Daˬyeˬlaˇ 11 - Akha

¹ “Meˬdiˇ tsawˇ jeuˬ Daˬliˇ sahˬ paˬ geuꞈ-awˇ uˆ lahˇ beh beh ngeh kʼoꞈ, aˬ yawꞈ jawˇ paw ngaˇ pyawˬ-awˇ aˬ yawꞈ-ahˇ haw piˇ-euˬ ma.”

Iˇjiˇtuˆ miˇ kʼahˬ hawˇ-eu Suˇliˆ miˇ kʼahˬ

² Mˬ taˆ gʼaˬ kʼehˇ kʼoeˇ gʼaˬ ehˇ-eu, “Nymˬ-mˇ poˆ jawˇ-aˬ, nawˬ-ahˇ ngaˇ aˬ diˇ aˬ maˇ pyeuꞈ laˇ-eu jeˬ ehˇ nehˬ nyaˇ. Paˇshaˇ miˇ kʼahˬ-ahˇ sahˬ paˬ smˇ gʼaˬ paˇ uˆ lahˇ tehꞈ-a. Kʼoeˇ naˇ, yaw beh deuˬ naˆ maˬ tseˇ smˇ muiˬ muiˬ dui dui-eu sahˬ paˬ oeˬ gʼaˬ tiˬ gʼaˬ paˇ uˆ lahˇ tehꞈ-a. Aˬ yawꞈ baoˬ kʼaˇ ahˇ maˬ ahˇ ahˇ-awˇ, pyuˇ shuiˇ kʼaˇ jaˆ maˬ jaˆ jaˆ ngeh, Heˬlaˬshaˆ miˇ kʼahˬ-ahˇ guiˇ deuˆ cawˬ cawˬ tehꞈ-a.

³ “Kʼoeˇ naˇ, baoˬ ahˇ dui dui-eu sahˬ paˬ tiˬ gʼaˬ paˇ doˆ laˇ tehꞈ-a. Huiˬ dui dui-eu miˇ kʼahˬ-ahˇ aˬ yawꞈ uˆ lahˇ-awˇ, yawˬ ha kʼaˇ mˇ mawꞈ-eu jeˬ mˇ tehꞈ-a.

⁴ Ehˇ kʼawꞈ, aˬ yawꞈ baoˬ huiˬ dui dui luꞈ ngeh, aˬ yawꞈ-euˬ miˇ kʼahˬ kʼahˬ maˬ kʼoeˇ kʼahˬ, oeˬ paˆ paˆ-iˇ tehꞈ-a. Aˬ yawꞈ nehˬ-ehˇ aˇ jeuˬ aˇ ca maˬ taꞈ-eu deuˬ aˬ yawꞈ-euˬ jawˇ duˬ-ahˇ sahˬ paˬ geuꞈ tehꞈ-a. Ehˇ kʼawꞈ, aˬ yawꞈ maꞈ aˬ yawꞈ loꞈ-ehˇ baoˬ maˬ huiˬ-a.

⁵ “Iˇjiˇtuˆ sahˬ paˬ gʼaˬ kʼaˆ dui dui tehꞈ-a. Ehˇ kʼawꞈ, aˬ yawꞈ-euˬ guiˇ maꞈ kʼoeˇ taˆ uˆ lahˇ-eu yaw huiˬ yaw mahˇ tiˬ gʼaˬ aˬ yawꞈ naˆ maˬ tseˇ gʼaˬ kʼaˆ laˇ-awˇ, aˬ yawꞈ-euˬ miˇ kʼahˬ naˆ maˬ tseˇ huiˬ-eu miˇ kʼahˬ-ahˇ ya uˆ lahˇ tehꞈ-a.

⁶ Aˇ kʼoꞈ aˇ la ui cuiˆ myahˇ laˇ ngeh jawˇ, Iˇjiˇtuˆ sahˬ paˬ Suˇliˆ sahˬ paˬ nehˬ-ehˇ saˇ jaˇ dzaˬ-awˇ, aˬ yawꞈ-euˬ aˬ buˇ Suˇliˆ sahˬ paˬ-ahˇ bi dahˬ dzaˬ leˇ tehꞈ-a. Ehˇ kʼawꞈ, saˇ jaˇ dzaˬ taˬ-euˬ kʼoeˇ gʼawˬ myahˇ ni maˬ gmˬ-ehˇ, sahˬ paˬ zaˬ miˬ kʼoeˇ gʼaˬ maˬ ehˇ, aˬ yawꞈ-euˬ kʼaˬ dzeˇ zaˬ maˬ ehˇ, aˬ yawꞈ-euˬ zaˬ deuˬ maˬ ehˇ, bi sehꞈ byoˆ jiˇ tehꞈ-a.

