Daˬyeˬlaˇ 8 - Akha

Yawˇ hawˇ-eu ciꞈ myehꞈ

¹ Beˬlaˇshaˬzaˬ sahˬ paˬ geuꞈ-euˬ smˇ kʼoꞈ tiˬ kʼoꞈ-ahˇ, yaw sahˇ laꞈ kʼoeˇ heu loꞈ-ehˇ paˇ ya mawˇ-euˬ ma.

² Yaw sahˇ laꞈ kʼoeˇ ya siˬ ya mawˇ-eu jeˬ laꞈ kʼoeˇ, Eˇlamˬ miˇ kʼahˬ-ahˇ jaˆ-eu Suˇsaˬ meuˬ-ahˇ ngaˇ jawˇ luꞈ gaˇ ya mawˇ-euˬ ma. Kʼoeˇ gaˇ, Uˇlehˇ lawˇ baˬ dawˬ peh ngaˇ yawꞈ luꞈ-eu ma.

³ Lawˇ baˬ lawˇ dzeˇ-ahˇ, uˬ coeˇ coeˇ mahˇ nyiˬ kahˬ tsoꞈ-eu yawˇ tiˬ mawˇ ngaˇ mawˇ-euˬ ma. Uˬ coeˇ tiˬ kahˬ-aˬ, mahˇ dzehˬ-awˇ shuiꞈ dzehˬ-eu meh.

⁴ Yawˇ kʼoeˇ mawˇ aˬ yawꞈ-euˬ uˬ coeˇ neh, nahˇ ma ga kʼehˬ paw pyawˬ, laꞈ taˆ paw pyawˬ hawˇ-eu, laꞈ oˆ paw pyawˬ-ahˇ coeˬ tahˬ gʼeh gaˇ ngaˇ ya mawˇ-euˬ ma. Jeˬ zaˬ tiˬ mawˇ-iˬ aˬ yawꞈ-ahˇ maˬ ciˬ daˬ leˇ nya-eu uˬ taꞈ, aˬ yawꞈ-ahˇ maˬ cehˆ dzeuˇ nya-a. Aˬ yawꞈ kʼaˇ gʼeh mawꞈ-eu jeˬ gʼeh-awˇ, huiˬ dui mahˇ dui dui luꞈ-eu meh.

⁵ Gaˇ kawˆ kʼoeˇ ngaˇ shaˇ noeˬ luꞈ ngeh, nahˇ ma ga kʼehˬ paw neh ciꞈ myehꞈ tiˬ mawˇ sehˇ laꞈ gaˇ ngaˇ ya mawˇ-euˬ ma. Ciꞈ myehꞈ kʼoeˇ mawˇ sehˇ-eu kawˇ dui dui-eu miˇ neh, aˬ kuiˇ miˇ tsa maˬ tuˆ-a. Aˬ yawꞈ-euˬ myaˆ nuiˆ nyiˬ nuiˆ yaw kaˬ-ahˇ, uˬ coeˇ tiˬ coeˇ ngaw law ni tsoꞈ-eu meh.

⁶ Yaw beh ngaˬ neh mawˇ-euˬ, lawˇ baˬ lawˇ dzeˇ yawꞈ luꞈ-eu uˬ coeˇ nyiˬ kahˬ tsoꞈ-eu yawˇ kʼoeˇ mawˇ jawˇ gaˇ, ciꞈ myehꞈ kʼoeˇ mawˇ gʼaˬ kʼaˇ jaˆ-eu shaˇ-awˇ coeˬ gʼeh-euˬ meh.

⁷ Yawˇ kʼoeˇ mawˇ-ahˇ aˬ yawꞈ coeˬ tahˬ gʼeh gaˇ ngaˇ haw luꞈ-eu ma. Aˬ yawꞈ nui ma pehˇ dui dui-eu miˇ neh, yawˇ kʼoeˇ mawˇ-ahˇ ciˬ tuˆ dzeh gʼeh-awˇ, uˬ coeˇ nyiˬ kahˬ luꞈ tahˬ kʼehꞈ-euˬ meh. Yawˇ kʼoeˇ mawˇ aˬ yawꞈ-ahˇ ciˬ daˬ-eu gʼaˬ maˬ ahˇ-a. Miˇ tsa bi tahˬ dzeh gʼeh-awˇ, nawˬ pahˬ nawˬ lahˇ nehˬ-euˬ meh. Ehˇ kʼawꞈ, yawˇ kʼoeˇ mawˇ-ahˇ tiˬ gʼaˬ-iˬ maˬ ka kʼoꞈ nehˬ nya-a.

