Daˬyeˬlaˇ 2 - Akha

Neˬbuˬkaˬneˬzaˬ yuꞈ maˆ maˆ-euˬ

¹ Neˬbuˬkaˬneˬzaˬ-aˬ, aˬ yawꞈ sahˬ paˬ geuꞈ-awˇ uˆ lahˇ-euˬ nyiˬ kʼoꞈ tiˬ kʼoꞈ-ahˇ, yuꞈ maˆ maˆ mawˇ-euˬ meh. Yuꞈ maˆ kʼoeˇ baˬ da neh aˬ yawꞈ noeˬ shaˬ dui dui-awˇ, maˬ yuꞈ kʼaˆ leˇ-a.

² Kʼoeˇ miˇ neh, ja maw mah loˬ nya-eu deuˬ hawˇ-eu, nyiˇ paˬ shaˆ ma deuˬ-ahˇ aˬ yawꞈ bi kuˇ laˬ-iˇ-awˇ, yuꞈ maˆ dawˬ tsuiꞈ bi yuˇ doˆ-euˬ meh. Tsawˇ haˬ kʼoeˇ deuˬ laˇ keuˆ-awˇ, sahˬ paˬ-euˬ mehˬ shi yawꞈ luꞈ-eu meh.

³ “Ngaˬ neh yuꞈ maˆ maˆ mawˇ-euˬ gaˇ kawˆ ngaˇ noeˬ shaˬ dui dui-awˇ, dawˬ tsuiꞈ siˬ nya mawꞈ nya” lehˇ aˬ yawꞈ maꞈ-ahˇ sahˬ paˬ ehˇ nehˬ-euˬ meh.

⁴ Aˬ yawꞈ maꞈ Aˬlaˬmiˇ dawˬ ngehˬ-awˇ, “Sahˬ paˬ ziˇ baw ziˇ za luꞈ-uˇ. Nawˬ neh yuꞈ maˆ maˆ mawˇ-euˬ gaˇ kawˆ dzawˇ nehˬ laꞈ-awˬ. Nga maꞈ dawˬ tsuiꞈ yuˇ doˆ nehˬ ma” lehˇ ehˇ-eu meh.

⁵ Kʼoeˇ ngeh, sahˬ paˬ heu loꞈ-ehˇ ehˇ-eu meh. “Ngaˬ neh maˆ-euˬ yuꞈ maˆ gaˇ kawˆ naw maꞈ ngaˬ-ahˇ ya dzawˇ nehˬ laꞈ-awˇ, yuꞈ maˆ kʼoeˇ-euˬ dawˬ tsuiꞈ kʼawꞈ, naw maꞈ ngaˬ-ahˇ ya yuˇ doˆ nehˬ laꞈ meh lehˇ, ngaˇ noeˬ tsehˆ taˬ-euˬ ma. Naw maꞈ ngaˬ-ahˇ kʼoeˇ loꞈ-ehˇ maˬ ehˇ mehˬ nehˬ nya naˇ, naw maꞈ-euˬ gʼawˇ mawˇ deuˆ tm deuˆ tmˇ jiˇ-awˇ, naw maꞈ-euˬ nymˇ deuˬ deh pyaˆ deh shaˆ jiˇ ma.

⁶ Ehˇ kʼawꞈ, naw maꞈ ngaˬ-ahˇ yuꞈ maˆ kʼoeˇ hmˬ dzawˇ nehˬ nya-awˇ, dawˬ tsuiꞈ yuˇ doˆ nehˬ laꞈ nya naˇ, naw maꞈ-ahˇ ngaˇ laꞈ sawˬ biꞈ-awˇ, yaw kʼaˆ-ehˇ taˬ huiˬ taˬ mahˇ nehˬ ma. Nymˬ-mˇ poˆ jawˇ-aˬ, yuꞈ maˆ gaˇ kawˆ dzawˇ-awˇ, yuꞈ maˆ dawˬ tsuiꞈ yuˇ doˆ-awˬ.”

