Doˆ-iˇ 24 - Akha

Dawˬ ma saˇ jaˇ boꞈ-eu

¹ Moˇseˬ-ahˇ Sahˬpaˬ Miˬyehˇ ehˇ nehˬ-eu, “Aˬloˬ, Naˬdehˇ, Aˬbiˇhuˬ hawˇ-eu Iˇsaˬleˬlaˆ tsawˇ haˬ aˬ yuiꞈ aˬ tsu shiꞈ tseˇ gʼaˬ sheuˬ-awˇ, gawˬ jawˬ-ahˇ ngaˇ jawˇ gaˇ daˆ laˇ-awˬ. Naw maꞈ ngaˇ jawˇ gaˇ maˬ laˇ keuˆ mi naˆ-ehˇ, ui cuiˆ gaˇ mahˇ kaˬ gaˇ jawˇ-awˇ, aw byaˆ-eu laꞈ kʼoeˇ, ngaˬ-ahˇ uˬ duˬ tahˬ-awˬ.

² Nawˇ maˬ ngeuˇ naˇ, nui gʼaˬ tiˬ gʼaˬ-iˬ ngaˬ-eu dawˬ peh maˬ ya laˇ peh-a. Tsawˇ haˬ aˇ maꞈ deuˬ-aˬ, gawˬ jawˬ-ahˇ tehꞈ-ehˇ kʼawꞈ maˬ ya daˆ laˇ-a.”

³ Iˇsaˬleˬlaˆ tsawˇ haˬ deuˬ jawˇ gaˇ Moˇseˬ iˇ-awˇ, Sahˬpaˬ Miˬyehˇ neh biꞈ nehˬ-euˬ dawˬ deuˬ hawˇ-eu zahˇ sahˇ kʼoꞈ deuˬ, aˬ yawꞈ maꞈ-ahˇ dzawˇ mehˬ nehˬ-euˬ meh. Kʼoeˇ ngeh, tsawˇ haˬ dawˬ tawˆ luꞈ, “Sahˬpaˬ Miˬyehˇ neh kʼaˇ ehˇ taˬ-euˬ yawˬ jeˬ na luꞈ nga maꞈ mˇ ma” lehˇ ehˇ-eu meh.

⁴ Kʼoeˇ naˇ, Sahˬpaˬ Miˬyehˇ neh kʼaˇ ngehˬ kʼaˇ tmˇ-euˬ zahˇ sahˇ kʼoꞈ dawˬ tawˆ luꞈ, Moˇseˬ boꞈ-euˬ meh. Yawˬ nah yawˬ uˬ shawˬ yaw naꞈ-ehˇ, gawˬ jawˬ dawˬ dahˬ-ahˇ lawˇ duˬ tiˬ tsahˇ aˬ yawꞈ tsoˆ-awˇ, Iˇsaˬleˬlaˆ tsawˇ jeuˬ tseˇ nyiꞈ jeuˬ-euˬ dah zaˇ, kʼaˬ lo tseˇ nyiꞈ siˬ kʼahˬ tuˇ-euˬ meh.

⁵ Kʼoeˇ naˇ, zaˬ guˬ deuˬ-ahˇ aˬ yawꞈ kʼehˇ gʼeh-awˇ, jeˬ zaˬ sehꞈ-awˇ, miˬ dzaˬ-ahˇ dzah puiˆ-eu laꞈ kʼoeˇ, cawˬ cawˬ taꞈ-eu lawˇ-eu jeˬ aˬ yawꞈ maꞈ Sahˬpaˬ Miˬyehˇ-ahˇ lawˇ nehˬ-euˬ meh.

⁶ Moˇseˬ-aˬ, jeˬ zaˬ kʼoeˇ deuˬ-euˬ shiˬ tiˬ paˆ kʼmˬ maˬ laꞈ kʼoeˇ dawˆ ahˇ-awˇ, tiˬ paˆ lawˇ duˬ-ahˇ byaˆ shehˬ-euˬ meh.

⁷ Kʼoeˇ naˇ, Sahˬpaˬ Miˬyehˇ-euˬ dawˬ boꞈ ahˇ taˬ-euˬ dawˬ ma saˇ jaˇ sahˬ boꞈ yuˇ-awˇ, Iˇsaˬleˬlaˆ tsawˇ haˬ deuˬ-ahˇ yaw kʼaˆ-ehˇ guˇ-awˇ gui mehˬ nehˬ-euˬ meh. Kʼoeˇ ngeh, “Sahˬpaˬ Miˬyehˇ-euˬ ehˇ dawˬ nga maꞈ naˇ haˬ geuꞈ-awˇ, aˬ yawꞈ neh kʼaˇ ehˇ taˬ-euˬ yawˬ jeˬ na luꞈ mˇ ma” lehˇ, aˬ yawꞈ maꞈ ehˇ-eu meh.

⁸ Kʼoeˇ naˇ, kʼmˬ maˬ laꞈ kʼoeˇ ahˇ-eu shiˬ kʼoeˇ neh, Iˇsaˬleˬlaˆ tsawˇ haˬ deuˬ-ahˇ Moˇseˬ byaˆ shehˬ-awˇ, “Shiˬ heu-aˬ, Sahˬpaˬ Miˬyehˇ naw maꞈ-ahˇ zahˇ dawˬ kʼoꞈ dawˬ heu deuˬ biꞈ-awˇ, naw maꞈ nehˬ-ehˇ dawˬ ma saˇ jaˇ mˇ taꞈ-euˬ saˇ kiˇ pyeuꞈ-eu meh” lehˇ aˬ yawꞈ maꞈ-ahˇ ehˇ nehˬ-euˬ meh.

