˬ bymˇ meh.

²⁷ “Piˇ ma-ahˇ aˇ yaˬ biꞈ ngeh sehꞈ-eu yawˇ aˬ buˬ-euˬ kʼahˬ hawˇ-euˬ shaˬ pyaˬ-ahˇ, muiˬ dui dui-eu laꞈ sawˬ loꞈ-ehˇ ngaˬ-ahˇ ya damˬ meh. Kʼoeˇ-aˬ, piˇ ma deuˬ-euˬ shaˬ bymˇ meh.

²⁸ Ngaˬ-euˬ tsawˇ haˬ deuˬ, cawˬ cawˬ taꞈ-eu lawˇ-eu jeˬ lawˇ ngeh lawˇ nehˬ-eu jeˬ zaˬ-euˬ kʼahˬ hawˇ-eu shaˬ pyaˬ-aˬ, piˇ ma deuˬ-euˬ shaˬ bymˇ pyeuꞈ-eu meh. Heu-aˬ, tiˬ jawˇ-iˬ maˬ paˇ laˇ nya-eu ngaˬ neh noeˬ tsehˆ-euˬ jeˬ pyeuꞈ-eu ma. Heu-aˬ, Sahˬpaˬ Miˬyehˇ pyeuꞈ-eu ngaˬ-ahˇ, ngaˬ-euˬ tsawˇ haˬ deuˬ neh biꞈ nehˬ laˬ-euˬ laꞈ sawˬ pyeuꞈ-eu meh.

²⁹ “Aˬloˬ ziˇ jiˇ ngeh, aˬ yawꞈ dm-euˬ piˇ ma-euˬ dm gʼaˬ dm lmˇ deuˬ, aˬ yawꞈ-euˬ aˬ li deuˬ-ahˇ ya biꞈ taˬ yaꞈ-awˇ, aˬ yawꞈ maꞈ-ahˇ piˇ ma aˇ yaˬ biꞈ ngeh ya bi dm-eu meh.

³⁰ Aˬloˬ-euˬ aˬ li deuˬ laꞈ kʼoeˇ, Aˬloˬ-euˬ piˇ ma aˇ yaˬ yuˇ-awˇ, ngaˇ jawˇ-eu sehˬ gʼawˆ-ahˇ uˇ leˇ-eu laꞈ kʼoeˇ, muiˬ-eu shawˇ-eu jawˇ duˬ-ahˇ zahˇ jahˇ leˇ-eu gʼaˬ-aˬ, shiꞈ nah keuˆ ni dm gʼaˬ dm lmˇ kʼoeˇ ya dm meh.

³¹ “Aˬloˬ hawˇ-eu aˬ yawꞈ-euˬ aˬ li deuˬ-ahˇ aˇ yaˬ biꞈ gaˇ geuꞈ-eu gʼaˇ duˬ sehꞈ-eu yawˇ aˬ buˬ kʼoeˇ mawˇ-euˬ shaˬ jiˇ yuˇ-awˇ, muiˬ-eu shawˇ-eu jawˇ duˬ tiˬ tsahˇ-ahˇ caꞈ-awˬ.

³² Shaˬ jiˇ kʼoeˇ hawˇ-eu kʼa sa laꞈ kʼoeˇ dzeˇ-eu kaˬ muˇ-ahˇ, ngaˇ jawˇ-eu sehˬ gʼawˆ gʼoˆ kʼehˬ-ahˇ aˬ yawꞈ maꞈ ya dzaˬ meh.

³³ Iˬ baˇ pyehˬ-eu hawˇ-eu aˇ yaˬ biꞈ-eu zahˇ jahˇ gaˇ geuꞈ-eu dzaˬ dzaˬ dawˇ dawˇ deuˬ aˬ yawꞈ maꞈ dzaˬ nya meh. Piˇ ma deuˬ tehꞈ-ehˇ dzaˇ kʼoeˇ deuˬ dzaˬ kʼmˬ-eu meh. Aˬ jeˬ miˇ neh ehˇ naˇ, kʼoeˇ-aˬ, muiˬ-eu shawˇ-eu dzaˇ pyeuꞈ-eu meh.

³⁴ Uˬ shawˬ paw keuˆ ni, maˬ dzaˬ jiˇ-ehˇ dzeˇ laˇ taˬ-euˬ shaˬ jiˇ hawˇ-eu kaˬ muˇ jaˆ naˇ, miˬ dzaˬ ya keuˬ dzeh meh. Dzaˇ kʼoeˇ-aˬ, muiˬ-eu shawˇ-eu dzaˇ pyeuꞈ-eu miˇ neh maˬ dzaˬ kʼmˬ-a.

³⁵ “Ngaˇ nawˬ-ahˇ yaw duˬ duˬ-ehˇ dawˬ biꞈ taˬ-euˬ loꞈ-ehˇ, Aˬloˬ hawˇ-eu aˬ yawꞈ-euˬ aˬ li deuˬ-ahˇ aˇ yaˬ biꞈ-eu bawˬ-iˬ shiꞈ nah keuˆ ni jahˇ-awˬ.

³⁶ Iˬ baˇ pyehˬ-eu lawˇ-eu jeˬ gʼaˇ duˬ, aˬ yawꞈ nah yawꞈ mawˇ neˇ mawˇ gaw tiˬ mawˇ sehꞈ-awˇ lawˇ-awˬ. Kʼoeˇ loꞈ-ehˇ jahˇ-eu jeˬ-aˬ, lawˇ duˬ-ahˇ bi shawˇ laˇ-eu meh. Kʼoeˇ naˇ, lawˇ duˬ kʼoeˇ muiˬ laˇ shawˇ laˇ ni, saˬ loˬ tsiˇ lehꞈ nehˬ-awˬ.

