Dawˬ tsoˆ 1 - Akha

Yaw dehꞈ dehꞈ-eu yawꞈ ngehꞈ meh

¹ Heu-aˬ, Yeˬluˇsaˬlehˬ meuˬ-ahˇ sahˬ paˬ geuꞈ-euˬ Daˬbiˇ-euˬ aˬ li pyeuꞈ-eu zaˬ siˬ tsawˇ gahˇ byah-eu dawˬ mehˬ dawˬ tsoˆ tsoˆ-eu gʼaˬ-euˬ dawˬ deuˬ meh.

² Dawˬ mehˬ dawˬ tsoˆ tsoˆ-eu gʼaˬ ehˇ-eu, Yawꞈ ngehꞈ meh. Yawꞈ ngehꞈ meh. Yaw dehꞈ dehꞈ-eu jeˬ-aˬ, tiˬ pawꞈ-iˬ gaˇ dahˇ maˬ tsoeˬ-a. Maˇ maˇ ni gaˇ dahˇ maˬ tsoeˬ-a.

³ Nahˇ ma uˬ moˆ tsawˇ haˬ zaˬ neh, kʼaˇ mˇ kʼaˇ shaˇ-euˬ jeˬ dawˬ tawˆ, aˬ jeˬ guiˬ lahˬ baw-eu jaˆ ta.

⁴ Tiˬ ziˇ jiˇ-awˇ tiˬ yehˆ juˬ kʼawꞈ, miˇ tsaˬ tahˬ kʼawˇ maˬ paˇ laˇ-a.

⁵ Nahˇ ma doˆ laˇ-awˇ ga ahˇ kʼawꞈ, aˬ yawꞈ tsahˇ-ahˇ gʼoꞈ kʼoꞈ leˇ meh.

⁶ Laꞈ oˆ baw ka gʼeh-eu jaˬ lehˇ, laꞈ taˆ paˇ baw kʼoꞈ laꞈ-eu meh. Jawˬ law jawˇ lawˇ baw-eu jaˬ lehˇ, jawˇ oeˇ-ahˇ gʼoꞈ kʼoꞈ laˇ-eu tehꞈ meh.

⁷ Lawˇ gawˆ kʼaˇ yoeˇ-eu dawˬ tawˆ luꞈ, laˆshaˆ-ahˇ yoeˇ uˇ-iˇ jiˇ kʼawꞈ, laˆ shaˆ byah laˇ-eu maˬ baw-a. Gawˆ bi yoeˇ-eu lawˇ gawˆ dawˬ tawˆ, gawˆ mehˇ ya gʼoꞈ kʼoꞈ leˇ-eu meh.

⁸ Gaˇ kawˆ kʼaˇ ngeuˇ-eu dawˬ tawˆ luꞈ, noeˬ shaˬ-eu jeˬ tehꞈ-ehˇ pyeuꞈ-awˇ, kʼaˬ meh neh maˬ ja jiˇ coeˇ-ehˇ, maˬ gaˬ maˬ mawˇ doe jiˇ coeˇ-a.

⁹ Kʼaˇ pyeuꞈ dzeuˇ-euˬ paˇ pyeuꞈ poˆ-awˇ, kʼaˇ mˇ dzeuˇ-euˬ mˇ poˆ-eu meh. Nahˇ ma uˬ moˆ kʼaˇ jaˆ-eu jeˬ, yaw shuiꞈ tiˬ hmˬ-iˬ maˬ ahˇ-a.

¹⁰ “Haw sheˇ haw sheˇ yaw shuiꞈ tiˬ jeˬ, doˆ le-euˬ nga” lehˇ ehˇ-eu kʼawꞈ, aˇ hu neh jaˆ-euˬ jeˬ pyeuꞈ-awˇ, aˬ dui maˬ seu le mi naˆ-ehˇ, jaˆ dzeuˇ yaꞈ-euˬ ngeuˇ law hawˇ meh.

