Dawˬ tsoˆ 2 - Akha

Byawˬ-eu mo-eu jeˬ gaˇ dahˇ maˬ tsoeˬ-a

¹ “Laˇ-awˬ. Byawˬ-eu mo-eu jeˬ aˇ naˆ ni muiˬ-eu nga lehˇ, ngaˇ nawˬ-ahˇ nui kʼahˇ tiˬ shiˇ bi byawˬ bi muˆ gʼa nyaˇ” lehˇ, ngaˇ yawˬ haˇ yawˬ ha ehˇ-euˬ ma. Kʼoeˇ kʼawꞈ, tiˬ jeˬ-iˬ gaˇ dahˇ maˬ tsoeˬ gaˇ ya mawˇ-euˬ ma.

² Uiˇ-eu jeˬ-aˬ, aˬ dzawˬ-euˬ gaˇ pyeuꞈ-awˇ, byawˬ-eu mo-eu jeˬ-aˬ, tiˬ pawꞈ-iˬ gaˇ dahˇ maˬ tsoeˬ-a.

³ Yaw muiˬ yaw doeˇ tseˇ paˆ nya-eu nui gahˇ-ahˇ poˆ duˬ tseˇ duˬ mawꞈ-eu nui kʼahˇ baˬ da neh, jiˇ baˬ dawˇ-awˇ dehꞈ byawˬ haw-eu gʼaˇ duˬ ngaˇ noeˬ tsehˆ-euˬ ma. Tsawˇ haˬ zaˬ miˇ tsaˬ kʼoeˇ taˆ tiˬ kʼehˇ laˇ kʼehˬ yaw dehꞈ ya dehꞈ-eu aˇ yamˬ laꞈ kʼoeˇ, aˬ geu jeˬ mˇ-eu gaˇ dahˇ tsoeˬ dzehˬ nga lehˇ ngaˇ siˬ duˬ mawꞈ-eu ma.

⁴ Huiˬ dui dui-eu gaˇ deuˬ ngaˇ mˇ-euˬ ma. Ngaˇ jawˇ-eu gʼaˇ duˬ nymˇ gʼawˬ mya nymˇ tsoˆ-awˇ, aˬ gaꞈ yaˇ kmˇ gʼawˬ mya kmˇ mˇ haw-euˬ ma.

⁵ Yaˇ kmˇ gʼawˬ mya jeˬ mˇ haw-awˇ, aˇ siˬ aˇ bawˇ gʼawˬ mya jeˬ ka haw-euˬ ma.

⁶ Aˇ bawˇ kʼoeˇ deuˬ-ahˇ iˇ cuꞈ shehˬ-eu gʼaˇ duˬ, lah duˬ-euˬ ma.

⁷ Kʼaˬ dzeˇ zaˬ zaˬ kʼaˆ hawˇ-eu zaˬ miˬ zaˬ zaˬ kʼaˆ gʼawˬ mya ni ngaˇ zeuˇ cu-awˇ, ngaˬ-euˬ nymˇ jiˇ laꞈ kʼoeˇ dehꞈ le-euˬ zaˬ kʼaˆ deuˬ kʼawꞈ jawˇ-eu ma. Ngaˇ jeˬ zaˬ myaˬ dui dui ma. Yeˬluˇsaˬlehˬ meuˬ-ahˇ kʼaˇ dehꞈ kʼaˇ jawˇ dzeuˇ yaꞈ-euˬ tsawˇ haˬ deuˬ laꞈ kʼoeˇ, ngaˇ myaˆ-ehˇ jeˬ zaˬ tiˬ gʼaˬ-iˬ maˬ jawˇ-a.

