Doˆ-iˇ 20 - Akha

Zahˇ dawˬ kʼoꞈ dawˬ tseˇ dawˬ

¹ Kʼoeˇ naˇ, Miˬyehˇ heu loꞈ-ehˇ ehˇ-eu meh.

² “Ngaˇ-aˬ, nawˇ aˬ cawˬ zaˬ kʼaˆ ya geuꞈ luꞈ-eu Iˇjiˇtuˆ miˇ kʼahˬ laꞈ kʼoeˇ neh, nawˬ-ahˇ sheuˬ doˆ nehˬ-euˬ nawˬ-euˬ Miˬyehˇ pyeuꞈ-eu Sahˬpaˬ Miˬyehˇ ma.

³ “Ngaˬ-euˬ mehˬ shi miˬ yehˇ nui gʼaˬ nawˇ maˬ ya bi jawˇ-a.

⁴ “Mˬ kʼoeˇ taˆ maˬ ehˇ, miˇ tsaˬ kʼoeˇ taˆ maˬ ehˇ, miˇ tsaˬ dawˬ dah iˇ cuꞈ laꞈ kʼoeˇ maˬ ehˇ, kʼaˇ jawˇ kʼaˇ jaˆ-eu jeˬ-ahˇ duˇ-eu tahˬ pahˬ aˬ ma mawˇ kawˇ yawˬ ha gʼaˇ duˬ maˬ ya tehˆ-a.

⁵ Tahˬ pahˬ aˬ ma mawˇ kawˇ mehˬ shi nawˇ maˬ ya awˆ byaˆ-a. Uˬ duˬ maˬ ya tahˬ-a. Aˬ jeˬ miˇ neh ehˇ naˇ, ngaˇ-aˬ, naw maꞈ-euˬ Miˬyehˇ, Sahˬpaˬ Miˬyehˇ pyeuꞈ-awˇ, myaˆ naˆ-eu Miˬyehˇ tiˬ gʼaˬ pyeuꞈ-eu ma. Ngaˬ-ahˇ bye-eu tsawˇ haˬ deuˬ-ahˇ ngaˇ kʼehˬ nehˬ-awˇ, aˬ yawꞈ maꞈ-euˬ zaˬ ziˇ oeˬ ziˇ keuˆ ni ngaˇ kʼehˬ nehˬ ma.

⁶ Ehˇ kʼawꞈ, ngaˬ-ahˇ gaˬ-awˇ, ngaˬ-euˬ zahˇ dawˬ kʼoꞈ dawˬ mehˬ nah caw teh-eu tsawˇ haˬ deuˬ-ahˇ, aˬ yawꞈ maꞈ-euˬ zaˬ ziˇ aˇ heˇ aˇ muiˇ ziˇ keuˆ ni, ngaˬ-euˬ gʼoeˇ-eu gaˬ-eu jeˬ ngaˇ bi mawˇ ma.

⁷ “Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ tsawˇ myahˇ-ahˇ, nawˇ yehˬ bawˬ sehˇ lu-ehˇ maˬ ya kuˇ niˇ gʼa-a. Aˬ jeˬ miˇ neh ehˇ naˇ, naw maꞈ-euˬ Miˬyehˇ, Sahˬpaˬ Miˬyehˇ pyeuꞈ-eu ngaˇ-aˬ, ngaˬ-euˬ tsawˇ myahˇ-ahˇ yehˬ bawˬ sehˇ lu-ehˇ kuˇ niˇ gʼa-eu tsawˇ haˬ-ahˇ kʼehˬ nehˬ kʼaˆ nehˬ ma.

⁸ “Jawˇ nah ngeh nah-aˬ, muiˬ-eu shawˇ-eu aˇ nah pyeuꞈ-eu nawˇ noeˬ keuˆ-awˇ, ya lah ya daw meh.

⁹ Nawˬ-euˬ gaˇ mˇ-eu gʼaˇ duˬ aˇ yamˬ koꞈ nah jaˆ-eu meh.

