Doˆ-iˇ 2 - Akha

Moˇseˬ dehꞈ le-euˬ

¹ Aˇ yamˬ kʼoeˇ yamˬ laꞈ kʼoeˇ, Leˬbiˇ tsawˇ haˬ kʼaˬ dzeˇ zaˬ tiˬ gʼaˬ hawˇ-eu, Leˬbiˇ tsawˇhaˬ zaˬ miˬ zaˬ tiˬ gʼaˬ sheuˬ dahˬ dzaˬ-eu meh.

² Zaˬ miˬ zaˬ kʼoeˇ gʼaˬ aˬ nyiˇ pi-awˇ, aˬ li tiˬ li ciˬ-euˬ meh. Aˬ li kʼoeˇ li muiˬ dui dui gaˇ aˬ yawꞈ ya mawˇ ngeh, ba la smˇ siˬ byah ni cu zaꞈ taˬ-euˬ meh.

³ Ehˇ kʼawꞈ, aˬ li kʼoeˇ li-ahˇ maˬ cu zaꞈ nya ni pyeuꞈ laˇ ngeh, iˇ cuꞈ maˬ uˇ-iˇ nya ni aˇ dziˬ lehꞈ gʼoeˬ taˬ-euˬ aˇ nyoˆ aˇ neˬ pawˬ tuˇ laꞈ kʼoeˇ ciˬ uˇ-awˇ, lawˇ baˬ lawˇ dzeˇ aˇ toꞈ yaˇ laꞈ kʼoeˇ ciˬ zaꞈ taˬ-iˇ-euˬ meh.

⁴ Aˬ li kʼoeˇ li-euˬ dmˇ ma tiˬ gʼaˬ ui cuiˆ gaˇ mahˇ kaˬ gaˇ yawꞈ-awˇ, aˬ li kʼoeˇ li-ahˇ haw luꞈ-eu meh.

⁵ Kʼoeˇ ngeh, sahˬ paˬ zaˬ miˬ lawˇ baˬ-ahˇ iˇ cuꞈ dzuiꞈ le-awˇ, aˬ yawꞈ-euˬ zaˬ miˬ zaˬ zaˬ kʼaˆ deuˬ lawˇ baˬ lawˇ deh caw caw-ehˇ cah luꞈ-eu meh. Aˇ toꞈ toꞈ yaˇ laꞈ kʼoeˇ jaˆ-eu pawˬ tuˇ tiˬ siˬ-ahˇ sahˬ paˬ zaˬ miˬ kʼoeˇ gʼaˬ tiˬ poˆ tehꞈ-ehˇ ya mawˇ-awˇ, aˬ yawꞈ-euˬ zaˬ kʼaˆ-ahˇ kʼehˇ-awˇ bi ciˬ doˆ laˬ-iˇ-euˬ meh.

⁶ Sahˬ paˬ zaˬ miˬ kʼoeˇ gʼaˬ pawˬ tuˇ kʼoeˇ siˬ pah haw ngeh, aˬ li zaˬ nahˬ tiˬ gʼaˬ-ahˇ ya mawˇ-euˬ meh. Aˬ li kʼoeˇ li ngoeˇ luꞈ-eu meh. Aˬ li kʼoeˇ li-ahˇ aˬ yawꞈ gʼawˬ shaˬ gaˬ-awˇ, “Aˬ li heu li-aˬ, Heˬbyehˇ tsawˇ haˬ-euˬ zaˬ pyeuꞈ-eu nga” lehˇ ehˇ-eu meh.

⁷ Kʼoeˇ ngeh, “Nawˬ-euˬ gʼaˇ duˬ zaˬ heu gʼaˬ-ahˇ bi haw-eu Heˬbyehˇ tsawˇ jeuˬ zaˬ miˬ zaˬ tiˬ gʼaˬ, ngaˇ ya kuˇ laˬ-iˇ nmˇ loˇ” lehˇ, aˬ li kʼoeˇ li-euˬ dmˇ ma gʼaˬ sahˬ paˬ zaˬ miˬ-ahˇ naˇ haˬ-euˬ meh.

