Daˬyeˬlaˇ 5 - Akha

Beˬlaˇshaˬzaˬ dzaˬ byawˇ lawˇ-euˬ

¹ Tiˬ miˇ keuˆ laˇ ngeh, sahˬ paˬ Beˬlaˇshaˬzaˬ-aˬ, aˬ yawꞈ-euˬ gaˇ mˇ-eu sahˬ paˬ sahˬ ma tiˬ heˇ gʼaˬ-ahˇ kuˇ-awˇ dzaˬ byawˇ lawˇ-eu laꞈ kʼoeˇ, tiˬ kawˆ loꞈ-ehˇ aˬ gaꞈ dzaˇ uiˇ dawˇ-euˬ meh.

² Aˬ yawꞈ maꞈ aˬ gaꞈ dzaˇ uiˇ dawˇ luꞈ ngeh, aˬ yawꞈ-euˬ aˬ da Neˬbuˬkaˬneˬzaˬ neh Yeˬluˇsaˬlehˬ meuˬ Uˬ duˬ tahˬ nymˇ nymˇ ma-ahˇ jaˆ gaˇ yuˇ laꞈ-euˬ pyuˇ kʼmˬ maˬ shuiˇ kʼmˬ maˬ deuˬ yuˇ laꞈ-awˬ lehˇ, Beˬlaˇshaˬzaˬ dawˬ biꞈ-euˬ meh. Aˬ yawꞈ-euˬ gaˇ mˇ-eu yaw huiˬ yaw mahˇ deuˬ, aˬ yawꞈ-euˬ miˬ zaˬ deuˬ hawˇ-eu, aˬ yawꞈ-euˬ ma nyiˇ deuˬ bi dawˇ-eu gʼaˇ duˬ, kʼmˬ maˬ kʼoeˇ deuˬ bi yuˇ laˬ-iˇ-euˬ meh.

³ Kʼoeˇ ngeh, Yeˬluˇsaˬlehˬ meuˬ-ahˇ jaˆ-eu Miˬyehˇ-euˬ nymˇ pyeuꞈ-eu Uˬ duˬ tahˬ nymˇ nymˇ ma-ahˇ neh yuˇ laꞈ taˬ-awˇ jaˆ-eu pyuˇ kʼmˬ maˬ shuiˇ kʼmˬ maˬ deuˬ yuˇ laꞈ-awˇ, sahˬ paˬ hawˇ-eu aˬ yawꞈ-euˬ gaˇ mˇ-eu sahˬ paˬ sahˬ ma deuˬ, aˬ yawꞈ-euˬ miˬ zaˬ deuˬ hawˇ-eu ma nyiˇ deuˬ, kʼmˬ maˬ kʼoeˇ deuˬ-ahˇ aˬ gaꞈ dzaˇ uiˇ kʼaˇ ahˇ dawˇ-euˬ meh.

⁴ Aˬ yawꞈ maꞈ aˬ gaꞈ dzaˇ uiˇ dawˇ dawˇ-ehˇ, shuiˇ, pyuˇ, guiˬ shuiˇ, shmˇ, daˇ kawˬ, kʼaˬ lo heu deuˬ neh jahˇ taˬ-euˬ miˬ yehˇ deuˬ-ahˇ ja ceuˬ-euˬ meh.

⁵ Ja pyuˬ ni, tsawˇ haˬ-euˬ aˬ laꞈ tiˬ laꞈ doˆ le-awˇ, sahˬ paˬ hawˇ nymˇ-euˬ kaˇ pyawˇ-ahˇ, tsiˇ kʼmˬ yaw shehꞈ bya dzehˬ-awˇ mawˇ duˬ laˇ dzehˬ gaˇ, sahˬ boꞈ boꞈ le-euˬ meh. Aˬ laꞈ kʼoeˇ laꞈ kʼoeˇ loꞈ-ehˇ sahˬ boꞈ boꞈ luꞈ gaˇ sahˬ paˬ mawˇ-euˬ meh.

⁶ Aˬ yawꞈ-euˬ myaˆ pyawˬ pyuˇ pya ni pyeuꞈ-iˇ-awˇ, guˆ dui dui-iˇ-euˬ miˇ neh, aˬ kuiˇ pawˬ tsuiꞈ yaw dzuˬ dzuˬ-eu meh.