¹⁰ Ehˇ kʼawꞈ, shiꞈ nah tiˬ nah-aˬ, ngaˬ-ahˇ damˬ nehˬ taˬ-eu gʼaˬ naˬ naˬ-eu aˇ nah pyeuꞈ-eu meh. Aˇ nah kʼoeˇ nah laꞈ kʼoeˇ, nawˇ maˬ-ehˇ, nawˬ-euˬ zaˬ deuˬ maˬ ehˇ, nawˬ-euˬ zaˬ kʼaˆ deuˬ maˬ ehˇ, nawˬ-euˬ jeˬ zaˬ deuˬ maˬ ehˇ, nawˬ-euˬ miˇ kʼahˬ laꞈ kʼoeˇ jawˇ luꞈ-eu boeˇ miˬ siˬ kʼaˬ deuˬ maˬ ehˇ, tiˬ gʼaˬ-iˬ gaˇ maˬ ya mˇ-a.

¹¹ Aˇ yamˬ koꞈ nah laꞈ kʼoeˇ, miˇ tsaˬ maˬ ehˇ, mˬ maˬ ehˇ, iˬ ma laˆ shaˆ maˬ ehˇ, heu deuˬ dawˬ tawˆ luꞈ laꞈ kʼoeˇ kʼaˇ jawˇ kʼaˇ jaˆ-eu yawˬ jeˬ na luꞈ maˬ ehˇ, ngaˇ beh-euˬ ma. Kʼoeˇ miˇ neh, Sahˬpaˬ Miˬyehˇ pyeuꞈ-eu ngaˇ-aˬ, jawˇ nah pyeuꞈ-eu aˇ nah kʼoeˇ nah-ahˇ dawˬ ngehˬ gʼeh nehˬ-awˇ, muiˬ-eu shawˇ-eu aˇ nah bi pyeuꞈ laˇ-euˬ ma.

¹² “Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ neh nawˬ-ahˇ biꞈ-euˬ miˇ tsaˬ kʼoeˇ taˆ, nawˇ ziˇ baw ni, nawˬ-euˬ aˬ da aˬ ma-ahˇ nawˇ yaw zeu ya baw meh.

¹³ “Aˬ cawˬ-ahˇ nawˇ maˬ ya sehꞈ-a.

¹⁴ “Aˬ cawˬ-euˬ miˬ zaˬ-ahˇ nawˇ maˬ ya bahˬ maˬ ya muˆ-a.

¹⁵ “Aˬ cawˬ-euˬ myawˬ nawˇ maˬ ya kʼoeˬ-a.

¹⁶ “Aˬ cawˬ gʼaˇ duˬ, maˬ tsaˬ maˬ dawˇ-eu saˇ kiˇ, nawˇ maˬ ya kamˬ-a.

¹⁷ “Aˬ cawˬ-euˬ nymˇ-ahˇ nawˇ mehˇ juiˇ maˬ ya juiˇ-a. Aˬ cawˬ-euˬ miˬ zaˬ-ahˇ maˬ ehˇ, zaˬ kʼaˆ deuˬ-ahˇ maˬ ehˇ, mawˇ neˇ deuˬ-ahˇ maˬ ehˇ, mahˬ tahˬ laˆ deuˬ-ahˇ maˬ ehˇ, aˬ cawˬ kʼaˇ jaˆ-eu jeˬ-ahˇ, nawˇ mehˇ juiˇ maˬ ya juiˇ-a.”

Iˇsaˬleˬlaˆ tsawˇ haˬ deuˬ guˆ-euˬ

¹⁸ Mˬ jeˬ jeˬ-eu teˇ saˇ hawˇ-eu daˇ heh teˇ saˇ-ahˇ ya gaˬ-awˇ, mˬ myawꞈ myawꞈ-awˇ, gawˬ jawˬ-ahˇ uˬ kʼoeˬ du doˆ laˇ gaˇ ya mawˇ ngeh, Iˇsaˬleˬlaˆ tsawˇ haˬ deuˬ guˆ-awˇ, yaw dzuˬ dzuˬ-eu laꞈ kʼoeˇ, gaˇ mahˇ kaˬ gaˇ yawꞈ luꞈ-eu meh.

¹⁹ Kʼoeˇ ngeh, Moˇseˬ-ahˇ aˬ yawꞈ maꞈ ehˇ nehˬ-eu, “Nawˬ-euˬ gʼawˇ mawˇ nga maꞈ-ahˇ dawˬ ngehˬ cawˬ naˇ, nga maꞈ naˇ haˬ ma. Ehˇ kʼawꞈ, Miˬyehˇ nga maꞈ-ahˇ dawˬ ngehˬ cawˬ laˇ naˇ, nga maꞈ shiˇ laˇ gaˇ guˆ-eu miˇ neh, maˬ naˇ haˬ peuˬ nya.”

