Dawqdaq 31 - Akha

Sahˬ paˬ-ahˇ mehˬ-eu tsoˆ-eu dawˬ

¹ Heu-aˬ, sahˬ paˬ Leˬmoeˬlaˇ-euˬ aˬ ma neh aˬ yawꞈ-ahˇ mehˬ nehˬ tsoˆ nehˬ-euˬ maˇ jawˆ ni gʼeh-eu dawˬ meh.

² Nawˇ-aˬ, ngaˇ gaˬ-eu ngaˬ-euˬ aˬ li maˇ maˇ ni gʼeh-eu, guiˬ lahˬ shaˇ-awˇ shaˇ za taˬ-euˬ aˬ li pyeuꞈ-eu ma. Nawˬ-ahˇ ngaˇ aˬ joˆ-ehˇ ya mehˬ ya tsoˆ nmˇ.

³ Zaˬ miˬ zaˬ-ahˇ nui kʼahˇ jaˆ-eu baˬ da neh, nawˬ-euˬ gʼaˬ hawˇ-eu pyuˇ shuiˇ myawˬ gahˬ taˬ laˆ jiˇ. Zaˬ miˬ zaˬ kʼoeˇ deuˬ sahˬ paˬ gʼawˬ mya gʼaˬ-ahˇ laˆ cawˆ haw-euˬ meh.

⁴ Leˬmoeˬlaˇ-oˇ, naˇ haˬ-awˬ. Sahˬ paˬ geuꞈ-eu tsawˇ haˬ jiˇ baˬ hawˇ-eu aˬ gaꞈ dzaˇ uiˇ-ahˇ gaˬ-eu nui ma maˬ ya bi ahˇ-a.

⁵ Aˬ yawꞈ maꞈ jiˇ baˬ dawˇ ngeh, zahˇ sahˇ kʼoꞈ-ahˇ ngehˇ jiˇ-awˇ, shaˬ-eu zahˬ-eu tsawˇ haˬ deuˬ gʼaˇ duˬ yaw tsaˬ yaw dawˇ dawˇ-ehˇ maˬ shaˇ noeˬ nehˬ nya-a.

⁶ Jiˇ baˬ hawˇ-euˬ aˬ gaꞈ dzaˇ uiˇ-aˬ, shiˇ leˇ luꞈ-eu deuˬ hawˇ-eu nui ma cawˆ dui dui-eu deuˬ gʼaˇ duˬ meh.

⁷ Aˬ yawꞈ maꞈ dawˇ-awˇ, shaˬ zahˬ hawˇ-eu nui ma cawˆ-eu jeˬ ngehˇ byoˆ jiˇ luꞈ-uˇ.

⁸ Yawˬ ha gʼaˇ duˬ maˬ ngehˬ maˬ tmˇ nya-eu deuˬ-ahˇ ngehˬ piˇ tmˇ piˇ nehˬ-awˬ. Laꞈ jeuˬ shaˇ kʼaˇ maˬ za-eu tsawˇ haˬ deuˬ-ahˇ haw piˇ nehˬ-awˬ.

⁹ Aˬ yawꞈ maꞈ gʼaˇ duˬ ngehˬ dah-awˇ, yaw tsaˬ yaw dawˇ dawˇ-ehˇ yaˇ kʼaˬ daˇ-awˬ. Shaˬ-eu zahˬ-eu deuˬ hawˇ-eu mehꞈ-eu shuꞈ-eu tsawˇ haˬ deuˬ-ahˇ ngehˬ gʼeh dah teˬ nehˬ-awˬ.

Bym-eu miˬ zaˬ

¹⁰ Miˬ zaˬ yaw bym tiˬ gʼaˬ poˆ mawˇ-eu aˇ naˆ ni shaˬ-eu nga. Aˬ yawꞈ-aˬ, kʼaˬ lo sehˇ naˆ maˬ tseˇ aˇ poeˬ kʼaˆ-eu meh.

¹¹ Aˬ yawꞈ-euˬ kʼaˬ dzeˇ zaˬ aˬ yawꞈ-ahˇ gʼoe coeˇ-awˇ tiˬ jawˇ-iˬ maˬ shaˬ le-a.

¹² Aˬ yawꞈ yaw dehꞈ kʼaˇ dehꞈ kʼoeˇ keuˆ ni, kʼaˬ dzeˇ zaˬ-ahˇ mˇ cu-awˇ, coeˬ leˇ-eu jeˬ maˬ mˇ-a.

¹³ Aˬ yawꞈ saˬ nmˇ saˬ paˇ mˇ-awˇ, mehˬ tsoeˬ guꞈ-eu tiˬ jawˇ-iˬ maˬ naˬ leˇ-a.

¹⁴ Baw gaꞈ saˇ baoˬ loꞈ-ehˇ, gaˇ mahˇ-ahˇ jaˆ-eu dzaˬ dzaˬ dawˇ dawˇ iˇ kahˇ-ahˇ sha ahˇ-eu meh.

¹⁵ Aˬ yawꞈ-euˬ nymˇ kʼahˬ zaˬ deuˬ dzaˬ-eu gʼaˇ duˬ dzaˇ laˆ saˆ-awˇ, zaˬ mi zaˬ zaˬ kʼaˆ deuˬ-ahˇ gaˇ biˇ nehˬ-eu gʼaˇ duˬ, uˬ bya maˬ bya laˇ mi naˆ-ehˇ uˬ tuˇ tuˇ-eu meh.