⁷ Aˬyawꞈ maꞈ ehˇ-eu, “Yuꞈ maˆ kʼoeˇ hmˬ gaˇ kawˆ sahˬ paˬ dzawˇ nehˬ laꞈ naˇ, nga maꞈ dawˬ tsuiꞈ yuˇ doˆ nehˬ ma.”

⁸ Kʼoeˇ ngeh, sahˬ paˬ heu loꞈ-ehˇ ehˇ-eu meh. “Ngaˬ neh noeˬ tsehˆ taˬ-euˬ jeˬ naw maꞈ haw siˬ-euˬ miˇ neh, aˇ yamˬ kʼaˇ jiˇ maˬ jiˇ jiˇ ni naw maꞈ leh jeh luꞈ-eu meh.

⁹ Naw maꞈ ngaˬ-ahˇ yuꞈ maˆ gaˇ kawˆ maˬ dzawˇ nehˬ laꞈ nya naˇ, naw maꞈ dawˬ tawˆ luꞈ-ahˇ tiˬ kawˆ loꞈ-ehˇ kʼehˬ nehˬ ma. Aˇ yamˬ laˆ myahˇ naˇ tiˬ jeˬ paˇ laˇ tehꞈ-a lehˇ naw maꞈ noeˬ tmˬ-awˇ, naw maꞈ dawˬ tawˆ luꞈ mehˬ bawˬ gm leˇ-awˇ ngaˬ-ahˇ jaˬ myawꞈ myawꞈ luꞈ-eu meh. Naw maꞈ yuꞈ maˆ dawˬ tsuiꞈ yuˇ doˆ nya ngaˇ lehˇ ngaˇ ya siˬ ni, yuꞈ maˆ gaˇ kawˆ ngaˬ-ahˇ dzawˇ nehˬ laꞈ sheˇ.”

¹⁰ Sahˬ paˬ-ahˇ nui noeˬ nui duˇ biꞈ-eu tsawˇ haˬ deuˬ heu loꞈ-ehˇ ehˇ-eu meh. “Sahˬ paˬ-oˇ, nawˇ kʼaˇ siˬ nya mawꞈ-eu jeˬ ehˇ nehˬ nya-eu tsawˇ haˬ tiˬ gʼaˬ-iˬ miˇ tsaˬ kʼoeˇ taˆ maˬ jawˇ-a. Sahˬ paˬ tiˬ gʼaˬ-iˬ, yawˬ ha-euˬ nyiˇ paˬ shaˆ ma deuˬ hawˇ-eu mah loˬ ja maw nya-eu deuˬ-ahˇ, teu naˆ naˆ-ehˇ ka tiˇ-awˇ maˬ naˇ haˬ haw-aˬ. Baoˬ huiˬ dui dui-eu sahˬ paˬ deuˬ kʼawꞈ, kʼoeˇ loꞈ-ehˇ maˬ jahˇ haw-aˬ.

¹¹ Nawˬ neh naˇ haˬ-euˬ dawˬ heu kʼaˆ dui dui-eu miˇ neh, miˬ yehˇ deuˬ maˬ ngeuˇ naˇ, tsawˇ haˬ zaˬ nawˬ-ahˇ maˬ ehˇ nehˬ nya-a. Miˬ yehˇ kʼoeˇ deuˬ kʼawꞈ, tsawˇ haˬ zaˬ nehˬ-ehˇ maˬ jawˇ-a.”

¹² Kʼoeˇ loꞈ-ehˇ ehˇ laˇ gaˇ sahˬ paˬ nui ma pehˇ dui dui-awˇ, Baˬbuˇloˬ meuˬ-ahˇ kʼaˇ jawˇ-eu sahˬ paˬ-ahˇ nui noeˬ nui duˇ biꞈ-eu deuˬ pyeuꞈ-eu tsawˇ gahˇ ahˇ-eu tsawˇ haˬ dawˬ tawˆ luꞈ-ahˇ sehꞈ-eu gʼaˇ duˬ, dawˬ biꞈ-euˬ meh.

