Dawˬ tsoˆ 12 - Akha

¹ Nawˇ zaˬ guˬ pyeuꞈ ngeh neh, nawˬ-ahˇ beh-euˬ yaw sahˇ-ahˇ noeˬ keuˆ-awˬ. Tsawˇ kʼaˆ kʼaˆ laˇ-awˇ nui saˇ maˬ oꞈ-eu miˇ neh, “Yaw dehꞈ maˬ dehꞈ nahˇ nya” lehˇ ya ehˇ-eu aˇ nah aˇ yamˬ maˬ keuˆ laˇ mi naˆ-ehˇ, Beh-euˬ yaw sahˇ-ahˇ noeˬ keuˆ-awˬ.

² Nahˇ ma, ba la hawˇ-eu aˬ guiˇ yaw shehꞈ deuˬ nawˬ-euˬ gʼaˇ duˬ maˬ bya-ehˇ pyeuꞈ-iˇ-awˇ, uˬ yehˇ bi yehˇ le-eu mˬ dmˇ iˇ dzeuˇ-euˬ maˬ baw-eu aˇ yamˬ kʼoeˇ yamˬ maˬ keuˆ le mi naˆ-ehˇ noeˬ keuˆ-awˬ.

³ Aˇ yamˬ kʼoeˇ yamˬ keuˆ le ngeh, nawˬ-ahˇ mˇ cu-euˬ nawˬ-euˬ aˬ laꞈ laꞈ nyeh nyeh-iˇ-awˇ, nawˬ-euˬ aˬ kuiˇ gʼaˬ juˬ-iˇ-eu uˬ taꞈ, nawˬ-euˬ seuˬ dzaˇ maˬ gʼoˬ dzaˬ nya-ehˇ, nawˬ-euˬ myaˆ nuiˆ maˬ mawˇ shawˇ nya ni pyeuꞈ-iˇ tehꞈ-a.

⁴ Pu gʼahˇ ceh dawˬ ja ja-eu teˇ saˇ nawˇ maˬ paˇ gaˬ nya-ehˇ, cehˇ lehˬ lehˬ-eu teˇ saˇ hawˇ-eu caˇ dawˬ caˇ-eu teˇ saˇ maˬ tseˇ paˆ nya-ehˇ pyeuꞈ-iˇ tehꞈ-a. Ehˇ kʼawꞈ, aˇ jiˇ mahˇ-eu teˇ saˇ baˬ da neh nawˇ maˬ yuꞈ kʼaˆ leˇ-ehˇ ya shaˬ tehꞈ-a.

⁵ Yaw goˇ-ahˇ nawˇ maˬ daˆ peuˬ-ehˇ, nawˇ gaˇ ma cah-eu kʼahˬ lahˇ paˬ-ehˇ pyeuꞈ-iˇ tehꞈ-a. Nawˬ-euˬ uˬ duˬ pyuˇ le-awˇ, yawˬ ha-euˬ gʼawˇ mawˇ maˬ laˆ luˆ coeˇ-eu uˬ taꞈ, nui kʼahˇ dawˬ tawˆ luꞈ byoˆ jiˇ tehꞈ-a. Aˇ saˬ saˬ-eu naˬ duˬ-ahˇ aˬ dui le luꞈ-awˇ, poˆ kaˬ lehˆ kawˆ-ahˇ tsawˇ ngoeˇ ngoeˇ-eu teˇ saˇ gaˬ doˆ laˇ tehꞈ-a.

⁶ Pyuˇ pyuˇ caˆ tsehˆ-iˇ-awˇ, shuiˇ naˬ bo paˆ-iˇ tehꞈ-a. Lah duˬ aˇ caˆ tsehˆ-iˇ-awˇ, iˇ cuꞈ oeˬ lahˬ ga paˆ tehꞈ-a.

⁷ Aˬ dui-euˬ gʼawˇ mawˇ miˇ tsaˬ-ahˇ gʼoꞈ kʼoꞈ-iˇ-awˇ, aˬ duiˬ-euˬ saꞈ laˇ-aˬ, dehꞈ-eu saꞈ laˇ biꞈ-eu yaw sahˇ pyeuꞈ-eu Miˬyehˇ jawˇ gaˇ gʼoꞈ leˇ tehꞈ-a. Aˇ yamˬ kʼoeˇ yamˬ maˬ keuˆ le mi naˆ-ehˇ, Miˬyehˇ-euˬ guiˬ lahˬ-ahˇ noeˬ keuˆ-awˬ.

