Daˬyeˬlaˇ 4 - Akha

Neˬbuˬkaˬneˬzaˬ yuꞈ maˆ tiˬ poˆ paˇ maˆ-euˬ

¹ Miˇ tsaˬ kʼoeˇ taˆ kʼaˇ jawˇ-eu miˇ kʼahˬ dawˬ tawˆ luꞈ hawˇ-eu tsawˇ jeuˬ dawˬ tawˆ luꞈ-ahˇ, sahˬ paˬ Neˬbuˬkaˬneˬzaˬ heu loꞈ-ehˇ dawˬ tsaꞈ tsaꞈ ahˇ gʼeh-euˬ meh. “Naw maꞈ dawˬ tawˆ luꞈ nui saˇ oꞈ luꞈ-uˇ.

² Dawˬ tawˆ kʼoeˇ taˆ huiˬ-eu Miˬyehˇ neh ngaˬ-ahˇ bi siˬ bi mawˇ laꞈ-euˬ zahˬ dui dui leˇ paˬ-ehˇ gʼeh-eu gaˇ kawˆ, naw maꞈ-ahˇ ngaˇ maˬ ja mehˬ-ehˇ maˬ jawˇ coeˇ nya.

³ Miˬyehˇ aˬ dui-ahˇ mehˬ laꞈ-euˬ, kʼaˆjeˬ-ehˇ gʼeh-eu gaˇkawˆdeuˬ, aˇ naˆ ni huiˬ-eu gaˇ kawˆ nga. Aˬ yawꞈ neh mˇ mehˬ shaˇ mehˬ-euˬ, zahˬ leˇ paˬ-ehˇ gʼeh-eu gaˇ deuˬ, aˇ naˆ ni baoˬ jaˆ-eu gaˇ nga. Aˬ yawꞈ miˇ kʼahˬ mˬ maˬ maˬ byaˆ, aˬ yawꞈ dzoeˬ dzaˬ zaˇ ziˇ ziꞈ meh.

⁴ “Ngaˇ-aˬ, ngaˬ-euˬ nymˇ pyeuꞈ-eu sahˬ paˬ-euˬ hawˇ nymˇ-ahˇ saˇ lehˆ ni jawˇ-awˇ, pyuˇ shuiˇ myawˬ gahˬ maˬ ehˇ jiˇ coeˇ ni jaˆ-eu ma.

⁵ Ehˇ kʼawꞈ, ngaˇ yuꞈ kʼaˆ luꞈ ngeh, guˆ laˇ paˬ-ehˇ gʼeh-eu yuꞈ maˆ maˆ-awˇ, guˆ dui dui laˇ paˬ-ehˇ gʼeh-eu jeˬ ya mawˇ-euˬ ma.

⁶ Ngaˬ-ahˇ yuꞈ maˆ dawˬ tsuiꞈ bi dzawˇ mehˬ-eu lehˇ, Baˬbuˇloˬ meuˬ-ahˇ kʼaˇ jawˇ-eu sahˬ paˬ-ahˇ nui noeˬ nui duˇ biꞈ-eu tsawˇ haˬ deuˬ-ahˇ, ngaˇ dawˬ biꞈ-awˇ bi kuˇ uiˬ jiˇ-euˬ ma.

⁷ Kʼoeˇ naˇ, nyiˇ paˬ shaˆ ma dawˬ tawˆ luꞈ hawˇ-eu, mah loˬ ja maw kʼaˇ nya-eu deuˬ dawˬ tawˆ luꞈ bi kuˇ uiˬ laꞈ-awˇ, ngaˬ neh yuꞈ maˆ maˆ-euˬ dawˬ tsuiꞈ bi yuˇ doˆ-euˬ ma. Ehˇ kʼawꞈ, aˬ yawꞈ maꞈ tiˬ gʼaˬ-iˬ yuꞈ maˆ dawˬ tsuiꞈ maˬ yuˇ doˆ nya-a.

⁸ Kʼoeˇ naˇ, Daˬyeˬlaˇ laˇ keuˆ-euˬ meh. (Aˬ yawꞈ-ahˇ ngaˬ-euˬ miˬ yehˇ-euˬ tsawˇ myahˇ pyeuꞈ-eu Beˬteˬshaˬzaˬ lehˇ kʼawꞈ kuˇ-eu meh.) Muiˬ-eu shawˇ-eu miˬ yehˇ-euˬ yaw sahˇ aˬ yawꞈ-euˬ laꞈ kʼoeˇ jawˇ-eu meh. Kʼoeˇ ngeh, ngaˬ neh yuꞈ maˆ maˆ-euˬ gaˇ kawˆ aˬ yawꞈ-ahˇ dzawˇ nehˬ-euˬ ma. Aˬ yawꞈ-ahˇ ngaˇ heu loꞈ-ehˇ ehˇ nehˬ-euˬ ma.