⁸ “Kuˇ laˬ-iˇ-awˬ” lehˇ, aˬ buˇ kʼoeˇ buˇ-ahˇ sahˬ paˬ zaˬ miˬ ehˇ nehˬ ngeh, aˬ yawꞈ iˇ-awˇ, aˬ li-euˬ aˬ ma-ahˇ kuˇ laꞈ-euˬ meh.

⁹ “Nawˇ zaˬ heu gʼaˬ ciˬ kʼoꞈ gʼeh-awˇ, ngaˬ-euˬ gʼaˇ duˬ bo sa nehˬ laꞈ-awˬ. Nawˬ-ahˇ ngaˇ bo saˆ poeˬ biꞈ ma” lehˇ, zaˬ miˬ zaˬ kʼoeˇ gʼaˬ-ahˇ sahˬ paˬ zaˬ miˬ ehˇ nehˬ-euˬ meh. Kʼoeˇ naˇ, zaˬ miˬ zaˬ kʼoeˇ gʼaˬ, aˬ li kʼoeˇ li ciˬ kʼoꞈ gʼeh-awˇ, bo saˆ-euˬ meh.

¹⁰ Aˬ li kʼoeˇ li huiˬ laˇ ngeh, sahˬ paˬ zaˬ miˬ jawˇ gaˇ sheuˬ gʼeh nehˬ-euˬ meh. Sahˬ paˬ zaˬ miˬ kʼoeˇ gʼaˬ, aˬ li kʼoeˇ li-ahˇ, aˬ yawꞈ-euˬ aˬ li tiˬ gʼaˬ loꞈ-ehˇ cu geuꞈ-euˬ meh. “Aˬ li heu li-ahˇ iˇ cuꞈ laꞈ kʼoeˇ ngaˬ neh gʼeu doˆ-euˬ miˇ neh, Moˇseˬ lehˇ myahˇ nehˬ ma” lehˇ, sahˬ paˬ zaˬ miˬ kʼoeˇ gʼaˬ, yawˬ haˇ yawˬ ha ehˇ-euˬ meh.

Moˇseˬ Miˇdiˬyaˬ miˇ kʼahˬ-ahˇ cehˆ leˇ-euˬ

¹¹ Moˇseˬ huiˬ loˆ laˇ ngeh jawˇ, aˬ yawꞈ-euˬ tsawˇ jeuˬ pyeuꞈ-eu Heˬbyehˇ tsawˇ haˬ deuˬ jawˇ gaˇ doe doe-ehˇ cah haw-iˇ-awˇ, aˬ yawꞈ maꞈ-ahˇ kʼehˬ-awˇ myawˬ kʼaˆ bi mˇ luꞈ gaˇ ya mawˇ-euˬ meh. Tiˬ nah-aˬ, Iˇjiˇtuˆ tsawˇ haˬ tiˬ gʼaˬ, aˬ yawꞈ-euˬ tsawˇ jeuˬ Heˬbyehˇ tsawˇ haˬ tiˬ gʼaˬ-ahˇ sehꞈ-euˬ gaˇ, aˬ yawꞈ ya mawˇ-euˬ meh.

¹² Moˇseˬ jawˬ jawˬ-ehˇ haw-awˇ, tsawˇ haˬ tiˬ gʼaˬ-iˬ maˬ jawˇ gaˇ ya mawˇ ngeh, Iˇjiˇtuˆ tsawˇ haˬ kʼoeˇ gʼaˬ-ahˇ sehꞈ-awˇ, kʼaˇ shuiꞈ laꞈ kʼoeˇ beuˬ pahˬ yaꞈ-euˬ meh.