¹³ Sahˬ paˬ neh biꞈ-euˬ dawˬ kʼoeˇ dawˬ-aˬ, tsawˇ gahˇ ahˇ-eu deuˬ dawˬ tawˆ luꞈ-ahˇ sehꞈ-eu gʼaˇ duˬ pyeuꞈ-eu miˇ neh, Daˬyeˬlaˇ hawˇ-eu aˬ yawꞈ-euˬ cawˬ deuˬ kʼawꞈ, bi sehꞈ paˬ-ehˇ tsaˬ laˇ-euˬ meh.

Daˬyeˬlaˇ-ahˇ Miˬyehˇ yuꞈ maˆ dawˬ tsuiꞈ mehˬ nehˬ-euˬ

¹⁴ Kʼoeˇ naˇ, Baˬbuˇloˬ meuˬ-ahˇ jawˇ-eu tsawˇ gahˇ ahˇ-eu tsawˇ haˬ deuˬ-ahˇ sehꞈ-eu gaˇ biꞈ taˬ-euˬ, sahˬ paˬ-ahˇ loꞈ piˇ-eu guiˇ maꞈ kʼoeˇ taˆ uˆ lahˇ-eu gʼaˬ pyeuꞈ-eu Aˬliˇoˆ jawˇ gaˇ Daˬyeˬlaˇ iˇ-awˇ, yaw muiˬ paˬ-ehˇ noeˬ gahˇ-awˇ ngehˬ cawˬ-euˬ meh.

¹⁵ Aˬ jeˬ miˇ neh kʼoeˇ naˆ naˆ-ehˇ kʼaˆ-eu dawˬ biꞈ taˬ-euˬ gaˇ kawˆ, Aˬliˇoˆ-ahˇ Daˬyeˬlaˇ naˇ haˬ ngeh, kʼaˇ pyeuꞈ laˇ-euˬ yawˬ jeˬ na luꞈ, Daˬyeˬlaˇ-ahˇ Aˬliˇoˆ dzawˇ nehˬ jiˇ-euˬ meh.

¹⁶ Tiˬ poˆ tehꞈ-ehˇ, sahˬ paˬ jawˇ gaˇ Daˬyeˬlaˇ le-awˇ, yuꞈ maˆ-euˬ dawˬ tsuiꞈ sahˬ paˬ-ahˇ aˬ yawꞈ ehˇ mehˬ nehˬ nya ni, aˇ yamˬ tiˬ kʼehˬ biꞈ laꞈ-eu gʼaˇ duˬ shaˇ leˇ-euˬ meh.

¹⁷ Kʼoeˇ naˇ, Daˬyeˬlaˇ gʼoꞈ-iˇ-awˇ, aˬ yawꞈ-euˬ cawˬ deuˬ pyeuꞈ-eu , Haˬnaˬniˇyaˆ, Miˇshaˬlaˇ, Aˬzaˬyiˇ aˬ ha maꞈ-ahˇ, gaˇ kawˆ kʼoeˇ dzawˇ nehˬ-euˬ meh.

¹⁸ “Aˬ yawꞈ maꞈ-ahˇ, Baˬbuˇloˬ meuˬ-ahˇ jawˇ-eu sahˬ paˬ-ahˇ nui noeˬ nui duˇ biꞈ-eu deuˬ nehˬ-ehˇ tiˬ kawˆ loꞈ-ehˇ maˬ ya bi sehꞈ-eu gʼaˇ duˬ, gaˇ kawˆ kʼoeˇ-euˬ dawˬ tsuiꞈ ehˇ nehˬ laꞈ ni, mˬ taˆ Miˬyehˇ-ahˇ guiˬ lahˬ shaˇ-awˬ” lehˇ, aˬ ha smˇ gʼaˬ-ahˇ Daˬyeˬlaˇ ehˇ nehˬ-euˬ meh.

¹⁹ Kʼoeˇ ngeh miˇ, yaw sahˇ laꞈ kʼoeˇ ya siˬ ya mawˇ-eu jeˬ laꞈ kʼoeˇ, Daˬyeˬlaˇ-ahˇ dawˬ tsuiꞈ pah mehˬ le-euˬ meh. Kʼoeˇ ngeh, mˬ taˆ Miˬyehˇ-ahˇ Daˬyeˬlaˇ heu loꞈ-ehˇ ja ceuˬ-euˬ meh.

