Daˬyeˬlaˇ 7 - Akha

Daˬyeˬlaˇ ya mawˇ-euˬ bawˇ tsahˬ jeˬ zaˬ oeˬ mawˇ

DAˬYEˬLAˇ YAW SAHˇ LAꞈ KʼOEˇ YA SIˬ YA MAWˇ-EUˬ JEˬ

¹ Beˬlaˇshaˬzaˬ sahˬ paˬ geuꞈ-awˇ Baˬbuˇloˬ miˇ kʼahˬ-ahˇ uˆ lahˇ-euˬ yaw beh kʼoꞈ-ahˇ, Daˬyeˬlaˇ yuꞈ maˆ maˆ-awˇ aˬ yawꞈ yuꞈ kʼaˆ luꞈ ngeh yaw sahˇ laꞈ kʼoeˇ heu loꞈ-ehˇ ya mawˇ-euˬ meh. Aˬ yawꞈ neh yuꞈ maˆ maˆ mawˇ-euˬ gaˇ kawˆ, Daˬyeˬlaˇ heu loꞈ-ehˇ boꞈ doˆ taˬ-euˬ meh.

² Daˬyeˬlaˇ ehˇ-eu, “Mˬ-ahˇ neh oe-euˬ jaˬ lehˇ, miˇ ma oeˬ coeˇ oeˬ pyawˬ luꞈ baw gʼeh leꞈ-awˇ, iˬ ma laˆ shaˆ-ahˇ ciˬ tahˬ ciˬ tuˆ-euˬ meh.

³ Tiˬ mawˇ tiˇ mawˇ maˬ duˇ leˇ-eu huiˬ dui dui-eu bawˇ tsahˬ jeˬ zaˬ oeˬ mawˇ, iˬ ma laˆ shaˆ-ahˇ neh doˆ laˇ-euˬ meh.

⁴ Yaw beh mawˇ-aˬ, aˇ laˬ jaˬ shiˇ-ahˇ duˇ-eu meh. Ehˇ kʼawꞈ, kʼaˬ dzeˇ dzeˇ ma loꞈ-ehˇ aˬ dahˇ tsoꞈ-eu meh. Ngaˇ haw haw-ehˇ jawˇ ngeh, aˬ dahˇ kʼoeˇ ga-iˇ jiˇ-awˇ, tuˇ laˇ-awˇ tsawˇ haˬ loꞈ-ehˇ gawˬ yawꞈ yawꞈ laˇ-euˬ meh. Kʼoeˇ naˇ aˬ yawꞈ laꞈ kʼoeˇ tsawˇ haˬ zaˬ-euˬ nui ma ahˇ laˇ-euˬ meh.

⁵ Bawˇ tsahˬ jeˬ zaˬ nyiˬ mawˇ tiˬ mawˇ-aˬ, kʼaˬ hmˇ-ahˇ duˇ-awˇ, aˬ kuiˇ nyiˬ kuiˇ kʼoeˇ taˆ gawˬ yawꞈ yawꞈ luꞈ-eu meh. Aˬ yawꞈ-euˬ seuˬ-ahˇ behˇ jehˆ smˇ kahˬ tsehꞈ tehˬ taˬ-euˬ meh. ‘Nawˇ kʼaˇ dzaˬ coeˇ-eu myaˆ ni dzaˬ-awˬ’ lehˇ aˬ yawꞈ-ahˇ ehˇ nehˬ-eu teˇ saˇ ngaˇ gaˬ-euˬ ma.

⁶ Ngaˇ haw haw-ehˇ paˇ jawˇ ngeh, bawˇ tsahˬ jeˬ zaˬ tiˬ mawˇ paˇ doˆ laˇ-euˬ meh. Kʼoeˇ mawˇ-aˬ, kʼaˬ zuiˬ-ahˇ duˇ-eu meh. Ehˇ kʼawꞈ, dahˇ teˇ-ahˇ aˇ jiˇ-euˬ aˬ dahˇ-ahˇ duˇ-eu aˬ dahˇ oeˬ dahˇ tsoꞈ-awˇ, uˬ duˬ oeˬ siˬ tsoꞈ-eu meh. Aˬ yawꞈ-ahˇ haw ngeh, uˆ lahˇ-eu baoˬ biꞈ taˬ-euˬ gaˇ duˇ-eu meh.