¹³ Yawˬ nah yawˬ aˬ yawꞈ paˇ cah haw-iˇ ngeh, Heˬbyehˇ tsawˇ haˬ nyiˬ gʼaˬ yaw kaˬ ceh dzaˬ luꞈ gaˇ paˇ ya mawˇ-euˬ meh. “Aˬ jeˬ miˇ neh yawˬ ha-euˬ cawˬ Heˬbyehˇ tsawˇ haˬ-ahˇ teu loꞈ-ehˇ dawꞈ te” lehˇ, lehˬ dzehˬ-eu gʼaˬ-ahˇ Moˇseˬ ehˇ nehˬ-euˬ meh.

¹⁴ Tsawˇ haˬ kʼoeˇ gʼaˬ ehˇ-eu, “Nga maꞈ kʼoeˇ taˆ aˬ yuiꞈ aˬ tsu geuꞈ-awˇ, yaˇ kʼaˬ bi daˇ-eu gʼaˇ duˬ, aˬ suˇ gʼaˬ nawˬ-ahˇ tseˇ doˆ taˬ ta. Iˇjiˇtuˆ tsawˇ haˬ kʼoeˇ gʼaˬ-ahˇ sehꞈ-euˬ loꞈ-ehˇ, ngaˬ-ahˇ nawˇ paˇ sehꞈ-eu gʼeh te loˇ.” Kʼoeˇ ngeh, Moˇseˬ guˆ laˇ-awˇ, “Ngaˬ neh mˇ-euˬ jeˬ aˬ cawˬ siˬ nya jiˇ-euˬ ngaˇ” lehˇ yawˬ haˇ yawˬ ha ehˇ-euˬ meh.

¹⁵ Gaˇ kawˆ kʼoeˇ sahˬ paˬ ya gaˬ ngeh, Moˇseˬ-ahˇ sehꞈ-eu lehˇ poˆ-euˬ meh. Ehˇ kʼawꞈ, Miˇdiˬyaˬ miˇ kʼahˬ-ahˇ Moˇseˬ cehˆ leˇ-awˇ jawˇ-euˬ meh. Tiˬ nah-aˬ, lah duˬ tiˬ duˬ dawˬ peh Moˇseˬ nuiˇ luꞈ-eu meh.

¹⁶ Kʼoeˇ ngeh, Miˇdiˬyaˬ miˇ kʼahˬ-euˬ piˇ ma pyeuꞈ-eu Yeˬdaˬyoˇ-euˬ aˬ buˇ shiꞈ gʼaˬ, aˬ yawꞈ maꞈ-euˬ aˬ da-euˬ yawˇ hawˇ-eu ciꞈ myehꞈ deuˬ-ahˇ iˇ cuꞈ bi dawˇ-eu gʼaˇ duˬ, jeˬ zaˬ-euˬ iˇ cuꞈ kʼawˇ lawˬ-ahˇ iˇ cuꞈ kʼawꞈ ahˇ-eu lehˇ, lah duˬ-ahˇ oe-euˬ meh.

¹⁷ Ehˇ kʼawꞈ yawˇ bo-eu tsawˇ haˬ tiˬ paˆ na deuˬ, aˬ buˇ kʼoeˇ deuˬ-ahˇ teh dzeh-euˬ meh. Kʼoeˇ ngeh, Moˇseˬ aˬ buˇ kʼoeˇ deuˬ paw pyawˬ-awˇ, jeˬ zaˬ-ahˇ iˇ cuꞈ bi dawˇ-euˬ meh.

¹⁸ Aˬ buˇ kʼoeˇ deuˬ iˇ kahˇ gʼoꞈ keuˆ leˇ ngeh, “Aˬ jeˬ miˇ neh iˬ nah naw maꞈ yaw naꞈ-ehˇ gʼoꞈ keuˆ laˇ teˬ” lehˇ, aˬ yawꞈ maꞈ-euˬ aˬ da aˬ yawꞈ maꞈ-ahˇ naˇ haˬ-euˬ meh.