⁹ Mah loˬ ja maw nya-eu deuˬ dawˬ tawˆ kʼoeˇ taˆ huiˬ dzehˬ-eu Beˬteˬshaˬzaˬ-oˇ, muiˬ-eu shawˇ-eu miˬ yehˇ-euˬ yaw sahˇ nawˬ-euˬ laꞈ kʼoeˇ jawˇ-awˇ, kʼaˇ zaꞈ taˬ-euˬ jeˬ dawˬ tawˆ luꞈ nawˇ siˬ nya meh lehˇ ngaˇ jah ma. Ngaˇ yuꞈ maˆ heu loꞈ-ehˇ maˆ-euˬ ma. Dawˬ tsuiꞈ tiˬ poˆ yuˇ doˆ nehˬ laꞈ sheˇ.

¹⁰ “Ngaˇ yuꞈ kʼaˆ luꞈ ngeh, miˇ tsaˬ tahˬ kʼawˇ-euˬ gʼahˇ ceh aˇ bawˇ bawˇ ma tiˬ bawˇ bawˇ gaˇ ya mawˇ-euˬ ma.

¹¹ Aˇ bawˇ kʼoeˇ bawˇ ngehˬ jawˇ ngehˬ huiˬ laˇ-awˇ, mˬ-ahˇ huiˬ tuˆ-awˇ, miˇ tsaˬ kʼoeˇ taˆ kʼaˇ jawˇ-eu tsawˇ haˬ yawˬ gʼaˬ na luꞈ haw mawˇ nya-eu meh.

¹² Aˇ bawˇ kʼoeˇ bawˇ-euˬ aˇ paꞈ haw muiˬ dui dui-eu uˬ taꞈ, aˇ siˬ siˬ dui dui-awˇ, miˇ tsaˬ zaˬ dawˬ tawˆ luꞈ dzaˬ loꞈ-eu meh. Bawˇ tsahˬ jeˬ zaˬ deuˬ aˇ bawˇ naˇ shmˇ uˬ moˆ gʼaˬ naˬ naˬ-awˇ, aˇ jiˇ deuˬ uˬ pyaˬ uˬ laꞈ doe ni bahˬ bahˬ-eu uˬ taꞈ, kʼaˇ dehꞈ kʼaˇ jawˇ-eu jeˬ dawˬ tawˆ luꞈ, aˇ bawˇ kʼoeˇ-euˬ aˇ siˬ dzaˬ-eu meh.

¹³ “Ngaˬ neh ya mawˇ-euˬ gaˇ kawˆ kʼoeˇ-ahˇ ngaˇ shaˇ sawˇ luꞈ ngeh, mˬ taˆ gʼaˬ kʼehˇ tiˬ gʼaˬ mˬ kʼoeˇ taˆ neh zoˇ tseuˆ ni haw haw-ehˇ oe ka luꞈ gaˇ ya mawˇ-euˬ ma.

¹⁴ Aˬ yawꞈ yaw kʼaˆ-ehˇ guˇ-awˇ heu loꞈ-ehˇ ehˇ-eu meh. Aˇ bawˇ heu bawˇ tuˇ lawˇ-awˇ uˬ laꞈ deuˆ tsehˆ dzeh jiˇ-awˬ. Aˇ paꞈ juˆ dzeh jiˇ-awˇ, aˇ siˬ byaˆ byoˆ jiˇ-awˬ. Aˇ bawˇ dawˬ pehˬ-ahˇ jawˇ-eu jeˬ zaˬ deuˬ teh dzeh jiˇ-awˇ, uˬ laꞈ-ahˇ dawꞈ-eu aˇ jiˇ deuˬ teh zaw jiˇ-awˬ.