²⁰ “Baoˬ huiˬ tsawˇ gahˇ byah-eu Miˬyehˇ maˬ byaˆ zaˇ ziˇ ja ceuˬ-eu ma.

²¹ Aˇ yamˬ aˇ law yawꞈ tuˆ tehˬ-awˇ, dzoeˬ dzaˬ dzeˇ paˇ yawꞈ-ahˇ jaˆ-awˇ, zaˬ siˬ nui gahˇ yawꞈ biꞈ-eu meh

²² Naꞈ-eu dawˬ tsuiꞈ yawꞈ pah mehˬ-awˇ, yaw zahˇ zaꞈ taˬ-euˬ mawˇ nya-awˇ, yawꞈ jawˇ tiˬ jawˬ yaw shehꞈ bya meh.

²³ Ngaˬ poeˬ ngaˬ bawˇ-euˬ Miˬyehˇ-oˇ, nawˬ-ahˇ ja ceuˬ-awˇ taˬ huiˬ ma. Tsawˇ gahˇ hawˇ-eu gʼaˬ biꞈ laꞈ-awˇ, shaˇ dawˬ naˇ haˬ laꞈ-euˬ uˬ taꞈ, sahˬ paˬ-ahˇ ya tmˇ leˇ-eu dawˬ, nga maꞈ-ahˇ nawˇ mehˬ laꞈ-euˬ meh.”

Daˬyeˬlaˇ yuꞈ maˆ gaˇ kawˆ dzawˇ mehˬ-awˇ dawˬ tsuiꞈ yuˇ doˆ nehˬ-euˬ

²⁴ Kʼoeˇ naˇ, sahˬ paˬ-ahˇ nui noeˬ nui duˇ biꞈ-eu deuˬ-ahˇ bi sehꞈ-eu gʼaˇ duˬ, sahˬ paˬ neh dawˬ biꞈ taˬ-euˬ gʼaˬ pyeuꞈ-eu Aˬliˇoˆ jawˇ gaˇ Daˬyeˬlaˇ iˇ-awˇ ehˇ nehˬ-eu, “Aˬ yawꞈ maꞈ-ahˇ taˬ sehꞈ law siˬ. Ngaˬ-ahˇ sahˬ paˬ jawˇ gaˇ sheuˬ gʼeh nehˬ laꞈ. Aˬ yawꞈ-euˬ yuꞈ maˆ dawˬ tsuiꞈ ngaˇ ehˇ mehˬ nehˬ ma.”

²⁵ Aˬliˇoˆ-aˬ, Daˬyeˬlaˇ-ahˇ sahˬ paˬ Neˬbuˬkaˬneˬzaˬ jawˇ gaˇ tiˬ poˆ tehꞈ-ehˇ sheuˬ gʼeh-awˇ, “Sahˬ paˬ-oˇ, Yuˇdaˆ miˇ kʼahˬ-ahˇ neh nyehꞈ laꞈ-euˬ deuˬ laꞈ kʼoeˇ, nawˬ-euˬ yuꞈ maˆ dawˬ tsuiꞈ yuˇ doˆ nehˬ nya-eu tiˬ gʼaˬ ngaˇ mawˇ-euˬ ma” lehˇ ehˇ nehˬ-euˬ meh.

²⁶ (Beˬtaˬshaˬzaˬ lehˇ kʼawꞈ kuˇ-eu) Daˬyeˬlaˇ-ahˇ, “Ngaˬ-euˬ yuꞈ maˆ nawˇ dzawˇ nya-awˇ, yuꞈ maˆ dawˬ tsuiꞈ kʼawꞈ, yuˇ doˆ nehˬ laꞈ nya ma loˇ” lehˇ, sahˬ paˬ naˇ haˬ-euˬ meh.

