Doˆ-iˇ 13 - Akha

Dehꞈ beh beh le-euˬ deuˬ Sahˬpaˬ Miˬyehˇ-ahˇ damˬ nehˬ-euˬ

¹ Moˇseˬ-ahˇ Sahˬpaˬ Miˬyehˇ ehˇ nehˬ-eu,

² “Dehꞈ beh beh le-euˬ jeˬ dawˬ tawˆ luꞈ laꞈ kʼoeˇ, aˬ li deuˬ hawˇ-eu aˬ buˬ deuˬ ngaˬ-ahˇ ya damˬ meh. Aˬ jeˬ miˇ neh ehˇ naˇ, Iˇsaˬleˬlaˆ tsawˇ haˬ laꞈ kʼoeˇ dehꞈ beh beh le-euˬ aˬ li hawˇ-eu, jeˬ zaˬ deuˬ laꞈ kʼoeˇ dehꞈ beh beh le-euˬ aˬ buˬ deuˬ ngaˬ-ahˇ taꞈ-eu meh.”

Dehˬ tseˬ maˬ ahˇ-eu Kaˬ muˇ dzaˬ-eu Bawˬ-iˬ

³ Iˇsaˬleˬlaˆ tsawˇ haˬ deuˬ-ahˇ Moˇseˬ ehˇ nehˬ-eu, “Naw maꞈ aˬ cawˬ-euˬ zaˬ kʼaˆ ya geuꞈ luꞈ-eu Iˇjiˇtuˆ miˇ kʼahˬ laꞈ kʼoeˇ neh doˆ le-euˬ aˇ nah heu nah-ahˇ noeˬ keuˆ-awˬ. Aˇ nah heu nah laꞈ kʼoeˇ, Sahˬpaˬ Miˬyehˇ-aˬ, huiˬ-eu aˬ yawꞈ-euˬ baoˬ-ahˇ gʼoe-awˇ, naw maꞈ-ahˇ sheuˬ doˆ nehˬ-euˬ meh. Dehˬ tseˬ ahˇ-eu kaˬ muˇ naw maꞈ maˬ ya dzaˬ-a.

⁴ Ba la yaw beh siˬ pyeuꞈ-eu Aˬ biˇ baˬ ba la, aˇ nah heu nah-ahˇ, Iˇjiˇtuˆ miˇ kʼahˬ laꞈ kʼoeˇ neh naw maꞈ ya doˆ le-euˬ meh.

⁵ Kaˬnaˬ tsawˇ jeuˬ, Heˬtaˆ tsawˇ jeuˬ, Aˬmawˇliˆ tsawˇ jeuˬ, Hiˇbiˇ tsawˇ jeuˬ hawˇ-eu Yeˬbuˇ tsawˇ jeuˬ heu deuˬ jawˇ-eu miˇ kʼahˬ kʼoeˇ kʼahˬ naw maꞈ-ahˇ biꞈ-eu gʼaˇ duˬ, Sahˬpaˬ Miˬyehˇ saˇ jaˇ yaw muiˬ-ehˇ dzaˬ tsehˆ taˬ-euˬ meh. Miˇ tsaˬ miˇ muiˬ muiˬ dui dui-awˇ, baw le za le-eu miˇ kʼahˬ kʼoeˇ kʼahˬ laꞈ kʼoeˇ, naw maꞈ-ahˇ aˬ yawꞈ sheuˬ keuˆ nehˬ ngeh, aˬ yawꞈ kʼoꞈ yawꞈ ba la yaw beh siˬ laꞈ kʼoeˇ, bawˬ-iˬ heu hmˬ naw maꞈ ya jahˇ meh.

⁶ Shiꞈ nah keuˆ ni, dehˬ tseˬ maˬ ahˇ-eu kaˬ muˇ tehꞈ-ehˇ naw maꞈ ya dzaˬ-awˇ, shiꞈ nah aˬ yawꞈ nah-ahˇ, Sahˬpaˬ Miˬyehˇ-ahˇ taˬ huiˬ taˬ mahˇ-eu bawˬ-iˬ naw maꞈ ya jahˇ meh.

