Biblia Todo Logo
Bìoball air-loidhne

- Sanasan -

Doˆ-iˇ 16 - Akha


Maˬnaˆ kaˬ muˇ hawˇ-eu hahˬ zaˬ laˬ ma

1 Iˇsaˬleˬlaˆ tsawˇ haˬ dawˬ tawˆ luꞈ Eˇleˬ-ahˇ neh doˆ-iˇ-euˬ meh. Aˬ yawꞈ maꞈ Iˇjiˇtuˆ miˇ kʼahˬ laꞈ kʼoeˇ neh doˆ le-euˬ ba la nyiˬ siˬ tiˬ siˬ tseˇ ngaˬ nah tiˬ nah byah laˇ ngeh, Eˇleˬ hawˇ-eu Siˇnaˆ gawˬ jawˬ yaw kaˬ-ahˇ jaˆ-eu Siˬ lehˇ kuˇ-eu jawˇ duˬ-ahˇ aˬ yawꞈ maꞈ oe keuˆ-euˬ meh.

2 Bawˇ tsahˬ bawˇ dahˇ kʼoeˇ tsahˇ laꞈ kʼoeˇ, aˬ yawꞈ maꞈ nui ma cawˆ laˇ-awˇ, Moˇseˬ hawˇ-eu Aˬloˬ-ahˇ iˬ baˇ taˬ-euˬ meh.

3 Iˇsaˬleˬlaˆ tsawˇ haˬ deuˬ aˬ yawꞈ nyaꞈ-ahˇ ehˇ nehˬ-eu, “Iˇjiˇtuˆ miˇ kʼahˬ laꞈ kʼoeˇ, Sahˬpaˬ Miˬyehˇ nga maꞈ-ahˇ bi shiˇ laꞈ law nmˇ-aˬ, muiˬ dzehˬ tehꞈ-a. Nga maꞈ kʼoeˇ gaˇ jawˇ ngeh, saˇ suˬ ni nuiˇ-awˇ hawˬ ya dzaˬ-euˬ ma. Shaˬ jiˇ hawˇ-eu nui jeˬ nui jeˇ kʼawꞈ, yawˬ ha kʼaˇ dzaˬ mawꞈ-eu loꞈ-ehˇ dzaˬ-euˬ ma. Ehˇ kʼawꞈ, naw nyaꞈ-aˬ, nga maꞈ bi mehꞈ sehꞈ jiˇ-eu lehˇ bawˇ tsahˬ bawˇ dahˇ laꞈ kʼoeˇ sheuˬ ahˇ laꞈ-euˬ ngaˇ.”

4 Kʼoeˇ naˇ, Moˇseˬ-ahˇ Sahˬpaˬ Miˬyehˇ ehˇ nehˬ-eu, “Naw maꞈ dawˬ tawˆ luꞈ gʼaˇ duˬ dzaˬ dzaˬ dawˇ dawˇ uˬ yehˇ loꞈ-ehˇ mˬ kʼoeˇ taˆ neh bi yehˇ ka leꞈ-eu lehˇ, nymˬ-mˇ ngaˇ lehˬ hmˬ taˬ-euˬ ma. Tsawˇ haˬ heu deuˬ-ahˇ yawˬ nah yawˬ na luꞈ bi doˆ-iˇ-awˇ, tiˬ nah gʼaˇ duˬ tiˬ nah loꞈ-eu dzaˬ-eu dawˇ-eu jeˬ bi gʼoˆ uiˬ-iˇ-awˬ. Kʼoeˇ loꞈ-ehˇ jahˇ-awˇ, tsawˇ haˬ heu deuˬ ngaˬ neh mehˬ nehˬ tsoˆ nehˬ-euˬ jeˬ-ahˇ naˇ haˬ geuꞈ nga loˇ lehˇ ngaˇ lawˬ haw ma.

5 Koꞈ nah tiˬ nah keuˆ laˇ naˇ, aˇ nah nui deuˬ-ahˇ maˬ duˇ ni, yawˬ nah na luꞈ, aˬ yawꞈ maꞈ gʼoˆ uiˬ luꞈ-eu naˆ maˬ tseˇ, nyiˬ bymˇ ya gʼoˆ uiˬ taˬ tehꞈ-a.”

