Doˆ-iˇ 15 - Akha

Moˇseˬ-euˬ caˇ dawˬ

¹ Kʼoeˇ naˇ, Moˇseˬ hawˇ-eu Iˇsaˬleˬlaˆ tsawˇ haˬ deuˬ, caˇ dawˬ heu bymˇ caˇ-awˇ, Sahˬpaˬ Miˬyehˇ-ahˇ ja ceuˬ-euˬ meh. “Sahˬpaˬ Miˬyehˇ-aˬ, baoˬ yaw shehꞈ kʼahˬ sehˇ huiˬ-awˇ guiˇ deuˆ gʼaˬ-euˬ miˇ neh, aˬ yawꞈ-ahˇ ngaˇ ja ceuˬ ma. Mahˬ kʼoeˇ deuˬ hawˇ-eu mahˬ dziˬ-eu tsawˇ haˬ deuˬ-ahˇ iˬ ma laˆ shaˆ laꞈ kʼoeˇ aˬ yawꞈ biˬ puꞈ jiˇ-euˬ meh.

² Sahˬpaˬ Miˬyehˇ-aˬ, gʼaˬ huiˬ-awˇ, ngaˬ-ahˇ haw piˇ-eu gʼaˬ pyeuꞈ-eu meh. Aˬ yawꞈ-aˬ, ngaˬ-ahˇ ka kʼoꞈ-eu gʼaˬ pyeuꞈ-eu meh. Aˬ yawꞈ ngaˬ-euˬ Miˬyehˇ pyeuꞈ-awˇ, aˬ yawꞈ-ahˇ ngaˇ ja ceuˬ ma. Aˬ yawꞈ ngaˬ da-euˬ Miˬyehˇ pyeuꞈ-awˇ, aˬ yawꞈ huiˬ-eu mahˇ-eu gaˇ kawˆ, ngaˇ caˇ-awˇ ja ceuˬ ma.

³ Sahˬpaˬ Miˬyehˇ-aˬ, guiˇ deuˆ-eu yaw sahˇ pyeuꞈ-awˇ aˬ yawꞈ-euˬ tsawˇ myahˇ Sahˬpaˬ Miˬyehˇ meh.

⁴ “Iˇjiˇtuˆ guiˇ maꞈ hawˇ-eu mahˬ laˆ lawˬ deuˬ-ahˇ iˬ ma laˆ shaˆ laꞈ kʼoeˇ aˬ yawꞈ biˬ puꞈ-euˬ meh. Aˬ cawˬ naˆ maˬ tseˇ nya-eu aˬ yawꞈ maꞈ-eu aˬ yuiꞈ deuˬ, Iˬ ma laˆ shaˆ Yaw neˇ laꞈ kʼoeˇ ga puꞈ sehꞈ-euˬ meh.

⁵ Naꞈ-eu iˬ ma laˆ shaˆ aˬ yawꞈ maꞈ-ahˇ dahˬ pymˬ-euˬ meh. Kʼaˬ lo loꞈ-ehˇ iˬ ma laˆ shaˆ dawˬ dah aˬ yawꞈ maꞈ ga nuiꞈ byoˆ-euˬ meh.

⁶ “Sahˬpaˬ Miˬyehˇ-oˇ, nawˬ-euˬ aˇ maˇ laꞈ zahˬ dui dui leˇ paˬ-ehˇ gʼeh-eu baoˬ ahˇ-awˇ, Nawˬ-ahˇ muiˇ-eu tsawˇ haˬ-ahˇ laˆ meuˇ laˆ loeˇ-euˬ meh.

⁷ Baoˬ huiˬ-eu laꞈ kʼoeˇ, nawˬ-ahˇ muiˇ-eu deuˬ-ahˇ nawˇ laˆ luˬ laˆ seˇ nehˬ-euˬ meh. Nawˇ nui ma pehˇ-eu jeˬ miˬ dzaˬ loꞈ-ehˇ doˆ-iˇ-awˇ, gʼo yoeˬ-ahˇ miˬ dzaˬ puiˆ-eu loꞈ-ehˇ, aˬ yawꞈ maꞈ-ahˇ puiˆ dzeh-euˬ meh.