⁸ Ngaˬ neh kʼaˇ uˆ lahˇ keuˆ-euˬ miˇ kʼahˬ deuˬ kʼoeˇ taˆ, sahˬ paˬ sahˬ ma geuꞈ luꞈ-eu deuˬ neh taꞈ nehˬ laꞈ-euˬ pyuˇ hawˇ-eu shuiˇ deuˬ, duˬ gahˬ gahˬ taˬ-euˬ loꞈ-ehˇ ngaˇ jaˆ ma. Dawˬ caˇ caˇ-eu kʼaˬ dzeˇ zaˬ deuˬ hawˇ-eu zaˬ miˬ zaˬ deuˬ jawˇ-awˇ, kʼaˬ dzeˇ zaˬ tiˬ gʼaˬ nui kʼahˇ kʼaˇ jaˆ-eu loꞈ-ehˇ, zaˬ miˬ zaˬ gʼawˬ mya ni ngaˇ jawˇ-eu ma.

⁹ Ngaˇ-aˬ, tsawˇ myahˇ huiˬ dui dui-awˇ, Yeˬluˇsaˬlehˬ meuˬ-ahˇ kʼaˇ jawˇ dzeuˇ yaꞈ-euˬ dawˬ tawˆ luꞈ kʼoeˇ taˆ, aˬ cawˬ naˆ maˬ tseˇ tsawˇ myahˇ doˆ-eu gʼaˬ ma. Ngaˬ-euˬ zaˬ siˬ nui gahˇ ngaˬ nehˬ-ehˇ aˬ myah luꞈ jawˇ luꞈ meh.

¹⁰ Ngaˇ-aˬ, kʼaˇ geuꞈ mawꞈ-eu jeˬ za-euˬ tsawˇ haˬ ma. Kʼaˇ byawˬ kʼaˇ mo mawꞈ-eu jeˬ, maˬ ya byawˬ maˬ ya mo-ehˇ dzahˬ tehˬ-euˬ tiˬ poˆ-iˬ maˬ jaˆ. Ngaˬ neh kʼaˇ mˇ kʼaˇ shaˇ doˆ-euˬ jeˬ-ahˇ ngaˇ nui kʼahˇ shiˇ-awˇ kʼahˬ sehˇ jehˆ-eu ma. Heu-aˬ, ngaˬ neh mˇ za-euˬ guiˬ lahˬ ma.

¹¹ Ngaˬ neh kʼaˇ mˇ kʼaˇ shaˇ-euˬ jeˬ dawˬ tawˆ luꞈ-ahˇ ngaˇ shaˇ sawˇ duˬ haw ngeh, ngaˇ aˇ naˆ ni shaˬ shaˬ-ehˇ mˇ dzeuˇ shaˇ dzeuˇ yaꞈ-euˬ nga. Ehˇ kʼawꞈ, tiˬ jeˬ-iˬ gaˇ dahˇ maˬ tsoeˬ law hawˇ ngaˬ lehˇ ngaˇ siˬ duˬ-eu ma. Jaˬ lehˇ mehˬ nah teh-eu loꞈ-ehˇ yawꞈ ngehꞈ meh. Nahˇ ma heu siˬ uˬ moˆ tiˬ jeˬ-iˬ mˇ za shaˇ za-euˬ maˬ baw-a.

¹² Uˬ duˬ duˬ laˇ ngeh-aˬ, sahˬ paˬ aˬ geu gʼaˬ ma kaˬ, huˬ ziˇ-euˬ sahˬpaˬ deuˬ neh mˇ dzeuˇ yaꞈ-euˬ jeˬ mˇ nya-eu tehꞈ meh. Kʼoeˇ miˇ neh, zaˬ siˬ tsawˇ gahˇ ahˇ-eu jeˬ hawˇ-eu aˬ dzawˬ aˇ gah gah-eu jeˬ-euˬ gaˇ kawˆ-ahˇ ngaˇ shaˇ sawˇ duˬ haw-euˬ ma.

¹³ Yaw zahˇ naˆ maˬ tseˇ yaw shehꞈ muiˬ dzehˬ-eu loꞈ-ehˇ, aˬ dzawˬ aˇ gah gah-eu jeˬ naˆ maˬ tseˇ zaˬ siˬ tsawˇ gahˇ muiˬ dzehˬ meh.

