Dawˬ tsoˆ 5 - Akha

Yaw awˇ laꞈ-ehˇ saˇ jaˇ taˬ dzaˬ

¹ Uˬ duˬ tahˬ nymˇ nymˇ ma-ahˇ le ngeh, kuiˇ toꞈ ciˬ-eu yahˇ-awˬ. Yaw muiˬ yaw doeˇ maˬ tseˇ paˆ nya-eu aˬ dzawˬ aˇ gah deuˬ jahˇ-eu loꞈ-ehˇ lawˇ-eu shehˇ-eu naˆ maˬ tseˇ, Uˬ duˬ tahˬ nymˇ nymˇ ma-ahˇ naˇ haˬ geuꞈ leˇ-eu muiˬ dzehˬ meh.

² Dawˬ maˬ ngehˬ mi naˆ-ehˇ yaw muiˬ paˬ-ehˇ shaˇ noeˬ-awˬ. Miˬyehˇ-ahˇ yaw awˇ laꞈ-ehˇ saˇ jaˇ taˬ dzaˬ. Aˬ yawꞈ mˬ kʼoeˇ taˆ jawˇ-awˇ, nawˇ miˇ tsaˬ kʼoeˇ taˆ jawˇ-eu miˇ neh, ngehˬ paˬ tmˇ paˬ-ehˇ gʼeh-eu taꞈ-ehˇ uˬ dzehˬ taˬ ngehˬ.

³ Nui noeˬ shaˬ-eu mehˬ nah maˬ muiˬ-eu yuꞈ maˆ caw-awˇ, dawˬ myaˬ-eu mehˬ nah yaw lehˬ caw-eu meh.

⁴ Kʼoeˇ miˇ neh, Miˬyehˇ-ahˇ nawˇ saˇ jaˇ dzaˬ gʼaˬ naˇ, yaw kawˇ-ehˇ mˇ byah-awˬ. Aˬ jeˬ miˇ neh ehˇ naˇ, aˬ dzawˬ aˇ gah-ahˇ aˬ yawꞈ nui ma maˬ tsaˬ-a. Nawˬ neh saˇ jaˇ kʼaˇ dzaˬ taˬ-euˬ loꞈ-ehˇ mˇ-awˬ.

⁵ Saˇ jaˇ dzaˬ-awˇ maˬ mˇ byah-eu naˆ maˬ tseˇ, saˇ jaˇ maˬ dzaˬ ni jawˇ-eu muiˬ dzehˬ meh.

⁶ Nawˇ dawˬ ngehˬ ngeh, maˬ ngehˬ maˬ tmˇ bahˬ ni yahˇ-awˬ. Aˇ nah hawˇ-eu Miˬyehˇ-euˬ piˇ ma deuˬ mehˬ shi “Ngaˇ ngehˬ lehˬ-euˬ nya” lehˇ taˬ ehˇ. Aˬ jeˬ miˇ neh Miˬyehˇ nui ma bi pehˇ-eu jeˬ mˇ te. Aˬ jeˬ miˇ neh nawˬ neh mˇ-euˬ gaˇ-ahˇ aˬ yawꞈ bi laˆ cawˆ te.

⁷ Nui noeˬ bym-awˇ mehˬ boeˬ nya dui dui kʼawꞈ, Miˬyehˇ-ahˇ guˆ-eu siˬ nya-awˬ.

Smˇ muiˬ muiˬ-eu gaˇ dahˇ maˬ tsoeˬ-a

⁸ Iˇ shaˬ zaˬ deuˬ-ahˇ sahˬ paˬ sahˬ ma deuˬ kʼehˬ-awˇ kʼaˆ-awˇ nawˬ dzaˬ kʼaˆ dzaˬ gaˇ ya mawˇ ngeh, taˬ zahˬ leˇ. Sahˬ paˬ sahˬ ma aˬ geu gʼaˬ maˬ kaˬ, aˬ yawꞈ taꞈ-ehˇ huiˬ dzehˬ-eu gʼaˬ jawˇ-awˇ, tiˬ gʼaˬ kʼoeˇ taˆ tiˬ gʼaˬ huiˬ daˆ leꞈ-eu meh.

⁹ Aˇ saˬ saˬ laˇ ngeh-aˬ, sahˬ paˬ kʼawꞈ cehˇ doˆ le-eu deh yaˇ-ahˇ ya gʼoe-eu meh.

