Doˆ-iˇ 23 - Akha

Yaw tsaˬ yaw dawˇ jeˬ-ahˇ taꞈ-eu zahˇ sahˇ kʼoꞈ

¹ “Aˬ cawˬ gaˇ kawˆ, maˬ ngeuˇ gaˇ keuˆ ni ja bu ja doeˇ-eu jeˬ nawˇ maˬ ya mˇ-a. Maˬ tsaˬ maˬ dawˇ-eu tsawˇ haˬ jawˇ paw pyawˬ-awˇ, maˬ tsaˬ maˬ dawˇ-eu saˇ kiˇ nawˇ maˬ ya kamˬ-a.

² Tsawˇ haˬ myaˬ tiˬ paˆ yaw lehˬ jeˬ mˇ ngeh maˬ ehˇ, yaw tsaˬ yaw dawˇ jeˬ-ahˇ bahˬ-eu saˇ kiˇ kamˬ ngeh maˬ ehˇ, nawˇ maˬ ya caw teh-a.

³ Shaˬ-eu zahˬ-eu tsawˇ haˬ-ahˇ gʼawˬ shaˬ haw gaˬ-eu laꞈ kʼoeˇ, aˬ yawꞈ jawˇ paw pyawˬ-awˇ yaˇ kʼaˬ maˬ ya ja-a.

⁴ “Nawˬ-ahˇ muiˇ-eu tsawˇ haˬ-euˬ mawˇ neˇ byoˆ-euˬ maˬ ehˇ, mahˬ tahˬ laˆ byoˆ-euˬ maˬ ehˇ, nawˇ ya mawˇ naˇ, ya teh kʼoꞈ gʼeh nehˬ meh.

⁵ Aˬ yawꞈ-euˬ mahˬ tahˬ laˆ tiˬ mawˇ kʼaˆ daˬ tawˬ-awˇ coˬ dzeh taˬ-euˬ nawˇ mawˇ naˇ, ya ngawˬ tuˇ nehˬ meh. Maˬ ngawˬ tuˇ nehˬ ni maˬ ya byehˇ dzeh yaꞈ-a.

⁶ “Shaˬ-eu zahˬ-eu tsawˇ haˬ-ahˇ yaˇ kʼaˬ daˇ nehˬ ngeh, maˬ tsaˬ maˬ dawˇ-eu laꞈ kʼoeˇ maˬ ya daˇ nehˬ-a.

⁷ Maˬ tsaˬ maˬ dawˇ-eu laꞈ kʼoeˇ, aˬ cawˬ-ahˇ iˬ baˇ taˬ-awˇ, yaˇ kʼaˬ maˬ ya ja-a. Maˬ lehˬ maˬ ca-eu tsawˇ haˬ-ahˇ maˬ ya sehꞈ-a. Aˬ jeˬ miˇ neh ehˇ naˇ, kʼoeˇ loꞈ-ehˇ maˬ tsaˬ maˬ dawˇ-eu jeˬ mˇ-eu tsawˇ haˬ-ahˇ, ngaˇ iˬ baˇ maˬ pyehˬ nya-a.

⁸ Aˬ cawˬ nawˬ-ahˇ laꞈ nmꞈ nmꞈ-eu pyuˇ nawˇ maˬ ya ha geuꞈ-a. Aˬ jeˬ miˇ neh ehˇ naˇ, laꞈ nmꞈ nmˬ nehˬ-eu jeˬ-aˬ, yaw tsaˬ yaw dawˇ jeˬ-ahˇ maˬ mawˇ nya ni, tsawˇ haˬ zaˬ-ahˇ myaˆ behꞈ bi behꞈ-iˇ-awˇ, iˬ baˇ maˬ ahˇ-eu tsawˇ haˬ deuˬ-ahˇ iˬ baˇ ahˇ-eu tsawˇ haˬ loꞈ-ehˇ bi pyeuꞈ-iˇ nya-eu meh.