¹⁴ Zaˬ siˬ tsawˇ gahˇ ahˇ-eu deuˬ yawˬ ha ya iˇ-eu gaˇ ma siˬ nya kʼawꞈ, aˬ dzawˬ-aˬ, yaw zahˇ laꞈ kʼoeˇ cah luꞈ gaˇ duˇ-eu meh. Ehˇ kʼawꞈ, aˬ yawꞈ tiˬ gaˇ shiˇ leˇ-eu tehꞈ meh lehˇ ngaˇ siˬ nya ma.

¹⁵ Aˬ dzawˬ aˇ gah hawˇ-eu ngaˇ, aˬ yawꞈ tiˬ gaˇ ya shiˇ leˇ-eu tehꞈ meh lehˇ ngaˇ noeˬ duˬ-euˬ ma. Toˆ-ehˇ ngeuˇ naˇ, ngaˇ zaˬ siˬ tsawˇ gahˇ heu naˆ naˆ-ehˇ ahˇ-eu baˬ da neh, aˬ jeˬ guiˬ lahˬ baw ta. Tiˬ jeˬ-iˬ guiˬ lahˬ maˬ baw-a lehˇ ngaˇ ehˇ-eu ma. Maˇ maˇ ni tiˬ jeˬ-iˬ guiˬ lahˬ maˬ baw-a.

¹⁶ Aˬ dzawˬ aˇ gah-ahˇ aˬ cawˬ maˬ noeˬ keuˆ-eu loꞈ-ehˇ, zaˬ siˬ tsawˇ gahˇ ahˇ-eu gʼaˬ-ahˇ kʼawꞈ, aˬ cawˬ maˬ noeˬ keuˆ-a. Mehˬ hu paw dehꞈ daˆ leꞈ-eu aˇ yamˬ laꞈ kʼoeˇ, dawˬ tawˆ luꞈ-ahˇ aˬ cawˬ ngehˇ jiˇ tehꞈ-a. Tsawˇ gahˇ ahˇ-eu deuˬ maˬ ehˇ, aˬ dzawˬ aˇ gah deuˬ maˬ ehˇ, tiˬ nah ya shiˇ byoˆ jiˇ tehꞈ-a.

Mˇ myawˬ mˇ-eu gaˇ dahˇ maˬ tsoeˬ-a

¹⁷ Yaw dehꞈ dehꞈ-eu jeˬ-ahˇ ngaˇ bye dui dui nya. Aˬ jeˬ miˇ neh ehˇ naˇ, nahˇ ma heu siˬ uˬ moˆ kʼaˇ mˇ kʼaˇ shaˇ-euˬ dawˬ tawˆ luꞈ, ngaˬ-ahˇ bi noeˬ shaˬ-eu jeˬ tehꞈ meh. Gaˇ dahˇ tsoeˬ-eu tiˬ jeˬ-iˬ maˬ jaˆ-ehˇ, jaˬ lehˇ mehˬ nah teh-eu loꞈ-ehˇ tehꞈ meh.

^18-19 Nahˇ ma heu siˬ uˬ moˆ ngaˬ neh kʼaˇ mˇ kʼaˇ shaˇ taˬ-euˬ jeˬ-ahˇ ngaˇ bye dui dui nya. Aˬ jeˬ miˇ neh ehˇ naˇ, gaˇ kʼoeˇ deuˬ nahˬ zaˬ deuˬ-ahˇ ya taˬ yaꞈ nehˬ meh. Nahˬ zaˬ kʼoeˇ gʼaˬ yaw laiꞈ yaw gahˇ aˬ suˇ gʼaˬ ehˇ nya nmˇ. Ehˇ kʼawꞈ, ngaˬ-euˬ zaˬ siˬ tsawˇ gahˇ-ahˇ gʼoe-awˇ, nahˇ ma heu siˬ uˬ moˆ ngaˬ neh kʼaˇ mˇ kʼaˇ shaˇ za-euˬ jeˬ dawˬ tawˆ luꞈ aˬ yawꞈ geuꞈ jiˇ tehꞈ-a. Heu kʼawꞈ tiˬ jeˬ-iˬ gaˇ dahˇ maˬ tsoeˬ-a.