6 Kʼoeˇ naˇ, Iˇsaˬleˬlaˆ tsawˇ haˬ dawˬ tawˆ luꞈ, Moˇseˬ hawˇ-eu Aˬloˬ aˬ nyaꞈ ehˇ nehˬ-eu, “Iˇjiˇtuˆ miˇ kʼahˬ laꞈ kʼoeˇ neh naw maꞈ-ahˇ sheuˬ doˆ leꞈ-euˬ gʼaˬ-aˬ, Sahˬpaˬ Miˬyehˇ pyeuꞈ-eu gaˇ, nymˇ ciꞈ naw maꞈ ya mawˇ tehꞈ-a.

7 Uˬ shawˬ keuˆ laˇ naˇ, Sahˬpaˬ Miˬyehˇ-euˬ yaw shehꞈ kʼahˬ sehˇ-ahˇ naw maꞈ ya mawˇ tehꞈ-a. Naw maꞈ nui ma cawˆ-eu laꞈ kʼoeˇ, Sahˬpaˬ Miˬyehˇ-ahˇ iˬ baˇ taˬ-awˇ toˇ luꞈ-eu teˇ saˇ-ahˇ aˬ yawꞈ ya gaˬ gʼaˬ-euˬ meh. Ngeuˇ meh. Naw maꞈ-aˬ, aˬ yawꞈ-ahˇ iˬ baˇ taˬ luꞈ-eu meh. (Nga nyaꞈ-ahˇ iˬ baˇ taˬ luꞈ-eu maˬ ngeuˇ-a.) Aˬ jeˬ miˇ neh ehˇ naˇ, nga nyaꞈ-aˬ, aˬ yawꞈ neh mehˬ nehˬ tsoˆ nehˬ laꞈ-euˬ loꞈ-ehˇ mˇ luꞈ-eu tehꞈ ma.”

8 Moˇseˬ paˇ ehˇ-eu, “Naw maꞈ dzaˬ-eu gʼaˇ duˬ shaˬ jiˇ deuˬ-ahˇ, uˬ ciꞈ uˬ taw paw maˬ ehˇ, naw maꞈ dzaˬ loꞈ dawˇ loꞈ-eu kaˬ muˇ deuˬ-ahˇ uˬ shawˬ paw maˬ ehˇ, Sahˬpaˬ Miˬyehˇ biꞈ nehˬ laꞈ tehꞈ-a. Aˬ jeˬ miˇ neh ehˇ naˇ, naw maꞈ nui ma cawˆ-eu laꞈ kʼoeˇ, aˬ yawꞈ-ahˇ iˬ baˇ taˬ-awˇ toˇ luꞈ-eu teˇ saˇ-ahˇ aˬ yawꞈ ya gaˬ gʼaˬ-euˬ meh. Aˬ diˇ aˬ maˇ ehˇ naˇ, naw maꞈ nui ma cawˆ-awˇ nga nyaꞈ-ahˇ iˬ baˇ taˬ-eu jeˬ-aˬ, Sahˬpaˬ Miˬyehˇ-ahˇ naw maꞈ nui ma cawˆ-awˇ iˬ baˇ taˬ gaˇ duˇ-eu meh.”

9 Aˬloˬ-ahˇ Moˇseˬ ehˇ nehˬ-eu, “Iˇsaˬleˬlaˆ tsawˇ haˬ aˇ maꞈ maꞈ lah ni, Sahˬpaˬ Miˬyehˇ mehˬ shi yawꞈ laˇ-awˬ lehˇ ehˇ nehˬ-awˬ. Aˬ jeˬ miˇ neh ehˇ naˇ, aˬ yawꞈ maꞈ nui ma cawˆ-eu laꞈ kʼoeˇ toˇ luꞈ-eu teˇ saˇ-ahˇ Sahˬpaˬ miˬyehˇ ya gaˬ-euˬ meh.”