⁷ Gʼawˬ myahˇ maˬ gʼeh-ehˇ, aˬ yawꞈ-euˬ aˬ yuiꞈ aˬ nyiˇ tiˬ gʼaˬ sahˬ paˬ keuˆ leˇ tehꞈ-a. Sahˬ paˬ kʼoeˇ gʼaˬ, Suˇliˆ sahˬ paˬ-euˬ guiˇ maꞈ-ahˇ guiˇ deuˆ-awˇ, aˬ yawꞈ maꞈ-euˬ taˆ laꞈ kʼoeˇ deuˆ uˇ gʼeh-awˇ, deuˆ gʼaˬ tehꞈ-a.

⁸ Aˬ yawꞈ maꞈ-euˬ miˬ yehˇ deuˬ hawˇ-eu, miˬ yehˇ kʼoeˇ deuˬ-ahˇ damˬ nehˬ taˬ-euˬ shuiˇ hawˇ-eu pyuˇ neh jahˇ taˬ-euˬ mˇ myawˬ keu ka deuˬ, Iˇjiˇtuˆ miˇ kʼahˬ-ahˇ aˬ yawꞈ yuˇ kʼoꞈ gʼeh tehꞈ-a. Aˇ yamˬ gʼawˬ myahˇ ni, aˬ yawꞈ guiˇ maˬ paˇ deuˆ ni jawˇ tehꞈ-a.

⁹ Kʼoeˇ naˇ, Suˇliˆ sahˬ paˬ Iˇjiˇtuˆ miˇ kʼahˬ-ahˇ guiˇ paˇ deuˆ le tehꞈ-a. Ehˇ kʼawꞈ, maˬ deuˆ gʼaˬ nya-ehˇ paˇ bi teh kʼoꞈ gʼeh tehꞈ-a.

¹⁰ “Suˇliˆ sahˬ paˬ-euˬ aˬ li deuˬ guiˇ maꞈ maꞈ ma laˆ uiˬ-awˇ, guiˇ deuˆ-eu gʼaˇ duˬ lehˬ hmˬ tehꞈ-a. Sahˬ paˬ-euˬ aˬ li tiˬ gʼaˬ iˇ jeuˬ jeuˬ-eu loꞈ-ehˇ iˇ gʼeh-awˇ, muiˇ-eu deuˬ-euˬ taꞈ-ahˇ deuˆ tehꞈ-a.

¹¹ Iˇjiˇtuˆ sahˬ paˬ nui ma pehˇ laˇ-eu laꞈ kʼoeˇ, Suˇliˆ sahˬ paˬ-ahˇ guiˇ deuˆ-awˇ, huiˬ dui dui-eu guiˇ maꞈ-ahˇ nyehꞈ mi tehꞈ-a.

¹² Aˬ yawꞈ guiˇ deuˆ gʼaˬ-euˬ gaˇ kawˆ hawˇ-eu, aˬ yawꞈ neh yehˇ gʼawˬ mya ni deuˆ sehꞈ-euˬ gaˇ kawˆ, aˬ yawꞈ kʼahˬ sehˇ jehˆ tehꞈ-a. Ehˇ kʼawꞈ, aˬ yawꞈ aˬ myah luꞈ kʼoeˇ loꞈ-ehˇ tehꞈ-ehˇ maˬ deuˆ gʼaˬ nya ni pyeuꞈ laˇ tehꞈ-a.

¹³ “Suˇliˆ sahˬ paˬ gʼoꞈ leˇ-awˇ, yaw beh naˆ maˬ tseˇ myaˬ-eu guiˇ maꞈ paˇ lehˬ hmˬ leˇ tehꞈ-a. Aˇ yamˬ tsaˬ laˇ ngeh jawˇ, guiˇ deuˆ-eu keu ka tiˬ loꞈ ahˇ-eu myaˬ dui dui-eu guiˇ maꞈ sheuˬ-awˇ paˇ oe tehꞈ-a.