⁸ Nawˬ-euˬ saꞈ neh iˬ ma laˆ shaˆ iˇ cuꞈ jehˆ bymˇ baw bymˇ-awˇ, gʼawˬ mahˇ ni bi goˇ laˇ-euˬ meh. Iˇ cuꞈ kaˇ pyawˇ pyawˇ-iˇ-awˇ, naꞈ dui dui-eu iˬ ma laˆ shaˆ gʼahˇ tseuˆ ni pyeuꞈ-iˇ-euˬ meh.

⁹ Muiˇ-eu deuˬ ehˇ-eu, ‘Aˬ yawꞈ maꞈ-ahˇ ngaˇ teh-awˇ teh mi ma. Aˬ yawꞈ maꞈ-euˬ pyuˇ shuiˇ myawˬ gahˬ dehˬ biˇ-awˇ, ngaˇ kʼaˇ geuꞈ mawꞈ-eu jeˬ yuˇ ma. Ngaˬ-euˬ mi cehˇ ngaˇ gʼawˇ doˆ-awˇ, aˬ yawꞈ maꞈ kʼaˇ ahˇ-eu jeˬ yuˇ jiˇ ma.’

¹⁰ Ehˇ kʼawꞈ, Sahˬpaˬ Miˬyehˇ nawˇ saꞈ tiˬ poˆ baw gʼeh ngeh, Iˇjiˇtuˆ tsawˇ haˬ deuˬ iˇ cuꞈ-ahˇ bu-awˇ, guˆ laˇ paˬ-ehˇ gʼeh-eu iˇ cuꞈ laꞈ kʼoeˇ, za siˬ loꞈ-ehˇ aˬ yawꞈ maꞈ ga nuiꞈ-euˬ meh.

¹¹ “Sahˬpaˬ Miˬyehˇ-oˇ, miˬyehˇ heu myaˆ ni gʼeh-eu laꞈ kʼoeˇ aˬ geu gʼaˬ nawˬ-ahˇ duˇ ta. Muiˬ-eu shawˇ-eu paw zahˬ leˇ paˬ-ehˇ gʼeh-eu, Nawˇ loꞈ-ehˇ aˬ suˇ gʼaˬ jawˇ ta. Zahˬ leˇ paˬ-ehˇ gʼeh-eu jeˬ hawˇ-eu baoˬ huiˬ-eu gaˇ mˇ nya-eu, nawˇ loꞈ-ehˇ aˬ suˇ gʼaˬ jawˇ ta.

¹² Nawˬ-euˬ aˇ maˇ laꞈ cawˬ ja ngeh, nga maꞈ-ahˇ muiˇ-eu deuˬ miˇ tsaˬ tahˬ kʼawˇ neh bi myoꞈ ahˇ jiˇ-euˬ meh.

¹³ Nawˬ-euˬ saˇ jaˇ nawˇ ziꞈ-awˇ, nawˬ neh ka kʼoꞈ-euˬ tsawˇ haˬ-ahˇ nawˇ sheuˬ gʼeh-euˬ meh. Nawˬ-euˬ baoˬ-ahˇ gʼoe-awˇ, muiˬ-eu shawˇ-eu nawˬ-euˬ miˇ kʼahˬ-ahˇ, aˬ yawꞈ maꞈ-ahˇ nawˇ sheuˬ gʼeh-euˬ meh.

¹⁴ Gaˇ kawˆ heu aˬ cawˬ tsawˇ jeuˬ deuˬ ya gaˬ-awˇ, aˬ yawꞈ maꞈ guˆ dui dui-eu laꞈ kʼoeˇ yaw dzuˬ dzuˬ-euˬ meh. Piˇliˇtiˆ tsawˇ haˬ deuˬ noeˬ shaˬ dui dui meh.

¹⁵ Eˬdoˬ tsawˇ jeuˬ aˬ yuiꞈ aˬ tsu deuˬ tsawˬ guˆ-iˇ-euˬ meh. Mawˇ baˆ tsawˇ haˬ baoˬ ahˇ-eu deuˬ yaw dzuˬ dzuˬ meh. Kaˬnaˬ miˇ kʼahˬ laꞈ kʼoeˇ jawˇ-eu tsawˇ haˬ deuˬ guˆ-eu nui ma ahˇ laˇ-euˬ meh.