¹⁵ Ehˇ kʼawꞈ, sahˬ nyiꞈ hawˇ-eu duˬ ciˇ-ahˇ shmˇ caˆ hawˇ-eu guiˬ caˆ lahˇ cuꞈ-awˇ, miˇ tsa bi pahˬ yaꞈ-awˇ, deh ga gʼahˇ ceh yaˇ moꞈ tsahˬ-ahˇ byehˇ dzeh yaꞈ-awˬ. “ ‘Aˬ yawꞈ-ahˇ ceuˬ deh deh deh-ehˇ, jeˬ zaˬ hawˇ-eu baw duˆ deuˬ nehˬ-ehˇ bi jawˇ-awˬ.

¹⁶ Shiꞈ kʼoꞈ keuˆ ni aˬ yawꞈ tsawˇ haˬ zaˬ-euˬ nui ma maˬ ahˇ-ehˇ, jeˬ zaˬ-euˬ nui ma ahˇ tehꞈ-a.

¹⁷ Heu-aˬ, haw luꞈ pyaˆ luꞈ-eu mˬ taˆ gʼaˬ kʼehˇ neh noeˬ tsehˆ-awˇ, daˇ tsehˆ-euˬ dawˬ ma. Dawˬ tawˆ kʼoeˇ taˆ huiˬ-eu Miˬyehˇ-aˬ, tsawˇ haˬ zaˬ-euˬ miˇ kʼahˬ kʼoeˇ taˆ baoˬ jaˆ-awˇ, aˬ yawꞈ kʼaˇ biꞈ mawꞈ-eu gʼaˬ-ahˇ miˇ kʼahˬ dzoeˬ dzaˬ biꞈ nya-eu gaˇ kawˆ, teˬ dui nyiˇ dui dui-eu tsawˇ haˬ tiˬ gʼaˬ-ahˇ keuˆ ni, aˬ yawꞈ miˇ kʼahˬ dzoeˬ dzaˬ biꞈ keuˆ nehˬ nya-eu gaˇ kawˆ, mˬ dzeˇ miˇ dzeˇ keuˆ ni jawˇ-eu tsawˇ haˬ dawˬ tawˆ luꞈ siˬ duˬ luꞈ-uˇ’ lehˇ ehˇ-eu meh.

¹⁸ “Heu-aˬ, sahˬ paˬ Neˬbuˬkaˬneˬzaˬ pyeuꞈ-eu ngaˇ maˆ mawˇ-euˬ yuꞈ maˆ ma. Nymˬ-mˇ poˆ jawˇ-aˬ, Beˬteˬshaˬzaˬ nawˇ yuꞈ maˆ heu hmˬ-euˬ dawˬ tsuiꞈ yuˇ doˆ nehˬ laꞈ sheˇ. Ngaˬ-ahˇ nui noeˬ nui duˇ biꞈ-eu deuˬ, yuꞈ maˆ heu hmˬ-euˬ dawˬ tsuiꞈ tiˬ gʼaˬ-iˬ maˬ yuˇ doˆ nya-a. Ehˇ kʼawꞈ, muiˬ-eu shawˇ-eu Miˬyehˇ-euˬ yaw sahˇ nawˬ-euˬ laꞈ kʼoeˇ jawˇ-eu miˇ neh, nawˇ yuˇ doˆ nya meh.”

Daˬyeˬlaˇ yuꞈ maˆ dawˬ tsuiꞈ yuˇ doˆ-euˬ

¹⁹ Kʼoeˇ loꞈ-ehˇ ehˇ gaˇ ya gaˬ ngeh, Beˬteˬshaˬzaˬ lehˇ kʼawꞈ kuˇ-eu Daˬyeˬlaˇ ya gaˬ ngeh, tsawˬ guˆ-iˇ-awˇ, dawˬ maˬ ngehˬ ni tiˬ kʼehˬ tsoˆ leˇ-euˬ meh. “Beˬteˬshaˬzaˬ-oˇ, yuꞈ maˆ heu-euˬ gaˇ kawˆ-ahˇ nawˇ taˬ tsawˬ guˆ-iˇ” lehˇ, sahˬ paˬ ehˇ-eu meh. Beˬteˬshaˬzaˬ ehˇ-eu, “Sahˬ paˬ-oˇ, ngaˬ-euˬ nui ma laꞈ kʼoeˇ, yuꞈ maˆ hawˇ-eu yuꞈ maˆ-euˬ dawˬ tsuiꞈ heu nawˬ-ahˇ ehˇ mawꞈ-eu jeˬ maˬ ngeuˇ-ehˇ, nawˬ-ahˇ muiˇ-eu deuˬ-ahˇ ehˇ mawꞈ-eu jeˬ pyeuꞈ law nmˇ duˇ nya.