¹⁴ Kʼoeˇ ngeh poˆ jawˇ, tsawˇ haˬ gʼawˬ mya ni Iˇjiˇtuˆ sahˬ paˬ-ahˇ puiˬ tehꞈ-a. Kʼoeˇ ngeh, Daˬyeˬlaˇ nawˬ-euˬ tsawˇ jeuˬ laꞈ kʼoeˇ haiˬ-eu tsawˇ haˬ deuˬ kʼawꞈ, aˬ yawꞈ maꞈ neh yaw sahˇ laꞈ kʼoeˇ ya siˬ ya mawˇ taˬ-euˬ jeˬ jaˆ-eu miˇ neh, guiˇ deuˆ-eu lehˇ tuˇ laˇ tehꞈ-a. Ehˇ kʼawꞈ, aˬ cawˬ neh bi deuˆ gʼaˬ tehꞈ-a.

¹⁵ Suˇliˆ sahˬ paˬ-aˬ, ziꞈ dah ni gawˬ lahˇ taˬ-euˬ meuˬ tiˬ meuˬ-ahˇ loꞈ jawˬ-awˇ, deuˆ gʼaˬ tehꞈ-a. Iˇjiˇtuˆ yehˇ deuˬ guiˇ maˬ paˇ deuˆ ni byehˇ tehꞈ-a. Nya dui dui-eu yehˇ deuˬ kʼawꞈ, guiˇ deuˆ-eu gʼaˇ duˬ, gʼaˬ maˬ ahˇ-ehˇ pyeuꞈ-iˇ tehꞈ-a.

¹⁶ Guiˇ deuˆ uˇ leꞈ-euˬ Suˇliˆ tsawˇ haˬ-aˬ, aˬ yawꞈ-ahˇ ciˬ daˬ leˇ-eu maˬ jawˇ-eu miˇ neh, kʼaˇ jahˇ mawꞈ-eu jahˇ tehꞈ-a. Sahˬpaˬ Miˬyehˇ neh saˇ jaˇ biꞈ taˬ-eu miˇ kʼahˬ-ahˇ aˬ yawꞈ yawꞈ-awˇ, aˬ yawꞈ-eu baoˬ uˬ moˆ maˬ luˆ maˬ laˆ nya ni zuiˆ gʼaˬ tehꞈ-a.

¹⁷ “Suˇliˆ sahˬ paˬ-aˬ, aˬ yawꞈ-euˬ guiˇ maꞈ dawˬ tawˆ luꞈ zmˬ-awˇ, guiˇ yaw kawˇ-ehˇ deuˆ gʼaˬ nya ni lehˬ hmˬ tehꞈ-a. Kʼoeˇ naˇ, aˬ yawꞈ-ahˇ muiˇ-eu gʼaˬ-euˬ miˇ kʼahˬ-ahˇ laˆ cawˆ-eu gʼaˇ duˬ, saˇ jaˇ dzaˬ taꞈ-eu laꞈ kʼoeˇ, aˬ yawꞈ-euˬ aˬ buˇ bi mˇ dzaˬ-iˇ-eu lehˇ aˇ kawˆ kawˆ tehꞈ-a. Ehˇ kʼawꞈ, aˬ yawꞈ neh noeˬ-euˬ loꞈ-ehˇ maˬ mˇ pyeuꞈ nya-aˇ.

¹⁸ Kʼoeˇ naˇ, iˬ ma laˆ shaˆ paw neh aˬ cawˬ miˇ kʼahˬ-ahˇ aˬ yawꞈ guiˇ deuˆ-awˇ, gʼawˬ mya kʼahˬ-ahˇ deuˆ gʼaˬ tehꞈ-a. Ehˇ kʼawꞈ, aˬ cawˬ tsawˇ jeuˬ-euˬ aˬ yuiꞈ aˬ tsu tiˬ gʼaˬ aˬ yawꞈ-ahˇ guiˇ deuˆ gʼaˬ-awˇ, aˬ yawꞈ neh aˬ dzawˬ aˇ gah gah-euˬ jeˬ aˇ saˬ bi saˬ tehꞈ-a. Aˬ diˇ aˬ maˇ Suˇliˆ sahˬ paˬ neh mˇ-euˬ yaw doeˇ jeˬ, Suˇliˆ sahˬ paˬ kʼoeˇ taˆ paˇ keuˆ le ni aˬ yawꞈ jahˇ kʼoꞈ nehˬ tehꞈ-a.