⁹ “Boeˇ miˬ siˬ kʼaˬ deuˬ-ahˇ yehˬ bawˬ sehˇ lu-ehˇ maˬ ya gʼeh-a. Iˇjiˇtuˆ miˇ kʼahˬ laꞈ kʼoeˇ, naw maꞈ boeˇ miˬ siˬ kʼaˬ pyeuꞈ haw-euˬ loꞈ-ehˇ, boeˇ miˬ siˬ kʼaˬ-euˬ nui ma naw maꞈ siˬ nya meh.

Shiꞈ kʼoꞈ tiˬ kʼoꞈ hawˇ-eu shiꞈ nah tiˬ nah

¹⁰ “Koꞈ kʼoꞈ laꞈ kʼoeˇ deh yaˇ mˇ dzaˬ-awˇ, kʼaˇ mˇ za-euˬ deuˬ jeˬ hmˬ taˬ-awˬ.

¹¹ Ehˇ kʼawꞈ, shiꞈ kʼoꞈ tiˬ kʼoꞈ-ahˇ, nawˬ-euˬ deh yaˇ maˬ mˇ dzaˬ ni bi naˬ-awˇ, dehꞈ doˆ laˇ-euˬ aˇ sehꞈ deuˬ-ahˇ kʼawꞈ, nawˇ ma ya yehˬ dzaˬ-a. Shaˬ-eu zahˬ-eu tsawˇ haˬ deuˬ kʼoeˇ-ahˇ yehˬ dzaˬ-awˇ, dzeˇ yaꞈ-euˬ deuˬ-ahˇ, bawˇ tsahˬ jeˬ zaˬ deuˬ ya bi dzaˬ meh. Aˬ gaꞈ yaˇ kmˇ hawˇ-eu saˬ loˬ yaˇ kmˇ-ahˇ kʼawꞈ, kʼoeˇ loˬ-ehˇ ya jahˇ meh.

¹² “Tiˬ jaw laꞈ kʼoeˇ, koꞈ nah gaˇ mˇ-awˬ. Ehˇ kʼawꞈ, nawˬ-euˬ zaˬ kʼaˆ deuˬ hawˇ-eu, nawˬ-ahˇ gʼaˬ mahˇ mahˇ dzaˬ-eu boeˇ miˬ siˬ kʼaˬ deuˬ maˬ ehˇ, nawˬ-euˬ jeˬ zaˬ deuˬ maˬ ehˇ, gʼaˬ naˬ ya naˬ ni, shiꞈ nah tiˬ nah-ahˇ nawˇ gaˇ maˬ ya mˇ-a.

¹³ “Sahˬpaˬ Miˬyehˇ pyeuꞈ-eu ngaˇ naw maꞈ-ahˇ kʼaˇ ehˇ nehˬ-eu jeˬ-ahˇ, naw maꞈ naˇ haˬ geuꞈ-awˬ. Miˬyehˇ nui gʼaˬ-ahˇ naw maꞈ uˬ duˬ maˬ ya tahˬ shaˇ-a. Aˬ yawꞈ-euˬ tsawˇ myahˇ-ahˇ tehꞈ-ehˇ kʼawꞈ maˬ ya kuˇ-a.

Huiˬ-eu Bawˬ-iˬ smˇ bawˬ-iˬ

¹⁴ “Ngaˬ-ahˇ taˬ huiˬ taˬ mahˇ-eu laꞈ kʼoeˇ, tiˬ kʼoꞈ laꞈ kʼoeˇ, huiˬ-eu bawˬ-iˬ smˇ bawˬ-iˬ naw maˬ ya gʼeh meh.

