Dawˬ tsoˆ 8 - Akha

¹ Zaˬ siˬ tsawˇ gahˇ ahˇ-eu tsawˇ haˬ-ahˇ duˇ-eu aˬ suˇ gʼaˬ jawˇ ta. Aˬ yawꞈ loꞈ-ehˇ dawˬ tsuiꞈ beuˬ doˆ mehˬ nya-eu aˬ suˇ gʼaˬ jawˇ ta. Zaˬ siˬ tsawˇ gahˇ-aˬ, tsawˇ haˬ zaˬ-euˬ myaˆ pyawˬ-ahˇ shiˬ keuˇ ni bi jaˆ-awˇ, nahˬ jawˆ ni bi pyeuꞈ laˇ-eu meh.

Sahˬpaˬ-euˬ dawˬ naˇ haˬ-awˬ

² Sahˬ paˬ-euˬ ehˇ dawˬ naˇ haˬ-awˬ. Maˬ shaˇ noeˬ ni Miˬyehˇ-ahˇ saˇ jaˇ dzaˬ-eu taˬ tehˬ.

³ Sahˬ paˬ-aˬ, yawˬ ha-ahˇ kʼaˇ loˆ laˇ-euˬ jeˬ mˇ nya-eu miˇ neh, aˬ yawꞈ dawˬ peh taˬ jawˇ. Kʼoeˇ loꞈ-ehˇ gʼeh-eu guˆ kʼaˇ za-eu jawˇ duˬ-ahˇ yahˇ pawˇ-awˬ.

⁴ Sahˬ paˬ-aˬ, baoˬ-ahˇ gʼoe-awˇ gaˇ mˇ-eu miˇ neh, tiˬ gʼaˬ-iˬ maˬ teh ngehˬ leˇ nya-a.

⁵ Aˬ yawꞈ-euˬ dawˬ-ahˇ kʼaˇ naˇ haˬ kʼoeˇ keuˆ ni, yaw dehꞈ dehꞈ-eu kʼahˬ lahˇ kʼaˇ maˬ za-a. Zaˬ siˬ tsawˇ gahˇ ahˇ-eu deuˬ, aˬ yawꞈ nui ma tsaˬ ni aˬ joˆ-ehˇ ya dehꞈ ya jawˇ-eu aˇ tsuiꞈ aˇ law siˬ nya-eu meh.

⁶ Aˬ yawꞈ jeˬ yawꞈ mˇ-eu gʼaˇ duˬ yamˬ law baw-eu meh. Aˬ dui maˬ siˬ nya-eu miˇ neh ya shaˬ luꞈ-eu tehꞈ meh.

⁷ Mehˬ hu paw pyeuꞈ laˇ-eu gaˇ kawˆ tiˬ gʼaˬ-iˬ maˬ siˬ nya-ehˇ, ehˇ mehˬ nehˬ laꞈ-eu gʼaˬ maˬ jawˇ-a.

⁸ Tsawˇ haˬ tiˬ gʼaˬ-iˬ ziˇ lahˬ maˬ ka nya-ehˇ, shiˇ nah maˬ shiˆ byoˆ nya-a. Kʼoeˇ-aˬ, aˬ dui maˬ dzeuˇ-iˇ nya ni ya deuˆ-eu guiˇ meh. Mehˇ shuiˇ maˬ shuiˇ dzeuˇ nya-a.

Tsawˇ doeˇ hawˇ-eu tsawˇ muiˬ

⁹ Tsawˇ haˬ zaˬ tiˬ gʼaˬ tiˇ gʼaˬ nawˬ dzaˬ kʼaˆ dzaˬ luꞈ-eu nahˇ ma heu siˬ uˬ moˆ, kʼaˇ pyeuꞈ luꞈ-eu gaˇ kawˆ deuˬ-ahˇ ngaˇ shaˇ sawˇ haw ngeh, heu deuˬ dawˬ tawˆ luꞈ-ahˇ ngaˇ ya mawˇ-euˬ ma.

¹⁰ Haiˬ-eu tsawˇ haˬ deuˬ-ahˇ baꞈ pahˬ gʼaˬ-awˇ gʼoꞈ leˇ ngeh, aˬ yawꞈ maꞈ neh yaw haiˬ jeˬ mˇ yaꞈ-euˬ meuˬ deuˬ laꞈ kʼoeˇ, aˬ yawꞈ maꞈ-ahˇ aˬ cawˬ ja ceuˬ-eu ngaˇ mawˇ haw-euˬ ma. Kʼoeˇ-aˬ, tiˬ jeˬ-iˬ gaˇ dahˇ maˬ tsoeˬ-a.

¹¹ Aˬ jeˬ miˇ neh tsawˇ haˬ zaˬ yaw haiˬ jeˬ tiˬ kʼehˬ maˬ taˬ ni mˇ ta. Aˬ jeˬ miˇ neh ehˇ naˇ, mˇ bahˬ-euˬ deuˬ-ahˇ yaw kawˇ-ehˇ maˬ kʼehˬ nehˬ-eu miˇ neh meh.