⁷ Shiꞈ nah keuˆ ni, dehˬ tseˬ keuˬ-awˇ jahˇ taˬ-euˬ kaˬ muˇ naw maꞈ maˬ ya dzaˬ-a. Dehˬ tseˬ maˬ ehˇ, dehˬ tseˬ ahˇ-eu kaˬ muˇ deuˬ maˬ ehˇ, naw maꞈ-euˬ jawˇ kʼahˬ jawˇ lahˬ laꞈ kʼoeˇ maˬ ya bi jaˆ-a.

⁸ Bawˬ-iˬ jahˇ-eu aˇ dahˬ beh ngeh jawˇ, Iˇjiˇtuˆ miˇ kʼahˬ laꞈ kʼoeˇ neh naw maꞈ doˆ le ngeh Sahˬpaˬ Miˬyehˇ neh naw maꞈ-ahˇ mˇ nehˬ-euˬ guiˬ lahˬ-ahˇ noeˬ keuˆ-eu laꞈ kʼoeˇ, heu loꞈ-ehˇ ya mˇ ya shaˇ-eu gaˇ kawˆ, naw maꞈ-euˬ aˬ li deuˬ-ahˇ dzawˇ nehˬ-awˬ.

⁹ Bawˬ-iˬ heu hmˬ-aˬ, naw maꞈ-euˬ laꞈ du-ahˇ maˬ ehˇ, naˇ kʼawˇ-ahˇ maˬ ehˇ, laꞈ tuiˆ paꞈ taˬ-euˬ loꞈ-ehˇ, tiˬ jawˇ-iˬ maˬ ngehˇ leˇ ni noeˬ mawˇ-eu jeˬ pyeuꞈ tehꞈ-a. Bawˬ-iˬ heu hmˬ-aˬ, Sahˬpaˬ Miˬyehˇ-euˬ Zahˇ dawˬ kʼoꞈ dawˬ-ahˇ maˬ tsehˆ leˇ ni gui poˆ-awˇ dzaw geuꞈ-eu gʼaˇ duˬ, naw maꞈ maˬ ya ngehˇ ni, bi noeˬ mawˇ-eu jeˬ pyeuꞈ tehꞈ-a. Aˬ jeˬ miˇ neh ehˇ naˇ, Sahˬpaˬ Miˬyehˇ-aˬ, aˬ yawꞈ-euˬ huiˬ-eu baoˬ-ahˇ gʼoe-awˇ, naw maꞈ-ahˇ Iˇjiˇtuˆ miˇ kʼahˬ laꞈ kʼoeˇ neh sheuˬ doˆ nehˬ-euˬ meh.

¹⁰ Aˬ yawꞈ kʼoꞈ yawꞈ aˇ yamˬ keuˆ laˇ ngeh, bawˬ-iˬ heu hmˬ naw maꞈ jahˇ-awˬ.”

Dehꞈ beh beh le-euˬ aˬ li

¹¹ “Naw maꞈ-ahˇ biꞈ-eu gʼaˇ duˬ, naw maꞈ-ahˇ maˬ ehˇ, naw maꞈ-euˬ aˬ poeˬ aˬ bawˇ deuˬ-ahˇ maˬ ehˇ, Sahˬpaˬ Miˬyehˇ neh saˇ jaˇ dzaˬ taˬ-euˬ Kaˬnaˬ tsawˇ jeuˬ-euˬ miˇ kʼahˬ-ahˇ, Sahˬpaˬ Miˬyehˇ naw maꞈ-ahˇ sheuˬ gʼeh tehꞈ-a. Miˇ kʼahˬ kʼoeˇ kʼahˬ naw maꞈ-ahˇ aˬ yawꞈ biꞈ laꞈ ngeh,

¹² dehꞈ beh beh le-euˬ aˬ li aˬ yuiꞈ deuˬ Sahˬpaˬ Miˬyehˇ-ahˇ naw maꞈ ya damˬ nehˬ tehꞈ-a. Jeˬ zaˬ deuˬ laꞈ kʼoeˇ, dehꞈ beh beh le-euˬ aˬ buˬ yawˬ mawˇ na luꞈ kʼawꞈ, Sahˬpaˬ Miˬyehˇ-euˬ pyeuꞈ-eu meh.

