Doˆ-iˇ 22 - Akha

Tsoeˬ kʼoꞈ nehˬ-eu jeˬ-ahˇ taꞈ leˇ-eu zahˇ

¹ “Tsawˇ haˬ tiˬ gʼaˬ na, mawˇ neˇ maˬ kaˬ, yawˇ maˬ kaˬ, tiˬ mawˇ na kʼoeˬ-awˇ, sehꞈ dzaˬ-euˬ maˬ ehˇ, ahˬ dzaˬ-euˬ maˬ ehˇ, mawˇ neˇ tiˬ mawˇ gʼaˇ duˬ mawˇ neˇ ngaˬ mawˇ ya tsoeˬ kʼoꞈ nehˬ-awˇ, yawˇ tiˬ mawˇ gʼaˇ duˬ yawˇ oeˬ mawˇ ya tsoeˬ kʼoꞈ nehˬ meh.

² Smˇ kʼoeˬ tiˬ gʼaˬ, smˇ kʼoeˬ kʼoeˬ luꞈ gaˇ aˬ cawˬ mawˇ-awˇ bi sehꞈ naˇ, sehꞈ-eu gʼaˬ kʼoeˇ taˆ iˬ baˇ maˬ jaˆ-a.

³ “Ehˇ kʼawꞈ, nahˇ ma doˆ laˇ gʼaˬ-awˇ neh smˇ kʼoeˬ-ahˇ sehꞈ naˇ, sehꞈ-eu gʼaˬ kʼoeˇ taˆ iˬ baˇ jaˆ-eu meh. Aˬ jeˬ miˇ neh ehˇ naˇ, smˇ kʼoeˬ kʼoeˇ gʼaˬ aˬ yawꞈ neh kʼoeˬ-euˬ aˇ poeˬ tsoeˬ kʼoꞈ nehˬ tehꞈ-a.

⁴ Tsoeˬ kʼoꞈ-eu tiˬ jeˬ-iˬ maˬ jaˆ naˇ, yawˬ ha-euˬ gʼawˇ mawˇ ahˬ-awˇ ya bi tsoeˬ tehꞈ-a.

⁵ “Mawˇ neˇ maˬ ehˇ, mahˬ tahˬ laˆ maˬ ehˇ, yawˇ maˬ ehˇ, bi kʼoeˬ-awˇ, kʼoeˬ-euˬ gʼaˬ-euˬ aˬ laꞈ laꞈ kʼoeˇ yaw dehꞈ-ehˇ jawˇ-eu ya mawˇ naˇ, nyiˬ bymˇ ya bi lawˬ dzehˬ tehꞈ-a.

⁶ “Tsawˇ haˬ tiˬ gʼaˬ yawˬ ha-euˬ yaˇ-ahˇ miˬ dzaˬ keuˬ ngeh, aˬ cawˬ-euˬ yaˇ-ahˇ bi doꞈ nyawˬ-iˇ-awˇ, maˬ yehˬ-euˬ cehˇ puiˆ dzaˬ-euˬ maˬ ehˇ, cehˇ cehˇ bymˇ puiˆ dzaˬ-euˬ maˬ ehˇ, miˬ dzaˬ keuˬ-eu gʼaˬ ya tsoeˬ meh.

⁷ “Tsawˇ haˬ tiˬ gʼaˬ, yawˬ gʼaˬ yawˬ-euˬ pyuˇ hawˇ-eu aˇ poeˬ kʼaˆ-eu myawˬ gahˬ deuˬ jeˬ hmˬ nehˬ-eu gʼaˇ duˬ nui ma tsaˬ-awˇ, aˬ yawꞈ-euˬ nymˇ-ahˇ jeˬ hmˬ taˬ ngeh, smˇ kʼoeˬ bi kʼoeˬ-awˇ, smˇ kʼoeˬ nyehꞈ mi naˇ, smˇ kʼoeˬ kʼoeˇ gʼaˬ nyiˬ bymˇ ya tsoeˬ kʼoꞈ meh.

