Dawˬ tsoˆ 3 - Akha

Yawˬ jeˬ, yawˬ yamˬ, yawˬ law

¹ Mˬ heu siˬ-euˬ uˬ moˆ, kʼaˇ pyeuꞈ kʼaˇ jaˆ-eu jeˬ dawˬtawˆ, yawˬ yamˬ yawˬ law baw luꞈ-eu meh.

² Dehꞈ le-eu yamˬ baw-eu loꞈ-ehˇ, shiˇ-eu aˇ yamˬ kʼawꞈ baw-eu meh. Toeˬ ka-eu yamˬ baw-eu loꞈ-ehˇ, gʼawˇ doˆ-eu yamˬ kʼawꞈ baw-eu meh.

³ Sehꞈ-eu aˇ yamˬ baw-eu loꞈ-ehˇ, jaˆ gʼaˬ yaˇ-eu aˇ yamˬ baw meh. Deh pyaˆ-eu yamˬ baw-eu loꞈ-ehˇ, tsoˆ muiˬ kʼoꞈ-eu yamˬ baw-eu meh.

⁴ Noeˬ shaˬ-eu yamˬ baw-eu loꞈ-ehˇ, laˬ kʼaˬ cehˇ-eu yamˬ baw-eu meh. Tsawˇ ngoeˇ ngoeˇ yamˬ baw-eu loꞈ-ehˇ, gaˇ nyeh nyeh-eu yamˬ baw-eu meh.

⁵ Kʼaˬ lo byaˆ dzeh-eu yamˬ baw-awˇ, gʼoˆ bymˇ kʼoꞈ-eu yamˬ baw-eu meh.

⁶ Byaˇ tawꞈ-eu yamˬ baw-eu loꞈ-ehˇ, dehˬ dzeh-eu yamˬ kʼawꞈ baw-eu meh. Jeˬ hmˬ-eu yamˬ baw-eu loꞈ-ehˇ, biˬ dzeh-eu yamˬ kʼawꞈ baw-eu meh.

⁷ Gʼeu pyaˬ-eu yamˬ baw-eu loꞈ-ehˇ, guꞈ tmˇ-eu yamˬ kʼawꞈ baw-eu meh. Ciˬ cuˇ jawˇ yamˬ baw-eu loꞈ-ehˇ, dawˬ ja ja-eu yamˬ baw-eu meh.

⁸ Gaˬ-eu aˇ yamˬ baw-eu loꞈ-ehˇ, bye-eu aˇ yamˬ kʼawꞈ baw-eu meh. Guiˇ deuˆ-eu yamˬ baw-eu loꞈ-ehˇ, tsaˬ leˇ tsahˇ leˇ yamˬ baw-eu meh.

⁹ Gaˇ mˇ-eu tsawˇ haˬ aˬ jeˬ guiˬ lahˬ za ta.

¹⁰ Tsawˇ haˬ zaˬ-ahˇ Miˬyehˇ neh ciˬ baꞈ ciˬ pi nehˬ-euˬ kʼaˆ behˆ kah dui dui gaˇ ngaˇ ya mawˇ-euˬ ma.

¹¹ Yawˬ jeˬ na luꞈ gʼaˇ duˬ aˬ yawꞈ neh yamˬ law toꞈ tsaˬ taˬ-euˬ meh. Mehˬ hu paw pyeuꞈ laˇ-eu gaˇ kawˆ siˬ mawꞈ mawˇ mawꞈ-eu nui ma, tsawˇ haˬ zaˬ-ahˇ aˬ yawꞈ biꞈ taˬ-euˬ meh. Ehˇ kʼawꞈ, aˬ yawꞈ neh mˇ-euˬ gaˇ-ahˇ aˇ dahˬ beh gaˇ neh aˇ saˬ saˬ gaˇ keuˆ ni maˬ bi siˬ duˬ-a.

¹² Kʼoeˇ miˇ neh, yawˬ ha kʼaˇ dehꞈ kʼoeˇ keuˆ ni laˬ kʼaˬ cehˇ cehˇ-ehˇ dehꞈ-awˇ, kʼaˇ gʼeh nya-eu jeˬ leh jeh-awˇ mˇ-eu taꞈ-ehˇ maˬ paˇ jaˆ meh lehˇ, ngaˇ noeˬ duˬ taˬ-euˬ ma.

¹³ Yawˬ gʼaˬ na luꞈ dzaˬ byawˬ dawˇ byawˬ byawˬ-awˇ, yawˬ ha neh mˇ-euˬ gaˇ-ahˇ nui kʼahˇ shiˇ-eu tsaˬ meh. Heu-aˬ Miˬyehˇ neh biꞈ laꞈ-euˬ guiˬ lahˬ meh.

