Daˬyeˬlaˇ 6 - Akha

Daˬyeˬlaˇ-ahˇ aˇ laˬ jaˬ shiˇ kuˆ-ahˇ nyehꞈ ahˇ-euˬ

¹ Daˬliˇ-aˬ, huiˬ dui dui-eu aˬ yawꞈ-euˬ miˇ kʼahˬ-ahˇ bi uˆ lahˇ-eu gʼaˇ duˬ, sahˬ paˬ sahˬ ma tiˬ yaˇ nyiˬ tseˇ gʼaˬ tseˇ doˆ-euˬ meh.

² Kʼoeˇ uˬ taꞈ, sahˬ paˬ sahˬ ma kʼoeˇ deuˬ sahˬ paˬ-ahˇ maˬ tsaˬ-eu jeˬ maˬ ya mˇ ni aˬ yawꞈ maˬ kʼoeˇ taˆ bi haw bi pyaˆ-eu gʼaˇ duˬ, Daˬyeˬlaˇ ahˇ leˇ-ehˇ tsawˇ haˬ smˇ gʼaˬ paˇ tseˇ doˆ-euˬ meh.

³ Kʼoeˇ smˇ gʼaˬ laꞈ kʼoeˇ, Daˬyeˬlaˇ gʼaˬ aˬ cawˬ naˆ maˬ tseˇ gaˇ mˇ nya dzehˬ-eu meh. Aˬ yawꞈ bym dui nya dui dui-eu miˇ neh, miˇ kʼahˬ kʼahˬ lah ni kʼoeˇ taˆ bi haw bi pyaˆ-eu gʼaˇ duˬ sahˬ paˬ shaˇ noeˬ-euˬ meh.

⁴ Daˬyeˬlaˇ nehˬ-ehˇ miˇ kʼahˬ-ahˇ haw pyaˆ uˆ lahˇ luꞈ-eu sahˬ paˬ sahˬ ma kʼoeˇ deuˬ, Daˬyeˬlaˇ miˇ kʼahˬ gaˇ mˇ gaˇ yaw lehˬ yaw ca doˆ laˇ ni poˆ tseˇ kʼawꞈ, maˬ poˆ mawˇ nya-a. Aˬ jeˬ miˇ neh ehˇ naˇ, Daˬyeˬlaˇ-aˬ, saˇ jaˇ ziꞈ-awˇ, nui ma dawˇ-eu uˬ taꞈ, yaw lehˬ maˬ mˇ-a.

⁵ “Daˬyeˬlaˇ-ahˇ uˬ duˬ tahˬ-eu zahˇ sahˇ kʼoꞈ-ahˇ taꞈ leˇ-awˇ yaw lehˬ poˆ-eu maˬ ngeuˇ naˇ, Daˬyeˬlaˇ-euˬ yaw lehˬ aˬ dui maˬ poˆ doˆ nya luꞈ-a” lehˇ, aˬ yawꞈ maꞈ tiˬ gʼaˬ tiˇ gʼaˬ ehˇ-eu meh.

⁶ Kʼoeˇ miˇ neh, sahˬ paˬ Daˬliˇ jawˇ gaˇ aˬ yawꞈ maꞈ le-awˇ, heu loꞈ-ehˇ ehˇ nehˬ leˇ-euˬ meh. “Sahˬ paˬ Daˬliˇ-oˇ, nawˇ ziˇ baw ziˇ za luꞈ-uˇ.