¹¹ Aˇ hu pyeuꞈ dzeuˇ yaꞈ-euˬ gaˇ kawˆ, nymˬ-mˇ ngehˇ byoˆ jiˇ-euˬ loꞈ-ehˇ, aˬ kaˇ huˬ ziˇ dehꞈ dzeuˇ-euˬ jeˬ, nahˬ ziˇ maˬ paˇ ya siˬ nya-aˇ.

Zaˬ siˬ tsawˇ gahˇ gaˇ dahˇ maˬ tsoeˬ-a

¹² Dawˬ mehˬ dawˬ tsoˆ tsoˆ-eu gʼaˬ pyeuꞈ-eu ngaˇ, Yeˬluˇsaˬlehˬ meuˬ-ahˇ jawˇ-awˇ, Iˇsaˬleˬlaˆ miˇ kʼahˬ-ahˇ uˆ lahˇ-euˬ sahˬ paˬ ma.

¹³ Zaˬ siˬ tsawˇ gahˇ-ahˇ gʼoe-awˇ, mˬ heu siˬ-euˬ uˬ moˆ kʼaˇ pyeuꞈ luꞈ-eu jeˬ dawˬ tawˆ luꞈ-ahˇ pyehˆ tseˇ haw-eu gʼaˇ duˬ ngaˇ noeˬ tsehˆ-euˬ ma. Tsawˇ haˬ zaˬ-ahˇ Miˬyehˇ neh ciˬ baꞈ ciˬ pi nehˬ-euˬ kʼaˆ behˆ aˇ naˆ ni kah-eu nga.

¹⁴ Mˬ heu siˬ-euˬ uˬ moˆ kʼaˇ pyeuꞈ luꞈ-eu yawˬ jeˬ na luꞈ ngaˇ mawˇ duˬ-euˬ ma. Gaˇ dahˇ tsoeˬ-eu tiˬ jeˬ-iˬ maˬ jaˆ-a. Jaˬ lehˇ mehˬ nah teh-eu loꞈ-ehˇ tehꞈ meh.

¹⁵ Yaw gʼahˬ maˬ ngawˬ dawˇ geuꞈ nya-ehˇ. aˇ teˬ maˬ gui byah geuꞈ nya-a.

¹⁶ Ngaˇ yawˬ haˇ yawˬ ha heu loꞈ-ehˇ ehˇ-euˬ ma. “Ngaˬ-euˬ mehˬ hu Yeˬluˇsaˬlehˬ meuˬ-ahˇ uˆ lahˇ yaꞈ-euˬ yawˬ gʼaˬ na luꞈ naˆ maˬ tseˇ, ngaˇ zaˬ siˬ tsawˇ gahˇ ahˇ dui dui-eu miˇ neh, tsawˇ myahˇ huiˬ dui dui miˇ-a. Zaˬ siˬ tsawˇ gahˇ hawˇ-eu yaw muiˬ yaw doeˇ tseˇ paˆ geuꞈ nya-eu nui gahˇ, ngaˇ yaw muiˬ paˬ-ehˇ siˬ duˬ nya duˬ-eu ma.”

¹⁷ Zaˬ siˬ tsawˇ gahˇ gaˇ kawˆ hawˇ-eu aˬ dzawˬ aˇ gah-euˬ gaˇ kawˆ maˬ ehˇ, yaw muiˬ yaw doeˇ tseˇ paˆ nya-eu nui gahˇ hawˇ-eu tsawˇ uˬ-euˬ gaˇ kawˆ maˬ ehˇ, ngaˇ pyehˆ tseˇ duˬ-euˬ ma. Ehˇ kʼawꞈ, dawˬ tawˆ luꞈ jaˬ lehˇ mehˬ nah teh gaˇ duˇ-eu tehꞈ meh.

¹⁸ Nui gahˇ ngehˬ ahˇ, nui noeˬ ngehˬ shaˬ. Tsawˇ gahˇ ngehˬ byah shaˬzahˬ ngehˬ naꞈ.