⁷ Nyiˇ paˬ shaˆ ma deuˬ hawˇ-eu mah loˬ ja maw deuˬ kuˇ laꞈ-eu gʼaˇ duˬ aˬ yawꞈ dawˬ biꞈ-euˬ meh. Aˬ yawꞈ maꞈ laˇ keuˆ ngeh, heu loꞈ-ehˇ ehˇ nehˬ-euˬ meh. “Heu gaˇ boꞈ taˬ-euˬ gaˇ kawˆ heu gui doˆ nya-awˇ, ngaˬ-ahˇ kʼaˇ dzawˇ poˆ nehˬ laꞈ nya-eu gʼaˬ-ahˇ, sahˬ paˬ dm-eu pehˇ kʼahˬ pehˇ mahˇ yaw neˇ bi dm-awˇ, kawˬ lahˇ-ahˇ taˬ huiˬ taˬ mahˇ-eu shuiˇ shuiˇ caˆ bi dah-awˇ, miˇ kʼahˬ heu kʼahˬ laꞈ kʼoeˇ aˬ cawˬ taꞈ-ehˇ huiˬ-eu sahˬ paˬ smˇ gʼaˬ tiˬ gʼaˬ bi geuꞈ-ma.”

⁸ Sahˬ paˬ-ahˇ nui noeˬ nui duˇ biꞈ-eu deuˬ mehˬ hu paw doˆ laˇ-awˇ gui haw kʼawꞈ, tiˬ gʼaˬ-iˬ maˬ gui doˆ nya-ehˇ, sahˬ paˬ-ahˇ dawˬ tsuiꞈ maˬ yuˇ doˆ nehˬ nya-a.

⁹ Sahˬ paˬ Beˬlaˇshaˬzaˬ guˆ dui dui-iˇ-awˇ, myaˆ pyawˬ shiˬ maˬ dahˬ ni pyeuꞈ-iˇ-euˬ meh. Aˬ yawꞈ-euˬ gaˇ mˇ-eu sahˬ paˬ sahˬ ma deuˬ kʼawꞈ, noeˬ maˬ doˆ ni tsoˆ leˇ jiˇ-euˬ meh.

¹⁰ Sahˬ paˬ hawˇ-eu aˬ yawꞈ-euˬ gaˇ mˇ-eu sahˬ paˬ sahˬ ma deuˬ luiˬ gʼa-eu teˇ saˇ-ahˇ sahˬ paˬ-euˬ aˬ ma gʼaˬ ya gaˬ ngeh, aˬ yawꞈ maꞈ dzaˬ byawˇ lawˇ luꞈ-eu lawˆ-ahˇ uˇ haw le-euˬ meh. Aˬ yawꞈ ehˇ-eu, “Sahˬ paˬ ziˇ baw ziˇ za luꞈ-uˇ. Sahˬpaˬ-oˇ, myaˆ pyawˬ maˬ muiˬ ni pyeuꞈ-iˇ paˬ-ehˇ teu naˆ naˆ-ehˇ guˆ-eu maˬ loˬ-a.

¹¹ Nawˬ-euˬ miˇ kʼahˬ laꞈ kʼoeˇ muiˬ-eu shawˇ-eu Miˬyehˇ-euˬ yaw sahˇ ahˇ-eu tsawˇ haˬ tiˬ gʼaˬ jawˇ meh. Nawˬ da dzoeˬ dzaˬ ngeh, tsawˇ haˬ kʼoeˇ gʼaˬ zaˬ siˬ tsawˇ gahˇ ahˇ dui dui-awˇ, Miˬyehˇ tiˬ gʼaˬ loꞈ-ehˇ siˬ nya mawˇ nya gaˇ ya mawˇ-euˬ meh. Nawˬ da sahˬ paˬ Neˬbuˬkaˬneˬzaˬ neh aˬ yawꞈ-ahˇ, nyiˇ paˬ shaˆ ma hawˇ-eu mah loˬ ja maw dawˬ tawˆ luꞈ kʼoeˇ taˆ huiˬ dzehˬ-eu gʼaˬ bi geuꞈ-euˬ meh.

¹² Aˬ yawꞈ-aˬ, siˬ dui gahˇ dui dui-awˇ, yuꞈ maˆ dawˬ tsuiꞈ yuˇ doˆ-eu paw maˬ ehˇ, zahˬ dui dui leˇ taˬ-euˬ gaˇ kawˆ deuˬ sawˇ doˆ-eu paw maˬ ehˇ, tsawˇ haˬ zaˬ maˬ noeˬ doˆ coeˇ-eu naꞈ dui dui-eu dawˬ tsuiꞈ deuˬ yuˇ doˆ nehˬ-eu paw maˬ ehˇ, aˬ cawˬ-ahˇ maˬ duˇ-eu zaˬ siˬ nui gahˇ ahˇ-eu meh. Kʼoeˇ miˇ neh, sahˬ paˬ neh Beˬteˬshaˬzaˬ lehˇ myahˇ nehˬ-euˬ Daˬyeˬlaˇ lehˇ kuˇ-eu tsawˇ haˬ kʼoeˇ gʼaˬ bi kuˇ laˬ-iˇ-awˬ. Sahˬ boꞈ boꞈ taˬ-euˬ dawˬ tsuiꞈ heu aˬ yawꞈ nawˬ-ahˇ ehˇ nehˬ laꞈ tehꞈ-a.”