⁷ Nawˬ-euˬ miˇ kʼahˬ-ahˇ uˆ lahˇ-eu paw gaˇ mˇ luꞈ-eu deuˬ pyeuꞈ-eu nga maꞈ, sahˬ paˬ sahˬ ma deuˬ kʼoeˇ taˆ haw pyaˆ uˆ lahˇ-eu deuˬ, sahˬ paˬ sahˬ ma geuꞈ-eu deuˬ hawˇ-eu, sahˬ paˬ sahˬ ma deuˬ-euˬ laꞈ oˆ teˬ ni miˇ kʼahˬ-ahˇ uˆ lahˇ-eu gaˇ mˇ-eu deuˬ dawˬ tawˆ luꞈ, nui ma tiˬ siˬ tehꞈ-ehˇ taˬ-awˇ heu loꞈ-ehˇ ehˇ-eu ma. Nawˇ zahˇ sahˇ kʼoꞈ tiˬ hmˬ taˬ-awˇ, ziꞈ dah ni bi nyehꞈ tehˬ mawꞈ-eu ma. Aˇ yamˬ smˬ tseˇ nah laꞈ kʼoeˇ, nawˬ-ahˇ maˬ ngeuˇ naˇ, miˬ yehˇ aˬ geu gʼaˬ-ahˇ maˬ ehˇ, tsawˇ haˬ-ahˇ maˬ ehˇ, tiˬ gʼaˬ-iˬ uˬ duˬ maˬ ya tahˬ, guiˬ lahˬ maˬ ya shaˇ-a lehˇ zahˇ sahˇ kʼoꞈ taˬ-awˇ, zahˇ sahˇ kʼoꞈ heu hmˬ-ahˇ maˬ caw teh-eu tsawˇ haˬ aˬ geu gʼaˬ maˬ kaˬ, aˇ laˬ jaˬ shiˇ kuˆ-ahˇ biˬ ahˇ ma lehˇ bi ehˇ tsehˆ mawꞈ miˇ-a.

⁸ Meˬdiˇ tsawˇ haˬ hawˇ-eu Paˇshaˇ tsawˇ haˬ-euˬ zahˇ sahˇ kʼoꞈ maˬ poˆ maˬ paˇ laˇ nya-eu loꞈ-ehˇ, zahˇ sahˇ kʼoꞈ heu hmˬ kʼawꞈ maˬ poˆ maˬ paˇ laˇ nya ni sahˬ boꞈ boꞈ doˆ-awˇ, sahˬ paˬ nawˇ laꞈ ma dehꞈ nehˬ laꞈ-awˬ.”

⁹ Kʼoeˇ naˇ, zahˇ sahˇ kʼoꞈ kʼoeˇ hmˬ-ahˇ sahˬ paˬ Daˬliˇ laꞈ ma dehˬ-euˬ meh.

¹⁰ Zahˇ sahˇ kʼoꞈ kʼoeˇ hmˬ-ahˇ laꞈ ma dehˬ gʼaˬ-euˬ gaˇ kawˆ Daˬyeˬlaˇ ya siˬ ngeh, iˇ kahˇ gʼoꞈ-iˇ-euˬ meh. Aˬ yawꞈ-euˬ nymˇ kʼoeˇ taˆ tiˆ-ahˇ, Yeˬluˇsaˬlehˬ meuˬ paw pyawˇ-eu laˇ gʼoˆ zaˬ dahˇ-eu meh. Aˬ myah luꞈ aˬ yawꞈ kʼaˇ mˇ haw-euˬ loꞈ-ehˇ, laˇ gʼoˆ zaˬ pah taˬ-euˬ mehˬ shi pawˬ tsuiꞈ pawˬ dmˬ dmˬ-awˇ, tiˬ nah smˬ poˆ Miˬyehˇ-ahˇ uˬ duˬ tahˬ-euˬ meh.

¹¹ Tsawˇ haˬ kʼoeˇ deuˬ oe-awˇ, Daˬyeˬlaˇ Miˬyehˇ-ahˇ uˬ duˬ tahˬ luꞈ gaˇ haw mawˇ-euˬ meh.