¹⁹ Suˇliˆ sahˬ paˬ-aˬ, aˬ yawꞈ-euˬ miˇ kʼahˬ-ahˇ jaˆ-eu aˬ yawꞈ-euˬ taˆ-ahˇ paˇ gʼoꞈ kʼoꞈ leˇ tehꞈ-a. Ehˇ kʼawꞈ, aˬ cawˬ aˬ yawꞈ-ahˇ guiˇ deuˆ gʼaˬ-awˇ, aˬ yawꞈ gʼaˇ duˬ aˇ saˬ saˬ-eu jeˬ keuˆ le tehꞈ-a.

²⁰ “Aˬ yawꞈ-euˬ dah zaˇ sahˬ paˬ tiˬ gʼaˬ paˇ daˆ laˇ tehꞈ-a. Aˬ yawꞈ-euˬ miˇ kʼahˬ smˇ muiˬ muiˬ laˇ ni, aˬ yawꞈ-euˬ gaˇ mˇ-eu yaw huiˬ yaw mahˇ tiˬ gʼaˬ pyehˬ gʼeh-awˇ, miˇ kʼahˬ zaˬ deuˬ-ahˇ kawˬ yaw kʼaˆ-ehˇ bi taꞈ tehꞈ-a. Gʼawˬ myahˇ maˬ gʼeh-ehˇ sahˬ paˬ kʼoeˇ gʼaˬ bi sehꞈ tehꞈ-a. Ehˇ kʼawꞈ, guiˇ deuˆ gaˇ hawˇ-eu, tsawˇ haˬ mawˇ gaˇ bi sehꞈ-euˬ maˬ ngeuˇ-aˇ.”

Haiˬ-eu Suˇliˆ sahˬ paˬ

²¹ Mˬ taˆ gʼaˬ kʼehˇ kʼoeˇ gʼaˬ heu loꞈ-ehˇ paˇ ja mehˬ nehˬ laꞈ-euˬ meh. “Mehˬ hu paw daˆ laˇ-eu Suˇliˆ sahˬ paˬ-aˬ, haiˬ dui dui-awˇ, sahˬ paˬ geuꞈ geuˇ-eu tsawˇ haˬ maˬ ngeuˇ-a. Ehˇ kʼawꞈ, tiˬ gʼaˬ-iˬ maˬ noeˬ maˬ duˇ-euˬ gaˇ, tsawˇ gahˇ gahˇ-awˇ sahˬ paˬ geuꞈ-euˬ meh.

²² Aˬ yawꞈ-euˬ ehˇ dawˬ maˬ geuꞈ-eu tsawˇ haˬ aˬ geu gʼaˬ maˬ kaˬ, Miˬyehˇ-euˬ Piˇ ma Yaw huiˬ gʼaˬ-ahˇ keuˆ ni, tiˬ gʼaˬ-iˬ maˬ bi dzeuˇ-iˇ ni laˆ byoˆ nehˬ tehꞈ-a.

²³ Miˇ kʼahˬ yaw nyiˇ tiˬ kʼahˬ-ahˇ aˬ yawꞈ uˆ lahˇ-eu tehꞈ kʼawꞈ, miˇ kʼahˬ nui deuˬ nehˬ-ehˇ tsawˇ gahˇ gahˇ-awˇ saˇ jaˇ dzaˬ taꞈ-eu laꞈ kʼoeˇ, tiˬ jawˇ saˇ-i tiˬ jawˇ aˬ yawꞈ gʼaˬ kʼaˆ dzehˬ laˇ tehꞈ-a.

