Dawˬ tsoˆ 4 - Akha

Kʼehˬ-eu kʼaˆ-eu, myawˬ kʼaˆ mˇ-eu, cawˬ maˬ baw-eu

¹ Nahˇ ma heu siˬ uˬ moˆ kʼehˬ-eu kʼaˆ-eu jeˬ dawˬ tawˆ luꞈ-ahˇ ngaˇ paˇ ya mawˇ-euˬ ma. Kʼehˬ-eu kʼaˆ-eu jeˬ-ahˇ ya daˬ luꞈ-eu tsawˇ haˬ deuˬ myaˆ biˇ yoeˇ luꞈ-awˇ, ngehˬ gʼeh nehˬ-eu gʼaˬ maˬ jawˇ-a. Aˬ yawꞈ maꞈ-ahˇ kʼehˬ luꞈ-eu deuˬ jawˇ paw gʼaˬ kʼaˆ-eu miˇ neh, tiˬ gʼaˬ-iˬ ngehˬ maˬ gʼeh nehˬ peuˬ-a.

² Dehꞈ luꞈ-eu deuˬ naˆ maˬ tseˇ, shiˇ dzeuˇ-euˬ tsawˇ haˬ deuˬ maˬ gaˇ dzehˬ law hawˇ ngaˬ lehˇ ngaˬ-ahˇ noeˬ laˇ miˇ-a.

³ Dawˬ tawˆ luꞈ kʼoeˇ taˆ zaˬ dzehˬ-eu-aˬ, maˬ dehꞈ doˆ le-euˬ deuˬ meh. Aˬ jeˬ miˇ neh ehˇ naˇ, nahˇ ma heu siˬ-euˬ uˬ moˆ yaw haiˬ jeˬ mˇ luꞈ gaˇ aˬ yawꞈ maꞈ maˬ ya mawˇ haw-a.

⁴ Tsawˇ haˬ zaˬ dehꞈ dzaˬ laˇ ni gaˇ mˇ-eu leh jeh-eu-aˬ, yawˬ ha dawˬ peh dehꞈ-eu deuˬ-ahˇ myaˆ naˆ-eu miˇ neh meh lehˇ ngaˇ haw siˬ-euˬ ma. Ehˇ kʼawꞈ, kʼoeˇ loꞈ-ehˇ mˇ-eu tiˬ jeˬ-iˬ gaˇ dahˇ maˬ tsoeˬ-a. Jaˬ lehˇ mehˬ nah teh-eu loꞈ-ehˇ tehꞈ meh.

⁵ Aˬ dzawˬ laꞈ pyehꞈ pyehꞈ deuˇ taˬ-awˇ, tsawˬ toeˬ dehꞈ ka byoˆ leꞈ-eu meh.

⁶ Laꞈ dzmˇ maˬ deˇ ni byah kʼaˇ-awˇ, gʼaˬ doeˇ maˬ dah ni gaˇ myaˬ-eu, jaˬ lehˇ mehˬ nah teh-eu taꞈ-ehˇ, laꞈkʼawˆtiˬkʼawˆ tehꞈ-ehˇ byah kʼawꞈ, nui saˇ oꞈ-eu kʼoeˇ zaˬ dzehˬ meh.

⁷ Nahˇ ma heu siˬ uˬ moˆ gaˇ dahˇ maˬ tsoeˬ-eu tiˬ jeˬ ngaˇ paˇ ya mawˇ-euˬ ma.

⁸ Yawˬ ha tiˬ gʼaˬ tehꞈ-ehˇ dahˬ dzaˬ-eu tsawˇ haˬ tiˬ gʼaˬ jawˇ-eu meh. Aˬ yawꞈ aˬ yuiꞈ aˬ nyiˇ maˬ baw, zaˬ maˬjawˇ kʼawꞈ, aˬ yawꞈ-euˬ pyuˇ shuiˇ myawˬ gahˬ-ahˇ nui kʼahˇ maˬ shiˇ-ehˇ, maˬ naˬ leˇ ni mˇ dui dui-eu meh. Yawˬ ha-euˬ gʼawˇ mawˇ yaw saˇ maˬ oꞈ ni aˬ suˇ gʼaˬ gʼaˇ duˬ aˬ yawꞈ mˇ luꞈ-eu gaˇ kawˆ, aˬ yawꞈ maˬ shaˇ noeˬ-a. Heu kʼawꞈ, tiˬ jeˬ-iˬ gaˇ dahˇ maˬ tsoeˬ-a. Maˬ mˇ paˬ-ehˇ gʼeh-eu gaˇ meh.