¹⁵ Iˇjiˇtuˆ miˇ kʼahˬ laꞈ kʼoeˇ neh naw maꞈ doˆ laˇ-euˬ Aˬbiˇbaˬ ba la laꞈ kʼoeˇ, ngaˇ naw maꞈ-ahˇ ehˇ nehˬ taˬ-eu loꞈ-ehˇ, Dehˬ tseˬ maˬ ahˇ-eu Kaˬ muˇ Dzaˬ-eu Bawˬ-iˬ gʼeh-awˬ. Bawˬ-iˬ gʼeh luꞈ-eu aˇ yamˬ shiꞈ nah laꞈ kʼoeˇ, dehˬ tseˬ dawˆ-awˇ jahˇ taˬ-euˬ dzaˇ aˬ geu jeˬ maˬ kaˬ, naw maꞈ maˬ ya dzaˬ-a. Lawˇ-eu shehˇ-eu jeˬ maˬ ahˇ ni, naw maꞈ ngaˬ-ahˇ uˬ duˬ maˬ ya tahˬ laˇ-a.

¹⁶ “Cehˇ yehˬ cehˇ diˬ dahˬ beh-eu yamˬ-ahˇ, Cehˇ laˆ luiˆ-eu Bawˬ-iˬ naw maꞈ ya gʼeh meh. “Aˬ gaꞈ hawˇ-eu aˇ siˬ aˇ lu keuˆ le-eu yamˬ pyeuꞈ-eu tsahˬ gaˆ yamˬ-ahˇ, aˇ siˬ aˇ lu pi ahˇ-eu Bawˬ-iˬ naw maꞈ ya jahˇ meh.

¹⁷ Aˬ yawꞈ kʼoꞈ yawꞈ, bawˬ-iˬ heu smˇ bawˬ-iˬ gʼeh-eu aˇ yamˬ keuˆ laˇ ngeh, kʼaˬ dzeˇ zaˬ dawˬ tawˆ luꞈ, naw maꞈ-euˬ Sahˬpaˬ Miˬyehˇ pyeuꞈ-eu ngaˬ-ahˇ uˬ duˬ ya tahˬ laˇ meh.

¹⁸ “Naw maꞈ ngaˬ-ahˇ jeˬ zaˬ lawˇ ngeh, dehˬ tseˬ keuˬ-eu kaˬ muˇ maˬ ya lawˇ ahˇ-a. Bawˬ-iˬ heu smˇ hmˬ laꞈ kʼoeˇ, naw maꞈ neh ngaˬ-ahˇ lawˇ-euˬ jeˬ zaˬ deuˬ-euˬ tsiˇ, yawˬ nah yawˬ uˬ shawˬ paw keuˆ ni maˬ ya bi jaˆ keuˆ-a.

¹⁹ “Aˬ yawˬ kʼoꞈ yawꞈ, naw maꞈ neh mˇ za-euˬ keuˆ beh beh le-euˬ dzaˬ la gʼo cehˇ hawˇ-eu aˇ siˬ aˇ lu deuˬ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ nymˇ-ahˇ ya yuˇ laꞈ meh. “Yawˇ zaˬ maˬ ehˇ, ciꞈ myehꞈ ciꞈ zaˬ maˬ ehˇ, aˬ ma-euˬ aˬ coeˇ dzaˇ uiˇ nehˬ-ehˇ maˬ ya puꞈ keuˬ dzaˬ-a.

Saˇ jaˇ hawˇ-eu Mehˬ nehˬ tsoˆ nehˬ-eu jeˬ

²⁰ “Ngaˬ neh laˆ saˆ taˬ-euˬ jawˇ duˬ-ahˇ naw maꞈ-ahˇ sheuˬ keuˆ nehˬ-eu gʼaˇ duˬ maˬ ehˇ, gaˇ pehˇ-ahˇ iˇ luꞈ ngeh, naw maꞈ-ahˇ bi haw piˇ-eu gʼaˇ duˬ maˬ ehˇ, mˬ taˆ gʼaˬ kʼehˇ tiˬ gʼaˬ ngaˇ pyehˬ gʼeh ma.

