Dawˬ tsoˆ 11 - Akha

Tsawˇ gahˇ ahˇ-eu bawˬ toˆ

¹ Aˬ cawˬ miˇ kʼahˬ-ahˇ jeˬ gaꞈ jeˬ ka mˇ taꞈ gaˇ nawˬ-euˬ pyuˇ gawꞈ taˬ-euˬ jaˆ naˇ, tiˬ nah jiˇ jeuˬ doˆ laˇ tehꞈ-a.

² Nawˬ-euˬ pyuˇ gʼawˬ mya gaˇ pyehˬ kʼawˬ taˬ-awˬ. Aˬ jeˬ miˇ neh ehˇ naˇ, miˇ tsaˬ heu kʼoeˇ taˆ guiˬ lahˬ doeˇ-eu jeˬ maˬ keuˆ le-aˇ lehˇ nawˇ maˬ ehˇ tsehˆ nya-a.

³ Mˬ dmˇ-ahˇ iˇ cuꞈ byah laˇ naˇ, uˬ yehˇ yehˇ ka leꞈ-eu meh. Aˇ bawˇ tiˬ bawˇ aˬ geu paw lawˇ-iˇ-euˬ maˬ kaˬ, kʼaˇ lawˇ dzeh-euˬ tsahˇ-ahˇ ga tehꞈ-a.

⁴ Jaˬ lehˇ pyawˬ tsaˬ gaˇ dawˬ-eu tsawˇ haˬ siˬ yoeˬ maˬ ya sehˬ-ehˇ, mˬ dmˇ dzeuˇ ni dawˬ-eu tsawˇ haˬ cehˇ maˬ ya yehˬ dzaˬ-a.

⁵ Shaˬ yoeˬ shaˬ laꞈ laꞈ kʼoeˇ saꞈ laˇ aˬ joˆ-ehˇ bymˬ doˆ laˇ-euˬ gaˇ kawˆ hawˇ-eu, uˬ maˆ laꞈ kʼoeˇ zaˬ aˬ joˆ-ehˇ pyeuꞈ doˆ laˇ nya-euˬ gaˇ kawˆ nawˇ maˬ siˬ nya-eu-aˬ, yawˬ jeˬ na luꞈ-ahˇ beh-euˬ gʼaˬ pyeuꞈ-eu Miˬyehˇ neh mˇ-euˬ gaˇ-ahˇ aˬ joˆ-ehˇ siˬ nya nmˇ.

⁶ Siˬ yoeˬ kʼaˇ sehˬ-euˬ dehꞈ laˇ meh lehˇ maˬ ehˇ tsehˆ nya-ehˇ, aˬ geu ngeh yamˬ-ahˇ sehˬ-euˬ muiˬ dzehˬ-eu gaˇ kawˆ maˬ siˬ duˬ nya-eu miˇ neh, uˬ shawˬ paw tehꞈ-ehˇ maˬ sehˬ ni, uˬ ciꞈ paw kʼawꞈ sehˬ-awˬ.

⁷ Yaw shehꞈ-aˬ, muiˬ dui dui-awˇ, nah gʼahˇ paw yaw dehꞈ dehꞈ-eu bya cehˆ ni nui kʼahˇ shiˇ duˬ jaˆ meh.

⁸ Aˬ yawꞈ kʼoꞈ yawꞈ nawˇ ya dehꞈ-eu guiˬ lahˬ-ahˇ taˬ ngehˇ. Nawˇ aˇ myah ni yaw dehꞈ ya dehꞈ-eu kʼawꞈ, yaw shiˇ aˇ yamˬ kʼoeˇ myah maˬ tseˇ myahˇ dzehˬ-eu meh. Mehˬ hu paw noeˬ tmˬ duˬ tiˬ jeˬ-iˬ maˬ jaˆ-a.

Zaˬ guˬ deuˬ-ahˇ mehˬ-eu tsoˆ-eu dawˬ

⁹ Zaˬ guˬ deuˬ-oˇ, zaˬ guˬ aˇ yamˬ-ahˇ nui kʼahˇ shiˇ-awˬ. Zaˬ guˬ guˬ ngeh laˬ kʼaˬ cehˇ-awˬ. Nawˬ-euˬ nui loˆ kʼaˇ jaˆ-eu loꞈ-ehˇ nui kʼahˇ tiˬ shiˇ dehꞈ-awˬ. Ehˇ kʼawꞈ, nawˬ neh kʼaˇ dehꞈ-euˬ loꞈ-ehˇ aˬ kaˇ tiˬ nah Miˬyehˇ yaˇ kʼaˬ daˇ nehˬ laꞈ gaˇ taˬ ngehˇ.

¹⁰ Noeˬ shaˬ-eu jeˬ hawˇ-eu kʼahˬ lahˇ-eu jeˬ taˬ bi ahˇ. Nawˇ gʼawˬ myahˇ ni zaˬ guˬ ya guˬ-eu maˬ ngeuˇ-a.