Dawˬ caˇ 7 - Akha

Zaˬ yo aˬ li caˇ dawˬ

¹ Sahˬ paˬ zaˬ miˬ-oˇ, sehˬ nawˆ nawˬ luꞈ-eu nawˬ-euˬ aˬ kuiˇ aˇ naˆ ni haw muiˬ-eu nga. Lah joˆ ni gʼeh-eu nawˬ-euˬ shaˬ pyaˬ-aˬ, nya dui dui-eu myawˬ guˇ tehˆ-eu gʼaˬ neh tehˆ-euˬ, aˇ poeˬ kʼaˆ-eu myawˬ guˇ loꞈ-ehˇ haw muiˬ-eu meh.

² Nawˬ-euˬ caˆ tahˬ-aˬ, aˬ gaꞈ dzaˇ uiˇ gʼawˬ mya jeˬ dahˬ-eu, tiˬ jawˇ-iˬ maˬ gui-iˇ-eu naˬ bo bo zah-ahˇ duˇ-eu meh. Nawˬ-euˬ uˬ maˆ-aˬ, ka paꞈ aˇ yehˆ lahˇ jawˬ taˬ-euˬ, cehˇ cehˇ dzahˬ-ahˇ duˇ-eu meh.

³ Nawˬ-euˬ kʼahˬ nyiˬ pyawˬ-aˬ, kʼaˬ tsehˆ zaˬ nyiˬ mawˇ-ahˇ duˇ-eu meh.

⁴ Nawˬ-euˬ kawˬ lahˇ-aˬ, ya ma juiˇ neh tsoˆ taˬ-euˬ, loꞈ-eu nymˇ goˇ-ahˇ duˇ-eu meh. Nawˬ-euˬ myaˆ nuiˆ-aˬ, Heˬshaˬboˬ meuˬ meuˬ ma lahˇ kʼehˬ dawˬ peh jaˆ-eu lah deuˬ-ahˇ duˇ-eu meh. Nawˬ-euˬ naˇ mehˇ-aˬ, Daˬmaˬsehˇ meuˬ-ahˇ loꞈ piˇ-eu nymˇ pyeuꞈ-eu, Leˬbaˬnoˬ nymˇ goˇ-ahˇ duˇ-eu meh.

⁵ Nawˬ-euˬ uˬ duˬ-aˬ, Gaˬlaˬmeˬlaˇ gawˬ jawˬ loꞈ-ehˇ goˇ ca ni jaˆ-awˇ, nawˬ-euˬ uˬ duˬ tsehˇ kʼahˇ caˆ pyehꞈ-aˬ, saˬ kahˇ boꞈ-euˬ loꞈ-ehˇ yaw shehꞈ bya-awˇ, sahˬ paˬ-ahˇ paꞈ cuꞈ nya ni haw muiˬ-eu meh.

⁶ Nawˇ aˇ naˆ ni aˇ gʼehˇ muiˬ-eu nga. Aˇ naˆ ni mawꞈ leˇ paˬ-ehˇ gʼeh-eu nga. Nawˬ-euˬ nui gaˬ-ahˇ aˇ naˆ ni nui kʼahˇ shiˇ paˬ-ehˇ gʼeh-eu nga.

⁷ Nawˬ-euˬ gʼawˇ mawˇ daoˇ aˇ bawˇ-ahˇ duˇ-awˇ, nawˬ-euˬ kʼahˬ nyiˬ pyawˬ daoˇ aˇ siˬ aˇ puˇ-ahˇ duˇ-eu meh.

⁸ Daoˇ aˇ bawˇ-ahˇ ngaˇ daˆ leˇ-awˇ, aˇ siˬ pyaˆ leˇ ma. Nawˬ-euˬ kʼahˬ nyiˬ pyawˬ aˬ gaꞈ aˇ puˇ-ahˇ duˇ-awˇ, nawˇ saꞈ gʼawˇ-eu siˬyehˆ aˇ siˬ loꞈ-ehˇ saw-awˇ,

⁹ nawˬ-euˬ kʼaˬ meh aˬ gaꞈ dzaˇ uiˇ loꞈ-ehˇ coeˇ nya. Ngaˇ gaˬ-eu gʼaˬ jawˇ-eu nyiˬ paˆ-ehˇ aˬ gaꞈ dzaˇ uiˇ yoeˇ gʼeh luꞈ-uˇ. Aˬ yawꞈ-euˬ mehˬ luˬ hawˇ-eu seuˬ kʼoeˇ taˆ yoeˇ daˆ luꞈ-uˇ.

Zaˬ miˬ aˬ buˇ caˇ dawˬ

¹⁰ Ngaˇ ngaˬ-euˬ zaˬ kʼaˬ-euˬ pyeuꞈ-awˇ, aˬ yawꞈ kʼawꞈ ngaˬ-ahˇ mawꞈ-eu meh.

¹¹ Ngaˬ-euˬ zaˬ kʼaˬ-oˇ, oe-awˬ. Meuˬ-euˬ laꞈ nyiˇ iˇ doˆ gʼeh-awˇ, pu-ahˇ uˬ ciꞈ yaꞈ-iˇ kaˇ-euˇ.

¹² Aˇ nyaꞈ uˬ shawˬ yaw naꞈ-ehˇ tuˇ-awˇ, aˬ gaꞈ baw nmˬ nmˬ laˇ ngaˬ loˇ lehˇ haw-iˇ kaˇ-euˇ. Aˇ cuˬ cuˬ laˇ ngaˬ loˇ lehˇ haw-iˇ kaˇ-euˇ. Aˇ ka uˆ aˇ bawˇ aˇ yehˆ yehˆ laˇ ngaˬ loˇ lehˇ haw-iˇ kaˇ-euˇ. Kʼoeˇ gaˇ, ngaˬ-euˬ nui gaˬ nawˬ-ahˇ biꞈ ma.

¹³ Zaˬ jawˇ lehˬ oꞈ aˇ siˬ yaw saw saw keuˆ le-awˇ, kʼaˇ kuiˇ-eu aˇ siˬ dawˬ tawˆ luꞈ aˇ nyaꞈ-euˬ gʼoˆ kʼehˬ dawˬ peh jaˆ meh. Ngaˇ gaˬ-eu gʼaˬ-oˇ, kʼaˇ kuiˇ-eu aˇ siˬ yaw shuiꞈ yaw oeˇ dawˬ tawˆ luꞈ, nawˬ-euˬ gʼaˇ duˬ ngaˇ pyaˆ uiˬ taˬ-euˬ ma.