Dawqdaq 9 - Akha

Zaˬ siˬ tsawˇ gahˇ hawˇ-eu dawˇ ga ga-eu jeˬ

¹ Zaˬ siˬ tsawˇ gahˇ-aˬ, aˬ yawꞈ-euˬ nymˇ tsoˆ-euˬ meh. Aˬ yawꞈ kʼawˇ zeuˇ shiꞈ zeuˇ ka tuˇ-euˬ meh.

² Aˬ yawꞈ jeˬ zaˬ sehꞈ-awˇ, aˬ gaꞈ dzaˇ uiˇ yoe-awˇ, hawˬ je shaˇ dahˇ taˬ-euˬ meh.

³ Aˬ yawꞈ-euˬ zaˬ miˬ zaˬ zaˬ kʼaˆ deuˬ-ahˇ meuˬ-ahˇ pyehˬ gʼeh-awˇ, jawˇ duˬ yaw goˇ-ahˇ daˆ-awˇ heu loꞈ-ehˇ bi guˇ-euˬ meh.

⁴ “Zaˬ siˬ tsawˇ gahˇ maˬ ahˇ-eu tsawˇ haˬ deuˬ-oˇ, heu gaˇ laˇ-awˬ.” Dawˇ ga ga-eu tsawˇ haˬ deuˬ-ahˇ heu loꞈ-ehˇ bi guˇ gaˬ-euˬ meh.

⁵ “Laˇ-awˬ, ngaˬ neh lehˬ hmˬ taˬ-euˬ dzaˇ dzaˬ laˇ-awˇ, ngaˬ neh laˆ saˆ taˬ-euˬ aˬ gaꞈ dzaˇ uiˇ dawˇ le-awˬ.

⁶ Dawˇ ga ga-eu tsawˇ haˬ deuˬ-ahˇ byehˇ dzeh-awˇ, zaˬ siˬ tsawˇ gahˇ mehˬ nah caw teh-awˇ dehꞈ-awˬ.”

⁷ Kʼahˬ sehˇ jehˆ-eu tsawˇ haˬ-ahˇ dzaw paˇ-eu gʼaˬ, dawˬ doeˇ ya daˬ-awˇ, aˬ dzawˬ aˇ gah-ahˇ mehˬ paˇ-eu gʼaˬ, laˆ tahˬ laˆ naˇ laˇ gaˇ ya daˬ tehꞈ-a.

⁸ Kʼahˬ sehˇ jehˆ-eu tsawˇ haˬ-ahˇ tiˬ jawˇ-iˬ taˬ mehˬ taˬ tsoˆ. Aˬ yawꞈ nawˬ-ahˇ bye tehꞈ-a. Tsawˇ gahˇ ahˇ-eu tsawˇ haˬ-ahˇ mehˬ nehˬ tsoˆ nehˬ-awˬ. Aˬ yawꞈ nawˬ-ahˇ yaw zeu baw tehꞈ-a.

⁹ Tsawˇ gahˇ ahˇ-eu tsawˇ haˬ-ahˇ mehˬ nehˬ tsoˆ nehˬ naˇ, tsawˇ gahˇ ahˇ dzehˬ laˇ tehꞈ-a. Yaw tsaˬ yaw dawˇ tsawˇ haˬ-ahˇ mehˬ nehˬ tsoˆ nehˬ naˇ, siˬ laˇ gahˇ laˇ dzehˬ tehꞈ-a.

¹⁰ Sahˬpaˬ Miˬyehˇ-ahˇ guˆ-eu jeˬ-aˬ, zaˬ siˬ tsawˇ gahˇ-euˬ dawˬ pehˬ duˬ puˇ meh. Muiˬ-eu shawˇ-eu Gʼaˬ-ahˇ siˬ nya naˇ, noeˬ siˬ noeˬ mawˇ nya-eu jeˬ za-eu meh.

¹¹ Zaˬ siˬ tsawˇ gahˇ nawˬ-ahˇ ziˇ bi baw-awˇ, nawˬ-euˬ aˇ kʼoꞈ bi mahˇ dzehˬ laˇ tehꞈ-a.

¹² Nawˇ zaˬ siˬ tsawˇ gahˇ ahˇ naˇ, nawˬ-euˬ gʼaˇ duˬ jiˇ jeuˬ jaˆ-awˇ, nawˇ dawˇ ga gaˬ naˇ, yawˬ haˇ yawˬ ha ya shaˬ ya zahˬ tehꞈ-a.

¹³ Aˬ dzawˬ aˇ gah gah-eu jeˬ-aˬ, dawˬ ja myaˬ-awˇ shaꞈ dawˇ-eu maˬ siˬ nya-eu zaˬ miˬ zaˬ-ahˇ duˇ-eu meh.

¹⁴ Aˬ yawꞈ-euˬ nymˇ gʼoˆ kʼehˬ-ahˇ aˬ yawꞈ nuiˇ-awˇ, meuˬ laꞈ kʼoeˇ jawˇ duˬ yaw goˇ-ahˇ aˬ yawꞈ nuiˇ-awˇ,

¹⁵ yawˬ ha gaˇ ma yawˬ ha cah-eu, iˇ tsehˆ laˇ tsehˆ-eu tsawˇ haˬ deuˬ-ahˇ,

¹⁶ “Dawˇ ga deuˬ-oˇ, heu gaˇ laˇ-awˬ” lehˇ kuˇ kuˇ-ehˇ jawˇ-eu meh. Aˬ dzawˬ aˇ gah deuˬ-ahˇ-aˬ,

¹⁷ “Kʼoeˬ dawˇ-eu iˇ cuꞈ coeˇ dzehˬ-awˇ, kʼoeˬ dzaˬ-eu kaˬ muˇ kuiˇ dzehˬ nya” lehˇ ehˇ nehˬ-eu meh.

¹⁸ Aˬ yawꞈ-euˬ nymˇ-ahˇ kʼaˇ le-eu deuˬ ya shiˇ-awˇ, kʼaˇ le uˇ-euˬ tsawˇ haˬ deuˬ shiˇ-eu miˇ kʼahˬ-ahˇ jawˇ luꞈ-eu gaˇ kawˆ, aˬ yawꞈ maꞈ maˬ siˬ nya-a.