¹² Kʼoeˇ naˇ, aˬ yawꞈ maꞈ tiˬ kawˆ loꞈ-ehˇ sahˬ paˬ jawˇ gaˇ le-awˇ ehˇ-eu, “Sahˬ paˬ-oˇ, heu smˬ tseˇ nah laꞈ kʼoeˇ, nawˬ-ahˇ maˬ ngeuˇ naˇ, miˬ yehˇ-ahˇ maˬ ehˇ, tsawˇ haˬ-ahˇ maˬ ehˇ, uˬ duˬ tahˬ guiˬ lahˬ shaˇ-eu tsawˇ haˬ aˬ geu gʼaˬ maˬ kaˬ, aˇ laˬ jaˬ shiˇ kuˆ-ahˇ biˬ ahˇ nehˬ gaˇ ya daˬ meh lehˇ zahˇ sahˇ kʼoꞈ taˬ-awˇ, laꞈ ma dehˬ-euˬ maˬ ngeuˇ te loˇ.” Sahˬ paˬ ehˇ-eu, “Ngeuˇ ma. Meˬdiˇ tsawˇ jeuˬ hawˇ-eu Paˇshaˇ tsawˇ jeuˬ-euˬ zahˇ sahˇ kʼoꞈ deuˬ maˬ poˆ maˬ paˇ laˇ nya-eu loꞈ-ehˇ, zahˇ sahˇ kʼoꞈ heu hmˬ kʼawꞈ, maˬ poˆ maˬ paˇ ni ziꞈ dah ni ya bi jaˆ meh.”

¹³ Aˬ yawꞈ maꞈ sahˬ paˬ-ahˇ ehˇ-eu, “Yuˇdaˆ miˇ kʼahˬ-ahˇ neh nyehꞈ laꞈ-euˬ Daˬyeˬlaˇ kʼoeˇ gʼaˬ-aˬ, sahˬ paˬ nawˬ-ahˇ yaw zeu maˬ baw-eu uˬ taꞈ, nawˬ neh taˬ taˬ-euˬ zahˇ sahˇ kʼoꞈ-ahˇ maˬ caw teh ni, tiˬ nah smˬ poˆ guiˬ lahˬ shaˇ-eu ma byehˇ-a.”

¹⁴ Dawˬ kʼoeˇ dawˬ-ahˇ sahˬ paˬ ya gaˬ ngeh, nui ma shaˬ zahˬ naꞈ-awˇ, Daˬyeˬlaˇ-ahˇ ka kʼoꞈ-eu gʼaˇ duˬ, nahˇ ma ga ahˇ ngeh keuˆ ni shaˇ noeˬ dui dui-euˬ meh.

¹⁵ Kʼoeˇ naˇ, tsawˇ haˬ kʼoeˇ deuˬ sahˬ paˬ jawˇ gaˇ paˇ laˇ-awˇ ehˇ-eu, “Sahˬ paˬ-oˇ, Meˬdiˇ tsawˇ jeuˬ hawˇ-eu Paˇshaˇ tsawˇ jeuˬ-euˬ zahˇ sahˇ kʼoꞈ-ahˇ neh ehˇ leꞈ naˇ, sahˬ paˬ neh ngehˬ tsehˆ ehˇ tsehˆ taˬ-euˬ jeˬ maˬ poˆ maˬ paˇ laˇ nya-eu gaˇ kawˆ, nawˇ siˬ nya meh.”

¹⁶ Kʼoeˇ ngeh jawˇ, Daˬyeˬlaˇ-ahˇ nyehꞈ-awˇ aˇ laˬ jaˬ shiˇ kuˆ-ahˇ biꞈ ahˇ-eu gʼaˇ duˬ sahˬ paˬ dawˬ biꞈ-euˬ meh. “Nawˇ saˇ jaˇ ziꞈ-awˇ gʼoe luꞈ-eu nawˬ-euˬ Miˬyehˇ nawˬ-ahˇ ka kʼoꞈ luꞈ-uˇ” lehˇ, Daˬyeˬlaˇ-ahˇ aˬ yawꞈ ehˇ nehˬ-euˬ meh.