¹⁰ Pyuˇ shuiˇ-ahˇ gaˬ-eu nui ma aˇ saˬ saˬ-eu maˬ baw-a. Smˇ muiˬ muiˬ laˇ mawꞈ-eu tsawˇ haˬ, nui kʼahˇ tiˬ jawˇ-iˬ maˬ byah-a. Heu kʼawꞈ, tiˬ jeˬ-iˬ gaˇ dahˇ maˬ tsoeˬ-a.

¹¹ Smˇ muiˬ ngehˬ-ehˇ muiˬ naˇ, dzaˬ-eu kʼaˬ meh ngehˬ-ehˇ myaˬ laˇ-eu meh. Jiˇ jeuˬ-aˬ, smˇ muiˬ gaˇ kawˆ siˬ laˇ-eu kʼoeˇ tehꞈ meh.

¹² Gaˇ mˇ-eu tsawˇ haˬ, dzaˬ loꞈ-eu maˬ dzaˬ loꞈ-eu maˬ kaˬ, uˬ ciꞈ yuꞈ kʼaˆ leˇ muiˬ-eu meh. Ehˇ kʼawꞈ, smˇ muiˬ aˬ da myawˬ gahˬ myaˬ-eu miˇ neh, nui noeˬ myaˬ-eu maˬ yuꞈ kʼaˆ leˇ-a.

¹³ Nahˇ ma heu siˬ uˬ moˆ nui ma cawˆ laˇ paˬ-ehˇ gʼeh-eu tiˬ jeˬ ngaˇ paˇ ya mawˇ-euˬ ma. Tsawˇ haˬ zaˬ deuˬ maˬ dzaˬ maˬ dawˇ peuˬ ni aˬ kaˇ gʼaˇ duˬ pyuˇ jeˬ hmˬ taˬ-eu meh.

¹⁴ Ehˇ kʼawꞈ, yawˬ ngehꞈ-ehˇ smˬ-iˇ jiˇ-awˇ, zaˬ-ahˇ jeˬ biˇ biꞈ yaꞈ-eu maˬ dzeˇ-a.

¹⁵ Dehꞈ le ngeh tiˬ jeˬ-iˬ maˬ hehˇ leꞈ-euˬ loꞈ-ehˇ, shiˇ ngeh kʼawꞈ tiˬ jeˬ-iˬ maˬ yuˇ gʼeh nya-a.

¹⁶ Heu-aˬ, nui ma cawˆ dui dui laˇ paˬ-ehˇ gʼeh-eu meh. Aˬ dui kʼaˇ dehꞈ doˆ le-euˬ loꞈ-ehˇ neˇ myawˆ ni ya gʼoꞈ leˇ-awˇ, aˬ dui neh mˇ-euˬ shaˇ-euˬ aˬ jeˬ guiˬ lahˬ baw ta. Jaˬ lehˇ mehˬ nah teh-eu loꞈ-ehˇ tehꞈ meh.

¹⁷ Aˬ dui yaw dehꞈ dehꞈ-eu zahˇ tsui ni gʼeh-awˇ, shaˬ zahˬ naˇ gawˇ myaˬ-awˇ, nui ma cawˆ duˬ tehꞈ meh.

¹⁸ Ngaˇ heu loꞈ-ehˇ noeˬ duˬ taˬ-euˬ ma. Muiˬ dzehˬ-eu jeˬ-aˬ, Miˬyehˇ aˬ dui-ahˇ miˇ tsaˬ kʼoeˇ taˆ tiˬ kʼehˇ laˇ kʼehˬ yaw dehꞈ bi dehꞈ laꞈ ngeh, dzaˬ byawˬ dawˇ byawˬ-awˇ, aˬ dui neh mˇ-euˬ gaˇ-ahˇ nui kʼahˇ shiˇ-eu jeˬ muiˬ dzehˬ meh.

¹⁹ Tsawˇ haˬ tiˬ gʼaˬ-ahˇ Miˬyehˇ pyuˇ shuiˇ myawˬ gahˬ biꞈ naˇ, guiˬ lahˬ-ahˇ noeˬ keuˆ-awˇ, yawˬ ha neh mˇ-euˬ gaˇ-ahˇ laˬ kʼaˬ cehˇ nui kʼahˇ shiˇ-eu tsaˬ meh. Kʼoeˇ-aˬ, Miˬyehˇ neh biꞈ-euˬ laꞈ sawˬ meh.

²⁰ Miˬyehˇ neh aˬ yawꞈ-ahˇ laˬ kʼaˬ cehˇ-eu jeˬ biꞈ oꞈ nehˬ-euˬ miˇ neh, yaw dehꞈ dehꞈ-eu aˇ yamˬ nymˇ gaˇ nui kʼahˇ shiˇ-eu tsaˬ meh.