⁷ Ngaˇ haw haw-ehˇ jawˇ ngeh, jeˬ zaˬ oeˬ mawˇ tiˬ mawˇ paˇ doˆ laˇ-euˬ meh. Jeˬ zaˬ kʼoeˇ mawˇ gʼaˬ kʼaˆ dui dui-awˇ, guˆ dui dui laˇ paˬ-ehˇ gʼeh-eu meh. Huiˬ dui dui-eu shuiˇ-euˬ seuˬ neh aˬ cawˬ-ahˇ kawꞈ nmˆ leꞈ-awˇ, nawˬ pyehˆ nehˬ-eu meh. Jeˬ zaˬ nui deuˬ-ahˇ maˬ duˇ ni, uˬ coeˇ tseˇ kahˬ tsoꞈ-eu meh.

⁸ Uˬ coeˇ kʼoeˇ deuˬ-ahˇ ngaˇ zahˬ leˇ-awˇ haw haw-ehˇ jawˇ ngeh, uˬ coeˇ kʼoeˇ deuˬ yaw kaˬ-ahˇ uˬ coeˇ coeˇ zaˬ tiˬ coeˇ doˆ laˇ-euˬ meh. Uˬ coeˇ coeˇ zaˬ kʼoeˇ neh kʼoeˇ gaˇ tsoꞈ-eu uˬ coeˇ smˇ kahˬ tahˬ juˆ dzeh-euˬ meh. Uˬ coeˇ kʼoeˇ coeˇ-ahˇ tsawˇ haˬ zaˬ-euˬ myaˆ nuiˆ tsoꞈ-awˇ, kʼahˬ sehˇ jehˆ-eu kʼaˬ meh tiˬ meh tsoꞈ-eu meh.

Mˬ maˬ maˬ byaˆ zaˇ ziˇ dehꞈ-eu gʼaˬ mawˇ le-euˬ

⁹ Ngaˇ haw haw-ehˇ jawˇ ngeh, dzoeˬ dzaˬ nuiˇ mahˬ ciˬ taˬ le-euˬ meh. Mˬ bymˬ miˇ bymˬ bymˬ ngeh neh dehꞈ luꞈ-eu gʼaˬ, dzoeˬ dzaˬ nuiˇ mahˬ tiˬ mahˬ kʼoeˇ taˆ nuiˇ le-euˬ meh. Aˬ yawꞈ dm luꞈ-eu mehˬ tsoeˬ saˬ laˬ loꞈ-ehˇ pyuˇ deuˬ ni gʼeh-awˇ, aˬ yawꞈ-euˬ uˬ duˬ tsehˇ kahˇ shawˇ jehˆ ni gʼeh-eu yawˇ caꞈ hm-ahˇ duˇ-eu meh. Aˬ yawꞈ-euˬ dzoeˬ dzaˬ nuiˇ mahˬ miˬ dzaˬ doꞈ luꞈ-eu daˇ jawˇ kʼoeˇ taˆ jaˆ-awˇ, miˬ lmˇ nyehˆ oˬ ni jaˆ-eu meh.

¹⁰ Kʼoeˇ gaˇ neh miˬ dzaˬ lawˇ gawˆ yoeˇ ka luꞈ-eu meh. Aˬ yawꞈ-euˬ myawˬ kʼehˇ gʼoˆ-eu aˇ heˇ aˇ muiˇ gʼaˬ jawˇ-awˇ, aˬ yawꞈ-euˬ mehˬ shi yawꞈ luꞈ-eu tsawˇ haˬ aˇ lam aˇ lam byah -eu meh. Yaˇ kʼaˬ daˇ-eu gʼaˬ yaˇ kʼaˬ daˇ dahˬ beh-awˇ, sahˬ boꞈ deuˬ dehˬ pah-euˬ meh.