¹⁹ Aˬ buˇ kʼoeˇ deuˬ ehˇ-eu, “Yawˇ bo-eu deuˬ nga maꞈ-ahˇ teh dzeh ngeh, Iˇjiˇtuˆ tsawˇ haˬ tiˬ gʼaˬ nga maꞈ jawˇ paw pyawˬ-awˇ, nga maꞈ-euˬ dah zaˇ, jeˬ zaˬ-ahˇ iˇ cuꞈ kʼawꞈ nehˬ-awˇ bi dawˇ-euˬ meh.”

²⁰ Kʼoeˇ ngeh, aˬ da gʼaˬ aˬ buˇ kʼoeˇ deuˬ-ahˇ ehˇ nehˬ-eu, “Tsawˇ haˬ kʼoeˇ gʼaˬ aˬ gaˇ iˇ taˬ. Aˬ jeˬ miˇ neh aˬ yawꞈ-ahˇ kʼoeˇ gaˇ byehˇ yaꞈ teˬ. Aˬ yawꞈ-ahˇ kuˇ laˬ-iˇ-awˬ. Aˬ dui pehˬ nehˬ-ehˇ bi dzaˬ bi dawˇ taꞈ laˇ-awˬ.”

²¹ Kʼoeˇ naˇ, aˬ yawꞈ pehˬ nehˬ-ehˇ jawˇ-eu gʼaˇ duˬ, Moˇseˬ nui ma tsaˬ-awˇ, Yeˬdaˬyoˇ neh Moˇseˬ-ahˇ, aˬ yawꞈ-euˬ aˬ buˇ Ziˬpoˇlaˬ-ahˇ bi sheuˬ-euˬ meh.

²² Kʼoeˇ naˇ, Ziˬpoˇlaˬ aˬ li tiˬ li ciˬ-euˬ meh. Kʼoeˇ ngeh, “Ngaˇ-aˬ, miˇ kʼahˬ heu kʼahˬ laꞈ kʼoeˇ boeˇ miˬ siˬ kʼaˬ tiˬ gʼaˬ pyeuꞈ-eu ma” lehˇ, Moˇseˬ yawˬ haˇ yawˬ ha ehˇ-awˇ, aˬ li kʼoeˇ li-ahˇ Geˬlaˬshmˬ lehˇ myahˇ nehˬ-euˬ meh.

²³ Aˇ kʼoꞈ aˇ la myahˇ laˇ ngeh jawˇ, Iˇjiˇtuˆ miˇ kʼahˬ-ahˇ uˆ lahˇ-eu sahˬ paˬ ziˇ jiˇ-euˬ meh. Ehˇ kʼawꞈ, Iˇsaˬleˬlaˆ tsawˇ haˬ deuˬ shaˬ dui zahˬ dui dui-eu laꞈ kʼoeˇ, aˬ cawˬ zaˬ kʼaˆ ya geuꞈ luꞈ-awˇ, caw ba le-awˬ lehˇ guˇ guˇ-ehˇ ngoeˇ luꞈ-eu meh. Aˬ yawꞈ maꞈ ngoeˇ luꞈ-eu teˇ saˇ Miˬyehˇ-ahˇ gaˬ leˇ-euˬ meh.

²⁴ Aˬ yawꞈ maꞈ shaˬ zahˬ naꞈ-eu laꞈ kʼoeˇ ngoeˇ luꞈ-eu teˇ saˇ-ahˇ Miˬyehˇ ya gaˬ ngeh, Aˬbyaˬhaˬ, Iˇtsaˆ hawˇ-eu Yaˬkoˆ-ahˇ aˬ yawꞈ neh dawˬ ma saˇ jaˇ dzaˬ taˬ-euˬ gaˇ noeˬ keuˆ-euˬ meh.

²⁵ Iˇsaˬleˬlaˆ tsawˇ haˬ deuˬ aˬ cawˬ laꞈ oˆ zaˬ kʼaˆ ya geuꞈ luꞈ gaˇ aˬ yawꞈ ya mawˇ ngeh, aˬ yawꞈ maꞈ gʼaˇ duˬ shaˇ noeˬ-euˬ meh.