²⁷ Kʼoeˇ ngeh, Daˬyeˬlaˇ heu loꞈ-ehˇ ehˇ-eu meh. “Sahˬ paˬ-oˇ, gaˇ kawˆ heu nawˬ-ahˇ ehˇ nehˬ nya-eu nyiˇ paˬ shaˆ ma hawˇ-eu mah loˬ ja maw nya-eu tsawˇ haˬ maˬ jawˇ-a.

²⁸ Ehˇ kʼawꞈ, naꞈ dui dui-eu gaˇ kawˆ pah mehˬ nya-eu, mˬ kʼoeˇ taˆ Miˬyehˇ jawˇ meh. Mehˬ hu paw pyeuꞈ laˇ-eu gaˇ kawˆ deuˬ, aˬ yawꞈ nawˬ-ahˇ mehˬ nehˬ laꞈ-euˬ meh. Nawˬ neh yaw sahˇ laꞈ kʼoeˇ ya siˬ ya mawˇ-euˬ jeˬ pyeuꞈ-eu nawˬ neh yuꞈ maˆ maˆ-euˬ gaˇ kawˆ, ngaˇ nawˬ-ahˇ dzawˇ mehˬ ma.

²⁹ “Sahˬ paˬ nawˇ yuꞈ kʼaˆ luꞈ ngeh, mehˬ hu paw pyeuꞈ laˇ-eu gaˇ kawˆ yuꞈ maˆ maˆ mawˇ-euˬ meh. Naꞈ dui dui-eu gaˇ kawˆ deuˬ pah mehˬ-eu Miˬyehˇ, mehˬ hu paw pyeuꞈ laˇ-eu gaˇ kawˆ nawˬ-ahˇ mehˬ nehˬ le-euˬ meh.

³⁰ Naꞈ dui dui-eu gaˇ kawˆ heu-euˬ dawˬ tsuiꞈ, nymˬ-mˇ ngaˬ-ahˇ pah mehˬ nehˬ laꞈ-euˬ meh. Aˬ cawˬ naˆ maˬ tseˇ ngaˇ zaˬ siˬ tsawˇ gahˇ ahˇ dzehˬ-eu miˇ neh, ngaˬ-ahˇ heu loꞈ-ehˇ pah mehˬ nehˬ laꞈ-euˬ maˬ ngeuˇ-a. Ehˇ kʼawꞈ, sahˬ paˬ nawˇ nawˬ-euˬ yuꞈ maˆ dawˬ tsuiꞈ siˬ nya-awˇ, nawˬ-euˬ nui ma-ahˇ pyeuꞈ doˆ laˇ-euˬ nui noeˬ-euˬ dawˬ tsuiꞈ nawˇ ya siˬ ni, ngaˬ-ahˇ heu loꞈ-ehˇ pah mehˬ nehˬ laꞈ-euˬ meh.

³¹ “Sahˬ paˬ-oˇ, yaw sahˇ laꞈ kʼoeˇ ya siˬ ya mawˇ-euˬ jeˬ laꞈ kʼoeˇ, yaw shehꞈ bya-awˇ guiˇ nyiˬ ni gʼeh-eu huiˬ dui dui-eu tsawˇ haˬ mawˇ kawˇ tiˬ kawˇ, nawˬ-euˬ mehˬ shi guˆ laˇ paˬ-ehˇ yawꞈ luꞈ gaˇ nawˇ ya mawˇ-euˬ meh.

³² Mawˇ kawˇ kʼoeˇ-euˬ uˬ duˬ-ahˇ muiˬ dui dui-eu shuiˇ neh jahˇ taˬ-awˇ, kʼahˬ hawˇ-eu aˬ laꞈ-ahˇ pyuˇ neh jahˇ taˬ-euˬ meh. Joꞈ hawˇ-eu shaˬ pyaˬ-ahˇ guiˬ shuiˇ neh jahˇ taˬ-euˬ meh.

³³ Aˬ kuiˇ kuiˇ du-ahˇ shmˇ neh jahˇ taˬ-awˇ, aˬ kuiˇ pehˬ zaˬ-ahˇ shmˇ tiˬ paˆ miˇ tsaˬ tiˬ paˆ lehˇ jahˇ taˬ-euˬ meh.

