Dawˬ caˇ 5 - Akha

Zaˬ yo aˬ li caˇ dawˬ

¹ Ngaˬ-euˬ yaˇ kmˇ-ahˇ ngaˇ oe-euˬ ma. Ngaˇ gaˬ-eu ngaˬ-euˬ zaˬ kʼaˬ jawˇ gaˇ ngaˇ oe-euˬ ma. Muˇ laˬ hawˇ-eu tsiˇ yaw saw jeˬ ngaˇ yuˇ uiˬ luꞈ-eu ma. Ngaˬ-euˬ byaˬ byaˬ uiˇ hawˇ-eu byaˬ yaˆ ngaˇ dzaˬ luꞈ-eu ma. Ngaˬ-euˬ aˬ gaꞈ dzaˇ uiˇ hawˇ-eu mawˇ neˇ aˬ coeˇ ngaˇ dawˇ luꞈ-eu ma. Gaˬ-eu cawˬ deuˬ-oˇ, dzaˬ-awˬ dawˇ-awˬ. Dzaˬ yehꞈ dawˇ yehꞈ ngeh keuˆ ni, dzaˬ boˆ dawˇ boˆ boˆ-awˬ.

Zaˬ miˬ aˬ buˇ caˇ dawˬ Caˇ dawˬ oeˬ bymˇ tiˬ bymˇ

² Ngaˇ yuꞈ kʼaˆ luꞈ kʼawꞈ, ngaˬ-euˬ nui ma yaw noeˬ nya. Ngaˇ gaˬ-eu gʼaˬ laˇ gʼoˆ-ahˇ kʼoˆ luꞈ gaˇ yuꞈ maˆ maˆ mawˇ-euˬ ma. Ngaˇ gaˬ-eu gʼaˬ-oˇ, ngaˬ-ahˇ bi uˇ laˇ nehˬ laꞈ sheˇ. Ngaˇ gaˬ dui dui-eu ngaˬ-euˬ zaˬ kʼaˬ, muiˬ dui dui-eu gʼaˬ-oˇ, bi uˇ laˇ nehˬ laꞈ sheˇ. Ngaˬ-euˬ uˬ duˬ-ahˇ ceuˬ ga aˬ-awˇ, ngaˬ-euˬ uˬ duˬ tsehˇ kahˇ jaˇ yoe ni miˇ-a.

Zaˬ yo aˬ li caˇ dawˬ Zaˬ miˬ aˬ buˇ caˇ dawˬ

³ Ngaˇ mehˬ tsoeˬ lehˆ dzeh gʼaˬ jiˇ taˬ-euˬ, aˬ joˆ-ehˇ paˇ dm kʼoꞈ nmˇ. Ngaˬ-euˬ aˬ kuiˇ dzuiꞈ shawˇ gʼaˬ jiˇ-euˬ, aˬ joˆ-ehˇ paˇ nawˬ jawꞈ nmˇ.

⁴ Ngaˇ gaˬ-eu gʼaˬ laˇ gʼoˆ-ahˇ tuˆ tehˬ laˇ-awˇ, aˬ yawꞈ laˇ keuˆ shaw-iˬ-eu miˇ neh ngaˇ nui ma cehˇ tahˬ tahˬ nya.

⁵ Aˬ yawꞈ bi uˇ laˇ law lehˇ ngaˇ lehˬ hmˬ taˬ-euˬ ma. Ngaˬ-euˬ aˬ laꞈ-ahˇ muˇ laˬ tsiˇ sawˆ-awˇ, ngaˬ-euˬ laꞈ noeˇ-ahˇ muˇ laˬ tsiˇ lehꞈ-awˇ, laˇ gʼoˆ sehˬ-ahˇ ngaˇ tuˆ tehˬ-euˬ ma.

⁶ Ngaˇ gaˬ-eu gʼaˬ bi uˇ laˇ-eu lehˇ laˇ gʼoˆ dehˬ pah ngeh, aˬ yawꞈ maˬ jawˇ ni iˇ dzeuˇ-euˬ meh. Aˬ yawꞈ-euˬ teˇ saˇ-ahˇ gaˬ mawꞈ dui dui nya. Aˬ yawꞈ-ahˇ ngaˇ poˆ kʼawꞈ, maˬ poˆ mawˇ nya nya. Aˬ yawꞈ-ahˇ kuˇ kʼawꞈ oˬ maˬ toˬ-a.

⁷ Meuˬ-ahˇ loꞈ piˇ-eu tsawˇ haˬ deuˬ ngaˬ-ahˇ tahˬ puˬ le-awˇ, diˬ naˇ diˬ gawˇ nehˬ laꞈ-euˬ meh. Meuˬ meuˬ lahˇ-ahˇ loꞈ piˇ-eu deuˬ, ngaˬ-euˬ uˬ boeˬ gʼeu pyaˬ nehˬ laꞈ-euˬ meh.