¹⁶ Aˬ yawꞈ miˇ tsaˬ poˆ zeuˇ-awˇ, aˬ yawꞈ poˆ za taˬ-euˬ pyuˇ yuˇ doˆ-awˇ, aˬ gaꞈ yaˇ kmˇ mˇ-eu meh.

¹⁷ Aˬ yawꞈ mˇ myawˬ mˇ coeˇ dui dui-awˇ, ziꞈ dah ni gʼeh-eu laꞈ kʼoeˇ gʼawˬ mya jeˬ mˇ doˆ shaˇ doˆ nya-eu meh.

¹⁸ Aˬ yawꞈ kʼaˇ mˇ kʼaˇ shaˇ doˆ-euˬ yawˬ jeˬ na luꞈ-euˬ aˇ poeˬ aˬ yawꞈ siˬ nya-awˇ, uˬ ciꞈ sehˇ gʼahˇ keuˆ ni maˬ naˬ leˇ ni mˇ-eu meh.

¹⁹ Yawˬ ha-euˬ saˬ kahˇ yawˬ ha shuiˇ-awˇ, yawˬ haˇ yawˬ ha mehˬ tsoeˬ guꞈ dm-eu meh.

²⁰ Shaˬ-eu zahˬ-eu tsawˇ haˬ-ahˇ aˬ yawꞈ caw ba nehˬ-awˇ, mehꞈ-eu shuꞈ-eu tsawˇ haˬ-ahˇ aˬ yawꞈ bi dzaˬ bi dawˇ-eu meh.

²¹ Aˬ yawꞈ-euˬ nymˇ kʼahˬ zaˬ deuˬ mehˬ tsoeˬ yaw lmˇ jaˆ loꞈ-eu miˇ neh, ngehˇ ga ngeh yamˬ-ahˇ kʼawꞈ aˬ yawꞈ kʼahˬ maˬ lahˇ-a.

²² Aˬ yawꞈ yuꞈ zaˇ kʼawˬ daˬ yaw muiˬ paˬ-ehˇ guꞈ taˬ-awˇ, neˇ tseuˆ ni gʼeh-eu muiˬ dui dui-eu mehˬ tsoeˬ deuˬ dm-eu meh.

²³ Aˬ yawꞈ-euˬ kʼaˬ dzeˇ zaˬ-aˬ, miˇ kʼahˬ-ahˇ tsawˇ myahˇ doˆ-eu aˬ yuiꞈ aˬ tsu tiˬ gʼaˬ pyeuꞈ-eu meh.

²⁴ Aˬ yawꞈ dm gʼaˬ dm lmˇ hawˇ-eu joꞈ paꞈ guꞈ-awˇ, baw gaꞈ deuˬ-ahˇ ahˬ nehˬ-eu meh.

²⁵ Aˬ yawꞈ-ahˇ aˬ cawˬ yaw zeu baw-awˇ, nui ma ziꞈ dah ni gʼeh-eu laꞈ kʼoeˇ, aˬ kaˇ gʼaˇ duˬ kʼahˬ maˬ lahˇ-a.

²⁶ Zaˬ siˬ tsawˇ gahˇ ahˇ-eu nahˬ yu ni gʼeh-eu dawˬ aˬ yawꞈ ngehˬ-eu meh.

²⁷ Aˬ yawꞈ tiˬ jawˇ-iˬ gʼaˬ naˬ maˬ naˬ-ehˇ, nymˇ jiˇ laꞈ kʼoeˇ kʼaˇ loˬ-eu jeˬ-ahˇ haw doe nya-eu meh.

²⁸ Aˬ yawꞈ-euˬ zaˬ deuˬ aˬ yawꞈ-ahˇ yaw zeu baw-awˇ, aˬ yawꞈ-euˬ kʼaˬ dzeˇ zaˬ aˬ yawꞈ-ahˇ ja ceuˬ-eu meh.

²⁹ Aˬ yawꞈ-euˬ kʼaˬ dzeˇ zaˬ ehˇ-eu, “Bym-eu zaˬ miˬ zaˬ gʼawˬ mya ni jawˇ meh. Ehˇ kʼawꞈ, nawˇ loꞈ-ehˇ tiˬ gʼaˬ-iˬ maˬ bym-a.

³⁰ Aˬ cawˬ bi haw mawꞈ-eu jeˬ maˬ ziꞈ-ehˇ, aˇ gʼehˇ muiˬ-eu jeˬ kʼawꞈ maˬ gmˬ-a. Ehˇ kʼawꞈ, Sahˬpaˬ Miˬyehˇ-ahˇ taˬ huiˬ taˬ mahˇ-eu zaˬ miˬ zaˬ-ahˇ aˬ cawˬ ya ja ceuˬ tehꞈ-a.

³¹ Aˬ yawꞈ neh kʼaˇ mˇ kʼaˇ shaˇ-euˬ jeˬ baˬ da neh, aˬ yawꞈ-ahˇ taˬ huiˬ-awˬ. Yawˬ gʼaˬ na luꞈ aˬ yawꞈ-ahˇ yaw zeu baw-eu tsaˬ meh.