¹⁶ Noeˬ shaˬ noeˬ zahˬ-awˇ guˆ-eu jeˬ, tsawˇ haˬ kʼoeˇ deuˬ kʼoeˇ taˆ keuˆ le-euˬ meh. Sahˬpaˬ Miˬyehˇ-oˇ, nawˬ-euˬ baoˬ-ahˇ aˬ yawꞈ maꞈ ya mawˇ-awˇ, aˬ cawˬ zaˬ kʼaˆ geuˬ-eu laꞈ kʼoeˇ nawˬ neh bi buˬ-iˇ-euˬ nawˬ-euˬ tsawˇ haˬ deuˬ maˬ iˇ dzeuˇ kʼoeˇ keuˆ ni, guˆ-eu laꞈ kʼoeˇ, tiˬ gaˇ-iˬ uˬ duˬ tahˬ shaˇ kʼaˇ maˬ za ni aˬ yawꞈ maꞈ jawˇ luꞈ-eu meh.

¹⁷ Nawˬ neh yawˬ haˇ yawˬ ha tsoˆ taˬ-euˬ Uˬ duˬ tahˬ nymˇ nymˇ ma, Sahˬpaˬ Miˬyehˇ nawˇ jawˇ-eu lehˇ tseˇ doˆ taˬ-euˬ jawˇ duˬ pyeuꞈ-eu nawˬ-eu gawˬ jawˬ kʼoeˇ taˆ, aˬ yawꞈ maꞈ-ahˇ nawˇ sheuˬ uˇ laꞈ-awˇ, ka ziꞈ taˬ-euˬ meh.

¹⁸ Sahˬpaˬ Miˬyehˇ-oˇ, mˬ maˬ maˬ byaˆ zaˇ ziˇ nawˇ sahˬ paˬ pyeuꞈ tehꞈ-a.”

Miˇliˬyaˬ-euˬ caˇ dawˬ

¹⁹ Iˇsaˬleˬlaˆ tsawˇ haˬ deuˬ-aˬ, gui coˇ ni gʼeh-eu miˇ tsaˬ-ahˇ nawˬ-awˇ, iˬ ma laˆ shaˆ tsehˆ doˆ-euˬ meh. Ehˇ kʼawꞈ, Iˇjiˇtuˆ tsawˇ haˬ-euˬ mahˬ laˆ lawˬ deuˬ hawˇ-eu, mahˬ laˆ lawˬ teh-eu tsawˇ haˬ deuˬ iˬ ma laˆ shaˆ laꞈ kʼoeˇ uˇ-iˇ ngeh, Sahˬpaˬ Miˬyehˇ iˇ cuꞈ paˇ bi dahˬ dzm laˇ-awˇ, aˬ yawꞈ maꞈ-ahˇ dahˬ pymˬ byoˆ-euˬ meh.

²⁰ Miˬyehˇ gʼaˇ duˬ ngehˬ dah-eu tsawˇ haˬ pyeuꞈ-eu Aˬloˬ-euˬ dmˇ ma Miˇliˬyaˬ bawˬ tsahˬ baꞈ-awˇ doˆ le ngeh, zaˬ miˬ zaˬ dawˬ tawˆ luꞈ bawˬ tsahˬ baꞈ-awˇ, aˬ yawꞈ nehˬ-ehˇ gaˇ nyeh nyeh-euˬ meh.

²¹ Aˬ yawꞈ maꞈ-ahˇ Miˇliˬyaˬ dawˬ caˇ caˇ mehˬ nehˬ-eu, “Sahˬpaˬ Miˬyehˇ-aˬ, yaw shehꞈ kʼahˬ sehˇ huiˬ-eu laꞈ kʼoeˇ, guiˇ deuˆ-eu gʼaˬ leˇ-euˬ miˇ neh, aˬ yawꞈ-ahˇ caˇ-awˇ ja ceuˬ-awˬ. Aˬ yawꞈ-aˬ, mahˬ kʼoeˇ deuˬ hawˇ-eu, mahˬ dziˬ-eu deuˬ-ahˇ, iˬ ma laˆ shaˆ laꞈ kʼoeˇ biˬ puꞈ jiˇ-euˬ meh.”