¹³ Dehꞈ beh beh le-euˬ mahˬ tahˬ laˆ mahˬ paˬ zaˬ yawˬ mawˇ na luꞈ-ahˇ, yawˇ zaˬ tiˬ mawˇ lawˇ dah nehˬ-awˇ ya zeuˇ kʼoꞈ geuꞈ meh.

¹⁴ Mehˬ hu paw dehꞈ daˆ leꞈ ngeh, ‘Bawˬ-iˬ heu hmˬ-euˬ dawˬ tsuiꞈ aˬ jeˬ-a’ lehˇ, naw maꞈ-euˬ aˬ li deuˬ naw maꞈ-ahˇ naˇ haˬ laˇ naˇ, heu loꞈ-ehˇ ehˇ kʼoꞈ nehˬ-awˬ. ‘Iˇjiˇtuˆ miˇ kʼahˬ laꞈ kʼoeˇ, nga maꞈ aˬ cawˬ zaˬ kʼaˆ geuꞈ luꞈ ngeh, Sahˬpaˬ Miˬyehˇ-aˬ, aˬ yawꞈ-euˬ huiˬ-eu baoˬ-ahˇ gʼoe-awˇ, nga maꞈ-ahˇ sheuˬ doˆ nehˬ laꞈ-euˬ meh.,

¹⁵ Iˇjiˇtuˆ sahˬ paˬ nui ma gʼahˇ-awˇ, nga maꞈ-ahˇ maˬ pyehˬ nehˬ laꞈ ni jawˇ ngeh, Iˇjiˇtuˆ miˇ kʼahˬ laꞈ kʼoeˇ, dehꞈ beh beh le-euˬ aˬ li aˬ yuiꞈ deuˬ-ahˇ, Sahˬpaˬ Miˬyehˇ sehꞈ-euˬ meh. Jeˬ zaˬ deuˬ laꞈ kʼoeˇ dehꞈ beh beh le-euˬ aˬ buˬ deuˬ-ahˇ kʼawꞈ, aˬ yawꞈ sehꞈ-euˬ meh. Kʼoeˇ miˇ neh, dehꞈ beh beh le-euˬ jeˬ zaˬ aˬ buˬ deuˬ Sahˬpaˬ Miˬyehˇ-ahˇ aˬ dui ya lawˇ nehˬ-awˇ, dehꞈ beh beh le-euˬ aˬ li aˬ yuiꞈ deuˬ-ahˇ aˬ dui ya zeuˇ kʼoꞈ geuꞈ-eu meh.

¹⁶ Kʼoeˇ loꞈ-ehˇ mˇ-eu jeˬ-aˬ, aˬ dui-euˬ naˇ kʼawˇ-ahˇ maˬ ehˇ, laꞈ du-ahˇ maˬ ehˇ, laꞈ tuiˆ paꞈ taˬ-euˬ loꞈ-ehˇ, tiˬ jawˇ-iˬ maˬ ngehˇ leˇ ni bi noeˬ mawˇ-eu jeˬ pyeuꞈ-awˇ, Sahˬpaˬ Miˬyehˇ neh aˬ yawꞈ-euˬ huiˬ-eu baoˬ-ahˇ gʼoe-awˇ, Iˇjiˇtuˆ miˇ kʼahˬ laꞈ kʼoeˇ neh sheuˬ doˆ nehˬ laꞈ-euˬ gaˇ, aˬ dui-ahˇ paˇ bi noeˬ mawˇ laꞈ tehꞈ-a’ lehˇ ehˇ nehˬ-awˬ.”