10 Iˇsaˬleˬlaˆ tsawˇ haˬ aˇ maꞈ-ahˇ Aˬloˬ dawˬ ngehˬ cawˬ luꞈ ngeh, aˬ yawꞈ maꞈ bawˇ tsahˬ bawˇ dahˇ paw haw gʼeh-awˇ, Sahˬpaˬ Miˬyehˇ-euˬ yaw shehꞈ kʼahˬ sehˇ mˬ dmˇ laꞈ kʼoeˇ doˆ le-euˬ gaˇ, ja pyuˬ ni ya mawˇ-euˬ meh.

11 Kʼoeˇ naˇ, Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

12 “Iˇsaˬleˬlaˆ tsawˇ haˬ deuˬ nui ma cawˆ-eu laꞈ kʼoeˇ toˇ luꞈ-eu teˇ saˇ-ahˇ ngaˇ ya gaˬ-euˬ ma. Aˬ yawꞈ maꞈ dzaˬ-eu gʼaˇ duˬ shaˬ jiˇ-ahˇ, uˬ ciꞈ uˬ taw paw zahˇ moˬ zahˇ shehˬ shehˬ ngeh yamˬ-ahˇ maˬ ehˇ, aˬ yawꞈ maꞈ loˬ-eu kaˬ muˇ deuˬ-ahˇ uˬ shawˬ paw maˬ ehˇ, aˬ yawꞈ maꞈ za tehꞈ-a lehˇ ehˇ nehˬ-awˬ. Ngaˇ-aˬ, aˬ yawꞈ maꞈ-euˬ Miˬyehˇ, Sahˬpaˬ Miˬyehˇ pyeuꞈ-eu gaˇ kawˆ aˬ yawꞈ maꞈ ya siˬ tehꞈ-a.”

13 Uˬ ciꞈ uˬ taw paw sehˬ gʼawˆ tiˬ byah ni hahˬ zaˬ laˬ ma baˬ maꞈ zaw uˇ laˇ-awˇ, uˬ shawˬ paw sehˬ gʼawˆ tiˬ jawˬ ngehˇ ga byah taˬ-euˬ meh.

14 Ngehˇ kʼoeˇ deuˬ gui-iˇ ngeh jawˇ, aˇ kʼoˇ kʼoˇ zaˬ tiˬ jeˬ, miˇ tsaˬ kʼaˇ shuiꞈ kʼoeˇ taˆ jaˆ yaꞈ-eu meh. Kʼoeˇ-aˬ, ngehˇ ngehˇ kʼoˇ-ahˇ duˇ-eu meh.

15 Iˇsaˬleˬlaˆ tsawˇ haˬ deuˬ aˇ kʼoˇ kʼoˇ zaˬ kʼoeˇ deuˬ-ahˇ ya mawˇ ngeh, aˬ jeˬ aˇ kʼoˇ pyeuꞈ-eu maˬ siˬ nya-ehˇ, “Heu aˬ jeˬ nga” lehˇ, tiˬ gʼaˬ tiˇ gʼaˬ naˇ haˬ-euˬ meh. Kʼoeˇ ngeh, aˬ yawꞈ maꞈ-ahˇ Moˇseˬ ehˇ nehˬ-eu, “Heu-aˬ, naw maꞈ dzaˬ-eu gʼaˇ duˬ, Sahˬpaˬ Miˬyehˇ neh naw maꞈ-ahˇ biꞈ nehˬ-euˬ kaˬ muˇ pyeuꞈ-eu meh.

16 Naw maꞈ yawˬ gʼaˬ na luꞈ, yawˬ ha pehˬ zaˬ kʼaˇ dzaˬ jiˇ coeˇ-eu myaˆ ni, yawˬ ha nymˇ jiˇ laꞈ kʼoeˇ jawˇ-eu tsawˇ haˬ aˇ gʼaˬ-ahˇ haw-awˇ, tiˬ gʼaˬ gʼaˇ duˬ nyiˬ pehˬ gʼoˆ uiˬ-awˬ lehˇ Sahˬpaˬ Miˬyehˇ ehˇ-eu meh.”