²⁰ Aˬ yawꞈ maꞈ-ahˇ Moˇseˬ ehˇ nehˬ-eu, “Taˬ guˆ. Aˬ jeˬ miˇ neh ehˇ naˇ, naw maꞈ-ahˇ lawˬ haw-eu gʼaˇ duˬ maˬ ehˇ, aˬ yawꞈ-ahˇ guˆ-eu baˬ da neh naw maꞈ iˬ baˇ maˬ ya mˇ-eu gʼaˇ duˬ maˬ ehˇ, Miˬyehˇ zaꞈ le-euˬ meh.”

²¹ Ehˇ kʼawꞈ, tsawˇ haˬ kʼoeˇ deuˬ-aˬ, gaˇ mahˇ kaˬ gaˇ tehꞈ-ehˇ yawꞈ yaꞈ-awˇ, Moˇseˬ tiˬ gʼaˬ tehꞈ-ehˇ, Miˬyehˇ jawˇ-eu zahˇ tsui ni gʼeh-eu mˬ dmˇ dawˬ peh le-euˬ meh.

Lawˇ duˬ-ahˇ taꞈ leˇ-eu zahˇ sahˇ kʼoꞈ

²² Moˇseˬ-ahˇ Sahˬpaˬ Miˬyehˇ dawˬ biꞈ-awˇ, Iˇsaˬleˬlaˆ tsawˇ haˬ deuˬ-ahˇ heu loꞈ-ehˇ bi ehˇ nehˬ-iˇ-euˬ meh. “Sahˬpaˬ Miˬyehˇ pyeuꞈ-eu ngaˇ, mˬ kʼoeˇ taˆ neh naw maꞈ-ahˇ dawˬ aˬ joˆ-ehˇ ngehˬ cawˬ-euˬ naw maꞈ ya mawˇ gʼaˬ-euˬ meh.

²³ Ngaˇ uˬ taꞈ, yawˬ ha-euˬ gʼaˇ duˬ, pyuˇ neh maˬ ehˇ, shuiˇ neh maˬ ehˇ, miˬyehˇ tehˆ-awˇ, naw maꞈ uˬ duˬ maˬ ya tahˬ-a.

²⁴ Ngaˬ-euˬ gʼaˇ duˬ, miˇ tsaˬ neh lawˇ duˬ tiˬ tsahˇ jahˇ-awˬ, gʼawˇ mawˇ mawˇ lah-ehˇ miˬ dzaˬ-ahˇ dzah puiˆ-awˇ lawˇ nehˬ-eu jeˬ maˬ ehˇ, cawˬ cawˬ taꞈ-eu lawˇ-eu jeˬ maˬ ehˇ, naw maꞈ-euˬ yawˇ hawˇ-eu mawˇ neˇ deuˬ, lawˇ duˬ kʼoeˇ hmˬ kʼoeˇ taˆ lawˇ-awˬ. Naw maꞈ ngaˬ-ahˇ uˬ duˬ bi tahˬ-eu lehˇ, ngaˬ neh tsaˬ tsoˆ taˬ-euˬ jawˇ duˬ yawˬ tsahˇ na luꞈ-ahˇ naw maꞈ jawˇ gaˇ ngaˇ oe-awˇ, naw maꞈ-ahˇ guiˬ lahˬ biꞈ nehˬ ma.

²⁵ Ngaˬ-euˬ gʼaˇ duˬ kʼaˬ lo neh naw maꞈ lawˇ duˬ gawˬ ngeh, taꞈ paˆ-euˬ kʼaˬ lo neh taˬ gawˬ. Aˬ jeˬ miˇ neh ehˇ naˇ, naw maꞈ dzahˬ taꞈ yuˇ-awˇ kʼaˬ lo-ahˇ taꞈ ngeh, kʼaˬ lo kʼoeˇ maˬ muiˬ maˬ shawˇ ni pyeuꞈ-iˇ-awˇ, ngaˬ-euˬ gʼaˇ duˬ maˬ geuꞈ nya ni jahˇ gaˇ duˇ-eu meh.

²⁶ Dawˬ dzm tsoꞈ-eu lawˇ duˬ, ngaˬ-eu gʼaˇ duˬ naw maꞈ maˬ ya tsoˆ-a. Aˬ jeˬ miˇ neh ehˇ naˇ, dawˬ dzm-ahˇ naw maꞈ daˆ leˇ ngeh, shaꞈ dawˇ-eu jeˬ doˆ laˇ tehꞈ-a.