²² Kʼoeˇ naˇ, Moˇseˬ-aˬ, Iˇsaˬleˬlaˆ tsawˇ haˬ deuˬ-ahˇ, iˬ ma laˆ shaˆ Yaw neˇ-ahˇ neh, Shuˇyaˆ lehˇ kuˇ-eu bawˇ tsahˬ bawˇ dahˇ paw sheuˬ gʼeh-euˬ meh. Bawˇ tsahˬ bawˇ dahˇ laꞈ kʼoeˇ, smˬ nah keuˆ ni aˬ yawꞈ maꞈ gaˇ ma cah keuˆ laꞈ-euˬ kʼawꞈ, iˇ cuꞈ maˬ ya mawˇ-a.

²³ Kʼoeˇ naˇ, Maˬlaˬ lehˇ kuˇ-eu jawˇ duˬ tiˬ tsahˇ-ahˇ aˬ yawꞈ maꞈ oe keuˆ-euˬ meh. Ehˇ kʼawꞈ, kʼoeˇ gaˇ jaˆ-eu iˇ cuꞈ yaw kʼaˬ kʼaˬ-eu miˇ neh, aˬ yawꞈ maꞈ maˬ dawˇ ahˇ coeˇ-a. Kʼoeˇ miˇ neh, jawˇ duˬ kʼoeˇ tsahˇ-ahˇ Maˬlaˬ lehˇ kuˇ-euˬ meh.

²⁴ Iˇsaˬleˬlaˆ tsawˇ haˬ kʼoeˇ deuˬ nui ma cawˆ-eu laꞈ kʼoeˇ, “Nga maꞈ aˬ jeˬ dawˇ nmˇ” lehˇ, Moˇseˬ-ahˇ ehˇ nehˬ-euˬ meh.

²⁵ Moˇseˬ Sahˬpaˬ Miˬyehˇ-ahˇ guiˬ lahˬ shaˇ ngeh, Sahˬpaˬ Miˬyehˇ aˬ yawꞈ-ahˇ aˇ bawˇ tiˬ bawˇ mehˬ nehˬ-euˬ meh. Aˇ bawˇ kʼoeˇ bawˇ iˇ cuꞈ-ahˇ baꞈ puꞈ ngeh, iˇ cuꞈ paˇ kuiˇ laˇ-euˬ meh. Kʼoeˇ gaˇ, yaw dehꞈ dehꞈ gaˇ taꞈ leˇ-eu zahˇ sahˇ kʼoꞈ deuˬ hawˇ-eu zahˇ dawˬ kʼoꞈ dawˬ deuˬ, Sahˬpaˬ Miˬyehˇ aˬ yawꞈ maꞈ-ahˇ biꞈ-awˇ lawˬ haw-euˬ meh.

²⁶ Aˬ yawꞈ ehˇ-eu “Ngaˬ-euˬ dawˬ-ahˇ naw maꞈ tuˆ tehˬ taˬ-awˇ, ngaˬ neh tsaˬ meh lehˇ noeˬ-euˬ jeˬ-ahˇnaw maꞈ mˇ-eu laꞈ kʼoeˇ, ngaˬ-euˬ ehˇ dawˬ-ahˇ naw maꞈ tiˬ byah tiˬ loꞈ naˇ haˬ geuꞈ naˇ, Iˇjiˇtuˆ tsawˇ haˬ kʼoeˇ taˆ bi keuˆ le-euˬ shaˬ zahˬ naˇ gawˇ kʼoeˇ deuˬ naw maꞈ kʼoeˇ taˆ bi keuˆ le-eu laꞈ kʼoeˇ, naw maꞈ-ahˇ kʼehˬ nehˬ kʼaˆ nehˬ-eu jeˬ ngaˇ maˬ mˇ. Ngaˇ-aˬ, naw maꞈ-ahˇ laˆ taˬ nehˬ-eu Sahˬpaˬ Miˬyehˇ pyeuꞈ-eu ma.”

²⁷ Yawˬ nah yawˬ keuˆ le ngeh, iˇ cuꞈ iˇ beuˆ tseˇ nyiꞈ beuˆ doˆ-awˇ, daoˇ aˇ bawˬ shiꞈ tseˇ bawˬ dehꞈ-eu Eˇleˬ lehˇ kuˇ-eu jawˇ duˬ-ahˇ aˬ yawꞈ maꞈ le keuˆ-euˬ meh. Kʼoeˇ gaˇ, lawˇ baˬ dawˬ peh aˬ yawꞈ maꞈ sehˬ gʼawˆ gʼawˆ-awˇ naˬ-euˬ meh.