¹¹ Ngaˇ haw haw-ehˇ jawˇ ngeh, uˬ coeˇ coeˇ zaˬ kʼoeˇ kahˬ kʼahˬ sehˇ jehˆ-eu teˇ saˇ ngaˬ-ahˇ gaˬ le luꞈ-eu meh. Ngaˇ haw luꞈ ngeh, bawˇ tsahˬ jeˬ zaˬ oeˬ mawˇ tiˬ mawˇ bi sehꞈ-awˇ, aˬ yawꞈ-euˬ gʼawˇ mawˇ miˬ dzaˬ miˬ lmˇ-ahˇ bi biˬ ahˇ-awˇ, bi puiˆ dzaˬ jiˇ-euˬ meh.

¹² Dzeˇ-eu bawˇ tsahˬ jeˬ zaˬ kʼoeˇ deuˬ-euˬ baoˬ bi yuˇ kʼoꞈ jiˇ-euˬ meh. Ehˇ kʼawꞈ, aˬ yawꞈ maꞈ-ahˇ maˬ sehꞈ ni tiˬ kʼehˬ tiˬ yamˬ bi dehꞈ tawˬ-euˬ meh.

¹³ Uˬ ciꞈ paw yaw sahˇ laꞈ kʼoeˇ ngaˇ kʼoeˇ loꞈ-ehˇ ya mawˇ luꞈ ngeh, tsawˇ haˬ zaˬ-ahˇ duˇ-eu tiˬ gʼaˬ ngaˇ mawˇ-euˬ ma. Aˬ yawꞈ-euˬ tiˬ jawˬ mˬ dmˇ tsahˇ lahˇ taˬ-awˇ oe-awˇ, mˬ bymˬ miˇ bymˬ bymˬ ngeh neh jawˇ luꞈ-eu gʼaˬ-euˬ mehˬ shi yawꞈ leˇ-euˬ meh.

¹⁴ Miˇ tsaˬ tsawˇ jeuˬ tsawˇ ca dawˬ tawˆ luꞈ hawˇ-eu, miˇ kʼahˬ dawˬ tawˆ luꞈ aˬ yawꞈ-euˬ laꞈ oˆ bi jawˇ-eu gʼaˇ duˬ, uˆ lahˇ-eu baoˬ hawˇ-eu miˇ kʼahˬ dawˬ tawˆ luꞈ maˬ ehˇ, taˬ huiˬ taˬ mahˇ-eu jeˬ hawˇ-eu yaw shehꞈ kʼahˬ sehˇ dawˬ tawˆ luꞈ maˬ ehˇ, aˬ yawꞈ-ahˇ biꞈ-euˬ meh. Aˬ yawꞈ uˆ lahˇ-eu jeˬ mˬ maˬ maˬ byaˆ zaˇ ziˇ ziꞈ-awˇ, aˬ yawꞈ-euˬ miˇ kʼahˬ tiˬ jawˇ-iˬ maˬ cawˆ-iˇ-a.

Yaw sahˇ laꞈ kʼoeˇ ya mawˇ-euˬ dawˬ tsuiꞈ

¹⁵ Ngaˬ neh yaw sahˇ laꞈ kʼoeˇ ya mawˇ-euˬ jeˬ-ahˇ ngaˇ tsawˬ guˆ-iˇ-awˇ, nui ma maˬ saˇ ni pyeuꞈ-iˇ-euˬ ma.

¹⁶ Kʼoeˇ gaˇ yawꞈ luꞈ-eu tsawˇ haˬ tiˬ gʼaˬ jawˇ gaˇ ngaˇ le-awˇ, gaˇ kawˆ kʼoeˇ deuˬ dawˬ tawˆ luꞈ-euˬ dawˬ tsuiꞈ ehˇ nehˬ laꞈ lehˇ ehˇ nehˬ ngeh, heu loꞈ-ehˇ ehˇ mehˬ nehˬ laꞈ-euˬ meh.

¹⁷ ‘Huiˬ-eu bawˇ tsahˬ jeˬ zaˬ heu oeˬ mawˇ-aˬ, miˇ tsaˬ kʼoeˇ taˆ jaˆ laˇ-eu miˇ kʼahˬ kʼahˬ ma oeˬ kʼahˬ-ahˇ ehˇ mawꞈ-eu meh.