²⁰ Nawˬ neh yuꞈ maˆ maˆ mawˇ-euˬ aˇ bawˇ kʼoeˇ goˇ dui dui-awˇ, mˬ-ahˇ tuˆ-eu miˇ neh, miˇ tsaˬ zaˬ yawˬ gʼaˬ na luꞈ haw mawˇ nya-eu meh.

²¹ Aˇ bawˇ kʼoeˇ aˇ paꞈ sahˇ dui dui-awˇ, miˇ tsaˬ kʼoeˇ taˆ kʼaˇ dehꞈ kʼaˇ jawˇ-eu jeˬ dawˬ tawˆ luꞈ dzaˬ loꞈ ni aˇ siˬ siˬ-eu meh. Bawˇ tsahˬ jeˬ zaˬ deuˬ aˇ bawˇ naˇ shmˇ uˬ moˆ gʼaˬ naˬ naˬ-awˇ, aˇ jiˇ deuˬ uˬ pyaˬ uˬ laꞈ kʼoeˇ taˆ bahˬ bahˬ-eu meh.

²² “Sahˬ paˬ-oˇ, nawˇ-aˬ, huiˬ dui goˇ dui dui-eu aˇ bawˇ kʼoeˇ bawˇ meh. Nawˇ huiˬ dui mahˇ dui dui laˇ-euˬ miˇ neh, mˬ-ahˇ tuˆ leˇ-awˇ, nawˬ-euˬ baoˬ miˇ tsaˬ dawˬ tawˆ luꞈ kʼoeˇ taˆ uˆ tehˬ taˬ-euˬ meh.

²³ Sahˬ paˬ nawˇ haw luꞈ ngeh, mˬ kʼoeˇ taˆ neh mˬ taˆ gʼaˬ kʼehˇ tiˬ gʼaˬ zaꞈ ka le-awˇ, heu loꞈ-ehˇ ehˇ-eu meh. ‘Aˇ bawˇ heu bawˇ tuˇ dzeh-awˇ laˆ cawˆ-awˬ. Ehˇ kʼawꞈ, sahˬ nyiꞈ hawˇ-eu duˬ ciˇ-ahˇ shmˇ caˆ hawˇ-eu guiˬ caˆ neh lahˇ cuꞈ-awˇ, miˇ tsa bi pahˬ yaꞈ-awˇ, deh ga gʼahˇ ceh yaˇ moꞈ tsahˬ-ahˇ byehˇ dzeh yaꞈ-awˬ. Aˬ yawꞈ-ahˇ ceuˬ deh deh deh-ehˇ, shiꞈ kʼoꞈ byah ni bawˇ tsahˬ jeˬ zaˬ nehˬ-ehˇ kʼoeˇ gaˇ bi jawˇ-awˬ’ lehˇ ehˇ-eu meh.

²⁴ “Sahˬ paˬ-oˇ, yuꞈ maˆ dawˬ tsuiꞈ heu loꞈ-ehˇ meh. Heu-aˬ, nawˬ-euˬ kʼoeˇ taˆ bi keuˆ le-eu gʼaˇ duˬ, dawˬ tawˆ kʼoeˇ taˆ huiˬ-eu Miˬyehˇ neh ehˇ tsehˆ taˬ-euˬ jeˬ pyeuꞈ-eu meh.

²⁵ Tsawˇ haˬ baꞈ tsahˬ-ahˇ neh nawˬ-ahˇ teh dzeh-awˇ, bawˇ tsahˬ jeˬ zaˬ nehˬ-ehˇ nawˇ ya jawˇ tehꞈ-a. Shiꞈ kʼoꞈ keuˆ ni nawˇ mawˇ neˇ loꞈ-ehˇ yaˇ moꞈ ya dzaˬ-awˇ, deh ga-ahˇ ceuˬ deh deh deh-ehˇ ya yuꞈ tehꞈ-a. Kʼoeˇ ngeh jawˇ, tsawˇ haˬ zaˬ-euˬ miˇ kʼahˬ deuˬ-ahˇ Dawˬ tawˆ kʼoeˇ taˆ huiˬ-eu Miˬyehˇ tuˆ tehˬ taˬ-awˇ, aˬ yawꞈ kʼaˇ biꞈ mawˬ-eu gʼaˬ-ahˇ miˇ kʼahˬ dzoeˬ dzaˬ biꞈ nya-eu gaˇ kawˆ, nawˇ siˬ duˬ tehꞈ-a.

