Dawˬ tsoˆ 7 - Akha

Yaw dehꞈ dehꞈ-eu shaˇ noeˬ paˬ-ehˇ gʼeh-eu

¹ Tsawˇ myahˇ muiˬ-eu jeˬ-aˬ, poeˬ-eu tsiˇ yaw saw naˆ maˬ tseˇ, aˇ poeˬ kʼaˆ dzehˬ-eu meh. Dehꞈ le-euˬ nah maˬ tseˇ, shiˇ nah poeˬ dzehˬ-eu meh.

² Dzaˬbyawˇ lawˇ-eu nymˇ naˆ maˬ tseˇ, tsawˇ ngoeˇ nymˇ-ahˇ iˇ-eu muiˬ meh. Shiˇ nah yawˬ gʼaˬ na-ahˇ loꞈ gaˇ, dehꞈ ngeh siˬ duˬ taˬ-eu tsaˬ meh.

³ Laˬ kʼaˬ cehˇ-awˇ uiˇ-eu maˬ tseˇ, noeˬ shaˬ-eu jeˬ poeˬ dzehˬ-eu meh. Noeˬshaˬ-eu jeˬ myaˆpyawˬ nyoeˬkʼawꞈ, nui ma bi gahˇ dzehˬ laˇ-eu meh.

⁴ Zaˬ siˬ tsawˇ gahˇ ahˇ-eu nui ma , tsawˇngoeˇngoeˇ-eu nymˇ-ahˇ jaˆ-awˇ, aˬ dzawˬ aˇ gah deuˬ-euˬ nui ma , byawˬ gʼa-eu nymˇ-ahˇ jaˆ-eu meh.

⁵ Aˬ dzawˬ caˇ gaˇ naˇ-eu maˬ tseˇ, zaˬ siˬ dehˬ gaˇ naˇ-eu tsaˬ meh.

⁶ Aˬ dzawˬ aˇ gah uiˇ-eu teˇ saˇ, guiˬ ba uˬ moˆ tsawˬ bu laꞈ kʼoeˇ , toeˆ toeˆ taˆ taˆ-ehˇ mahˇ luꞈ-eu, aˬ gah puiˆ dzaˬ-eu teˇ saˇ meh.

⁷ Zaˬ siˬ tsawˇ gahˇ ahˇ-eu tsawˇ haˬ, aˬ cawˬ-ahˇ nawˬ dzaˬ-eu kʼoeˇ-aˬ, aˬ dzawˬ aˇ gah-euˬ lawˇ behˇ-ahˇ, yawˬ ha shaˇ baꞈ gaˇ duˇ-eu meh. Laꞈ nmꞈ nmꞈ-eu jeˬ mˇ-eu-aˬ, tsawˇ haˬ zaˬ-ahˇ laˆ cawˆ-eu meh.

⁸ Aˇ dahˬ beh-eu jeˬ naˆ maˬ tseˇ, aˇ saˬ saˬ-eu jeˬ muiˬ dzehˬ-awˇ, nui ma huiˬ-eu jeˬ naˆ maˬ tseˇ, oˇ oꞈ-eu jeˬ muiˬ dzehˬ-eu meh.

⁹ Nui ma pehˇ-eu taˬ tehˬ. Nui pehˇ-euˬ jawˇ duˬ-aˬ, aˬ dzawˬ aˇ gah-euˬ bawˇ kʼahˇ meh.

¹⁰ “Aˬ jeˬ miˇ neh aˇ hu aˇ yamˬ, iˬ nah maˬ tseˇ maˬ gaˇ ta” lehˇ, gaˇ dahˇ maˬ tsoeˬ-eu dawˬ taˬ ngehˬ. Kʼoeˇ loꞈ-ehˇ ehˇ-eu dawˬ kʼoeˇ-aˬ, tsawˇ gahˇ ahˇ-eu dawˬ maˬ ngeuˇ-a.