¹⁸ Ehˇ kʼawꞈ, Dawˬ tawˆ kʼoeˇ taˆ huiˬ-eu Miˬyehˇ-euˬ tsawˇ haˬ deuˬ dzoeˬ dzaˬ-eu baoˬ za-awˇ, aˬ yawꞈ maꞈ-euˬ miˇ kʼahˬ mˬ maˬ maˬ byaˆ zaˇ ziˇ ziꞈ tehꞈ-a’ lehˇ ehˇ-eu meh.

¹⁹ Kʼoeˇ naˇ, bawˇ tsahˬ jeˬ zaˬ nui deuˬ-ahˇ maˬ duˇ-eu bawˇ tsahˬ jeˬ zaˬ oeˬ mawˇ tiˬ mawˇ-euˬ dawˬ tsuiꞈ ngaˇ siˬ nya mawꞈ-eu ma. Jeˬ zaˬ kʼoeˇ mawˇ aˬ yawꞈ-euˬ guiˬ shuiˇ laꞈ sahˬ hawˇ-eu shmˇ-euˬ seuˬ neh aˬ cawˬ-ahˇ kawꞈ pyehˆ kawꞈ lehˆ-awˇ, nawˬ pyehˆ nehˬ-eu meh.

²⁰ Aˬ yawꞈ-euˬ uˬ duˬ-ahˇ tsoꞈ-eu uˬ coeˇ tseˇ kahˬ hawˇ-eu, aˬ cawˬ jeˬ nah doˆ laˇ-awˇ, uˬ coeˇ smˇ kahˬ tahˬ juˆ dzeh-euˬ uˬ coeˇ kʼoeˇ kahˬ-euˬ dawˬ tsuiꞈ ngaˇ siˬ nya mawꞈ-eu ma. Uˬ coeˇ kʼoeˇ kahˬ tsawˇ haˬ-euˬ myaˆ nuiˆ tsoꞈ-awˇ, kʼahˬ sehˇ jehˆ dui dui-eu kʼaˬ meh ti meh tsoꞈ-eu meh. Jeˬ zaˬ kʼoeˇ mawˇ-aˬ, jeˬ zaˬ nui deuˬ naˆ maˬ tseˇ guˆ dui dui laˇ paˬ-ehˇ gʼeh-eu meh.

²¹ Ngaˇ haw haw-ehˇ jawˇ ngeh, uˬ coeˇ kʼoeˇ kahˬ Miˬyehˇ-euˬ tsawˇ haˬ deuˬ nehˬ-ehˇ guiˇ deuˆ-awˇ, deuˆ gʼaˬ-euˬ meh.

²² Kʼoeˇ naˇ, mˬ bymˬ miˇ bymˬ bymˬ ngeh neh jawˇ luꞈ-eu gʼaˬ oe-awˇ, Dawˬ tawˆ kʼoeˇ taˆ huiˬ-eu Miˬyehˇ-euˬ tsawˇ haˬ deuˬ jawˇ paw pyawˬ-awˇ yaˇ kʼaˬ daˇ-euˬ meh. Miˬyehˇ-euˬ tsawˇ haˬ deuˬ miˇ kʼahˬ-ahˇ ya uˆ lahˇ-eu aˇ yamˬ keuˆ laˇ-euˬ meh.

²³ Kʼoeˇ naˇ, ngaˬ-ahˇ dawˬ tsuiꞈ heu loꞈ-ehˇ ehˇ nehˬ laꞈ-euˬ meh. “Bawˇ tsahˬ jeˬ zaˬ oeˬ mawˇ tiˬ mawˇ-aˬ, miˇ tsaˬ kʼoeˇ taˆ jaˆ laˇ-eu lehˇ gʼeh-eu huiˬ dui dui-eu miˇ kʼahˬ oeˬ kʼahˬ tiˬ kʼahˬ-ahˇ ehˇ mawꞈ-eu meh. Miˇ kʼahˬ kʼoeˇ kʼahˬ-aˬ, miˇ kʼahˬ nui deuˬ-ahˇ maˬ duˇ-ehˇ, miˇ tsaˬ dawˬ tawˆ luꞈ-ahˇ kawꞈ pyehˆ kawꞈ lehˆ-awˇ, nawˬ pahˬ nawˬ lahˇ tehꞈ-a.