²⁴ Smˇ muiˬ muiˬ-eu miˇ kʼahˬ deuˬ maˬ noeˬ maˬ duˇ-ehˇ jawˇ luꞈ gaˇ aˬ yawꞈ guiˇ deuˆ-awˇ, aˬ yawꞈ-euˬ aˬ poeˬ aˬ bawˇ deuˬ tiˬ jawˇ-iˬ maˬ mˇ haw-euˬ jeˬ aˬ yawꞈ mˇ tehꞈ-a. Kʼoeˇ naˇ, guiˇ deuˆ za-euˬ pyuˇ shuiˇ myawˬ gahˬ deuˬ-ahˇ, aˬ yawꞈ mehˬ nah caw teh-eu tsawˇ haˬ deuˬ nehˬ-ehˇ tiˬ kawˆ loꞈ-ehˇ biˇ geuꞈ tehꞈ-a. Aˬ cawˬ taˆ tsoˆ gaˇ guiˇ deuˆ-iˇ-eu gʼaˇ duˬ aˬ yawꞈ aˇ kawˆ kawˆ-awˇ lehˬ hmˬ tehꞈ-a. Ehˇ kʼawꞈ, aˬ yawꞈ-euˬ aˇ nah aˇ yamˬ jiˇ le tehˇ tehˬ tehꞈ-a.

²⁵ “Aˬ yawꞈ Iˇjiˇtuˆ sahˬ paˬ-ahˇ guiˇ deuˆ-eu gʼaˇ duˬ guiˇ maꞈ maꞈ ma lehˬ hmˬ-awˇ, Iˇjiˇtuˆ sahˬ paˬ kʼawꞈ aˬ yawꞈ-ahˇ guiˇ deuˆ-eu gʼaˇ duˬ, kʼoeˇ myaˆ maˬ tseˇ myaˬ-eu guiˇ maꞈ maꞈ ma lehˬ hmˬ tehꞈ-a. Ehˇ kʼawꞈ, tsawˇ gahˇ bi gahˇ gʼaˬ-euˬ baˬ da neh Iˇjiˇtuˆ sahˬ paˬ guiˇ maˬ deuˆ gʼaˬ nya-a.

²⁶ Aˬ yawꞈ-euˬ dawˬ peh jawˇ-awˇ aˬ yawꞈ-ahˇ nui noeˬ nui duˇ biꞈ-eu tsawˇ haˬ deuˬ aˬ yawꞈ cawˆ-iˇ ni mˇ-awˇ, aˬ yawꞈ-euˬ yehˇ gʼawˬ mya ni bi deuˆ sehꞈ-awˇ, aˬ yawꞈ-euˬ guiˇ maꞈ byoˆ-iˇ tehꞈ-a.

²⁷ Kʼoeˇ naˇ, sahˬ paˬ kʼoeˇ nyiˬ gʼaˬ hawˬ jeh tiˬ jeh -ahˇ tehꞈ-ehˇ dzaˬ taꞈ tehꞈ-a. Ehˇ kʼawꞈ, aˬ yawꞈ nyaꞈ nui ma laꞈ gʼoꞈ baw-awˇ, tiˬ gʼaˬ tiˇ gʼaˬ jaˬ myawꞈ myawꞈ tehꞈ-a. Aˇ yamˬ maˬ keuˆ laˇ-euˬ miˇ neh, aˬ yawꞈ nyaꞈ neh noeˬ taˬ-euˬ jeˬ maˬ mˇ pyeuꞈ nya-a.

²⁸ Suˇliˆ sahˬ paˬ-aˬ, aˬ yawꞈ neh guiˇ kʼaˇ deuˆ za-euˬ myawˬ gahˬ deuˬ yuˇ-awˇ gʼoꞈ daˆ leˇ tehꞈ-a. Miˬyehˇ-euˬ tsawˇ haˬ deuˬ-euˬ uˬ duˬ tahˬ-eu zahˇ sahˇ kʼoꞈ-ahˇ laˆ cawˆ ma lehˇ, aˬ yawꞈ-euˬ nui ma laꞈ kʼoeˇ noeˬ tsehˆ tehꞈ-a. Aˬ yawꞈ kʼaˇ jahˇ mawꞈ-eu jeˬ jahˇ yaꞈ-awˇ, aˬ yawꞈ-euˬ miˇ kʼahˬ-ahˇ gʼoꞈ daˆ leˇ tehꞈ-a.