Sahˬ boꞈ boꞈ taˬ-euˬ dawˬ tsuiꞈ Daˬyeˬlaˇ yuˇ doˆ nehˬ-euˬ

¹³ Daˬyeˬlaˇ-ahˇ sahˬ paˬ jawˇ gaˇ sheuˬ keuˆ laꞈ-awˇ, sahˬ paˬ neh heu loꞈ-ehˇ ehˇ nehˬ-euˬ meh. “Ngaˬ da neh Yuˇdaˆ miˇ kʼahˬ-ahˇ nyehꞈ-awˇ sheuˬ kʼoꞈ laꞈ-euˬ Daˬyeˬlaˇ lehˇ kuˇ-eu kʼoeˇ gʼaˬ nawˇ ma loˇ.

¹⁴ Muiˬ-eu shawˇ-eu Miˬyehˇ-euˬ yaw sahˇ nawˬ-euˬ laꞈ kʼoeˇ jawˇ-awˇ, nawˇ bym dui nya dui dui-eu gaˇ kawˆ hawˇ-eu, zaˬ siˬ tsawˇ gahˇ byah dui dui-eu gaˇ kawˆ ngaˇ ya gaˬ-euˬ ma.

¹⁵ Ngaˬ-ahˇ nui noeˬ nui duˇ biꞈ-eu deuˬ hawˇ-eu, mah loˬ ja maw nya-eu deuˬ bi sheuˬ laꞈ-awˇ, heu gaˇ boꞈ taˬ-euˬ gaˇ kawˆ heu bi gui haw-awˇ ngaˬ-ahˇ dawˬ tsuiꞈ bi yuˇ doˆ mehˬ-euˬ kʼawꞈ, tiˬ gʼaˬ-iˬ dawˬ tsuiꞈ maˬ poˆ doˆ nya-a.

¹⁶ Zaꞈ taˬ-euˬ gaˇ kawˆ deuˬ hawˇ-eu, naꞈ dui dui-eu dawˬ tsuiꞈ deuˬ nawˇ yuˇ doˆ nya meh lehˇ ngaˇ ya gaˬ-euˬ ma. Heu gaˇ boꞈ taˬ-euˬ sahˬ boꞈ heu nawˇ gui-awˇ ngaˬ-ahˇ dawˬ tsuiꞈ yuˇ doˆ nehˬ laꞈ nya naˇ, sahˬ paˬ dm-eu pehˇ kʼahˬ pehˇ mahˇ yaw neˇ bi dm-awˇ, taˬ huiˬ taˬ mahˇ-eu shuiˇ shuiˇ caˆ nawˬ-euˬ kawˬ lahˇ-ahˇ sheu dah nehˬ-awˇ, miˇ kʼahˬ heu kʼahˬ laꞈ kʼoeˇ aˬ cawˬ taꞈ-ehˇ huiˬ dzehˬ-eu sahˬ paˬ smˇ gʼaˬ tiˬ gʼaˬ bi geuꞈ ma.”

¹⁷ Daˬyeˬlaˇ ehˇ-eu, “Sahˬ paˬ-oˇ, nawˇ ngaˬ-ahˇ biꞈ ma lehˇ ehˇ-eu laꞈ sawˬ teu deuˬ ngaˬ-ahˇ maˬ biꞈ laꞈ ni, nawˬ nehˬ-ehˇ bi jaˆ-awˬ. Maˬ ngeuˇ naˇ, aˬ cawˬ-ahˇ biꞈ-awˬ. Boꞈ taˬ-euˬ gaˇ kawˆ heu nawˬ-ahˇ ngaˇ gui mehˬ-awˇ, dawˬ tsuiꞈ yuˇ doˆ nehˬ ma.

¹⁸ “Dawˬ tawˆ kʼoeˇ taˆ huiˬ-eu Miˬyehˇ neh nawˬ da-ahˇ huiˬ dui dui-eu sahˬ paˬ tiˬ gʼaˬ bi pyeuꞈ laˇ-awˇ, baoˬ yaw shehꞈ kʼahˬ sehˇ biꞈ nehˬ-euˬ meh.