²¹ Aˬ yawꞈ-ahˇ haw tsoˆ taˬ-awˇ, aˬ yawꞈ-euˬ ehˇ dawˬ naˇ haˬ-awˬ. Aˬ yawꞈ-aˬ, ngaˬ neh kʼehˇ gʼeh leꞈ-euˬ gʼaˬ pyeuꞈ-eu miˇ neh, naw maꞈ aˬ yawꞈ-ahˇ puiˬ naˇ, aˬ yawꞈ naw maꞈ-ahˇ iˬ baˇ maˬ pyehꞈ-a.

²² Ehˇ kʼawꞈ, naw maꞈ aˬ yawꞈ ehˇ dawˬ naˇ haˬ-awˇ, ngaˬ neh kʼaˇ ehˇ taˬ-euˬ yawˬ jeˬ na luꞈ mˇ naˇ, naw maꞈ-ahˇ muiˇ-eu tsawˇ haˬ dawˬ tawˆ luꞈ-ahˇ ngaˇ guiˇ deuˆ ma.

²³ Ngaˬ-eu gʼaˬ kʼehˇ kʼoeˇ gʼaˬ naw maꞈ-euˬ mehˬ hu iˇ-awˇ, Aˬmawˇliˆ, Heˬtaˆ, Paˬyehˆ, Kaˬnaˬ, Hiˇbiˇ hawˇ-eu Yeˬbuˇ tsawˇ jeuˬ heu deuˬ-euˬ miˇ kʼahˬ deuˬ laꞈ kʼoeˇ, naw maꞈ-ahˇ sheuˬ uˇ gʼeh ngeh, tsawˇ jeuˬ heu deuˬ-ahˇ ngaˇ laˆ cawˆ ma. Aˬ yawꞈ maꞈ-euˬ miˬ yehˇ deuˬ-ahˇ naw maꞈ uˬ duˬ taˬ tahˬ.

²⁴ Aˬ yawꞈ maꞈ-euˬ uˬ duˬ tahˬ-eu zahˇ sahˇ kʼoꞈ-ahˇ naw maꞈ taˬ caw teh. Ehˇ kʼawꞈ, aˬ yawꞈ maꞈ-euˬ miˬ yehˇ deuˬ-ahˇ laˆ cawˆ-awˇ, aˬ yawꞈ maꞈ-euˬ muiˬ-eu shawˇ-eu kʼaˬ lo kʼawˇ zeuˇ deuˬ-ahˇ deh pyaˆ dzeh-awˬ.

²⁵ Naw maꞈ-euˬ Miˬyehˇ, Sahˬpaˬ Miˬyehˇ pyeuꞈ-eu ngaˬ-ahˇ naw maꞈ uˬ duˬ tahˬ naˇ, ngaˇ naw maꞈ-ahˇ dzaˬ dzaˬ dawˇ dawˇ hawˇ-eu iˇ cuꞈ guiˬ lahˬ biꞈ-awˇ, naw maꞈ kʼoeˇ taˆ naˇ-eu gawˇ-eu jeˬ maˬ bi keuˆ le ni yuˇ dzeh ma.

²⁶ Naw maꞈ jawˇ-eu miˇ kʼahˬ laꞈ kʼoeˇ, zaˬ miˬ zaˬ tiˬ gʼaˬ-iˬ zaˬ maˬ dzeh-eu uˬ taꞈ, maˬ baw aˬ ma maˬ jawˇ ni ngaˇ mˇ ma. Ngaˇ naw maꞈ-ahˇ ziˇ bi baw ma.

²⁷ “Naw maꞈ-ahˇ laˆ tsoeˬ-eu tsawˇ haˬ deuˬ ngaˬ-ahˇ guˆ-iˇ ni ngaˇ jahˇ ma. Naw maꞈ-ahˇ guiˇ deuˆ-eu tsawˇ haˬ-ahˇ ngaˇ laˆ bahˬ laˆ baˆ nehˬ-awˇ, naw maꞈ-ahˇ muiˇ-eu tsawˇ haˬ dawˬ tawˆ luꞈ, naw maꞈ jawˇ gaˇ neh ya cehˆ byoˆ ni ngaˇ jahˇ nehˬ ma.