⁸ Ehˇ kʼawꞈ, smˇ kʼoeˬ maˬ nyehꞈ mi nya naˇ, pyuˇ shuiˇ myawˬ gahˬ jeˬ hmˬ nehˬ-euˬ gʼaˬ-ahˇ, uˬ duˬ tahˬ-eu jawˇ duˬ-ahˇ sheuˬ gʼeh-awˇ, aˬ cawˬ-euˬ myawˬ aˬ yawꞈ maˬ kʼoeˬ-aˬ lehˇ, kʼoeˇ gaˇ ya bi kamˬ meh.

⁹ “Mawˇ neˇ, mahˬ tahˬ laˆ, yawˇ, dm gʼaˬ dm lmˇ hawˇ-eu, nui jeˬ aˬ geu jeˬ maˬ kaˬ, byoˆ-iˇ-euˬ paˇ mawˇ kʼoꞈ ngeh, tsawˇ haˬ nyiˬ gʼaˬ yaw kaˬ yaw sahˇ tawˬ-awˇ tsawˇ pyehˇ pyehˇ-eu laꞈ kʼoeˇ, dawˬ ja doˆ laˇ naˇ, uˬ duˬ tahˬ-eu jawˇ duˬ-ahˇ aˬ yawꞈ nyaꞈ-ahˇ ya sheuˬ gʼeh-eu meh. Iˬ baˇ ahˇ-eu meh lehˇ Miˬyehˇ neh laꞈ noeˇ bi toeˬ-euˬ gʼaˬ-aˬ, yawˬ gʼaˬ yawˬ-ahˇ nyiˬ bymˇ paˇ ya tsoeˬ kʼoꞈ nehˬ meh.

¹⁰ “Tsawˇ haˬ tiˬ gʼaˬ na, yawˬ gʼaˬ yawˬ-euˬ mahˬ tahˬ laˆ maˬ ehˇ, mawˇ neˇ maˬ ehˇ, yawˇ maˬ ehˇ, jeˬ zaˬ nui jeˬ maˬ ehˇ, cu paˆ paˆ ngeh, jeˬ zaˬ kʼoeˇ mawˇ shiˇ-euˬ maˬ ehˇ, byoˆ-euˬ maˬ ehˇ, mawˇ-euˬ tsawˇ kaˬ maˬ jawˇ naˇ,

¹¹ tsawˇ haˬ kʼoeˇ gʼaˬ uˬ duˬ tahˬ-eu jawˇ duˬ-ahˇ le-awˇ, aˬ cawˬ-euˬ jeˬ zaˬ aˬ yawꞈ maˬ kʼoeˬ-aˬ lehˇ ya kamˬ meh. Jeˬ zaˬ kʼoeˇ mawˇ aˬ cawˬ neh bi kʼoeˬ-euˬ jeˬ maˬ ngeuˇ naˇ, yaw sahˇ gʼaˬ ya smˬ-awˇ, cu paˆ paˆ-euˬ gʼaˬ lawˬ nehˬ-eu maˬ loˬ-a.

¹² Ehˇ kʼawꞈ, jeˬ zaˬ kʼoeˇ mawˇ aˬ cawˬ neh bi kʼoeˬ-euˬ jeˬ pyeuꞈ naˇ, cu paˆ paˆ-euˬ gʼaˬ yaw sahˇ gʼaˬ-ahˇ ya lawˬ nehˬ meh.

¹³ Bawˇ tsahˬ jeˬ zaˬ yaw haiˬ deuˬ neh kawꞈ sehꞈ dzaˬ-euˬ jeˬ pyeuꞈ naˇ, maˬ dzaˬ jiˇ ni dzeˇ laˇ-euˬ deuˬ yuˇ kʼoꞈ laꞈ-awˇ, ya mehˬ laˇ-eu meh. Bawˇ tsahˬ jeˬ zaˬ yaw haiˬ deuˬ neh bi kawꞈ sehꞈ dzaˬ-euˬ jeˬ zaˬ gʼaˇ duˬ, cu paˆ paˆ-eu gʼaˬ, yaw sahˇ gʼaˬ-ahˇ maˬ ya lawˬ nehˬ-a.