³⁷ Shiꞈ nah keuˆ ni, aˬ yawꞈ nah yawꞈ kʼoeˇ loꞈ-ehˇ jahˇ-awˬ. Kʼoeˇ ngeh, lawˇ duˬ kʼoeˇ muiˬ laˇ shawˇ laˇ-awˇ, kʼoeˇ gaˇ kʼaˇ toeˬ ciˆ leˇ-eu aˬ geu gʼaˬ maˬ kaˬ, aˬ geu jeˬ maˬ kaˬ, muiˬ-eu shawˇ-eu jeˬ-euˬ baoˬ baˬ da neh, guˬ leˇ tehꞈ-a.

Aˬ yawꞈ nah yawꞈ lawˇ-eu jeˬ

³⁸ “Heu naˇ, mehˬ hu paw dehꞈ daˆ leꞈ-eu aˇ yamˬ laꞈ kʼoeˇ, nyiˬ kʼoꞈ byah laˇ-euˬ yawˇ zaˬ tiˬ mawˇ lawˇ duˬ kʼoeˇ taˆ yawˬ nah na luꞈ ya lawˇ meh.

³⁹ Uˬ shawˬ paw tiˬ mawˇ hawˇ-eu, uˬ ciꞈ paw tiˬ mawˇ ya lawˇ meh.

⁴⁰ Yaw beh lawˇ-euˬ yawˇ zaˬ kʼoeˇ mawˇ nehˬ-ehˇ, saˬ loˬ tsiˇ maˇ tsaꞈ nyiˬ tsaꞈ keuˬ taˬ-euˬ muiˬ-eu cehˇ meu tiˬ pehˬ ya lawˇ ahˇ meh. Aˬ gaꞈ dzaˇ uiˇ maˇ tsaꞈ kʼawꞈ tiˬ tsaꞈ shehˆ-awˇ ya lawˇ meh.

⁴¹ Yawˇ zaˬ yawˬ mawˇ yawˬ-ahˇ uˬ ciꞈ uˬ taw paw lawˇ-awˬ. Cehˇ meu, saˬ loˬ tsiˇ hawˇ-eu, aˬ gaꞈ dzaˇ uiˇ kʼawꞈ, uˬ shawˬ paw poˆ lawˇ ngeh loꞈ-ehˇ lawˇ ahˇ-awˬ. Kʼoeˇ-aˬ, Sahˬpaˬ Miˬyehˇ pyeuꞈ-eu ngaˬ-ahˇ lawˇ-eu dzaˬ dzaˬ dawˇ dawˇ lawˇ-eu jeˬ pyeuꞈ-awˇ, kʼoeˇ-euˬ yaw saꞈ-ahˇ, ngaˇ nui ma tsaˬ-eu ma.

⁴² Mehˬ hu paw dehꞈ daˆ leꞈ-eu aˇ yamˬ laꞈ kʼoeˇ, ngaˬ-euˬ mehˬ shi, ngaˇ jawˇ-eu sehˬ gʼawˆ gʼoˆ kʼehˬ-ahˇ, aˬ myah luꞈ ya lawˇ meh. Kʼoeˇ gaˇ, ngaˬ-euˬ tsawˇ haˬ-ahˇ ngaˇ tahˬ puˬ le-awˇ, nawˬ-ahˇ ngaˇ dawˬ ngehˬ cawˬ ma.

⁴³ Kʼoeˇ gaˇ, Iˇsaˬleˬlaˆ tsawˇ haˬ deuˬ-ahˇ ngaˇ tahˬ puˬ-awˇ, ngaˬ-euˬ yaw shehꞈ baˬ da neh, jawˇ duˬ kʼoeˇ tsahˇ muiˬ laˇ shawˇ laˇ tehꞈ-a.

⁴⁴ Sehˬ gʼawˆ hawˇ-eu lawˇ duˬ-ahˇ ngaˇ bi muiˬ bi shawˇ laˇ-awˇ, Aˬloˬ hawˇ-eu aˬ yawꞈ-euˬ aˬ li deuˬ-ahˇ, ngaˬ-euˬ gaˇ mˇ-eu piˇ ma bi geuꞈ-eu gʼaˇ duˬ, ngaˇ tseˇ doˆ ma.

⁴⁵ Iˇsaˬleˬlaˆ tsawˇ haˬ deuˬ nehˬ-ehˇ ngaˇ jawˇ-awˇ, ngaˇ aˬ yawꞈ maꞈ-euˬ Miˬyehˇ pyeuꞈ tehꞈ-a.

⁴⁶ Aˬ yawꞈ maꞈ nehˬ-ehˇ ngaˇ ya jawˇ ni, ngaˇ-aˬ, aˬ yawꞈ maꞈ-ahˇ Iˇjiˇtuˆ miˇ kʼahˬ laꞈ kʼoeˇ neh sheuˬ doˆ nehˬ-euˬ aˬ yawꞈ maꞈ-euˬ Miˬyehˇ, Sahˬpaˬ Miˬyehˇ pyeuꞈ-eu ngaˇ lehˇ, aˬ yawꞈ maꞈ siˬ nya tehꞈ-a. Ngaˇ-aˬ, aˬ yawꞈ maꞈ-euˬ Miˬyehˇ pyeuꞈ-eu Sahˬpaˬ Miˬyehˇ ma.