⁸ Ciꞈ myehꞈ kʼoeˇ mawˇ tiˬ jawˇ saˇ-i tiˬ jawˇ nui ma huiˬ dui mahˇ dui dui laˇ-euˬ meh. Ehˇ kʼawꞈ, aˬ yawꞈ kʼaˇ kʼaˆ maˬ kʼaˆ kʼaˆ ngeh, aˬ yawꞈ-euˬ uˬ coeˇ kʼoeˇ kahˬ lehˆ iˇ-awˇ, ngaw law ni mawˇ laˇ-eu uˬ coeˇ oeˬ kahˬ paˇ doˆ laˇ-euˬ meh. Uˬ coeˇ kʼoeˇ oeˬ kahˬ-aˬ, tiˬ kahˬ tiˬ paw pyawˇ-eu meh.

⁹ Uˬ coeˇ kʼoeˇ oeˬ kahˬ laꞈ kʼoeˇ tiˬ kahˬ-ahˇ, uˬ coeˇ coeˇ zaˬ tiˬ coeˇ tsoꞈ doˆ laˇ-euˬ meh. Uˬ coeˇ coeˇ yaˬ kʼoeˇ coeˇ-euˬ baoˬ, laꞈ oˆ paw pyawˬ-ahˇ maˬ ehˇ, nahˇ ma doˆ kʼehˬ paw pyawˬ-ahˇ maˬ ehˇ, muiˬ dui dui-eu miˇ kʼahˬ paw maˬ ehˇ, pymˬ tehˬ jiˇ gʼeh-euˬ meh.

¹⁰ Uˬ coeˇ kʼoeˇ kahˬ gʼaˬ kʼaˆ dui dui laˇ-awˇ, mˬ taˆ guiˇ maꞈ-ahˇ maˬ ehˇ, aˬ guiˇ deuˬ-ahˇ maˬ ehˇ, guiˇ deuˆ nya laˇ-euˬ meh. Aˬ guiˇ tiˬ paˆ na deuˬ-ahˇ miˇ ca deuˆ ka-awˇ, nawˬ pahˬ-euˬ meh.

¹¹ Mˬ taˆ guiˇ maꞈ kʼoeˇ taˆ uˆ lahˇ-eu gʼaˬ-ahˇ kʼawꞈ aˬ yawꞈ yehˬ bawˬ sehˇ lu-ehˇ ehˇ niˇ gʼa-awˇ, aˬ yawꞈ nah yawꞈ aˬ yawꞈ-ahˇ lawˇ nehˬ-eu jeˬ maˬ bi lawˇ ni laˆ tsoeˬ-eu uˬ taꞈ, Uˬ duˬ tahˬ nymˇ nymˇ ma-ahˇ laˆ jawꞈ-euˬ meh.

¹² Tsawˇ haˬ zaˬ deuˬ kʼoeˇ gaˇ aˬ yawꞈ nah yawꞈ lawˇ-eu jeˬ maˬ paˇ lawˇ ni, iˬ baˇ mˇ-awˇ, yaw tsaˬ yaw dawˇ jeˬ-ahˇ miˇ tsa biˬ dzeh-euˬ meh. Uˬ coeˇ kʼoeˇ kahˬ-aˬ, aˬ yawꞈ kʼaˇ mˇ mawꞈ-eu jeˬ mˇ pyeuꞈ nya-eu meh.

¹³ Mˬ taˆ gʼaˬ kʼehˇ tiˬ gʼaˬ mˬ taˆ gʼaˬ kʼehˇ yawˬ gʼaˬ yawˬ-ahˇ heu loꞈ-ehˇ naˇ haˬ gaˇ ngaˇ ya gaˬ-euˬ ma. “Yaw sahˇ laꞈ kʼoeˇ ya siˬ yaw mawˇ luꞈ-eu gaˇ kawˆ heu deuˬ, aˇ myah keuˆ ni heu loꞈ-ehˇ tehꞈ-ehˇ jaˆ-eu gʼeh ta. Aˬ yawꞈ nah yawꞈ lawˇ-eu shehˇ-eu jeˬ mˇ-eu dah zaˇ, iˬ baˇ mˇ mˇ-ehˇ jawˇ-eu teu aˇ myah keuˆ ni jaˆ-eu gʼeh ta. Mˬ taˆ guiˇ maꞈ hawˇ-eu Uˬ duˬ tahˬ nymˇ nymˇ ma-ahˇ, aˇ myah keuˆ ni bi nawˬ pahˬ-eu gʼeh ta.”