³⁴ Nawˇ kʼoeˇ gaˇ haw haw-ehˇ jawˇ ngeh, tsawˇ haˬ tiˬ gʼaˬ-iˬ maˬ toeˬ ciˆ-euˬ gaˇ, lo guˇ-ahˇ neh kʼaˬ lo lo ma tiˬ siˬ poˆ ka leꞈ-awˇ, shmˇ hawˇ-eu miˇ tsaˬ neh jahˇ taˬ-euˬ aˬ kuiˇ-ahˇ poˆ daˆ-awˇ lehˬ paˆ-euˬ meh.

³⁵ Ja pyuˬ ni, shuiˇ, miˇ tsaˬ, guiˬ shuiˇ, pyuˇ hawˇ-eu shuiˇ kʼoeˇ deuˬ dawˬ tawˆ luꞈ meuˇ-iˇ loeˇ-iˇ jiˇ-awˇ, jawˇ la yamˬ-ahˇ cehˇ bymˇ saˬ kʼawꞈ-ahˇ ga-eu kʼaˬ lehˇ loꞈ-ehˇ pyeuꞈ jiˇ-euˬ meh. Jaˬ lehˇ neh bi baw byoˆ jiˇ-awˇ iˇ zaˇ laˇ zaˇ maˬ siˬ ni pyeuꞈ-iˇ-euˬ meh. Ehˇ kʼawꞈ, kʼaˬ lo kʼoeˇ siˬ gawˬ jawˬ jawˬ ma pyeuꞈ laˇ-awˇ, miˇ tsaˬ tahˬ kʼawˇ-ahˇ huiˬ byah-euˬ meh.

³⁶ “Heu-aˬ, yuꞈ maˆ maˆ mawˇ-euˬ gaˇ kawˆ meh. Sahˬ paˬ-oˇ, nymˬ-mˇ poˆ jawˇ-aˬ, yuꞈ maˆ dawˬ tsuiꞈ ngaˇ ehˇ ma.

³⁷ Sahˬ paˬ-oˇ, nawˇ-aˬ, sahˬ paˬ dawˬ tawˆ kʼoeˇ taˆ huiˬ dzehˬ-eu sahˬ paˬ pyeuꞈ-eu meh. Mˬ taˆ Miˬyehˇ neh nawˬ-ahˇ baoˬ hawˇ-eu gʼaˬ biꞈ-euˬ uˬ taꞈ, aˬ cawˬ taˬ huiˬ taˬ mahˇ-eu jeˬ kʼawꞈ biꞈ-euˬ meh.

³⁸ Miˇ tsaˬ kʼoeˇ taˆ kʼaˇ jawˇ-eu tsawˇ haˬ dawˬ tawˆ luꞈ kʼoeˇ taˆ maˬ ehˇ, jeˬ zaˬ hawˇ-eu ho zaˬ nga jiˇ dawˬ tawˆ luꞈ kʼoeˇ taˆ maˬ ehˇ, nawˇ bi uˆ lahˇ-euˬ meh. Nawˇ-aˬ, shuiˇ uˬ duˬ kʼoeˇ siˬ meh.

³⁹ Nawˇ jiˇ naˇ, nawˬ-euˬ miˇ kʼahˬ taꞈ-ehˇ nyiˇ teˬ-eu miˇ kʼahˬ tiˬ kʼahˬ paˇ doˆ laˇ tehꞈ-a. Kʼoeˇ jiˇ naˇ, miˇ kʼahˬ smˇ kʼahˬ tiˬ kʼahˬ pyeuꞈ-eu guiˬ shuiˇ miˇ kʼahˬ paˇ doˆ laˇ-awˇ, miˇ tsaˬ dawˬ tawˆ luꞈ-ahˇ uˆ lahˇ tehꞈ-a.