¹² Iˬ baˇ mˇ-eu tsawˇ haˬ tiˬ gʼaˬ aˇ yaˇ poˆ mˇ bahˬ kʼawꞈ, ziˇ baw-eu meh. Aˬ cawˬ heu loꞈ-ehˇ ehˇ-eu ngaˇ gaˬ haw-euˬ ma. “Miˬyehˇ-euˬ ehˇ dawˬ naˇ haˬ-eu tsawˇ haˬ dehꞈ dzaˬ laˇ tehꞈ-a.

¹³ Ehˇ kʼawꞈ, haiˬ-eu tsawˇ haˬ deuˬ ya shaˬ ya zahˬ tehꞈ-a. Aˬ yawꞈ maꞈ Miˬyehˇ ehˇ dawˬ maˬ naˇ haˬ-eu miˇ neh, dehꞈ ziˇ maˬ shehˇ-ehˇ, naˇ shmˇ shmˇ-eu loꞈ-ehˇ tiˬ kʼehˇ laˇ kʼehˬ laꞈ kʼoeˇ byoˆ-iˇ tehꞈ-a.”

¹⁴ Ehˇ kʼawꞈ, kʼoeˇ loꞈ-ehˇ ehˇ-eu tiˬ jeˬ-iˬ gaˇ dahˇ maˬ tsoeˬ-a. Miˇ tsaˬ kʼoeˇ taˆ pyeuꞈ luꞈ gaˇ haw sheˇ. Tiˬ poˆ na, yaw haiˬ deuˬ iˬ baˇ mˇ-eu baˬ da neh, yaw tsaˬ yaw dawˇ tsawˇ haˬ deuˬ kʼehˬ-eu kʼaˆ-eu jeˬ-ahˇ ya daˬ-awˇ, yaw tsaˬ yaw dawˇ deuˬ neh mˇ-euˬ muiˬ-eu gaˇ aˇ poeˬ, haiˬ-eu tsawˇ haˬ deuˬ guiˬ lahˬ za-eu meh. Kʼoeˇ kʼawꞈ, tiˬ jeˬ-iˬ gaˇ dahˇ maˬ tsoeˬ-a lehˇ ngaˇ ehˇ-eu ma.

¹⁵ Kʼoeˇ miˇ neh, tsawˇ haˬ zaˬ byawˬ gʼa mo gʼa-eu jeˬ mˇ-eu tsaˬ meh lehˇ ngaˇ noeˬ duˬ taˬ-euˬ ma. Aˬ jeˬ miˇ neh ehˇ naˇ, miˇ tsaˬ heu kʼoeˇ taˆ dehꞈ ngeh aˬ yawꞈ gʼaˇ duˬ nui kʼahˇ shiˇ kʼaˇ za-eu-aˬ, dzaˬ byawˬ dawˇ byawˬ byawˬ-awˇ, byawˬ-eu mo-eu jeˬ mˇ-eu heu tehꞈ meh. Miˬyehˇ neh nahˇ ma heu siˬ uˬ moˆ aˬ yawꞈ-ahˇ bi dehꞈ-euˬ aˇ yamˬ laꞈ kʼoeˇ aˬ yawꞈ mˇ dzaˬ kʼawꞈ dawˇ luꞈ ngeh, aˬ yawꞈ kʼoeˇ loꞈ-ehˇ byawˬ gʼa mo gʼa nya-eu meh.

¹⁶ Ngaˇ zaˬ siˬ tsawˇ gahˇ ahˇ laˇ ni kʼaˇ leh jeh ngeh, miˇ tsaˬ heu kʼoeˇ taˆ kʼaˇ pyeuꞈ luꞈ-eu jeˬ-ahˇ ngaˇ shaˇ sawˇ haw luꞈ ngeh, ngaˇ heu loꞈ-ehˇ pyehˆ tseˇ duˬ-euˬ ma. Uˬ ciꞈ nah gʼahˇ maˬ ehˇ ni, nawˇ maˬ yuꞈ-ehˇ haw tsoˆ taˬ kʼawꞈ,

¹⁷ Miˬyehˇ mˇ luꞈ-eu gaˇ-ahˇ nawˇ maˬ haw siˬ nya-aˇ. Nawˇ aˇ naˆ ni leh jeh-awˇ poˆ tseˇ haw kʼawꞈ, maˬ poˆ tseˇ duˬ nya-aˇ. Zaˬ siˬ tsawˇ gahˇ ahˇ-eu tsawˇ haˬ deuˬ yawˬ haˇ yawˬ ha aˇ naˆ ni nya ma lehˇ noeˬ kʼawꞈ, Miˬyehˇ neh mˇ-euˬ gaˇ-ahˇ maˬ siˬ duˬ nya-a.