¹⁴ Kʼoeˇ ngeh, mˬ taˆ gʼaˬ kʼehˇ yawˬ gʼaˬ yawˬ heu loꞈ-ehˇ ehˇ-eu meh. “Uˬ ciꞈ paw hawˇ-eu uˬ shawˬ paw lawˇ-eu jeˬ maˬ lawˇ maˬ shehˇ nya-eu aˇ nah aˇ yamˬ tiˬ heˇ tiˬ yaˇ ngaˬ tseˇ nah jaˆ tehꞈ-a. Kʼoeˇ naˇ, Uˬ duˬ tahˬ nymˇ nymˇ ma paˇ muiˬ paˇ shawˇ kʼoꞈ laˇ tehꞈ-a.”

Yaw sahˇ laꞈ kʼoeˇ ya siˬ ya mawˇ-euˬ gaˇ kawˆ mˬ taˆ gʼaˬ kʼehˇ Gaˬbeˬlaˇ ja mehˬ-eu

¹⁵ Yaw sahˇ laꞈ kʼoeˇ ya siˬ ya mawˇ-euˬ dawˬ tsuiꞈ kʼoeˇ ngaˇ shaˇ noeˬ luꞈ ngeh, tsawˇ haˬ tiˬ gʼaˬ ngaˬ-euˬ mehˬ shi ja pyuˬ ni yawꞈ le-euˬ meh.

¹⁶ Kʼoeˇ ngeh, “Gaˬbeˬlaˇ-oˇ, tsawˇ haˬ teu gʼaˬ-ahˇ, aˬ yawꞈ neh ya mawˇ-euˬ gaˇ kawˆ dawˬ tsuiꞈ ehˇ mehˬ nehˬ-awˬ” lehˇ, Uˇlehˇ lawˇ baˬ paw neh guˇ-eu teˇ saˇ ngaˇ ya gaˬ-euˬ ma.

¹⁷ Gaˬbeˬlaˇ oe-awˇ ngaˬ-euˬ dawˬ peh yawꞈ le ngeh, ngaˇ guˆ dui dui-iˇ-awˇ, miˇ tsa coˬ dzeh-euˬ ma. Aˬ yawꞈ ngaˬ-ahˇ ehˇ-eu, “Tsawˇ haˬ zaˬ-oˇ, nawˬ neh yaw sahˇ laꞈ kʼoeˇ ya siˬ ya mawˇ-euˬ dawˬ tsuiꞈ siˬ nya-awˬ. Kʼoeˇ-aˬ, miˇ tsaˬ heu aˇ saˬ saˬ-eu gaˇ kawˆ-ahˇ taꞈ leˇ-eu meh.”

¹⁸ Aˬ yawꞈ kʼoeˇ loꞈ-ehˇ ehˇ luꞈ ngeh, ngaˇ miˇ tsa coˬ dzeh-awˇ maˬ noeˬ-ehˇ pyeuꞈ-iˇ-euˬ ma. Ehˇ kʼawꞈ, aˬ yawꞈ ngaˬ-ahˇ baꞈ tuˇ nehˬ laꞈ-euˬ meh.

¹⁹ Aˬ yawꞈ ehˇ-eu, “Miˬyehˇ nui ma pehˇ-eu jeˬ aˬ joˆ-ehˇ gʼeh laˇ nga lehˇ nawˬ-ahˇ ngaˇ mehˬ nehˬ nyaˇ. Nawˬ neh ya siˬ ya mawˇ-euˬ heu-aˬ, aˇ saˬ saˬ-eu aˇ nah aˇ yamˬ-ahˇ taꞈ leˇ-eu meh.

²⁰ “Nawˬ neh ya mawˇ-euˬ uˬ coeˇ nyiˬ kahˬ tsoꞈ-eu yawˇ kʼoeˇ mawˇ-aˬ, Meˬdiˇ miˇ kʼahˬ hawˇ-eu Paˇshaˇ miˇ kʼahˬ-ahˇ ehˇ mawꞈ-eu meh.

²¹ Ciꞈ myehꞈ kʼoeˇ mawˇ-aˬ, Heˬlaˬshaˆ miˇ kʼahˬ pyeuꞈ-awˇ, myaˆ nuiˆ nyiˬ nuiˆ yaw kaˬ-ahˇ ngaw law ni tsoꞈ-eu uˬ coeˇ kʼoeˇ kahˬ-aˬ, sahˬ paˬ yaw beh gʼaˬ-ahˇ ehˇ mawꞈ-eu meh.

²² Uˬ coeˇ yaw beh kahˬ lehˆ dzeh-awˇ paˇ doˆ laˇ-euˬ uˬ coeˇ kʼoeˇ oeˬ kahˬ-aˬ, miˇ kʼahˬ kʼoeˇ kʼahˬ laꞈ kʼoeˇ miˇ kʼahˬ oeˬ kʼahˬ paˆ doˆ-iˇ-awˇ, yaw beh loꞈ-ehˇ gʼaˬ maˬ kʼaˆ ni pyeuꞈ-iˇ gaˇ ehˇ mawꞈ-eu meh.