¹⁷ Aˇ laˬ jaˬ shiˇ kuˆ-euˬ duˬ kʼahˬ mehˬ kʼehˬ-ahˇ, sahˬ paˬ-euˬ jmˬ hawˇ-eu sahˬ paˬ-euˬ gaˇ mˇ-euˬ sahˬ paˬ sahˬ ma deuˬ-euˬ jmˬ diˬ taˬ-euˬ kʼaˬ lo tiˬ siˬ baꞈ taˬ-euˬ meh. Daˬyeˬlaˇ-ahˇ tsawˇ haˬ tiˬ gʼaˬ-iˬ maˬ bi ka kʼoꞈ-euˬ gʼaˇ duˬ, kʼoeˇ loꞈ-ehˇ baꞈ taˬ-euˬ jeˬ pyeuꞈ-eu meh.

¹⁸ Kʼoeˇ naˇ, sahˬ paˬ-euˬ hawˇ nymˇ-ahˇ sahˬ paˬ gʼoꞈ leˇ-awˇ, tiˬ jeˬ-iˬ maˬ dzaˬ maˬ dawˇ-eu uˬ taꞈ, aˬ yawꞈ byawˬ gʼa-eu jeˬ tiˬ jeˬ-iˬ maˬ bi jahˇ ni, uˬ ciꞈ maˬ yuꞈ kʼaˆ leˇ-ehˇ shaˬ bya-euˬ meh.

¹⁹ Uˬ bya bya laˇ ngeh, aˇ laˬ jaˬ shiˇ kuˆ-ahˇ sahˬ paˬ cehˆ gʼeh-euˬ meh.

²⁰ Kʼoeˇ gaˇ cehˆ keuˆ ngeh, kʼahˬ lahˇ dui dui-eu laꞈ kʼoeˇ, “Dehꞈ luꞈ-eu Miˬyehˇ-euˬ zaˬ kʼaˆ Daˬyeˬlaˇ-oˇ, nawˇ saˇ jaˇ ziꞈ-awˇ gʼoe-eu nawˬ-euˬ Miˬyehˇ nawˬ-ahˇ aˇ laˬ jaˬ shiˇ neh maˬ bi kawꞈ sehꞈ ni ka kʼoꞈ nehˬ laꞈ mehˬ loˇ” lehˇ guˇ-euˬ meh.

²¹ Daˬyeˬlaˇ ehˇ-eu, “Sahˬ paˬ ziˇ baw ziˇ zaˬ luꞈ-uˇ.

²² Aˇ laˬ jaˬ shiˇ ngaˬ-ahˇ maˬ ya kawꞈ sehꞈ dzaˬ ni, Miˬyehˇ aˬ yawꞈ-euˬ mˬ taˆ gʼaˬ kʼehˇ pyehˬ gʼeh leꞈ-awˇ aˇ laˬ jaˬ shiˇ-euˬ kʼaˬ meh-ahˇ paꞈ tsoeˬ tsoeˬ-euˬ meh. Ngaˇ iˬ baˇ maˬ ahˇ-ehˇ, sahˬ paˬ nawˬ-ahˇ ngaˬ neh mˇ lehˬ taˬ-euˬ maˬ jaˆ-a lehˇ aˬ yawꞈ siˬ nya-eu miˇ neh, aˬ yawꞈ heu loꞈ-ehˇ mˇ-euˬ meh.”

²³ Sahˬ paˬ laˬ kʼaˬ cehˇ dui dui-awˇ, Daˬyeˬlaˇ-ahˇ aˇ laˬ jaˬ shiˇ kuˆ-ahˇ neh gʼeu doˆ-eu gʼaˇ duˬ dawˬ biꞈ-euˬ meh. Aˬ yawꞈ maꞈ aˬ yawꞈ-ahˇ gʼeu doˆ ngeh, aˬ yawꞈ Miˬyehˇ-ahˇ jah-eu miˇ neh tiˬ jeˬ-iˬ maˬ gʼeh ni jawˇ gaˇ ya mawˇ-euˬ meh.