¹¹ Zaˬ siˬ tsawˇ gahˇ poeˬ kʼaˆ jeˬ biˇ, nahˇ ma kʼaˇ mawˇ-eu tsawˇ haˬ-ahˇ, muiˬ-eu guiˬ lahˬ biꞈ nehˬ-eu meh.

¹² Zaˬ siˬ tsawˇ gahˇ pyuˇ-ahˇ duˇ-awˇ, aˬ dui-ahˇ haw piˇ nya-eu meh. Zaˬ siˬ tsawˇ gahˇ-euˬ saꞈ laˇ-ahˇ, zaˬ siˬ tsawˇ gahˇ haw piˇ-eu meh.

¹³ Miˬyehˇ neh mˇ-euˬ shaˇ noeˬ sheˇ. Aˬ yawꞈ neh beh ngoꞈ taˬ-euˬ jeˬ, ngawˬ dawˇ nya-eu aˬ suˇ jawˇ ta.

¹⁴ Guiˬ lahˬ baw ngeh laˬ kʼaˬ cehˇ-awˇ, guiˬ lahˬ doeˇ ngeh yehˬ cehˬ cehˬ-awˬ. Nyiˬ jeˬ luꞈ Miˬyehˇ beh-euˬ meh. Ni shawˬ gaˇ kawˆ siˬ duˬ nya-eu, tsawˇ haˬ tiˬ gʼaˬ-iˬ maˬ jawˇ-a.

¹⁵ Ngaˇ yaw dehꞈ dehꞈ-eu tiˬ jeˬ-iˬ gaˇ dahˇ maˬ tsoeˬ kʼawꞈ, yawˬ jeˬ na luꞈ ya mawˇ kuꞈ haw-euˬ ma. Dawˇ coe ni dehꞈ-eu yaw tsaˬ yaw dawˇ tsawˇ haˬ ziˇ teˬ-eu mawˇ haw-awˇ, maˬ tsaˬ maˬ dawˇ-eu jeˬ mˇ-eu haiˬ-eu tsawˇ haˬ ziˇ baw-eu mawˇ haw-euˬ ma.

¹⁶ Yaw tsaˬ yaw dawˇ jeˬ aˇ dzehˬ maˬ mˇ dzeuˇ-ehˇ, zaˬ siˬ tsawˇ gahˇ aˇ dzehˬ maˬ bi dzeuˇ ni, yawˬ haˇ yawˬ ha maˬ laˆ cawˆ ni dehꞈ-awˬ.

¹⁷ Yaw haiˬ jeˬ aˇ dzehˬ maˬ mˇ dzeuˇ-ehˇ, aˬ dzawˬ yaw kʼaˆ-ehˇ maˬ dzawˬ ni, shiˇ yamˬ maˬ keuˆ gaˇ ziˇ maˬ ya jiˇ ni dehꞈ-awˬ.

¹⁸ Mehˆ lawˆ nyiˬ dzaˬ maˬ iˇ dzeuˇ ni yahˇ-awˬ. Miˬyehˇ-ahˇ guˆ-eu nui ma ahˇ naˇ, nawˬ neh noeˬ-euˬ jeˬ mˇ pyeuꞈ nya tehꞈ-a.

¹⁹ Meuˬdzoeˬsahˬpaˬ tseˇgʼaˬ maˬtseˇ, zaˬ siˬ tiˬ gʼaˬ baoˬ huiˬ-eu meh.

²⁰ Yaw lehˬ tiˬ pawꞈ-iˬ maˬ mˇ-ehˇ, yaw dawˇ tehꞈ-ehˇ mˇ-eu tsawˇ muiˬ, miˇ taˆ tiˬ gʼaˬ-iˬ maˬ jawˇ-a.

²¹ Aˬ cawˬ kʼaˇ ehˇ gaˇ naˇ haˬ naˇ, yawˬ ha zaˬ kʼaˆ-euˬ dawˬ doeˇ kʼawꞈ, yawˬ ha-ahˇ gaˬ keuˆ laˇ tehꞈ-a.

²² Yawˬ ha neh ngehˬ daˆ-euˬ dawˬ doeˇ, yawˬ haˇ yawˬ ha siˬ nya luꞈ meh.