¹⁹ Aˬ yawꞈ huiˬ dui mahˇ dui dui-eu miˇ neh, miˇ tsaˬ kʼoeˇ taˆ kʼaˇ jawˇ-eu tsawˇ jeuˬ tsawˇ ca dawˬ tawˆ luꞈ, aˬ yawꞈ-ahˇ guˆ-awˇ yaw dzuˬ dzuˬ-eu meh. Aˬ yawꞈ sehꞈ mawꞈ-eu gʼaˬ-ahˇ sehꞈ-awˇ, aˬ yawꞈ bi dehꞈ mawꞈ-eu gʼaˬ-ahˇ maˬ sehꞈ ni bi dehꞈ-euˬ meh. Aˬ yawꞈ ciˬ huiˬ mawꞈ-eu gʼaˬ-ahˇ ciˬ huiˬ-awˇ, aˬ yawꞈ dehˬ awˆ mawꞈ-eu gʼaˬ-ahˇ dehˬ awˆ nehˬ-euˬ meh.

²⁰ Ehˇ kʼawꞈ, aˬ yawꞈ nui ma huiˬ-eu mahˇ-eu jeˬ ahˇ laˇ-awˇ nui ma gʼahˇ-eu uˬ taꞈ, aˬ cawˬ-ahˇ gʼawˬ shaˬ gaˬ-eu maˬ siˬ nya-eu miˇ neh, aˬ yawꞈ-euˬ sahˬ paˬ aˇ yaˬ bi yuˇ ka-awˇ, yaw shehꞈ kʼahˬ sehˇ maˬ jaˆ ni pyeuꞈ-iˇ-euˬ meh.

²¹ Tsawˇ haˬ zaˬ-euˬ baꞈ tsahˬ-ahˇ neh aˬ yawꞈ-ahˇ teh dzeh-awˇ, bawˇ tsahˬ jeˬ zaˬ-euˬ nui ma ahˇ laˇ-euˬ meh. Bawˇ tsahˬ mahˬ tahˬ laˆ deuˬ nehˬ-ehˇ aˬ yawꞈ jawˇ-awˇ, mawˇ neˇ loꞈ-ehˇ yaˇ moꞈ tseuˆ dzaˬ-awˇ, deh ga-ahˇ naˇ shmˇ maˬ baw gaˇ, ceuˬ deh deh deh-ehˇ yuꞈ-euˬ meh. Aˇ saˬ saˬ laˇ ngeh jawˇ, tsawˇ haˬ zaˬ-euˬ miˇ kʼahˬ dawˬ tawˆ luꞈ, Dawˬ tawˆ kʼoeˇ taˆ huiˬ-eu Miˬyehˇ-euˬ laꞈ-ahˇ jaˆ-awˇ, aˬ yawꞈ kʼaˇ biꞈ mawꞈ-eu gʼaˬ-ahˇ miˇ kʼahˬ dzoeˬ dzaˬ biꞈ nya-eu gaˇ kawˆ, aˬ yawꞈ-ahˇ siˬ duˬ leˇ-euˬ meh.

²² “Ehˇ kʼawꞈ, aˬ yawꞈ-euˬ aˬ li pyeuꞈ-eu nawˇ-aˬ, gaˇ kawˆ heu deuˬ dawˬ tawˆ luꞈ siˬ nya kʼawꞈ, nui nahˬ nui yu maˬ ahˇ-a.

²³ Mˬ taˆ Sahˬpaˬ Miˬyehˇ-ahˇ nawˇ jahˇ gʼeh haw-eu laꞈ kʼoeˇ, aˬ yawꞈ-euˬ Uˬ duˬ tahˬ nymˇ nymˇ ma laꞈ kʼoeˇ jaˆ-eu kʼmˬ maˬ deuˬ nawˇ yuˇ ahˇ laꞈ-awˇ, nawˇ hawˇ-eu nawˬ-euˬ gaˇ mˇ-eu sahˬ paˬ sahˬ ma deuˬ, nawˬ-euˬ miˬ zaˬ deuˬ hawˇ-eu ma nyiˇ deuˬ, aˬ gaꞈ dzaˇ uiˇ kʼaˇ ahˇ-awˇ dawˇ dawˇ-ehˇ, naˬ bawˇ maˬ gaˬ nya, myaˆ nuiˆ maˬ mawˇ nya-eu tiˬ jeˬ-iˬ maˬ siˬ nya-eu miˬ yehˇ deuˬ pyeuꞈ-eu, shuiˇ, pyuˇ, guiˬ shuiˇ, shmˇ, daˇ kawˬ, kʼaˬ lo, heu deuˬ neh jahˇ taˬ-euˬ miˬ yehˇ deuˬ-ahˇ ja ceuˬ-euˬ meh. Ehˇ kʼawꞈ, nawˬ-ahˇ toeˬ dehꞈ toeˬ shiˇ nya-awˇ, nawˇ kʼaˇ mˇ kʼaˇ shaˇ-eu yawˬ jeˬ na luꞈ-ahˇ tuˆ tehˬ luꞈ-eu Miˬyehˇ-ahˇ nawˇ maˬ taˬ huiˬ-a.