17 Kʼoeˇ naˇ, Iˇsaˬleˬlaˆ tsawˇ haˬ deuˬ kaˬ muˇ kʼoeˇ gʼoˆ uiˬ-euˬ meh. Tiˬ paˆ na deuˬ-aˬ, gʼawˬ mya ni gʼoˆ uiˬ-awˇ, tiˬ paˆ na deuˬ-aˬ, tsaˬ tsaˬ ni tehꞈ-ehˇ gʼoˆ uiˬ taˬ-euˬ meh.

18 Ehˇ kʼawꞈ, aˬ yawꞈ maꞈ pehˬ haw ngeh, gʼawˬ mya ni gʼoˆ uiˬ taˬ-euˬ deuˬ kʼawꞈ maˬ za myaˬ dzehˬ-ehˇ, tsaˬ tsaˬ ni tehꞈ-ehˇ gʼoˆ uiˬ-euˬ deuˬ kʼawꞈ maˬ za cuiˆ dzehˬ-euˬ gaˇ ya mawˇ-euˬ meh. Yawˬ gʼaˬ na luꞈ, yawˬ ha kʼaˇ dzaˬ jiˇ coeˇ-eu myaˆ ni tehꞈ-ehˇ za-euˬ meh.

19 “Aˬ geu gʼaˬ maˬ kaˬ, ni shawˬ nah gʼaˇ duˬ maˬ ya jeˬ hmˬ taˬ-a” lehˇ, aˬ yawꞈ maꞈ-ahˇ Moˇseˬ ehˇ nehˬ-euˬ meh.

20 Ehˇ kʼawꞈ, aˬ yawꞈ maꞈ laꞈ kʼoeˇ tiˬ paˆ na deuˬ-aˬ, Moˇseˬ ehˇ gaˇ maˬ naˇ haˬ-ehˇ, jeˬ hmˬ taˬ-euˬ meh. Uˬ shawˬ keuˆ le ngeh, kaˬ muˇ kʼoeˇ deuˬ laꞈ kʼoeˇ luˆ tahˬ uˇ leˇ-awˇ, yaw buꞈ behꞈ laꞈ-eu meh. Kʼoeˇ ngeh, aˬ yawꞈ maꞈ-ahˇ Moˇseˬ nui ma pehˇ-eu meh.

21 Aˬ yawꞈ shawˬ yawꞈ, aˬ yawꞈ maꞈ yawˬ gʼaˬ na luꞈ, yawˬ ha kʼaˇ dzaˬ jiˇ coeˇ-eu myaˆ ni, kaˬ muˇ gʼoˆ uiˬ-euˬ meh. Nahˇ tsaˇ kʼaˆ laˇ ngeh, miˇ tsa kʼaˇ ga yaꞈ-euˬ kaˬ muˇ dawˬ tawˆ luꞈ guiˇ byoˆ jiˇ-euˬ meh.

22 Koꞈ nah keuˆ laˇ ngeh, kaˬ muˇ kʼoeˇ aˬ yawꞈ nah yawꞈ gʼoˆ uiˬ-euˬ myaˆ maˬ tseˇ nyiˬ myaˆ ni aˬ yawꞈ maꞈ gʼoˆ uiˬ-euˬ meh. Tsawˇ haˬ tiˬ gʼaˬ gʼaˇ duˬ oeˬ pehˬ gʼoˆ uiˬ taˬ-euˬ meh. Iˇsaˬleˬlaˆ tsawˇ haˬ aˬ yuiꞈ aˬ tsu dawˬ tawˆ luꞈ Moˇseˬ jawˇ gaˇ oe-awˇ, gaˇ kawˆ kʼoeˇ ja nehˬ le-euˬ meh.