²⁴ Uˬ coeˇ tseˇ kahˬ-aˬ, huiˬ dui dui-eu miˇ kʼahˬ-ahˇ uˆ lahˇ-eu sahˬ paˬ tseˇ gʼaˬ-ahˇ ehˇ mawꞈ-eu meh. Kʼoeˇ naˇ, sahˬ paˬ tiˬ gʼaˬ paˇ doˆ le tehꞈ-a. Aˬ yawꞈ-aˬ, yaw beh uˆ lahˇ-euˬ sahˬ paˬ kʼoeˇ deuˬ-ahˇ beu gaˇ dui dui-awˇ, sahˬ paˬ smˇ gʼaˬ-ahˇ yuˇ dzeh tehꞈ-a.

²⁵ Dawˬ tawˆ kʼoeˇ taˆ huiˬ-eu Miˬyehˇ-ahˇ ceh cawˬ cawˬ-eu dawˬ ngehˬ-awˇ, Miˬyehˇ-euˬ tsawˇ haˬ deuˬ-ahˇ aˬ yawꞈ kʼehˬ nehˬ kʼaˆ nehˬ tehꞈ-a. Uˬ duˬ tahˬ-eu zahˇ sahˇ kʼoꞈ deuˬ hawˇ-eu, uˬ duˬ tahˬ-eu zahˇ sahˇ kʼoꞈ-ahˇ taꞈ-eu bawˬ-iˬ deuˬ-ahˇ aˬ yawꞈ laˆ paˇ-awˇ, Miˬyehˇ-euˬ tsawˇ haˬ deuˬ aˬ yawꞈ uˆ lahˇ-eu uˬ moˆ smˇ kʼoꞈ uˬ taꞈ tiˬ paˆ ya jawˇ tehꞈ-a.

²⁶ Kʼoeˇ naˇ, mˬ taˆ yaˇ kʼaˬ daˇ-eu nymˇ-ahˇ yaˇ kʼaˬ daˇ-awˇ, aˬ yawꞈ-euˬ baoˬ bi yuˇ kʼoꞈ-awˇ, aˬ yawꞈ-ahˇ tiˬ saˬ tiˬ li laˆ cawˆ nehˬ tehꞈ-a.

²⁷ Miˇ tsaˬ kʼoeˇ taˆ kʼaˇ jaˆ-eu miˇ kʼahˬ dawˬ tawˆ luꞈ-euˬ baoˬ hawˇ-eu yaw shehꞈ kʼahˬ sehˇ dawˬ tawˆ luꞈ, Dawˬ tawˆ kʼoeˇ taˆ huiˬ-eu Miˬyehˇ-euˬ tsawˇ haˬ deuˬ-ahˇ biꞈ nehˬ tehꞈ-a. Aˬ yawꞈ maꞈ uˆ lahˇ-eu baoˬ aˇ saˬ saˬ-eu maˬ baw-ehˇ, miˇ tsaˬ kʼoeˇ taˆ kʼaˇ jawˇ-eu sahˬ paˬ sahˬ ma dawˬ tawˆ luꞈ, aˬ yawꞈ maꞈ-euˬ ehˇ dawˬ naˇ haˬ-awˇ, aˬ yawꞈ maꞈ neh kʼaˇ kʼehˇ-euˬ jeˬ ya mˇ tehꞈ-a.”

²⁸ Gaˇ kawˆ heu hmˬ heu gaˇ jiˇ-euˬ meh. Ngaˇ guˆ dui dui-iˇ-euˬ miˇ neh, myaˆ pyawˬ pyuˇ pya ni pyeuꞈ-iˇ-awˇ, aˬ cawˬ-ahˇ maˬ ja nehˬ ni nui ma laꞈ kʼoeˇ juiˇ taˬ-euˬ ma.