⁹ Moˇseˬ, Aˬloˬ, Naˬdehˇ, Aˬbiˇhuˬ hawˇ-eu, Iˇsaˬleˬlaˆ tsawˇ haˬ aˬ yuiꞈ aˬ tsu shiꞈ tseˇ gʼaˬ, gawˬ jawˬ kʼoeˇ jawˬ-ahˇ daˆ leˇ-euˬ meh.

¹⁰ Iˇsaˬleˬlaˆ tsawˇ jeuˬ-euˬ Miˬyehˇ-ahˇ aˬ yawꞈ maꞈ ya mawˇ-euˬ meh. Aˬ yawꞈ-euˬ aˬ kuiˇ uˬ moˆ, mˬ loꞈ-ehˇ nyoeˇ leuˬ leuˬ-eu kʼaˬ lo sehˇ-ahˇ duˇ-eu jeˬ kʼawˬ taˬ-euˬ meh.

¹¹ Aˬ yawꞈ maꞈ Miˬyehˇ-ahˇ mawˇ-euˬ kʼawꞈ, Miˬyehˇ aˬ yawꞈ maꞈ-ahˇ maˬ laˆ cawˆ nehˬ ni, Miˬyehˇ-euˬ mehˬ shi aˬ yawꞈ maꞈ dzaˬ taꞈ dawˇ taꞈ-awˇ jawˇ-euˬ meh.

Moˇseˬ hawˇ-eu Siˇnaˆ gawˬ jawˬ

¹² Moˇseˬ-ahˇ Sahˬpaˬ Miˬyehˇ ehˇ nehˬ-eu, “Gawˬ jawˬ-ahˇ, ngaˇ jawˇ gaˇ daˆ laˇ-awˬ. Nawˇ heu gaˇ laˇ keuˆ-awˇ jawˇ ngeh, Iˇsaˬleˬlaˆ tsawˇ haˬ-ahˇ mehˬ nehˬ tsoˆ nehˬ-eu gʼaˇ duˬ, ngaˬ neh zahˇ dawˬ kʼoꞈ dawˬ boꞈ ahˇ taˬ-euˬ kʼaˬ lo teˇ byaꞈ nyiˬ byaꞈ nawˬ-ahˇ ngaˇ biꞈ ma.”

¹³ Moˇseˬ hawˇ-eu aˬ yawꞈ-euˬ gʼaˬ zaˬ Yawˇshuˆ aˬ nyaꞈ lehˬ hmˬ-awˇ, muiˬ-eu shawˇ-eu gawˬ jawˬ-ahˇ Moˇseˬ daˆ leˇ-euˬ meh.

¹⁴ Aˬ yuiꞈ aˬ tsu kʼoeˇ deuˬ-ahˇ Moˇseˬ ehˇ nehˬ-eu, “Nga nyaꞈ gʼoꞈ keuˆ le ngeh keuˆ ni, sehˬ gʼawˆ-ahˇ jawˇ-awˇ nga nyaꞈ-ahˇ loꞈ tawˬ-awˬ. Aˬloˬ hawˇ-eu Huˇyaˆ aˬ nyaꞈ naw maꞈ nehˬ-ehˇ jawˇ luꞈ meh. Aˬ geu gʼaˬ maˬ kaˬ, ja dzaˬ paˬ-ehˇ gʼeh-eu jeˬ doˆ laˇ naˇ, aˬ yawꞈ nyaꞈ jawˇ gaˇ iˇ-awˇ, bi laˆ tsaˬ geuꞈ-awˬ.”

¹⁵ Siˇnaˆ gawˬ jawˬ-ahˇ Moˇseˬ daˆ leˇ ngeh, gawˬ jawˬ kʼoeˇ jawˬ-ahˇ mˬ dmˇ kʼawˬ pymˬ pymˬ-euˬ meh.

¹⁶ Sahˬpaˬ Miˬyehˇ-euˬ yaw shehꞈ kʼahˬ sehˇ Siˇnaˆ gawˬ jawˬ kʼoeˇ taˆ zaꞈ le-awˇ, koꞈ nah keuˆ ni gawˬ jawˬ kʼoeˇ jawˬ-ahˇ mˬ dmˇ dehˬ kaˬ taˬ-euˬ meh. Shiꞈ nah tiˬ nah-ahˇ, mˬ dmˇ laꞈ kʼoeˇ neh, Moˇseˬ-ahˇ Sahˬpaˬ Miˬyehˇ kuˇ-euˬ meh.

¹⁷ Sahˬpaˬ Miˬyehˇ-euˬ yaw shehꞈ kʼahˬ sehˇ-aˬ, gawˬ jawˬ uˬ du doꞈ luꞈ-eu miˬ dzaˬ-ahˇ duˇ gaˇ, Iˇsaˬleˬlaˆ tsawˇ haˬ deuˬ ya mawˇ-euˬ meh.

¹⁸ Gawˬ jawˬ-ahˇ Moˇseˬ daˆ leˇ-awˇ, mˬ dmˇ laꞈ kʼoeˇ le uˇ leꞈ-euˬ meh. Oeˬ tseˇ nah oeˬ tseˇ miˇ keuˆ ni, aˬ yawꞈ kʼoeˇ gaˇ jawˇ-euˬ meh.