²³ “Miˇ kʼahˬ kʼoeˇ deuˬ aˇ saˬ saˬ-eu aˇ nah aˇ yamˬ dawˬ peh peh laˇ-awˇ, haiˬ dui dui laˇ ngeh, nui ma gʼahˇ dui dui-awˇ dzawˬ dui gahˇ dui dui-eu sahˬ paˬ tiˬ gʼaˬ doˆ laˇ tehꞈ-a.

²⁴ Aˬ yawꞈ-aˬ, baoˬ huiˬ dui dui tehꞈ-a. Ehˇ kʼawꞈ, aˬ yawˇ yawꞈ baoˬ huiˬ laˇ-euˬ maˬ ngeuˇ-a. Aˬ yawꞈ-aˬ, guˆ laˇ paˬ-ehˇ gʼeh-eu laˆ cawˆ-eu jeˬ mˇ-awˇ, aˬ yawꞈ kʼaˇ mˇ mawꞈ-euˬ yawˬ jeˬ na luꞈ mˇ pyeuꞈ shaˇ pyeuꞈ nya-eu meh. Baoˬ huiˬ-eu tsawˇ haˬ deuˬ hawˇ-eu Miˬyehˇ-euˬ tsawˇ haˬ deuˬ kʼoeˇ taˆ, yaw cawˆ jeˬ keuˆ le ni aˬ yawꞈ mˇ tehꞈ-a.

²⁵ Aˬ yawꞈ tsawˇ gahˇ gahˇ-awˇ jaˬ myawꞈ mehˇ shuiˇ zmˬ-eu laꞈ kʼoeˇ, gʼawˬ mya jeˬ mˇ doˆ laꞈ tehꞈ-a. Aˬ yawˆ yawꞈ huiˬ dui mahˇ dui dui miˇ-a lehˇ noeˬ-awˇ, tsawˇ haˬ gʼawˬ mya ni-ahˇ maˬ noeˬ maˬ duˇ-ehˇ jawˇ gaˇ tiˬ jeˬ-iˬ maˬ ehˇ ni sehꞈ tehꞈ-a. Sahˬ paˬ dawˬ tawˆ kʼoeˇ taˆ huiˬ-eu Sahˬpaˬ-ahˇ kʼawꞈ, aˬ yawꞈ yehˬ bawˬ sehˇ lu-ehˇ ehˇ-eu meh. Laˆ luˬ laˆ seˇ nehˬ gaˇ aˬ yawꞈ ya daˬ tehꞈ-a. Ehˇ kʼawꞈ, tsawˇ haˬ zaˬ-euˬ baoˬ neh laˆ luˬ laˆ seˇ nehˬ-eu jeˬ maˬ ngeuˇ-a.

²⁶ Nawˬ neh yaw sahˇ laꞈ kʼoeˇ ya siˬ ya mawˇ-euˬ loꞈ-ehˇ, uˬ ciꞈ uˬ taw paw hawˇ-eu uˬ shawˬ paw lawˇ-eu shehˇ-eu jeˬ mˇ-eu gaˇ kawˆ-ahˇ taꞈ leˇ-awˇ nawˬ-ahˇ ja mehˬ-euˬ jeˬ aˬ diˇ pyeuꞈ laˇ tehꞈ-a. Ehˇ kʼawꞈ, gaˇ kawˆ heu maˬ ja ni jawˇ tawˬ siˬ. Aˬ jeˬ miˇ neh ehˇ naˇ, kʼoeˇ loꞈ-ehˇ pyeuꞈ laˇ-eu gʼaˇ duˬ aˇ yamˬ gʼawˬ myahˇ ni jaˆ-a siˬ.”

²⁷ Ngaˇ Daˬyeˬlaˇ nui ma gʼaˬ baˬ dui dui-iˇ-awˇ, gʼawˬ mya nah jawˇ saˇ maˬ doˆ ni jawˇ-euˬ ma. Kʼoeˇ naˇ, ngaˇ paˇ tuˇ laˇ-awˇ, sahˬ paˬ-euˬ gaˇ paˇ mˇ daˆ leꞈ-euˬ ma. Ehˇ kʼawꞈ, ngaˬ neh yaw sahˇ laꞈ kʼoeˇ ya siˬ ya mawˇ-euˬ jeˬ-ahˇ noeˬ-eu nui ma maˬ byoˆ-iˇ-ehˇ, gaˇ kawˆ kʼoeˇ maˬ noeˬ shaw nya ni jawˇ-euˬ ma.”