²⁹ “Aˇ yamˬ tsaˬ laˇ ngeh, Iˇjiˇtuˆ miˇ kʼahˬ-ahˇ aˬ yawꞈ guiˇ tiˬ poˆ paˇ deuˆ-iˇ tehꞈ-a. Ehˇ kʼawꞈ, kʼoeˇ ngeh poˆ guiˇ deuˆ-eu-aˬ, yaw beh poˆ-ahˇ maˬ duˇ ni, yawˬ jeˬ yawˬ-ehˇ pyeuꞈ-iˇ tehꞈ-a.

³⁰ Loˇmaˆ tsawˇ haˬ deuˬ saˇ baoˬ dziˬ-awˇ oe-awˇ, aˬ yawꞈ-ahˇ ciˬ daˬ le-eu miˇ neh, aˬ yawꞈ guˆ dui dui-iˇ tehꞈ-a. “Kʼoeˇ naˇ, aˬ yawꞈ nui ma pehˇ dui dui-eu laꞈ kʼoeˇ jeˬ nah paw gʼoꞈ kʼoꞈ laˇ-awˇ, Miˬyehˇ-euˬ tsawˇ haˬ deuˬ-euˬ uˬ duˬ tahˬ-eu zahˇ sahˇ kʼoꞈ-ahˇ laˆ cawˆ-eu lehˇ leh jeh tehꞈ-a. Uˬ duˬ tahˬ-eu zahˇ sahˇ kʼoꞈ kʼoeˇ hmˬ-ahˇ byehˇ dzeh-euˬ tsawˇ haˬ deuˬ-ahˇ aˬ yawꞈ gʼaˬ baꞈ baꞈ tehꞈ-a.

³¹ Aˬ yawꞈ-euˬ yehˇ tiˬ paˆ na deuˬ, Uˬ duˬ tahˬ nymˇ nymˇ ma-ahˇ laˆ jawꞈ tehꞈ-a. Yawˬ nah na luꞈ lawˇ-eu shehˇ-eu jeˬ maˬ bi mˇ ni, aˬ yawꞈ maꞈ laˆ tsoeˬ-awˇ, doeˇ dui dui-eu nui daˆ daˆ laˇ paˬ-ehˇ gʼeh-eu jeˬ kʼoeˇ gaˇ bi jaˆ tehꞈ-a.

³² Miˬyehˇ-ahˇ uˬ duˬ tahˬ-eu zahˇ sahˇ kʼoꞈ-ahˇ byehˇ dzeh-euˬ tsawˇ haˬ deuˬ-ahˇ aˬ yawꞈ mehˇ shuiˇ shuiˇ gʼaˬ nya kʼawꞈ, Miˬyehˇ-ahˇ maˬ byehˇ dzeh-eu tsawˇ haˬ deuˬ aˬ yawꞈ-ahˇ ziꞈ dah ni ciˬ daˬ tehꞈ-a.

³³ Zaˬ siˬ tsawˇ gahˇ byah-eu aˬ yuiꞈ aˬ tsu deuˬ-aˬ, aˬ yawꞈ maꞈ-euˬ tsawˇ haˬ gʼawˬ mya ni-ahˇ mehˬ nehˬ tsoˆ nehˬ tehꞈ-a. Ehˇ kʼawꞈ, aˇ yamˬ tiˬ kʼehˬ laꞈ kʼoeˇ aˬ yawꞈ maꞈ tiˬ paˆ na deuˬ guiˇ deuˆ gaˇ bi deuˆ sehꞈ-awˇ, tiˬ paˆ na deuˬ-ahˇ miˬ dzaˬ bi keuˬ sehꞈ tehꞈ-a. Tiˬ paˆ na deuˬ-aˬ, tahˇ joe bi joe-awˇ, bi nyehꞈ tehꞈ-a.

³⁴ Kʼoeˇ loꞈ-ehˇ tsawˇ haˬ sehꞈ luꞈ-eu aˇ yamˬ laꞈ kʼoeˇ, Miˬyehˇ-euˬ tsawˇ haˬ deuˬ-aˬ, ui cuiˆ na ngehˬ gʼeh dah teˬ nehˬ-eu jeˬ-ahˇ za tehꞈ-a. Tsawˇ haˬ gʼawˬ mya ni yawˬ ha-ahˇ muiˬ laˇ gaˇ haw-awˇ, Miˬyehˇ-euˬ tsawˇ haˬ deuˬ jawˇ paw pyawˬ tehꞈ-a.

