Daˬyeˬlaˇ 9 - Akha

Daˬyeˬlaˇ aˬ yawꞈ-euˬ tsawˇ jeuˬ gʼaˇ duˬ guiˬ lahˬ shaˇ-euˬ

¹ Meˬdiˇ tsawˇ jeuˬ Dzeuˬsehˆ-euˬ aˬ li Daˬliˇ-aˬ, Baˬbuˇloˬ miˇ kʼahˬ-ahˇ uˆ lahˇ-euˬ meh.

² Aˬ yawꞈ uˆ lahˇ-euˬ nyiˬ kʼoꞈ tiˬ kʼoꞈ-ahˇ, muiˬ-eu shawˇ-eu sahˬ boꞈ deuˬ-ahˇ ngaˇ gui-awˇ, Miˬyehˇ gʼaˇ duˬ ngehˬ dah-eu Yeˬlaˬmiˇ-ahˇ Sahˬpaˬ Miˬyehˇ neh ehˇ nehˬ-euˬ gaˇ kawˆ pyeuꞈ-eu, “Shiꞈ tseˇ kʼoꞈ byah ni Yeˬluˇsaˬlehˬ meuˬ yaw cawˆ-ehˇ jaˆ tehꞈ-a” lehˇ ehˇ taˬ-euˬ gaˇ kawˆ kʼoeˇ ngaˇ shaˇ noeˬ luꞈ-eu ma.

³ Kʼoeˇ naˇ, ngaˇ maˬ dzaˬ maˬ dawˇ ni jawˇ-awˇ, guˬ daˇ pehˇ zeuˇ mehˬ tsoeˬ dm-euˬ uˬ taꞈ, kʼaˬ lehˇ tsahˬ-ahˇ nuiˇ-awˇ, Sahˬpaˬ Miˬyehˇ pyeuꞈ-eu Miˬyehˇ-ahˇ guiˬ lahˬ shaˇ dui dui-euˬ ma.

⁴ Ngaˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ ngaˇ guiˬ lahˬ shaˇ-eu laꞈ kʼoeˇ, ngaˬ-euˬ tsawˇ jeuˬ-euˬ iˬ baˇ ehˇ doˆ nehˬ-euˬ ma. “Sahˬpaˬ Miˬyehˇ pyeuꞈ-eu Miˬyehˇ-oˇ, nawˇ-aˬ, huiˬ dui mahˇ dui dui-eu gʼaˬ meh. Nawˬ-ahˇ nga maꞈ taˬ huiˬ taˬ mahˇ-eu ma. Nawˬ-euˬ dawˬ ma saˇ jaˇ-ahˇ nawˇ maˬ byehˇ dzeh ni, nawˬ-ahˇ gaˬ-awˇ, nawˬ-euˬ dawˬ-ahˇ naˇ haˬ geuꞈ-eu tsawˇ haˬ deuˬ kʼoeˇ taˆ, nawˬ-euˬ gʼoeˇ-eu gaˬ-eu jeˬ tiˬ jawˇ-iˬ maˬ tsehˆ-iˇ-a.

⁵ “Nga maꞈ iˬ baˇ mˇ-euˬ ma. Nga maꞈ haiˬ-eu tsawˇ haˬ deuˬ pyeuꞈ-awˇ, nawˬ -ahˇ puiˬ-euˬ ma. Nawˬ neh bi mˇ laꞈ-euˬ jeˬ-ahˇ nga maꞈ maˬ mˇ ni, nawˬ neh mehˬ nehˬ laꞈ-euˬ yaw tsaˬ yaw dawˇ jeˬ-ahˇ nga maꞈ byehˇ dzeh-euˬ ma.

⁶ Nga maꞈ-euˬ sahˬ paˬ sahˬ ma deuˬ, nga maꞈ-euˬ aˬ poeˬ aˬ bawˇ deuˬ hawˇ-eu, nga maꞈ tsawˇ jeuˬ-ahˇ, nawˬ-euˬ tsawˇ myahˇ uˬ moˆ ngehˬ-eu tmˇ-eu deuˬ pyeuꞈ-eu Miˬyehˇ gʼaˇ duˬ ngehˬ dah-eu nawˬ-euˬ zaˬ kʼaˆ deuˬ-euˬ ehˇ dawˬ nga maꞈ maˬ naˇ haˬ ni dehꞈ-euˬ ma.