²⁸ Naw maꞈ-euˬ mehˬ hu, byaˬ duˇ baˬ maꞈ ngaˇ pyehˬ gʼeh-awˇ, Hiˇbiˇ tsawˇ jeuˬ, Kaˬnaˬ tsawˇ jeuˬ hawˇ-eu Heˬtaˆ tsawˇ jeuˬ-ahˇ bi teh dzeh ma.

²⁹ Tiˬ kʼoꞈ aˇ yamˬ laꞈ kʼoeˇ tehꞈ-ehˇ, tsawˇ jeuˬ kʼoeˇ deuˬ dawˬ tawˆ luꞈ-ahˇ ngaˇ maˬ teh doˆ jiˇ nehˬ. Kʼoeˇ loꞈ-ehˇ teh doˆ nehˬ naˇ, miˇ kʼahˬ kʼoeˇ kʼahˬ bawˇ tsahˬ bawˇ dahˇ pyeuꞈ-iˇ-awˇ, naw maꞈ-ahˇ laˆ bahˬ-eu bawˇ tsahˬ jeˬ zaˬ myaˬ dui dui laˇ tehꞈ-a.

³⁰ Naw maꞈ tsawˇ haˬ myaˬ laˇ-awˇ, miˇ kʼahˬ kʼoeˇ kʼahˬ-ahˇ jawˇ byah gʼeh nya ngeh keuˆ ni, aˬ yawꞈ maꞈ-ahˇ tiˬ jawˇ ui cuiˆ ui cuiˆ-ehˇ, ngaˇ teh doˆ ma.

³¹ Naw maꞈ miˇ kʼahˬ-euˬ miˇ kaˬ-aˬ, Aˬgaˬbaˬ Iˬ ma laˆ shaˆ lahˇ gʼoꞈ-ahˇ neh, Uˇpaˬlaˇ lawˇ baˬ-ahˇ keuˆ ni hawˇ-eu, Gʼahˇ ceh-euˬ Iˬ ma laˆ shaˆ-ahˇ neh, bawˇ tsahˬ bawˇ dahˇ kʼaˇ suiꞈ deh yaˇ-ahˇ keuˆ ni meh. Miˇ kʼahˬ kʼoeˇ kʼahˬ-ahˇ jawˇ-eu tsawˇ haˬ deuˬ kʼoeˇ taˆ, naw maꞈ-ahˇ ngaˇ baoˬ bi huiˬ dzehˬ-awˇ, naw maꞈ iˇ ngeh, aˬ yawꞈ maꞈ-ahˇ naw maꞈ teh doˆ gʼeh tehꞈ-a.

³² Aˬ yawꞈ maꞈ-ahˇ maˬ ehˇ, aˬ yawꞈ maꞈ-euˬ miˬ yehˇ-ahˇ maˬ ehˇ, saˇ jaˇ taˬ dzaˬ.

³³ Tsawˇ haˬ kʼoeˇ deuˬ-ahˇ, naw maꞈ-euˬ miˇ kʼahˬ laꞈ kʼoeˇ taˬ bi jawˇ. Aˬ yawꞈ maꞈ-ahˇ bi jawˇ naˇ, naw maꞈ-ahˇ mˇ bahˬ ni aˬ yawꞈ maꞈ jahˇ tehꞈ-a. Aˬ yawꞈ maꞈ-euˬ miˬ yehˇ deuˬ-ahˇ naw maꞈ uˬ duˬ tahˬ naˇ, shiˇ-eu lahˇ ju-ahˇ naw maꞈ paꞈ leˇ tehꞈ-a.”