²⁰ Kʼoeˇ miˇ neh, nahˇ ma heu siˬ uˬ moˆ teu naˆ naˆ-ehˇ gaˇ maˬ mˇ paˬ law hawˇ nyaˬ lehˇ noeˬ laˇ miˇ-a.

²¹ Aˬ jeˬ miˇ neh ehˇ naˇ, zaˬ siˬ tsawˇ gahˇ hawˇ-eu yawˬ ha bym-eu nya-eu jeˬ-ahˇ gʼoe-awˇ, shaˬ doˆ mˇ doˆ taˬ-euˬ yawˬ jeˬ na luꞈ, tiˬ jeˬ-iˬ maˬ mˇ maˬ shaˇ-euˬ gʼaˬ-ahˇ ya a nehˬ yaꞈ-eu meh. Heu-aˬ, tiˬ jeˬ-iˬ gaˇ dahˇ maˬ tsoeˬ-eu uˬ taꞈ, tiˬ pawꞈ-iˬ maˬ tsaˬ maˬ dawˇ-a.

²² Nahˇ ma heu siˬ uˬ moˆ myawˬ kʼaˆ mˇ-awˇ shaˬ zahˬ naꞈ-eu, aˬ jeˬ guiˬ lahˬ baw ta.

²³ Tsawˇ haˬ zaˬ yaw dehꞈ dehꞈ-eu tiˬ ziˇ, noeˬ shaˬ noeˬ zahˬ noeˬ dui noeˬ duiˇ-eu laꞈ kʼoeˇ gaˇ ya mˇ-awˇ, uˬ ciꞈ paw kʼawꞈ nui noeˬ gʼaˬ naˬ naˬ kʼaˇ maˬ za-a. Heu kʼawꞈ, tiˬ jeˬ-iˬ gaˇ dahˇ maˬ tsoeˬ-a.

²⁴ Tsawˇ haˬ zaˬ gʼaˇ duˬ maˬ kʼaˇ gaˇ dzehˬ-eu jeˬ-aˬ, yawˬ ha neh kʼaˇ poˆ uiˬ taˬ-euˬ jeˬ dzaˬ byawˬ dawˇ byawˬ byawˬ-eu kʼoeˇ meh. Heu kʼawꞈ, Miˬyehˇ neh biꞈ leꞈ-euˬ guiˬ lahˬ tiˬ jeˬ meh lehˇ ngaˇ paˇ noeˬ mawˇ-euˬ ma.

²⁵ Dzaˬ-eu dawˇ-eu jeˬ hawˇ-eu nui saˇ oꞈ-eu jeˬ-ahˇ, yawˬ haˇ yawˬ ha aˬ gaˇ poˆ doˆ laˬ-iˇ nya nmˇ.

²⁶ Miˬyehˇ-aˬ, aˬ yawꞈ nui ma tsaˬ-eu tsawˇ haˬ deuˬ-ahˇ, yaw muiˬ yaw doeˇ tseˇ paˆ nya-eu nui gahˇ maˬ ehˇ, zaˬ siˬ tsawˇ gahˇ maˬ ehˇ, nui saˇ oꞈ-eu jeˬ maˬ ehˇ, biꞈ nehˬ-eu meh. Ehˇ kʼawꞈ, iˬ baˇ zaˬ deuˬ pyuˇ poˆ shuiˇ poˆ-awˇ jeˬ hmˬ taˬ nya ni, aˬ yawꞈ jahˇ nehˬ-eu meh. Kʼoeˇ-aˬ, aˬ yawꞈ nui kʼahˇ shiˇ-eu tsawˇ haˬ-ahˇ biꞈ nya ni bi poˆ uiˬ taˬ-euˬ gaˇ duˇ-eu meh. Heu deuˬ dawˬ tawˆ luꞈ, tiˬ jeˬ-iˬ gaˇ dahˇ maˬ tsoeˬ-a. Jaˬ lehˇ mehˬ nah teh-eu loꞈ-ehˇ tehꞈ meh.