⁸ Yeˬluˇsaˬlehˬ meuˬ-ahˇ jawˇ-eu zaˬ miˬ zaˬ deuˬ-oˇ, ngaˬ-ahˇ saˇ jaˇ dzaˬ-awˬ. Ngaˬ-euˬ zaˬ kʼaˬ-ahˇ naw maꞈ ya mawˇ naˇ, ngaˇ aˬ yawꞈ-ahˇ gaˬ dui dui-eu miˇ neh, jawˇ saˇ tiˬ pawꞈ-iˬ maˬ doˆ nya lehˇ ehˇ nehˬ ma lehˇ, ngaˬ-ahˇ saˇ jaˇ dzaˬ-awˬ.

Zaˬ miˬ aˬ buˇ baˬ maꞈ caˇ dawˬ

⁹ Zaˬ miˬ dawˬ tawˆ kʼoeˇ taˆ aˇ gʼehˇ muiˬ-eu gʼaˬ-oˇ, nawˬ-euˬ zaˬ kʼaˬ aˬ cawˬ-ahˇ aˬ joˆ-ehˇ beu gaˇ ta. Nga maꞈ nawˬ-ahˇ saˇ jaˇ dzaˬ paˬ-ehˇ, nawˬ-euˬ zaˬ kʼaˬ aˬ cawˬ taꞈ-ehˇ aˬ jeˬ dzehˬ ta.

Zaˬ miˬ aˬ buˇ caˇ dawˬ

¹⁰ Ngaˬ-euˬ zaˬ kʼaˬ aˬ lmˬ mehˇ-awˇ aˇ gʼehˇ muiˬ-eu ma. Aˬ yawꞈ loꞈ-ehˇ gʼeh-eu tiˬ muiˇ gʼaˬ-ahˇ tiˬ gʼaˬ maˬ keuˬ-a.

¹¹ Aˬ yawꞈ-euˬ myaˆ pyawˬ muiˬ dui dui-eu shuiˇ-ahˇ duˇ-eu meh. Aˬ yawꞈ-euˬ uˬ duˬ tsehˇ kahˇ yaw gʼahˬ yaw diˆ-ehˇ gʼeh-awˇ, awꞈ-aˬ loꞈ-ehˇ naˆ-eu meh.

¹² Aˬ yawꞈ-euˬ myaˆ nuiˆ-aˬ, lawˇ gawˆ dawˬ peh jawˇ-eu, mawˇ neˇ aˬ coeˇ neh bi dzuiꞈ shawˇ taˬ-euˬ, kʼaˬ kʼoeˬ-euˬ myaˆ nuiˆ loꞈ-ehˇ, kʼaˬ lo sehˇ-ahˇ duˇ-eu meh.

¹³ Aˬ yawꞈ-euˬ baˬ ba-aˬ, baw duˆ hawˇ-eu yaw saw jeˬ byah-eu yaˇ kmˇ-ahˇ duˇ-eu meh. Aˬ yawꞈ-euˬ mehˬ luˬ-aˬ, muˇ laˬ tsiˇ nyiꞈ leˇ taˬ-euˬ, ka paꞈ aˇ yehˆ-ahˇ duˇ-eu meh.

¹⁴ Aˬ yawꞈ-euˬ laꞈ du-aˬ, lah joˆ ni gʼeh-eu shuiˇ-ahˇ duˇ-awˇ, kʼaˬ lo sehˇ toeˬ taˬ-euˬ laꞈ duꞈ duꞈ luꞈ-eu meh. Aˬ yawꞈ-euˬ gʼawˇ mawˇ-aˬ, nyoeˇ naˆ naˆ-eu kʼaˬ lo sehˇ toeˬ tsoꞈ taˬ-euˬ, ya ma juiˇ-ahˇ duˇ-eu meh.

¹⁵ Aˬ yawꞈ-euˬ aˬ kuiˇ-aˬ, shuiˇ zeuˇ dahˇ kʼoeˇ taˆ ciˬ tuˇ taˬ-euˬ, kʼaw teuꞈ ba la kʼawˇ zeuˇ-ahˇ duˇ-eu meh. Aˬ yawꞈ-euˬ aˇ gʼehˇ-aˬ, goˇ dui dui-eu shuˬ liˇ aˇ bawˇ dehꞈ-eu, Leˬbaˬnoˬ gawˬ jawˬ loꞈ-ehˇ haw muiˬ-eu meh.

¹⁶ Aˬ yawꞈ dawˬ ngehˬ-eu naˇ haˬ muiˬ dui dui-awˇ, mawꞈ dui dui leˇ paˬ-ehˇ gʼeh-eu meh. Yeˬluˇsaˬlehˬ meuˬ-ahˇ jawˇ-eu zaˬ miˬ zaˬ deuˬ-oˇ, ngaˬ-euˬ zaˬ kʼaˬ pyeuꞈ-eu ngaˬ-euˬ cawˬ-aˬ, kʼoeˇ loꞈ-ehˇ gʼeh-eu tsawˇ haˬ ma.