²⁴ Kʼoeˇ naˇ, Daˬyeˬlaˇ-ahˇ yaw doeˇ jahˇ-euˬ tsawˇ haˬ dawˬ tawˆ luꞈ-ahˇ nyehꞈ-eu gʼaˇ duˬ sahˬ paˬ dawˬ biꞈ-awˇ, aˬ yawꞈ maꞈ hawˇ-eu aˬ yawꞈ maꞈ-euˬ miˬ sawˇ zaˬ deuˬ dawˬ tawˆ luꞈ-ahˇ, aˇ laˬ jaˬ shiˇ kuˆ-ahˇ biˬ ahˇ jiˇ-euˬ meh. Aˬ yawꞈ maꞈ aˇ laˬ jaˬ shiˇ kuˆ-euˬ duˬ kʼahˬ-ahˇ maˬ ga keuˆ -iˇ mi naˆ-ehˇ, aˇ laˬ jaˬ shiˇ kʼoeˇ deuˬ aˬ yawꞈ maꞈ-ahˇ tsawˬ dawꞈ-awˇ, shaˬ yoeˬ shaˬ laꞈ kawꞈ kʼehꞈ kawꞈ kʼoeˆ jiˇ-euˬ meh.

²⁵ Kʼoeˇ naˇ, miˇ tsaˬ kʼoeˇ taˆ kʼaˇ jawˇ-eu tsawˇ jeuˬ tsawˇ ca dawˬ tawˆ luꞈ hawˇ-eu, miˇ kʼahˬ dawˬ tawˆ luꞈ-ahˇ, sahˬ paˬ Daˬliˇ heu loꞈ-ehˇ sahˬ boꞈ boꞈ nehˬ-euˬ meh. “Naw maꞈ dawˬ tawˆ luꞈ nui saˇ oꞈ-awˇ jawˇ saˇ doˆ luꞈ-uˇ.

²⁶ Ngaˬ-euˬ miˇ kʼahˬ kʼahˬ ma heu kʼahˬ laꞈ kʼoeˇ kʼaˇ jawˇ-eu tsawˇ haˬ dawˬ tawˆ luꞈ, Daˬyeˬlaˇ-euˬ Miˬyehˇ-ahˇ guˆ-awˇ yaw zeu baw-awˬ lehˇ, ngaˇ dawˬ biꞈ-eu ma. “Aˬ yawꞈ dehꞈ-eu Miˬyehˇ pyeuꞈ-awˇ, mˬ maˬ maˬ byaˆ uˆ lahˇ tehꞈ-a. Yawꞈ-euˬ miˇ kʼahˬ maˬ cawˆ-iˇ-ehˇ, yawꞈ-euˬ dzoeˬ dzaˬ maˬ byoˆ-iˇ-a.

²⁷ Aˬ yawꞈ ka kʼoꞈ-eu gʼaˬ pyeuꞈ-awˇ, ngehˬ gʼeh dah teˬ nehˬ-eu gʼaˬ meh. Mˬ hawˇ-eu miˇ tsaˬ heu kʼoeˇ taˆ, zahˬ leˇ-eu jeˬ mˇ-eu gʼaˬ meh. Aˇ laˬ jaˬ shiˇ maˬ bi kawꞈ ni, Daˬyeˬlaˇ-ahˇ ka kʼoꞈ-euˬ meh.”

²⁸ Daˬliˇ uˆ lahˇ-eu aˇ yamˬ hawˇ-eu, Paˇshaˇ tsawˇ jeuˬ Guˇluˆ uˆ lahˇ-eu aˇ yamˬ laꞈ kʼoeˇ, Daˬyeˬlaˇ dehꞈ dzaˬ dui dui-euˬ meh.