⁹ Tsawˇ haˬ nyiˬ gʼaˬ-aˬ, tiˬ gʼaˬ tehꞈ naˆ maˬ tseˇ gaˇ dahˇ tsoeˬ dzehˬ-eu meh. Aˬ jeˬ miˇ neh ehˇ naˇ, nyiˬ gʼaˬ mˇ naˇ gaˇ za myaˬ dzehˬ-eu meh.

¹⁰ Tiˬ gʼaˬ coˬ-iˇ naˇ, tiˬ gʼaˬ gʼeu tuˇ nehˬ nya-eu meh. Ehˇ kʼawꞈ, tiˬ gʼaˬ tehꞈ-ehˇ jawˇ-eu coˬ-iˇ ngeh, shaˬ dui dui meh. Aˬ jeˬ miˇ neh ehˇ naˇ, gʼeu tuˇ nehˬ-eu gʼaˬ maˬ jawˇ-a.

¹¹ Yaw gaˆ gaˆ ngeh nyiˬ gʼaˬ tiˬ kawˆ loꞈ-ehˇ yuꞈ naˇ lmˇ laˇ-eu meh. Ehˇ kʼawꞈ tiˬ gʼaˬ tehꞈ naˇ, yawˬ haˇ yawˬ ha aˬ joˆ-ehˇ laˆ lmˇ nmˇ.

¹² Tiˬ gʼaˬ tehꞈ-ahˇ dawꞈ gʼaˬ nya kʼawꞈ, nyiˬ gʼaˬ gm gaˇ maˬ dawꞈ gʼaˬ nya-a. Aˇ caˆ smˬ caˆ yeuꞈ taˬ-eu caˆ yeuꞈ-ahˇ maˬ gʼeu tsehˆ coeˇ-a.

^13-14 Tsawˇ haˬ tiˬ gʼaˬ iˇ shaˬ shaˬ dui dui-awˇ sahˬ paˬ pyeuꞈ laˇ-euˬ maˬ kaˬ, paꞈ kuˆ-ahˇ uˇ gaˇ neh sahˬ paˬ daˆ keuˆ leˇ-euˬ maˬ kaˬ, tsawˇ mawˬ mawˬ laˇ ngeh aˬ dzawˬ dzawˬ-awˇ aˬ cawˬ ehˇ dawˬ maˬ naˇ haˬ naˇ, iˇ shaˬ shaˬ-awˇ tsawˇ gahˇ ahˇ-eu zaˬ guˬ tiˬ gʼaˬ maˬ tawˬ-a.

¹⁵ Nahˇ ma heu siˬ uˬ moˆ kʼaˇ jawˇ-eu tsawˇ haˬ dawˬ tawˆ luꞈ-ahˇ ngaˇ shaˇ noeˬ haw ngeh, sahˬ paˬ pyeuꞈ leˇ-eu zaˬ guˬ tiˬ gʼaˬ aˬ yawꞈ maꞈ laꞈ kʼoeˇ ahˇ tehꞈ-a lehˇ ngaˇ siˬ duˬ-eu ma.

¹⁶ Sahˬ paˬ tiˬ gʼaˬ uˆ lahˇ-eu uˬ moˆ jawˇ-eu tsawˇ haˬ zaˬ deuˬ maˬ gui jiˇ coeˇ-a. Aˬ yawꞈ-euˬ dzoeˬ dzaˬ jiˇ le ngeh, aˬ yawꞈ-euˬ guiˬ lahˬ-ahˇ tiˬ gʼaˬ-iˬ maˬ noeˬ keuˆ-a. Tiˬ jeˬ-iˬ gaˇ dahˇ maˬ tsoeˬ-a. Jaˬ lehˇ mehˬ nah teh-eu loꞈ-ehˇ tehꞈ meh.