Mˬ dmˇ kʼawˇ zeuˇ hawˇ-eu miˬ dzaˬ kʼawˇ zeuˇ

¹⁷ Iˇjiˇtuˆ sahˬ paˬ Iˇsaˬleˬlaˆ tsawˇ haˬ deuˬ-ahˇ pyehˬ nehˬ-awˇ bi doˆ-iˇ ngeh, Piˇliˇtiˆ miˇ kʼahˬ caw caw-ehˇ dahˇ daˆ gʼeh-eu gaˇ ma kʼoeˇ kahˇ dawˇ dui dui kʼawꞈ, gaˇ ma kʼoeˇ kahˇ-ahˇ neh Iˇsaˬleˬlaˆ tsawˇ haˬ deuˬ-ahˇ Miˬyehˇ maˬ sheuˬ doˆ gʼeh-aˬ. “Mehˬ hu paw guiˇ ya deuˆ paˬ-ehˇ jaˆ-eu gaˇ Iˇsaˬleˬlaˆ tsawˇ haˬ deuˬ ya siˬ naˇ, Iˇjiˇtuˆ miˇ kʼahˬ-ahˇ paˇ gʼoꞈ poˆ-iˇ-eu jeˬ-ahˇ ngaˇ maˬ geuꞈ mawꞈ nya” lehˇ Miˬyehˇ noeˬ-eu meh.

¹⁸ Kʼoeˇ miˇ neh, aˬ yawꞈ maꞈ-ahˇ bawˇ tsahˬ bawˇ dahˇ doe doe-ehˇ sheuˬ jawˬ nehˬ-awˇ, Iˬ ma laˆ shaˆ Yaw neˇ jaˆ-eu paw sheuˬ gʼeh-euˬ meh. Iˇsaˬleˬlaˆ tsawˇ haˬ deuˬ-aˬ, guiˇ deuˆ-eu keu ka deuˬ pi luꞈ-eu meh.

¹⁹ Yoˇsehˆ neh Iˇsaˬleˬlaˆ tsawˇ haˬ deuˬ-ahˇ, aˬ yawꞈ neh ehˇ-euˬ loꞈ-ehˇ mˇ ma lehˇ saˇ jaˇ bi dzaˬ-euˬ loꞈ-ehˇ, Moˇseˬ-aˬ, Yoˇsehˆ-euˬ gʼawˇ mawˇ-ahˇ aˬ yawꞈ nehˬ-ehˇ yuˇ gʼeh-euˬ meh. “Miˬyehˇ naw maꞈ-ahˇ ka kʼoꞈ le ngeh, ngaˬ-euˬ gʼawˇ mawˇ-ahˇ, miˇ kʼahˬ heu kʼahˬ laꞈ kʼoeˇ neh naw maꞈ ya yuˇ doˆ gʼeh meh” lehˇ, Yoˇsehˆ neh ehˇ taˬ yaꞈ-euˬ jaˆ-eu meh.

²⁰ Iˇsaˬleˬlaˆ tsawˇ haˬ deuˬ Suˇkoˆ lehˇ kuˇ-eu jawˇ duˬ-ahˇ neh doˆ-iˇ-awˇ, bawˇ tsahˬ bawˇ dahˇ-ahˇ tehˬ ni jaˆ-eu Eˇdamˬ meuˬ-ahˇ sehˬ gʼawˆ gʼawˆ-awˇ naˬ-euˬ meh.

²¹ Uˬ ciꞈ nah gʼahˇ maˬ-ehˇ, aˬ yawꞈ maꞈ gaˇ ma doˆ-iˇ nya ni, nah gʼahˇ paw aˬ yawꞈ maꞈ-ahˇ gaˇ ma mehˬ-eu gʼaˇ duˬ, mˬ dmˇ kʼawˇ zeuˇ laꞈ kʼoeˇ, Sahˬpaˬ Miˬyehˇ aˬ yawꞈ maꞈ-euˬ mehˬ hu iˇ-awˇ, uˬ ciꞈ paw miˬ dzaˬ kʼawˇ zeuˇ laꞈ kʼoeˇ aˬ yawꞈ maꞈ-euˬ meh hu aˬ yawꞈ iˇ-eu laꞈ kʼoeˇ, aˬ yawꞈ maꞈ-ahˇ yaw shehꞈ bya nehˬ-euˬ meh.

²² Iˇsaˬleˬlaˆ tsawˇ haˬ deuˬ mehˬ shi, nah gʼahˇ paw mˬ dmˇ kʼawˇ zeuˇ aˬ myah luꞈ jaˆ-awˇ, uˬ ciꞈ paw miˬ dzaˬ kʼawˇ zeuˇ aˬ myah luꞈ jaˆ-euˬ meh.