²³ Gaˇ kawˆ heu deuˬ dawˬ tawˆ luꞈ-ahˇ, ngaˬ-euˬ tsawˇ gahˇ neh ngaˇ lawˬ haw-euˬ ma. Zaˬ siˬ tsawˇ gahˇ ahˇ-eu tsawˇ haˬ pyeuꞈ laˇ ni leh jeh kʼawꞈ, maˬ leh jeh keuˆ coeˇ nya.

²⁴ Zaˬ siˬ tsawˇ gahˇ-aˬ, gaˇ mahˇ kaˬ dui dui-awˇ, naꞈ dui dui-eu miˇ neh, aˬ suˇ gʼaˬ poˆ mawˇ nya nmˇ.

²⁵ Ehˇ kʼawꞈ, zaˬ siˬ tsawˇ gahˇ poˆ-awˇ dzaw geuꞈ-eu gʼaˇ duˬ, ngaˇ noeˬ tsehˆ taˬ-euˬ ma. Ngaˬ-euˬ nui ma laꞈ kʼoeˇ maˬ noeˬ shaw-euˬ jeˬ shaw laˇ jiˇ-awˇ, aˬ dzawˬ dzawˬ-awˇ aˇ gah gah-eu jeˬ aˇ naˆ ni doeˇ-eu gaˇ kawˆ ciˇ tahˬ teh li nya ni, zaˬ siˬ tsawˇ gahˇ poˆ ma lehˇ ngaˇ noeˬ duˬ taˬ-euˬ ma.

²⁶ Shiˇ-eu jeˬ naˆ maˬ tseˇ doeˇ dui dui-eu tiˬ jeˬ ngaˇ mawˇ taˬ-euˬ ma. Kʼoeˇ-aˬ, zaˬ miˬ zaˬ meh. Aˬ yawꞈ-euˬ nui gaˬ lahˇ ju kʼmˇ gaˇ duˇ-awˇ, nawˬ-ahˇ byaˇ cuꞈ-eu aˬ yawꞈ-euˬ aˬ laꞈ shmˇ caˆ paꞈ gaˇ duˇ-eu meh. Miˬyehˇ-euˬ nui kʼahˇ poˆ-eu tsawˇ haˬ cehˆ dzeuˇ nya kʼawꞈ, iˬ baˇ mˇ-eu deuˬ paꞈ leˇ-eu meh.

²⁷ Zaˬ siˬ tsawˇ gahˇ byah-eu mehˬ-eu tsoˆ-eu gʼaˬ ehˇ-eu, “Ngaˬ-euˬ nui ma laꞈ kʼoeˇ maˬ noeˬ shaw nya-eu jeˬ-ahˇ ngaˇ poˆ ngeh, tiˬ jawˇ saˇ-iˬ tiˬ jawˇ heu loꞈ-ehˇ poˆ mawˇ-euˬ ma.

²⁸ Ngaˇ maˬ siˬ nya-eu gaˇ kawˆ nui deuˬ poˆ duˬ-eu lehˇ leh jeh kʼawꞈ, maˬ poˆ mawˇ nya nya. Kʼaˬ dzeˇ zaˬ tiˬ heˇ gʼaˬ laꞈ kʼoeˇ yaw zeu baw nehˬ paˬ-ehˇ gʼeh-eu tiˬ gʼaˬ ahˇ-awˇ, zaˬ miˬ zaˬ laꞈ kʼoeˇ tiˬ gʼaˬ-iˬ maˬ ahˇ-a.

²⁹ Ngaˬ neh poˆ duˬ-euˬ gaˇ kawˆ uˬ dzah-aˬ, heu loꞈ-ehˇ ma. Miˬyehˇ neh aˬ dui-ahˇ beh taˬ-euˬ muiˬ dui jaˬ dui dui-eu meh. Ehˇ kʼawꞈ, aˬ dui yawˬ haˇ yawˬ ha dehꞈ bahˬ dehꞈ lahˇ-euˬ meh.”