23 Aˬ yawꞈ maꞈ-ahˇ Moˇseˬ ehˇ-eu, “Ni shawˬ nah-aˬ, aˬ yawꞈ-ahˇ damˬ nehˬ taˬ-euˬ muiˬ-eu shawˇ-eu aˇ nah pyeuꞈ-eu meh lehˇ Sahˬpaˬ Miˬyehˇ ehˇ taˬ-euˬ meh. Teu miˇ neh, naw maꞈ kʼaˇ tehˬ ba dzaˬ mawꞈ-eu jeˬ iˬ nah tehˬ ba-awˇ, kʼaˇ caꞈ dzaˬ mawꞈ-eu jeˬ iˬ nah caꞈ taˬ-awˬ. Kʼaˇ dzeˇ laˇ-euˬ jeˬ ni shawˬ nah gʼaˇ duˬ taˬ taˬ-awˬ.”

24 Moˇseˬ neh aˬ yawꞈ maꞈ-ahˇ ehˇ nehˬ-euˬ loꞈ-ehˇ, kʼaˇ dzeˇ laˇ-euˬ jeˬ yawˬ nah yawˬ uˬ shawˬ paw keuˆ ni aˬ yawꞈ maꞈ bi jaˆ-euˬ meh. Dzaˇ kʼoeˇ deuˬ maˬ buꞈ-iˇ ni jaˆ-awˇ, luˆ tahˬ kʼawꞈ maˬ uˇ leˇ-a.

25 Aˬ yawꞈ maꞈ-ahˇ Moˇseˬ ehˇ nehˬ-eu, “Dzaˇ heu deuˬ-ahˇ iˬ nah dzaˬ-awˬ. Aˬ jeˬ miˇ neh ehˇ naˇ, iˬ nah-aˬ, Sahˬpaˬ Miˬyehˇ-ahˇ damˬ nehˬ taˬ-euˬ gʼaˬ naˬ naˬ-eu jawˇ nah pyeuꞈ-awˇ, dzaˬ-eu dawˇ-eu jeˬ heu-ahˇ sehˬ gʼawˆ laꞈ nyiˇ paw naw maꞈ maˬ paˇ ya mawˇ meh.

26 Koꞈ nah laꞈ kʼoeˇ, dzaˬ-eu dawˇ-eu jeˬ naw maꞈ ya gʼoˆ uiˬ meh. Ehˇ kʼawꞈ, gʼaˬ naˬ naˬ-eu aˇ nah pyeuꞈ-eu shiꞈ nah tiˬ nah-ahˇ, dzaˬ-eu dawˇ-eu jeˬ naw maꞈ maˬ paˇ ya mawˇ meh.”

27 Shiꞈ nah tiˬ nah-ahˇ, aˬ yawꞈ maꞈ tiˬ paˆ na deuˬ, kaˬ muˇ gʼoˆ-iˇ-eu lehˇ doˆ-iˇ-euˬ meh. Ehˇ kʼawꞈ, aˬ yawꞈ maꞈ tiˬ jeˬ-iˬ ga gaˇ maˬ ya mawˇ-a.

28 Kʼoeˇ naˇ, Moˇseˬ-ahˇ Sahˬpaˬ Miˬyehˇ ehˇ nehˬ-eu, “Nawˬ-euˬ tsawˇ haˬ deuˬ ngaˬ-euˬ ehˇ dawˬ-ahˇ maˬ naˇ haˬ ni aˇ myah keuˆ ni jawˇ-eu lehˇ gʼeh ta.

29 Sahˬpaˬ Miˬyehˇ pyeuꞈ-eu ngaˇ, naw maꞈ-ahˇ gʼaˬ naˬ naˬ-eu aˇ nah tiˬ nah biꞈ taˬ-euˬ meh lehˇ siˬ nya-awˬ. Kʼoeˇ miˇ neh, koꞈ nah tiˬ nah-ahˇ nyiˬ nah dzaˬ loꞈ-eu dzaˬ-eu dawˇ-eu jeˬ ngaˇ biꞈ nehˬ ma. Shiꞈ nah tiˬ nah-ahˇ, yawˬ gʼaˬ na luꞈ, yawˬ ha jawˇ duˬ-ahˇ yawˬ ha jawˇ-awˇ, yawˬ ha-euˬ nymˇ laꞈ nyiˇ maˬ ya doˆ-iˇ-a.”