⁴⁰ Kʼoeˇ jiˇ naˇ, miˇ kʼahˬ oeˬ kʼahˬ tiˬ kʼahˬ paˇ doˆ laˇ tehꞈ-a. Miˇ kʼahˬ kʼoeˇ kʼahˬ-aˬ, yawˬ jeˬ na luꞈ-ahˇ laˆ kʼehꞈ laˆ kʼoeˆ nya-eu shmˇ loꞈ-ehˇ gʼahˇ tehꞈ-a. Yawˬ jeˬ na luꞈ-ahˇ shmˇ neh laˆ kʼehꞈ laˆ kʼoeˆ nya gaˇ duˇ ni, yaw beh jaˆ-euˬ miˇ kʼahˬ deuˬ-ahˇ, miˇ kʼahˬ kʼoeˇ kʼahˬ neh laˆ cawˆ jiˇ tehꞈ-a.

⁴¹ Aˬ kuiˇ pehˬ zaˬ hawˇ-eu kuiˇ noeˇ deuˬ-aˬ, shmˇ tiˬ paˆ, miˇ tsaˬ tiˬ paˆ lehˇ gʼeh gaˇ nawˇ mawˇ-euˬ meh. Kʼoeˇ-aˬ, miˇ kʼahˬ tiˬ kʼahˬ laꞈ kʼoeˇ gʼawˬ mya kʼahˬ paˆ-iˇ gaˇ ehˇ mawꞈ-eu meh. Miˇ kʼahˬ kʼoeˇ-aˬ, shmˇ-euˬ gʼaˬ tiˬ paˆ ahˇ-eu miˇ kʼahˬ pyeuꞈ tehꞈ-a. Aˬ jeˬ miˇ neh ehˇ naˇ, miˇ tsaˬ-ahˇ shmˇ tiˬ paˆ keuˬ taˬ-euˬ meh.

⁴² Shmˇ tiˬ paˆ miˇ tsaˬ tiˬ paˆ lehˇ gʼeh-eu kuiˇ noeˇ deuˬ-euˬ dawˬ tsuiꞈ-aˬ, miˇ kʼahˬ kʼoeˇ kʼahˬ gʼaˬ ahˇ-eu miˇ kʼahˬ pyeuꞈ-eu loꞈ-ehˇ, gʼaˬ baˬ-eu miˇ kʼahˬ kʼawꞈ pyeuꞈ-eu meh lehˇ ehˇ mawꞈ-eu meh.

⁴³ Miˇ tsaˬ-ahˇ shmˇ keuˬ taˬ-euˬ gaˇ nawˇ ya mawˇ-euˬ meh. Dawˬ tsuiꞈ-aˬ, miˇ kʼahˬ kʼahˬ ma kʼoeˇ kʼahˬ-ahˇ uˆ lahˇ-eu sahˬ paˬ sahˬ ma deuˬ, aˬ buˇ aˬ li bi sheuˬ dah dzaˬ taꞈ-eu laꞈ kʼoeˇ, tiˬ gaˇ dehꞈ taꞈ-eu lehˇ leh jeh gaˇ ehˇ mawꞈ-eu meh. Ehˇ kʼawꞈ, shmˇ hawˇ-eu miˇ tsaˬ maˬ keuˬ leˇ nya-eu loꞈ-ehˇ, aˬ yawꞈ maꞈ kʼoeˇ loꞈ-ehˇ maˬ jahˇ pyeuꞈ nya-a.

⁴⁴ Sahˬ paˬ sahˬ ma kʼoeˇ deuˬ dzoeˬ dzaˬ-eu aˇ yamˬ-ahˇ, mˬ taˆ Miˬyehˇ miˇ kʼahˬ tiˬ kʼahˬ beh tehꞈ-a. Miˇ kʼahˬ kʼoeˇ kʼahˬ-aˬ, mˬ maˬ maˬ byaˆ zaˇ ziˇ ziꞈ-eu miˇ kʼahˬ pyeuꞈ-awˇ, aˬ cawˬ maˬ deuˆ gʼaˬ nya-eu miˇ kʼahˬ meh. Ehˇ kʼawꞈ, miˇ kʼahˬ kʼoeˇ kʼahˬ neh miˇ kʼahˬ kʼoeˇ deuˬ dawˬ tawˆ luꞈ-ahˇ tiˬ saˬ tiˬ li laˆ cawˆ byoˆ nehˬ jiˇ-awˇ, mˬ maˬ maˬ byaˆ zaˇ ziˇ ziꞈ dah ni gʼeh-eu miˇ kʼahˬ pyeuꞈ laˇ tehꞈ-a.