¹⁴ “Tsawˇ haˬ tiˬ gʼaˬ, yawˬ gʼaˬ yawˬ-ahˇ jeˬ zaˬ tiˬ mawˇ shaˇ ngaˬ-awˇ, yaw sahˇ gʼaˬ maˬ jawˇ gaˇ jeˬ zaˬ kʼoeˇ mawˇ laˆ tahˬ laˆ naˇ-euˬ maˬ ehˇ, shiˇ-euˬ maˬ ehˇ, shaˇ ngaˬ-euˬ gʼaˬ ya lawˬ meh.

¹⁵ Ehˇ kʼawꞈ, yaw sahˇ gʼaˬ-euˬ mehˬ shi kʼoeˇ loꞈ-ehˇ pyeuꞈ laˇ naˇ, lawˬ-eu maˬ loˬ-a. Jeˬ zaˬ kʼoeˇ mawˇ-ahˇ aˇ poeˬ biꞈ-awˇ shaˇ ngaˬ taˬ-euˬ jeˬ pyeuꞈ naˇ, shaˇ ngaˬ poeˬ tehꞈ-ehˇ ya biꞈ kʼoꞈ meh.

Dehꞈ jeˬ dehꞈ kawˆ hawˇ-eu Uˬ duˬ tahˬ-eu jeˬ-ahˇ taꞈ leˇ-eu zahˇ

¹⁶ “Tsawˇ haˬ tiˬ gʼaˬ, shawˇ jehˆ ni gʼeh-eu miˬ daꞈ tiꞈ gʼaˬ-ahˇ bahˬ naˇ, zahˇ shaˇ poeˬ biꞈ-awˇ, miˬ daꞈ kʼoeˇ gʼaˬ-ahˇ ya sheuˬ dahˬ dzaˬ meh.

¹⁷ Ehˇ kʼawꞈ, aˬ da gʼaˬ, aˬ yawꞈ-euˬ aˬ buˇ miˬ daꞈ-ahˇ, tsawˇ haˬ kʼoeˇ gʼaˬ-ahˇ maˬ bi mˇ dzaˬ-iˇ mawꞈ naˇ, tsawˇ haˬ kʼoeˇ gʼaˬ, aˬ da gʼaˬ-ahˇ zahˇ shaˇ poeˬ ya biꞈ-eu meh.

¹⁸ “Nehꞈ seu piˇ seu-eu zaˬ miˬ zaˬ aˬ geu gʼaˬ maˬ kaˬ, ya sehꞈ dzeh meh.

¹⁹ “Jeˬ zaˬ nehˬ-ehˇ joe-eu tsawˇ haˬ-ahˇ ya sehꞈ meh.

²⁰ “Sahˬpaˬ Miˬyehˇ pyeuꞈ-eu ngaˬ-ahˇ maˬ ngeuˇ ni, miˬyehˇ nui gʼaˬ-ahˇ lawˇ-eu shehˇ-eu tsawˇ haˬ-ahˇ ya sehꞈ byoˆ meh.

²¹ “Boeˇ miˬ siˬ kʼaˬ-ahˇ yehˬ bawˬ sehˇ lu-ehˇ maˬ ya jahˇ-a. Aˬ jeˬ miˇ neh ehˇ naˇ, Iˇjiˇtuˆ miˇ kʼahˬ laꞈ kʼoeˇ, naw maꞈ boeˇ miˬ siˬ kʼaˬ pyeuꞈ haw-euˬ meh.

²² Miˬ coeˬ miˬ ma deuˬ hawˇ-eu muˇ coe aˬ nmˇ deuˬ-ahˇ yehˬ bawˬ sehˇ lu-ehˇ maˬ ya gʼeh-a.

²³ Naw maꞈ kʼoeˇ loꞈ-ehˇ gʼeh naˇ, aˬ yawꞈ maꞈ ngoeˇ-awˇ caw ba nehˬ laꞈ lehˇ ngaˬ-ahˇ shaˇ ngeh, aˬ yawꞈ maꞈ-euˬ shaˇ dawˬ-ahˇ ngaˇ aˬ diˇ aˬ maˇ naˇ haˬ ma.