⁸ Dawˬ mehˬ dawˬ tsoˆ tsoˆ-eu gʼaˬ ehˇ-eu, “Yawꞈ ngehꞈ meh. Yawꞈ ngehꞈ meh. Dawˬ tawˆ luꞈ gaˇ dahˇ maˬ tsoeˬ-a.”

Aˇ saˬ saˬ-eu dawˬ

⁹ Dawˬ mehˬ dawˬ tsoˆ tsoˆ-eu gʼaˬ zaˬ siˬ tsawˇ gahˇ ahˇ-eu tehꞈ maˬ ngeuˇ-a. Aˬ yawꞈ siˬ nya-eu jeˬ aˬ tsawˬ-ahˇ mehˬ nehˬ tsoˆ nehˬ-eu meh. Aˇ hu-euˬ dawˬ daˬ deuˬ-ahˇ aˬ yawꞈ poˆ tseˇ doˆ-awˇ, tsaˬ-eu maˬ tsaˬ-eu pyehˆ tseˇ duˬ taˬ-euˬ meh.

¹⁰ Dawˬ mehˬ dawˬ tsoˆ tsoˆ-eu gʼaˬ gaˇ dahˇ tsoeˬ-eu dawˬ deuˬ poˆ doˆ-awˇ, aˬ yawꞈ neh kʼaˇ boꞈ taˬ-euˬ jeˬ tsaˬ dui dui-eu meh.

¹¹ Zaˬ siˬ tsawˇ gahˇ ahˇ-eu deuˬ neh daˬ taˬ yaꞈ-euˬ dawˬ daˬ deuˬ-aˬ, yawˇ deuˬ-ahˇ gaˇ ma sheuˬ mehˬ-eu yawˇ bo-eu gʼaˬ-euˬ daˇ cuiˇ-ahˇ duˇ-awˇ, kʼaˇ poˆ uiˬ taˬ-eu dawˬ daˬ deuˬ-aˬ, shmˇ sehˬ neh deh myahˬ taˬ-euˬ loꞈ-ehˇ ziꞈ-eu meh. Dawˬ kʼoeˇ deuˬ-aˬ, aˬ dui dawˬ tawˆ luꞈ-ahˇ bo-eu yaw sahˇ pyeuꞈ-eu, yawˇ bo-eu yaw sahˇ Miˬyehˇ tiˬ gʼaˬ neh tehꞈ-ehˇ biꞈ taˬ-euˬ meh.

¹² Ngaˬ li-oˇ, aˇ dzehˬ nui paw aˇ dzeuˇ taˬ dzeuˇ. Sahˬ boꞈ paˇ dmˬ boꞈ doˆ-eu jeˬ mˇ saˬ mˇ li-euˬ maˬ baw-ehˇ, tsawˇ gahˇ aˇ dzehˬ poˆ dzeuˇ-eu-aˬ, yawˬ haˇ yawˬ ha kʼehˬ gaˇ duˇ-eu meh.

¹³ Dawˬ tawˆ luꞈ kʼoeˇ taˆ uˬ duˬ duˬ leˇ-eu, ehˇ paˬ-ehˇ gʼeh-eu tiˬ jeˬ jaˆ-eu tehꞈ meh. Miˬyehˇ-ahˇ guˆ-awˇ, aˬ yawꞈ-euˬ dawˬ naˇ haˬ geuꞈ-awˬ. Aˬ jeˬ miˇ neh ehˇ naˇ, tsawˇ haˬ zaˬ-ahˇ beh taˬ-euˬ-aˬ, kʼoeˇ loꞈ-ehˇ bi mˇ-eu gʼaˇ duˬ meh.

¹⁴ Aˬ dui neh kʼaˇ mˇ-euˬ muiˬ muiˬ doeˇ doeˇ dawˬ tawˆ luꞈ, Miˬyehˇ neh yaˇ kʼaˬ ya bi daˇ meh. Ciˬ cuˇ ni baˇ zaꞈ-ahˇ mˇ kʼoeˬ-euˬ jeˬ kʼawꞈ, tiˬ hmˬ-iˬ maˬ dzeuˇ-iˇ nya-a.