³⁵ Zaˬ siˬ tsawˇ gahˇ byah-eu aˬ yuiꞈ aˬ tsu tiˬ paˆ na deuˬ bi sehꞈ tehꞈ-a. Ehˇ kʼawꞈ kʼoeˇ loꞈ-ehˇ bi sehꞈ-euˬ baˬ da neh, tsawˇ haˬ zaˬ deuˬ muiˬ laˇ shawˇ laˇ tehꞈ-a. Miˬyehˇ neh lehˬ hmˬ taˬ-euˬ aˇ saˬ saˬ-eu aˇ yamˬ keuˆ laˇ ngeh keuˆ ni, kʼoeˇ loꞈ-ehˇ pyeuꞈ pyeuꞈ-ehˇ jaˆ tehꞈ-a.

³⁶ “Suˇliˆ sahˬ paˬ-aˬ, yawˬ ha-ahˇ kʼaˇ loˆ laˇ-euˬ jeˬ mˇ tehꞈ-a. Miˬyehˇ dawˬ tawˆ luꞈ naˆ maˬ tseˇ aˬ yawꞈ huiˬ-awˇ, Dawˬ tawˆ kʼoeˇ taˆ huiˬ-eu Miˬyehˇ naˆ maˬ tseˇ aˬ yawꞈ huiˬ dzehˬ ma lehˇ, yawˬ haˇ yawˬ ha kʼahˬ sehˇ jehˆ tehꞈ-a. Miˬyehˇ aˬ yawꞈ-ahˇ kʼehˬ nehˬ-eu aˇ yamˬ maˬ keuˆ laˇ kʼoeˇ keuˆ ni, aˬ yawꞈ kʼoeˇ loꞈ-ehˇ jahˇ nya tehꞈ-a. Miˬyehˇ-aˬ, aˬ yawꞈ neh kʼaˇ noeˬ taˬ-euˬ loꞈ-ehˇ maˇ maˇ ni mˇ tehꞈ-a.

³⁷ Aˬ yawꞈ-euˬ aˬ poeˬ aˬ bawˇ deuˬ uˬ duˬ tahˬ-euˬ miˬ yehˇ hawˇ-eu zaˬ miˬ zaˬ deuˬ gaˬ-eu miˬ yehˇ-ahˇ, aˬ yawꞈ myaˆ maˬ haw cawˬ ni jawˇ tehꞈ-a. Miˬyehˇ dawˬ tawˆ luꞈ naˆ maˬ tseˇ aˬ yawꞈ huiˬ dzehˬ ma lehˇ noeˬ-awˇ, miˬ yehˇ-ahˇ miˬ yehˇ lehˇ maˬ sawˇ ni dehꞈ tehꞈ-a.

³⁸ Ehˇ kʼawꞈ, ziꞈ dah ni gʼeh-eu taˆ deuˬ-ahˇ haw piˇ-eu miˬ yehˇ-ahˇ aˬ yawꞈ yaw zeu baw tehꞈ-a. Aˬ yawꞈ-euˬ aˬ poeˬ aˬ bawˇ deuˬ tiˬ jawˇ-iˬ uˬ duˬ maˬ tahˬ haw-euˬ miˬ yehˇ-ahˇ, shuiˇ, pyuˇ, aˇ poeˬ kʼaˆ-eu kʼaˬ lo sehˇ hawˇ-eu, muiˬ dui dui-eu aˇ poeˬ kʼaˆ-eu laꞈ sawˬ deuˬ aˬ yawꞈ damˬ nehˬ tehꞈ-a.

³⁹ Aˬ yawꞈ-euˬ taˆ-ahˇ bi loꞈ piˇ-eu gʼaˇ duˬ, aˬ cawˬ tsawˇ jeuˬ-euˬ miˬ yehˇ-ahˇ uˬ duˬ tahˬ-eu tsawˇ haˬ deuˬ-ahˇ aˬ yawꞈ gʼoe tehꞈ-a. Aˬ yawꞈ-ahˇ sahˬ paˬ meh lehˇ kʼaˇ noeˬ-eu tsawˇ haˬ deuˬ-ahˇ aˬ yawꞈ taˬ huiˬ nehˬ-awˇ, huiˬ-eu gaˇ deuˬ bi mˇ-awˇ, miˇ tsaˬ pehˇ tsahˇ laꞈ sawˬ biꞈ nehˬ tehꞈ-a.