⁴⁵ Tsawˇ haˬ neh maˬ laˆ ciˆ-euˬ gaˇ, lo guˇ-ahˇ neh kʼaˬ lo tiˬ siˬ aˬ joˆ-ehˇ poˆ ka leꞈ-awˇ, shmˇ, guiˬ shuiˇ, miˇ tsaˬ, pyuˇ, shuiˇ heu deuˬ neh jahˇ taˬ-euˬ tsawˇ haˬ mawˇ kawˇ-ahˇ aˬ joˆ-ehˇ poˆ deh-euˬ nawˇ mawˇ-euˬ meh. Huiˬ-eu Miˬyehˇ-aˬ, mehˬ hu paw pyeuꞈ laˇ-eu gaˇ kawˆ nawˬ-ahˇ ehˇ mehˬ nehˬ-euˬ meh. Nawˬ neh yuꞈ maˆ kʼaˇ maˆ mawˇ-euˬ loꞈ-ehˇ nawˬ-ahˇ ngaˇ dzawˇ duˬ nehˬ gʼaˬ-awˇ, tsaˬ dui dui-eu dawˬ tsuiꞈ yuˇ doˆ nehˬ gʼaˬ-euˬ ma.”

Sahˬ paˬ neh Daˬyeˬlaˇ-ahˇ laꞈ sawˬ biꞈ-euˬ

⁴⁶ Sahˬ paˬ Neˬbuˬkaˬneˬzaˬ miˇ tsa awˆ byaˆ-awˇ, Daˬyeˬlaˇ-ahˇ lawˇ nehˬ shehˇ nehˬ-eu gʼaˇ duˬ dawˬ biꞈ-euˬ meh.

⁴⁷ Sahˬ paˬ ehˇ-eu, “Nawˬ-euˬ Miˬyehˇ-aˬ, miˬ yehˇ dawˬ tawˆ kʼoeˇ taˆ huiˬ-eu Miˬyehˇ pyeuꞈ-awˇ, sahˬ paˬ dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu uˬ taꞈ, naꞈ dui dui-eu gaˇ kawˆ deuˬ pah mehˬ nehˬ nya-eu gʼaˬ meh. Naꞈ dui dui-eu gaˇ kawˆ heu nawˇ dawˬ tsuiꞈ pah mehˬ nya-euˬ miˇ neh, ngaˇ heu loꞈ-ehˇ siˬ duˬ-eu ma.”

⁴⁸ Kʼoeˇ naˇ, sahˬ paˬ neh Daˬyeˬlaˇ-ahˇ yaw huiˬ yaw mahˇ bi keuˆ leˇ-awˇ, muiˬ dui dui-eu laꞈ sawˬ deuˬ biꞈ-euˬ uˬ taꞈ, Baˬbuˇloˬ meuˬ-euˬ gahˬ kaˬ-ahˇ uˆ lahˇ-eu gʼaˬ bi geuꞈ-awˇ, sahˬ paˬ-ahˇ nui noeˬ nui duˇ biꞈ-eu tsawˇ gahˇ ahˇ-eu tsawˇ haˬ dawˬ tawˆ luꞈ kʼoeˇ taˆ bi uˆ lahˇ-euˬ meh.

⁴⁹ Daˬyeˬlaˇ-euˬ shaˇ dawˬ-ahˇ sahˬ paˬ naˇ haˬ-awˇ, Shaˬdaˬlaˆ, Meˬshaˆ, Aˬbeˬdaˬneˬgoˬ aˬ ha smˇ gʼaˬ-ahˇ, Baˬbuˇloˬ meuˬ-euˬ gahˬ kaˬ-ahˇ haw-eu pyaˆ-eu deuˬ bi geuꞈ-euˬ meh. Daˬyeˬlaˇ-aˬ, sahˬ paˬ-euˬ saˇ naˇ-ahˇ gaˇ mˇ-euˬ meh.