⁷ Sahˬpaˬ Miˬyehˇ-oˇ, nawˇ-aˬ, aˬ myah luꞈ yaw tsaˬ yaw dawˇ jeˬ tehꞈ-ehˇ mˇ-eu meh. Ehˇ kʼawꞈ, nga maꞈ-aˬ, yawˬ ha-euˬ myaˆ pyawˬ naˇ mehˇ cawˆ-eu jeˬ tehꞈ-ehˇ mˇ-euˬ ma. Yuˇdaˆ miˇ kʼahˬ-ahˇ jawˇ-eu deuˬ maˬ ehˇ, Yeˬluˇsaˬlehˬ meuˬ-ahˇ jawˇ-eu deuˬ maˬ ehˇ, dawˬ peh gaˇ mahˇ jaˆ-eu miˇ kʼahˬ deuˬ-ahˇ nawˬ neh teh byaˆ-awˇ bi jawˇ-euˬ Iˇsaˬleˬlaˆ tsawˇ haˬ dawˬ tawˆ luꞈ maˬ ehˇ, nawˬ-ahˇ saˇ jaˇ maˬ ziꞈ-eu miˇ neh, aˬ yawꞈ maꞈ kʼoeˇ taˆ shaꞈ dawˇ-eu jeˬ keuˆ le taˬ-euˬ meh.

⁸ Sahˬpaˬ Miˬyehˇ-oˇ, nga maꞈ-euˬ sahˬ paˬ sahˬ ma deuˬ hawˇ-eu, nga maꞈ-euˬ aˬ poeˬ aˬ bawˇ deuˬ, nawˬ-euˬ mehˬ shi iˬ baˇ mˇ-awˇ, shaꞈ dawˇ dui dui paˬ-ehˇ dehꞈ-euˬ meh.

⁹ Nga maꞈ nawˬ-ahˇ puiˬ-euˬ kʼawꞈ, nawˇ gʼawˬ shaˬ gaˬ-awˇ iˬ baˇ pyehˬ nehˬ laꞈ-euˬ meh.

¹⁰ Nga maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ, nawˬ-euˬ zaˬ kʼaˆ pyeuꞈ-eu Miˬyehˇ gʼaˇ duˬ ngehˬ dah-eu deuˬ-ahˇ gʼoe-awˇ, nawˬ neh nga maꞈ-ahˇ biꞈ laꞈ-euˬ zahˇ dawˬ kʼoꞈ dawˬ-ahˇ caw teh-awˇ dehꞈ-awˬ lehˇ nawˇ ehˇ gaˇ, nga maꞈ maˬ naˇ haˬ geuꞈ-aˬ.

¹¹ Iˇsaˬleˬlaˆ tsawˇ jeuˬ jeuˬ lah ni nawˬ-euˬ zahˇ dawˬ kʼoꞈ dawˬ-ahˇ byehˇ-awˇ, nawˇ ehˇ gaˇ maˬ naˇ haˬ ni dehꞈ-euˬ meh. Nawˬ-euˬ mehˬ shi nga maꞈ iˬ baˇ mˇ-euˬ miˇ neh, nawˬ-euˬ zaˬ kʼaˆ Moˇseˬ-euˬ Zahˇ dawˬ kʼoꞈ dawˬ laꞈ kʼoeˇ boꞈ ahˇ taˬ-euˬ yaˬ kʼehˇ yaˬ-eu jeˬ, nga maꞈ kʼoeˇ taˆ nawˇ bi keuˆ le-euˬ meh.

¹² Nga maꞈ hawˇ-eu nga maꞈ kʼoeˇ taˆ uˆ lahˇ-eu deuˬ kʼoeˇ taˆ bi keuˆ le ma lehˇ ehˇ taˬ-euˬ jeˬ, nawˇ bi keuˆ le-euˬ meh. Miˇ tsaˬ kʼoeˇ taˆ jaˆ-eu meuˬ tiˬ meuˬ-iˬ maˬ ya daˬ haw-euˬ kʼehˬ-eu kʼaˆ-eu jeˬ-ahˇ, Yeˬluˇsaˬlehˬ meuˬ ya daˬ-euˬ meh.