⁴⁰ “Suˇliˆ sahˬ paˬ-euˬ aˇ yamˬ jiˇ le-eu dawˬ peh peh laˇ ngeh, Iˇjiˇtuˆ sahˬ paˬ aˬ yawꞈ-ahˇ guiˇ deuˆ laˇ tehꞈ-a. Suˇliˆ sahˬ paˬ gʼeh gʼaˬ kʼaˇ jaˆ-eu yuˇ doˆ-awˇ, mahˬ laˆ lawˬ deuˬ, mahˬ deuˬ, saˇ baoˬ deuˬ zmˬ-awˇ guiˇ deuˆ tehꞈ-a. Iˇ jeuˬ jeuˬ-eu loꞈ-ehˇ, miˇ kʼahˬ gʼawˬ mya kʼahˬ-ahˇ aˬ yawꞈ guiˇ deuˆ uˇ gʼeh tehꞈ-a.

⁴¹ Miˬyehˇ neh Saˇ jaˇ dzaˬ taˬ-euˬ Miˇ kʼahˬ-ahˇ kʼawꞈ, aˬ yawꞈ uˇ-iˇ-awˇ, tsawˇ haˬ aˇ heˇ aˇ muiˇ gʼaˬ-ahˇ sehꞈ tehꞈ-a. Ehˇ kʼawꞈ, Eˬdoˬ miˇ kʼahˬ, Mawˇbaˆ miˇ kʼahˬ hawˇ-eu, Aˬmoˬ miˇ kʼahˬ tiˬ paˆ dzehˬ ni dzeuˇ-iˇ tehꞈ-a.

⁴² Miˇ kʼahˬ kʼoeˇ deuˬ dawˬ tawˆ luꞈ-ahˇ aˬ yawꞈ guiˇ deuˆ uˇ gʼeh ngeh, Iˇjiˇtuˆ miˇ kʼahˬ-ahˇ kʼawꞈ uˇ-iˇ tehꞈ-a.

⁴³ Iˇjiˇtuˆ tsawˇ haˬ deuˬ neh jeˬ hmˬ taˬ-euˬ shuiˇ deuˬ, pyuˇ deuˬ hawˇ-eu, aˇ poeˬ kʼaˆ-eu pyuˇ shuiˇ myawˬ gahˬ deuˬ aˬ yawꞈ deuˆ za geuꞈ tehꞈ-a. Liˆbyaˇ miˇ kʼahˬ hawˇ-eu Suˬdaˬ miˇ kʼahˬ-ahˇ kʼawꞈ, aˬ yawꞈ deuˆ gʼaˬ tehꞈ-a.

⁴⁴ Kʼoeˇ naˇ, nahˇ ma doˆ kʼehˬ paw hawˇ-eu laꞈ taˆ paw pyawˬ-ahˇ neh gaˬ le-euˬ dawˬ deuˬ-ahˇ aˬ yawꞈ tsawˬ guˆ-iˇ-awˇ, guˆ kʼaˬ kʼaˬ-eu laꞈ kʼoeˇ guiˇ deuˆ dui paˇ dui-awˇ, tsawˇ haˬ gʼawˬ mya ni sehꞈ tehꞈ-a.

⁴⁵ Iˬ ma laˆ shaˆ hawˇ-eu Uˬ duˬ tahˬ nymˇ nymˇ ma tsoˆ taˬ-euˬ gawˬ jawˬ yaw kaˬ-ahˇ, sahˬ paˬ-euˬ sehˬ gʼawˆ gʼawˆ ma deuˬ aˬ yawꞈ gʼawˆ tehꞈ-a. Ehˇ kʼawꞈ, aˬ yawꞈ-ahˇ ngehˬ gʼeh nehˬ-eu gʼaˬ maˬ jawˇ-ehˇ pyeuꞈ-iˇ-awˇ, ya shiˇ tehꞈ-a.”