²⁴ Kʼoeˇ miˇ neh, sahˬ boꞈ heu bi boꞈ-eu lehˇ, Miˬyehˇ neh aˬ laꞈ pyehˬ gʼeh leꞈ-euˬ meh.

²⁵ “Boꞈ taˬ-euˬ aˇ boꞈ-aˬ, ‘MEˬNEˬ, MEˬNEˬ, TEˬKEˬLAˇ, PAˬSIˬ’ lehˇ meh.

²⁶ Ehˇ mawꞈ-eu dawˬ tsuiꞈ-aˬ, heu loꞈ-ehˇ meh. MEˬNEˬ lehˇ ehˇ-eu-aˬ, naˬ baꞈ-ahˇ ehˇ-eu meh. Dawˬ tsuiꞈ-aˬ, nawˬ-euˬ miˇ kʼahˬ-euˬ aˇ nah aˇ yamˬ-ahˇ Miˬyehˇ gui taˬ-awˇ, aˇ saˬ saˬ-eu aˇ nah bi keuˆ le-eu lehˇ gʼeh-eu meh lehˇ ehˇ mawꞈ-eu meh.

²⁷ TEˬKEˬLAˇ lehˇ ehˇ-eu-aˬ, aˇ naˆ ni kah-eu pyaˇ-eu gaˇ ehˇ-eu meh. Dawˬ tsuiꞈ-aˬ, nawˬ-ahˇ paˆ yawˬ neh saˆ haw ngeh, pyaˇ dui dui gaˇ ya mawˇ-euˬ meh lehˇ ehˇ mawꞈ-eu meh.

²⁸ PEˬLEˬ lehˇ ehˇ-eu-aˬ, biˇ paˆ gaˇ ehˇ-eu meh. Dawˬ tsuiꞈ-aˬ, nawˬ-euˬ miˇ kʼahˬ deuˆ paˆ biˇ paˆ-awˇ, Meˬdiˇ tsawˇ jeuˬ hawˇ-eu Paˇshaˇ tsawˇ jeuˬ-ahˇ biꞈ nehˬ gaˇ ehˇ mawꞈ-eu meh.”

²⁹ Beˬlaˇshaˬzaˬ neh aˬ yawꞈ-euˬ tsawˇ haˬ deuˬ-ahˇ tiˬ poˆ tehꞈ-ehˇ dawˬ biꞈ-awˇ, Daˬyeˬlaˇ-ahˇ sahˬ paˬ dm-eu pehˇ kʼahˬ pehˇ mahˇ yaw neˇ bi dm-awˇ, taˬ huiˬ taˬ mahˇ-eu shuiˇ shuiˇ caˆ kawˬ lahˇ-ahˇ nyehꞈ dah nehˬ-euˬ meh. Kʼoeˇ naˇ, miˇ kʼahˬ kʼoeˇ taˆ aˬ cawˬ naˆ maˬ tseˇ huiˬ-eu sahˬ paˬ smˇ gʼaˬ tiˬ gʼaˬ bi geuꞈ-euˬ meh.

³⁰ Kʼoeˇ ngeh miˇ, Baˬbuˇloˬ sahˬ paˬ Beˬlaˇshaˬzaˬ-ahˇ aˬ cawˬ sehꞈ-euˬ meh.

³¹ Kʼoeˇ naˇ, aˇ kʼoꞈ koꞈ tseˇ nyiˬ kʼoꞈ byah-eu Daˬliˇ lehˇ kuˇ-eu Meˬdiˇ tsawˇ haˬ tiˬ gʼaˬ, miˇ kʼahˬ kʼoeˇ kʼahˬ-ahˇ sahˬ paˬ geuꞈ-awˇ uˆ lahˇ-euˬ meh.