¹³ Moˇseˬ-euˬ Zahˇ dawˬ kʼoꞈ dawˬ laꞈ kʼoeˇ kʼaˇ boꞈ taˬ-euˬ kʼehˬ-eu kʼaˆ-eu jeˬ nga maꞈ kʼoeˇ taˆ keuˆ le gʼaˬ-euˬ meh. Ehˇ kʼawꞈ, nga maꞈ-eu Miˬyehˇ pyeuꞈ-eu Sahˬpaˬ Miˬyehˇ-oˇ, nga maꞈ iˬ baˇ mˇ-eu maˬ naˬ leˇ-ehˇ, nymˬ-mˇ keuˆ ni nawˬ-euˬ nui kʼahˇ hawˇ-eu nawˬ-euˬ yaw tsaˬ yaw dawˇ jeˬ-ahˇ maˬ poˆ ni dehꞈ luꞈ-eu ma.

¹⁴ Nga maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ, nawˇ aˬ myah luꞈ yaw tsaˬ yaw dawˇ dawˇ-ehˇ mˇ-eu gʼaˬ pyeuꞈ-eu loꞈ-ehˇ, nawˬ-euˬ ehˇ dawˬ-ahˇ nga maꞈ maˬ naˇ haˬ-euˬ miˇ neh, nga maꞈ-ahˇ kʼehˬ-eu kʼaˆ-eu gʼaˇ duˬ nawˬ neh lehˬ hmˬ taˬ-euˬ loꞈ-ehˇ, kʼehˬ nehˬ kʼaˆ nehˬ laꞈ-euˬ meh.

¹⁵ “Nawˬ-euˬ baoˬ-ahˇ gʼoe-awˇ nawˬ-euˬ tsawˇ haˬ deuˬ-ahˇ Iˇjiˇtuˆ miˇ kʼahˬ laꞈ kʼoeˇ neh sheuˬ doˆ laꞈ nehˬ-awˇ, kʼoeˇ baˬ da neh iˬ nah keuˆ ni tsawˇ myahˇ doˆ luꞈ-eu nga maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ, nga maꞈ iˬ baˇ mˇ-euˬ ma.

¹⁶ Nga maꞈ lehˬ-iˇ-euˬ miˇ-a. Dzeuˇ laˇ ngeh, nga maꞈ-ahˇ nawˇ haw piˇ nehˬ laꞈ-euˬ meh. Kʼoeˇ miˇ neh, Yeˬluˇsaˬlehˬ meuˬ-ahˇ nui ma taˬ pehˇ nehˬ laꞈ. Kʼoeˇ-aˬ, nawˬ-euˬ meuˬ meh. Nawˬ-euˬ muiˬ-eu shawˇ-eu gawˬ jawˬ meh. Nga maꞈ-euˬ iˬ baˇ hawˇ-eu nga maꞈ-euˬ aˬ poeˬ aˬ bawˇ deuˬ neh mˇ-euˬ yaw lehˬ jeˬ baˬ da neh, dawˬ peh jaˆ-eu miˇ kʼahˬ deuˬ-ahˇ jawˇ-eu tsawˇ haˬ deuˬ, Yeˬluˇsaˬlehˬ meuˬ hawˇ-eu nawˬ-euˬ tsawˇ haˬ deuˬ-ahˇ ja bu luꞈ meh.

¹⁷ Miˬyehˇ-oˇ, ngaˇ guiˬ lahˬ shaˇ gaˇ naˇ haˬ nehˬ laꞈ. Ngaˬ-euˬ shaˇ dawˬ-ahˇ naˬ bawˇ ciˬ kʼmˇ nehˬ laꞈ. Nawˇ Miˬyehˇ pyeuꞈ-eu gaˇ kawˆ tsawˇ haˬ yawˬ gʼaˬ na luꞈ-ahˇ siˬ duˬ leˇ ni, cawˆ-iˇ taˬ-euˬ Uˬ duˬ tahˬ nymˇ nymˇ ma paˇ laˆ muiˬ kʼoꞈ nehˬ laꞈ.

¹⁸ Miˬyehˇ-oˇ, nga maꞈ-euˬ shaˇ dawˬ-ahˇ naˇ haˬ nehˬ laꞈ-awˇ, nga maꞈ hawˇ-eu nawˬ-euˬ tsawˇ myahˇ pi luꞈ-eu meuˬ-euˬ shaˬ zahˬ haw mawˇ nehˬ laꞈ. Nga maꞈ yaw tsaˬ yaw dawˇ miˇ neh heu loꞈ-ehˇ guiˬ lahˬ shaˇ-eu maˬ ngeuˇ. Nawˇ gʼawˬ shaˬ gaˬ nya-eu gʼaˬ pyeuꞈ-eu miˇ neh, heu loꞈ-ehˇ shaˇ-eu ma.