²⁴ Kʼoeˇ ngeh, ngaˇ nui ma pehˇ laˇ-awˇ, naw maꞈ-ahˇ guiˇ deuˆ-eu laꞈ kʼoeˇ bi shiˇ ma. Naw maꞈ-euˬ miˬ zaˬ deuˬ miˬ coeˬ miˬ ma pyeuꞈ-iˇ-awˇ, naw maꞈ-euˬ zaˬ deuˬ aˬ da maˬ baw ni ya jawˇ tehꞈ-a.

²⁵ “Shaˬ-eu zahˬ-eu tsawˇ haˬ deuˬ-ahˇ nawˇ pyuˇ paˇ nehˬ ngeh, jiˇ jeuˬ yuˇ dzaˬ-eu pyuˇ paˇ-eu tsawˇ haˬ deuˬ loꞈ-ehˇ taˬ jahˇ.

²⁶ Tsawˇ haˬ tiˬ gʼaˬ na, aˇ bui biꞈ daˇ-awˇ, nawˬ-ahˇ pyuˇ shaˇ paˇ laˇ naˇ, nahˇ ma maˬ ga ahˇ mi naˆ-ehˇ, aˇ bui kʼoeˇ aˬ yawꞈ-ahˇ biꞈ kʼoꞈ nehˬ-awˬ.

²⁷ Aˬ jeˬ miˇ neh ehˇ naˇ, aˬ yawꞈ yaw gaˆ gaˆ ngeh dm-eu gʼaˇ duˬ, aˇ bui kʼoeˇ tiˬ kahˇ jaˆ-eu tehꞈ meh. Maˬ ngeuˇ naˇ, aˬ yawˬ aˬ joˆ-ehˇ yuꞈ nmˇ. Caw ba nehˬ laꞈ-awˬ lehˇ aˬ yawꞈ ngoeˇ-awˇ ngaˬ-ahˇ shaˇ ngeh, ngaˇ naˇ haˬ ma. Aˬ jeˬ miˇ neh ehˇ naˇ, ngaˇ-aˬ, gʼawˬ shaˬ gaˬ nya-eu nui ma ahˇ-eu ma.

²⁸ “Miˬyehˇ-ahˇ yehˬ bawˬ sehˇ lu-ehˇ maˬ ya ehˇ niˇ gʼa-a. Naw maꞈ-ahˇ uˆ lahˇ-eu aˬ yuiꞈ aˬ tsu-ahˇ yaˬ kʼehˇ maˬ ya yaˬ-a.

²⁹ “Naw maꞈ-euˬ dzaˬ la gʼo cehˇ, aˬ gaꞈ dzaˇ uiˇ hawˇ-eu, saˬ loˬ tsiˇ deuˬ keuˆ le ngeh, ngaˬ-ahˇ ya lawˇ meh. “Dehꞈ beh deh le-euˬ naw maꞈ-euˬ aˬ li aˬ yuiꞈ deuˬ ngaˬ-ahˇ ya biꞈ laꞈ meh.

³⁰ Dehꞈ beh beh le-euˬ naw maꞈ-euˬ mawˇ neˇ deuˬ hawˇ-eu yawˇ deuˬ, ngaˬ-ahˇ ya biꞈ laꞈ meh. Jeˬ zaˬ deuˬ laꞈ kʼoeˇ, dehꞈ beh beh le-euˬ aˬ buˬ deuˬ-ahˇ, shiꞈ nah keuˆ ni aˬ ma mawˇ nehˬ-ehˇ maˬ gʼawˬ-iˇ ni bi jawˇ-awˇ, yehꞈ nah tiˬ nah keuˆ laˇ naˇ, ngaˬ-ahˇ ya lawˇ meh.

³¹ “Naw maꞈ-aˬ, ngaˬ-euˬ tsawˇ haˬ pyeuꞈ-eu miˇ neh, bawˇ tsahˬ jeˬ zaˬ yaw gʼeh deuˬ neh kawꞈ sehꞈ-euˬ jeˬ zaˬ shaˬ jiˇ maˬ ya dzaˬ-a. Shaˬ jiˇ kʼoeˇ deuˬ aˬ kuiˬ-ahˇ ya bi dzaˬ meh.