¹⁴ Miˬyehˇ neh kʼaˇ mˇ kʼaˇ shaˇ-euˬ jeˬ mˬ maˬ maˬ byaˆ zaˇ ziˇ gmˬ meh lehˇ ngaˇ siˬ nya ma. Aˬ yawꞈ neh mˇ taˬ-euˬ jeˬ-ahˇ, tiˬ jeˬ-iˬ maˬ dawˆ lahˬ nya-eu uˬ taꞈ, tiˬ jeˬ-iˬ maˬ yuˇ teˬ nya-a. Tsawˇ haˬ zaˬ aˬ yawꞈ-ahˇ guˆ ni, Miˬyehˇ neh kʼoeˇ loꞈ-ehˇ jahˇ-euˬ meh.

¹⁵ Kʼaˇ pyeuꞈ luꞈ-eu jeˬ hawˇ-eu kʼaˇ pyeuꞈ laˇ-eu lehˇ gʼeh-eu jeˬ dawˬ tawˆ luꞈ, pyeuꞈ dzeuˇ yaꞈ-euˬ gaˇ kawˆ tehꞈ meh. Aˬ yawꞈ tiˬ jeˬ tehꞈ-ehˇ, tiˬ poˆ saˇ-iˬ tiˬ poˆ pyeuꞈ laˇ ni Miˬyehˇ jahˇ-eu meh.

Miˇ kʼoeˇ taˆ maˬ tsaˬ maˬ dawˇ-eu jeˬ

¹⁶ Kʼoeˇ uˬ taꞈ, nahˇ ma heu siˬ uˬ moˆ yaw tsaˬ yaw dawˇ jeˬ jaˆ paˬ-ehˇ gʼeh-eu tsahˇ-ahˇ, maˬ tsaˬ maˬ dawˇ-eu jeˬ tehꞈ-ehˇ byah luꞈ gaˇ ngaˇ ya mawˇ-euˬ ma.

¹⁷ Kʼaˇ pyeuꞈ laˇ-eu yawˬ jeˬ na luꞈ, aˬ yawꞈ neh toꞈ taˬ-euˬ yamˬ law-ahˇ pyeuꞈ laˇ-eu miˇ neh, tsawˇ muiˬ tsawˇ doeˇ maˬ tseˇ paˆ ni, tiˬ kawˆ loꞈ-ehˇ Miˬyehˇ yaˇ kʼaˬ daˇ-eu nga lehˇ, ngaˇ yawˬ haˇ yawˬ ha ehˇ-euˬ ma.

¹⁸ Tsawˇ haˬ zaˬ-aˬ, jeˬ zaˬ taꞈ-ehˇ maˬ dzehˬ-eu gaˇ kawˆ uˬ duˬ duˬ laˇ ni, Miˬyehˇ lawˬ haw luꞈ meh lehˇ, yawˬ haˇ yawˬ ha ehˇ luꞈ-eu ma.

¹⁹ Uˬ duˬ duˬ laˇ ngeh-aˬ, tsawˇ haˬ zaˬ hawˇ-eu jeˬ zaˬ tiˬ gaˇ shiˇ leˇ-eu meh. Nyiˬ jeˬ luꞈ shiˇ-eu jeˬ tehꞈ meh. Nyiˬ jeˬ luꞈ saꞈ tiˬ kawˆ loꞈ-ehˇ gʼawˇ-awˇ, beu gaˇ duˬ maˬ jaˆ-a. Aˬ jeˬ miˇ neh ehˇ naˇ, nyiˬ jeˬ luꞈ yaw dehꞈ dehꞈ-eu tiˬ jeˬ-iˬ gaˇ dahˇ maˬ tsoeˬ-a.

²⁰ Nyiˬ jeˬ luꞈ aˇ saˬ saˬ leˇ duˬ tiˬ tsahˇ tehꞈ meh. Kʼaˬ lehˇ-ahˇ pyeuꞈ doˆ laˇ-euˬ loꞈ-ehˇ, kʼaˬ lehˇ paˇ ya pyeuꞈ kʼoꞈ jiˇ-eu meh.

²¹ Tsawˇ haˬ-euˬ saꞈ laˇ mˬ taˆ daˆ gʼoꞈ leˇ-awˇ, jeˬ zaˬ-euˬ saꞈ laˇ miˇ oˆ gʼoꞈ kʼoꞈ-iˇ-eu meh lehˇ aˬ suˇ gʼaˬ ehˇ tsehˆ nya ta.

²² Kʼoeˇ miˇ neh, yawˬ ha neh mˇ-euˬ gaˇ-ahˇ nui kʼahˇ shiˇ-eu naˆ maˬ tseˇ muiˬ dzehˬ-eu tiˬ jeˬ-iˬ maˬ paˇ jaˆ meh. Yawˬ ha-euˬ guiˬ lahˬ kʼoeˇ loˆ ni tehꞈ meh. Shiˇ dzeuˇ gʼaˬ miˇ tsa pyeuꞈ laˇ-eu gaˇ kawˆ aˬ suˇ gʼaˬ siˬ duˬ nya ta.