¹⁹ Sahˬpaˬ Miˬyehˇ-oˇ, shaˇ dawˬ naˇ haˬ nehˬ laꞈ. Sahˬpaˬ Miˬyehˇ-oˇ, iˬ baˇ pyehˬ nehˬ laꞈ. Sahˬpaˬ Miˬyehˇ-oˇ, nga maꞈ-euˬ shaˇ dawˬ gaˬ-awˇ, mˇ keuˆ shaˇ keuˆ nehˬ laꞈ. Nawˇ Miˬyehˇ pyeuꞈ-eu gaˇ kawˆ tsawˇ haˬ yawˬ gʼaˬ na luꞈ-ahˇ siˬ duˬ leˇ ni, maˬ nyi naˬ ni ngehˬ gʼeh nehˬ laꞈ. Meuˬ heu meuˬ nawˬ-euˬ meuˬ pyeuꞈ-awˇ, tsawˇ haˬ heu deuˬ nawˬ-euˬ tsawˇ haˬ meh.”

Shiꞈ tseˇ kʼoꞈ shiꞈ poˆ

²⁰ Ngaˇ guiˬ lahˬ shaˇ shaˇ-ehˇ, ngaˬ-euˬ iˬ baˇ hawˇ-eu ngaˬ-euˬ tsawˇ jeuˬ Iˇsaˬleˬlaˆ tsawˇ haˬ deuˬ-euˬ iˬ baˇ ehˇ doˆ-awˇ, aˬ yawꞈ-euˬ muiˬ-eu shawˇ-eu Uˬ duˬ tahˬ nymˇ nymˇ ma paˇ tsoˆ muiˬ-eu gʼaˇ duˬ, ngaˬ-eu Miˬyehˇ pyeuꞈ-eu Sahˬpaˬ Miˬyehˇ-ahˇ shaˇ-euˬ ma.

²¹ Ngaˇ kʼoeˇ loꞈ-ehˇ guiˬ lahˬ shaˇ shaˇ-ehˇ jawˇ ngeh, yaw beh yaw sahˇ laꞈ kʼoeˇ ya siˬ ya mawˇ-eu jeˬ laꞈ kʼoeˇ ngaˬ neh mawˇ-euˬ Gaˬbeˬlaˇ kʼoeˇ gʼaˬ, ngaˇ jawˇ gaˇ zaw ka gʼeh leꞈ-euˬ meh.

²² Aˬ yawꞈ ngaˬ-ahˇ heu loꞈ-ehˇ ehˇ mehˬ le-euˬ meh. “Daˬyeˬlaˇ-oˇ, nawˬ-ahˇ gʼoˆ siˬ gʼoˆ shaw nya-eu zaˬ siˬ tsawˇ gahˇ biꞈ-eu gʼaˇ duˬ ngaˇ oe-euˬ ma.

²³ Nawˇ guiˬ lahˬ shaˇ dahˬ beh ngeh neh, nawˬ-euˬ shaˇ dawˬ-ahˇ Miˬyehˇ naˇ haˬ geuꞈ-euˬ meh. Aˬ yawꞈ nawˬ-ahˇ gaˬ-eu meh. Kʼoeˇ miˇ neh, ngaˇ nawˬ-ahˇ ehˇ mehˬ le-eu lehˇ oe-euˬ ma. Yaw sahˇ laꞈ kʼoeˇ ya siˬ ya mawˇ-euˬ gaˇ kawˆ heu ngaˇ ja mehˬ ngeh, nawˇ yaw muiˬ paˬ-ehˇ naˇ haˬ taˬ-awˬ.

²⁴ “Shiꞈ tseˇ kʼoꞈ, shiꞈ poˆ lehˇ ehˇ-euˬ-aˬ, nawˬ-euˬ tsawˇ jeuˬ hawˇ-eu naw maꞈ-euˬ muiˬ-eu shawˇ-eu meuˬ-ahˇ iˬ baˇ hawˇ-eu yaw haiˬ jeˬ laꞈ kʼoeˇ ka kʼoꞈ nehˬ-eu gʼaˇ duˬ, Miˬyehˇ neh dza taˬ-euˬ aˇ yamˬ-ahˇ ehˇ-eu meh. Yaw sahˇ laꞈ kʼoeˇ kʼaˇ ya siˬ kʼaˇ ya mawˇ-euˬ loꞈ-ehˇ aˬ diˇ aˬ maˇ keuˆ le-awˇ, muiˬ-eu shawˇ-eu Uˬ duˬ tahˬ nymˇ nymˇ ma paˇ ya a nehˬ-eu aˇ nah bi keuˆ le-eu gʼaˇ duˬ, iˬ baˇ mˇ-eu jeˬ aˇ saˬ bi saˬ le-awˇ, mˬ maˬ maˬ byaˆ zaˇ ziˇ ziꞈ-eu yaw tsaˬ yaw dawˇ jeˬ ziꞈ dah ni bi jaˆ le tehꞈ-a.