²⁶ Sahˬ nyiꞈ hawˇ-eu duˬ ciˇ deuˬ-ahˇ miˇ tsa bi pahˬ yaꞈ-awˬ lehˇ, mˬ taˆ gʼaˬ kʼehˇ deuˬ dawˬ biꞈ-euˬ dawˬ tsuiꞈ-aˬ, miˇ tsaˬ dawˬ tawˆ kʼoeˇ taˆ Miˬyehˇ uˆ lahˇ luꞈ-eu gaˇ kawˆ nawˇ siˬ duˬ ngeh, nawˇ sahˬ paˬ paˇ ya geuꞈ kʼoꞈ tehꞈ-a lehˇ ehˇ mawꞈ-eu meh.

²⁷ Kʼoeˇ miˇ neh sahˬ paˬ-oˇ, ngaˬ-euˬ ehˇ dawˬ geuꞈ nehˬ laꞈ. Iˬ baˇ maˬ mˇ ni byehˇ-awˇ, yaw tsaˬ yaw dawˇ jeˬ mˇ-eu laꞈ kʼoeˇ, shaˬ zaˬ zahˬ zaˬ deuˬ-ahˇ gʼawˬ shaˬ gaˬ nehˬ-awˬ. Kʼoeˇ loꞈ-ehˇ jahˇ naˇ, nawˬ-euˬ gʼaˇ duˬ nui saˇ oꞈ-eu jeˬ maˬ byoˆ-iˇ-aˇ.”

²⁸ Kʼaˇ ehˇ taˬ-euˬ jeˬ dawˬ tawˆ luꞈ, sahˬ paˬ Neˬbuˬkaˬneˬzaˬ kʼoeˇ taˆ keuˆ le-euˬ meh.

²⁹ Ba la tseˇ nyiꞈ siˬ dzeuˇ-iˇ-awˇ, Baˬbuˇloˬ meuˬ-ahˇ jaˆ-eu aˬ yawꞈ jawˇ-eu sahˬ paˬ hawˇ nymˇ-euˬ nymˇ mˬ kʼoeˇ taˆ aˬ yawꞈ cah baˇ luꞈ ngeh,

³⁰ “Haw sheˇ, Baˬbuˇloˬ meuˬ heu aˇ naˆ ni huiˬ-eu mahˇ-eu meuˬ nga. Ngaˬ-euˬ baoˬ hawˇ-eu ngaˬ-euˬ yaw shehꞈ kʼahˬ sehˇ bi doˆ laˇ-eu gʼaˇ duˬ, sahˬ paˬ jawˇ-eu meuˬ pyeuꞈ laˇ ni, ngaˬ neh tsoˆ-euˬ ma” lehˇ aˬ yawꞈ ehˇ-eu meh.

³¹ Dawˬ kʼoeˇ dawˬ aˬ yawꞈ maˬ ngehˬ jiˇ miˇ naˆ-ehˇ, mˬ kʼoeˇ taˆ heu loꞈ-ehˇ ehˇ doˆ leꞈ-euˬ meh. “Sahˬ paˬ Neˬbuˬkaˬneˬzaˬ-oˇ, ngaˇ ehˇ gaˇ naˇ haˬ-awˬ. Nawˬ-euˬ dzoeˬ dzaˬ nawˬ nehˬ-ehˇ maˬ paˇ jawˇ meh.

³² Tsawˇ haˬ baꞈ tsahˬ laꞈ kʼoeˇ nawˬ-ahˇ teh dzeh-awˇ, bawˇ tsahˬ jeˬ zaˬ nehˬ-ehˇ ya jawˇ-iˇ-awˇ, shiꞈ kʼoꞈ keuˆ ni mawˇ neˇ loꞈ-ehˇ yaˇ moꞈ ya dzaˬ tehꞈ-a. Kʼoeˇ ngeh jawˇ, dawˬ tawˆ kʼoeˇ taˆ huiˬ-eu Miˬyehˇ tsawˇ haˬ zaˬ-euˬ miˇ kʼahˬ kʼoeˇ taˆ baoˬ jaˆ-awˇ, aˬ yawꞈ biꞈ mawꞈ-eu gʼaˬ-ahˇ miˇ kʼahˬ dzoeˬ dzaˬ biꞈ nya-eu gaˇ kawˆ, nawˇ siˬ duˬ tehꞈ-a.”