30 Kʼoeˇ miˇ neh, shiꞈ nah tiˬ nah-ahˇ Iˇsaˬleˬlaˆ tsawˇ haˬ deuˬ gaˇ maˬmˇ-a.

31 Kaˬ muˇ kʼoeˇ-ahˇ, Iˇsaˬleˬlaˆ tsawˇ haˬ deuˬ maˬnaˆ lehˇ kuˇ-eu meh. Kʼoeˇ-aˬ, yaˇ sawˇ aˇ nuiˆ-ahˇ duˇ-awˇ, ba ceuˬ ni gʼeh-awˇ, byaˬ byaˬ uiˇ neh jahˇ taˬ-euˬ kaˬ muˇ loꞈ-ehˇ kuiˇ-eu meh.

32 Moˇseˬ ehˇ-eu, “Sahˬpaˬ Miˬyehˇ aˬ dui maꞈ-ahˇ Iˇjiˇtuˆ miˇ kʼahˬ laꞈ kʼoeˇ neh sheuˬ doˆ nehˬ laꞈ ngeh, bawˇ tsahˬ bawˇ dahˇ laꞈ kʼoeˇ aˬ dui dzaˬ-eu gʼaˇ duˬ aˬ yawꞈ neh biꞈ laꞈ-euˬ dzaˇ-ahˇ, aˬ kaˇ, aˬ dui-euˬ zaˬ deuˬ uˆ deuˬ kʼawꞈ ya mawˇ haw ni, aˬ yawꞈ maꞈ gʼaˇ duˬ, maˬnaˆ kaˬ muˇ ui cuiˆ jeˬ hmˬ taˬ-awˬ lehˇ Sahˬpaˬ Miˬyehˇ ehˇ-eu meh.”

33 Kʼoeˇ naˇ, “Ciˬ cuˇ tiˬ siˬ yuˇ-awˇ, maˬnaˆ kaˬ muˇ nyiˬ pehˬ ehˇ gʼaˬ ni pehˬ ahˇ-awˇ, aˬ kaˇ aˬ dui-euˬ zaˬ deuˬ uˆ deuˬ gʼaˇ duˬ bi jeˬ hmˬ taˬ-eu gʼaˇ duˬ, Sahˬpaˬ Miˬyehˇ-euˬ mehˬ shi ciˬ taˬ-iˇ-awˬ” lehˇ, Aˬloˬ-ahˇ Moˇseˬ ehˇ nehˬ-euˬ meh.

34 Moˇseˬ-ahˇ Sahˬpaˬ Miˬyehˇ neh ehˇ nehˬ-euˬ loꞈ-ehˇ jeˬ hmˬ taˬ-eu gʼaˇ duˬ, ciˬ cuˇ kʼoeˇ siˬ-ahˇ, Dawˬ ma saˇ jaˇ Bahˬ keuˆ mehˬ shi Aˬloˬ ciˬ taˬ-iˇ-euˬ meh.

35 Iˇsaˬleˬlaˆ tsawˇ haˬ deuˬ-aˬ, aˬ yawꞈ maꞈ jawˇ duˬ dah leˇ-euˬ Kaˬnaˬ miˇ kʼahˬ-ahˇ maˬ le keuˆ kʼoeˇ keuˆ ni, oeˬ tseˇ kʼoꞈ keuˆ ni maˬnaˆ kaˬ muˇ dzaˬ-euˬ meh.

36 (Aˇ hu Iˇsaˬleˬlaˆ tsawˇ haˬ deuˬ zmˬ-euˬ, tiˬ awˇ mehˇ lehˇ kuˇ-eu cehˇ pehˬ tiˬ pehˬ-aˬ, nymˬ-mˇ aˬ dui zmˬ luꞈ-euˬ cehˇ pehˬ nyiˬ pehˬ hui ni ahˇ-eu meh.)

Akha Bible Revision (Latin Script) © Thailand Bible Society, 2011.

Thailand Bible Society
Lean sinn:



Sanasan