²⁵ Gaˇ kawˆ heu gʼoˆ shaw-awˇ juiˇ taˬ-awˬ. Yeˬluˇsaˬlehˬ meuˬ bi tsoˆ muiˬ-eu gʼaˇ duˬ dawˬ biꞈ-euˬ aˇ yamˬ-ahˇ neh, Miˬyehˇ neh tsiˇ shehˆ daˆ-awˇ tseˇ doˆ taˬ-euˬ uˆ lahˇ-eu gʼaˬ oe keuˆ ngeh keuˆ ni, shiꞈ kʼoꞈ, shiꞈ poˆ myahˇ tehꞈ-a. Yeˬluˇsaˬlehˬ meuˬ hawˇ-eu meuˬ laꞈ kʼoeˇ jaˆ-eu gaˇ ma deuˬ gawˬ muiˬ tsoˆ muiˬ jiˇ-awˇ, muiˇ-eu deuˬ guiˇ maˬ bi deuˆ gʼaˬ laˇ nya ni, ziꞈ dah ni gʼeh-eu taˆ deuˬ gawˬ ziꞈ tsoˆ ziꞈ gʼaˬ-awˇ, koꞈ tseˇ nyiꞈ kʼoꞈ, shiꞈ poˆ keuˆ ni gmˬ tehꞈ-a. Ehˇ kʼawꞈ, aˇ yamˬ kʼoeˇ yamˬ-aˬ, shaˬ zahˬ naꞈ-eu aˇ yamˬ pyeuꞈ tehꞈ-a.

²⁶ Aˇ yamˬ kʼoeˇ yamˬ aˇ saˬ saˬ laˇ ngeh, Miˬyehˇ neh tseˇ doˆ-awˇ bi uˆ lahˇ-euˬ tsawˇ haˬ kʼoeˇ gʼaˬ, maˬ tsaˬ maˬ dawˇ-eu laꞈ kʼoeˇ bi sehꞈ tehꞈ-a. Baoˬ huiˬ-eu uˆ lahˇ-eu tsawˇ haˬ tiˬ gʼaˬ-euˬ guiˇ maꞈ uˇ le-awˇ, meuˬ hawˇ-eu Uˬ duˬ tahˬ nymˇ nymˇ ma-ahˇ laˆ cawˆ tehꞈ-a. Aˇ saˬ saˬ-eu aˇ nah aˇ yamˬ iˇ jeuˬ jeuˬ-eu loꞈ-ehˇ keuˆ le-awˇ, Miˬyehˇ neh lehˬ hmˬ taˬ-euˬ guiˇ deuˆ-eu jeˬ hawˇ-eu laˆ luˬ laˆ seˇ-eu jeˬ hehˇ ahˇ leꞈ tehꞈ-a.

²⁷ Uˆ lahˇ-eu tsawˇ haˬ kʼoeˇ gʼaˬ, shiꞈ kʼoꞈ keuˆ ni tsawˇ haˬ gʼawˬ mya gʼaˬ nehˬ-ehˇ dawˬ ma saˇ jaˇ dzaˬ taꞈ-awˇ, aˇ yamˬ tiˬ paˆ paˆ-iˇ ngeh, lawˇ-eu shehˇ-eu jeˬ maˬ bi mˇ ni laˆ tsoeˬ tehꞈ-a. Uˬ duˬ tahˬ nymˇ nymˇ ma-euˬ kʼaˬ boeˬ-ahˇ, doeˇ dui dui-eu nui daˆ daˆ laˇ paˬ-ehˇ gʼeh-eu jeˬ bi jaˆ-awˇ, kʼoeˇ loꞈ-ehˇ bi jaˆ-euˬ gʼaˬ-ahˇ yaˇ kʼaˬ daˇ-eu gʼaˇ duˬ, Miˬyehˇ neh lehˬ hmˬ taˬ-eu aˇ yamˬ maˬ keuˆ laˇ kʼoeˇ keuˆ ni, kʼoeˇ gaˇ jaˆ tehꞈ-a.”