³³ Kʼaˇ ehˇ-euˬ yawˬ jeˬ na luꞈ ja pyuˬ ni keuˆ le-euˬ meh. Neˬbuˬkaˬneˬzaˬ-aˬ, tsawˇ haˬ tsahˬ-ahˇ neh bi teh dzeh-awˇ, mawˇ neˇ loꞈ-ehˇ yaˇ moꞈ tseuˆ dzaˬ-euˬ meh. Aˬ yawꞈ ceuˬ deh ya deh-awˇ, aˬ yawꞈ-euˬ gʼawˇ mawˇ caꞈ hm deuˬ kaˬ dzeˇ caꞈ hm loꞈ-ehˇ mahˇ le-awˇ, aˬ yawꞈ-euˬ kuiˇ sahˬ laꞈ sahˬ aˇ jiˇ kuiˇ sahˬ loꞈ-ehˇ mahˇ le-euˬ meh.

Neˬbuˬkaˬneˬzaˬ Miˬyehˇ-ahˇ ja ceuˬ-euˬ

³⁴ Sahˬ paˬ Neˬbuˬkaˬneˬzaˬ ehˇ-eu, “Shiꞈ kʼoꞈ dzeuˇ-iˇ ngeh jawˇ, mˬ-ahˇ ngaˇ gʼawˇ leuˇ haw ngeh, nui ma-ahˇ noeˬ laˇ-euˬ miˇ-a. Dawˬ tawˆ kʼoeˇ taˆ huiˬ-eu Miˬyehˇ-ahˇ ngaˇ ja ceuˬ-awˇ, mˬ maˬ maˬ byaˆ zaˇ ziˇ dehꞈ-eu gʼaˬ-ahˇ ciˬ poeˬ-awˇ taˬ huiˬ taˬ mahˇ nehˬ-euˬ ma. “Aˬ yawꞈ dzoeˬ dzaˬ zaˇ ziˇ gmˬ-awˇ, aˬ yawꞈ miˇ kʼahˬ zaˇ ziˇ ziꞈ meh.

³⁵ Miˇ tsaˬ tsawˇ haˬ dawˬ tawˆ luꞈ-ahˇ, aˬ yawꞈ tsawˇ haˬ maˬ sawˇ nehˬ-a. Mˬ taˆ zaˬ deuˬ, miˇ tsaˬ zaˬ deuˬ, yawꞈ-euˬ laꞈ kʼawˆ uˬ moˆ tehꞈ meh. Yawꞈ nui kʼahˇ maˬ tsahˇ pyawˇ nya-a. Yawꞈ-ahˇ dawˬ poˆ maˬ poˆ nya-a.

³⁶ “Ngaˇ nui ma-ahˇ paˇ noeˬ laˇ ngeh, ngaˬ-euˬ yaw shehꞈ kʼahˬ sehˇ hawˇ-eu ngaˬ-euˬ miˇ kʼahˬ-euˬ yaw shehꞈ kʼahˬ sehˇ kʼoeˇ deuˬ, ngaˬ-ahˇ paˇ biꞈ kʼoꞈ laꞈ-euˬ meh. Ngaˬ-euˬ gaˇ mˇ-eu yaw huiˬ yaw mahˇ deuˬ hawˇ-eu, ngaˬ-euˬ laꞈ oˆ sahˬ paˬ sahˬ ma geuꞈ luꞈ-eu deuˬ ngaˬ-ahˇ paˇ ha geuꞈ-awˇ, ngaˬ-euˬ dzoeˬ dzaˬ-euˬ baoˬ paˇ za kʼoꞈ-euˬ uˬ taꞈ, yaw beh naˆ maˬ tseˇ ngaˬ-ahˇ taˬ huiˬ taˬ mahˇ nehˬ laꞈ-euˬ meh.

³⁷ “Nymˬ-mˇ poˆ jawˇ, ngaˇ Neˬbuˬkaˬneˬzaˬ-aˬ, mˬ taˆ Sahˬ paˬ-ahˇ ja ceuˬ-awˇ taˬ huiˬ-eu uˬ taꞈ, ciˬ huiˬ ciˬ mahˇ dui dui-eu ma. Aˬ yawꞈ neh kʼaˇ mˇ kʼaˇ shaˇ-euˬ jeˬ tsaˬ dui dawˇ dui dui-awˇ, nui ma huiˬ-eu mahˇ-eu tsawˇ haˬ-ahˇ aˬ yawꞈ zuiˆ gʼaˬ nya-eu meh.”