Dawqdaq 29 - Akha

¹ Ngehˬ-ehˇ mehˬ naˇ ngehˬ-ehˇ nui ma huiˬ-eu tsawˇ haˬ, tiˬ nah ya shaˬ byoˆ leꞈ tehꞈ-a.

² Yaw tsaˬ yaw dawˇ tsawˇ haˬ dzoeˬ dzaˬ ngeh, miˇ kʼahˬ zaˬ nui saˇ oꞈ-awˇ, maˬ tsaˬ maˬ dawˇ-eu tsawˇ haˬ dzoeˬ dzaˬ ngeh, miˇ kʼahˬ zaˬ ya noeˬ shaˬ tehꞈ-a.

³ Zaˬ siˬ tsawˇ gahˇ mehˬ nah teh-eu tsawˇ haˬ, aˬ da-euˬ kʼahˬ sehˇ pyeuꞈ-awˇ, meh maˬ laˇ nehˬ-ehˇ byawˬ gʼa-eu tsawˇ haˬ pyuˇ laˆ dzeh-eu aˬ dzawˬ aˇ gah meh.

⁴ Yaw tsaˬ yaw dawˇ jeˬ-ahˇ gaˬ-eu sahˬ paˬ-aˬ, miˇ kʼahˬ laˆ ziꞈ-awˇ, pyuˇ shuiˇ-ahˇ gaˬ-eu sahˬ paˬ miˇ kʼahˬ laˆ cawˆ-eu meh.

⁵ Yawˬ ha-euˬ cawˬ-ahˇ ja poeˬ nehˬ-eu tsawˇ haˬ-aˬ, yawˬ haˇ yawˬ ha lahˇ ju kʼmˇ gaˇ duˇ-eu meh.

⁶ Haiˬ-eu tsawˇ haˬ yawˬ ha-euˬ iˬ baˇ-ahˇ teuˆ paꞈ-awˇ, yaw sui yaw dawˇ tsawˇ haˬ kʼahˇ kʼoꞈ kʼaˇ maˬ za ni nui saˇ oꞈ-eu meh.

⁷ Yaw tsaˬ yaw dawˇ tsawˇ haˬ shaˬ zaˬ zahˬ zaˬ-ahˇ gʼawˬ shaˬ gaˬ-eu siˬ nya kawꞈ, maˬ tsaˬ maˬ dawˇ-eu tsawˇ haˬ kʼoeˇ loꞈ-ehˇ maˬ siˬ nya-a.

⁸ Aˬ cawˬ gʼaˇ duˬ maˬ shaˇ noeˬ-eu tsawˇ haˬ, meuˬ meuˬ lah-ehˇ laˆ shaˬ nya-awˇ, zaˬ siˬ tsawˇ gahˇ ahˇ-eu tsawˇ haˬ iˬ dehˬ iˬ ceh laˆ byoˆ nya-eu meh.

⁹ Tsawˇ gahˇ ahˇ-eu tsawˇ haˬ aˬ dzawˬ aˇ gah nehˬ-ehˇ yaˇ kʼaˬ ja ngeh, aˬ dzawˬ aˇ gah uiˇ uiˇ-ehˇ, dawˬ kʼaˆ ngehˬ-awˇ tsawˇ pyehˇ pyehˇ-eu meh.

¹⁰ Aˬ cawˬ-ahˇ sehꞈ-eu tsawˇ haˬ yaw sui yaw dawˇ deuˬ-ahˇ bye-awˇ, yaw tsaˬ yaw dawˇ tsawˇ haˬ aˬ cawˬ-ahˇ ka kʼoꞈ nehˬ-eu meh.

¹¹ Aˬ dzawˬ aˇ gah deuˬ aˬ cawˬ-ahˇ nui ma bi mawˇ-awˇ, nui ma-ahˇ noeˬ-eu tsawˇ haˬ aˬ cawˬ-ahˇ nui ma maˬ bi mawˇ ni oˇ dzeuˇ-eu meh.

¹² Sahˬ paˬ sahˬ ma tiˬ gʼaˬ maˬ tsaˬ-eu dawˬ-ahˇ naˇ haˬ geuꞈ naˇ, aˬ yawꞈ-euˬ gaˇ mˇ-eu yaw huiˬ yaw mahˇ dawˬ tawˆ luꞈ jaˬ myawꞈ pyeuꞈ jiˇ-eu meh.

¹³ Iˇ shaˬ zaˬ hawˇ-eu iˇ shaˬ zaˬ-ahˇ kʼehˬ-eu tsawˇ haˬ, duˇ leˇ duˬ tiˬ tsahˇ jaˆ-eu meh. Nyiˬ gʼaˬ luꞈ-ahˇ Sahˬpaˬ Miˬyehˇ neh myaˆ nuiˆ beh tsoꞈ taˬ-euˬ meh.

¹⁴ Sahˬ zaˬ zahˬ zaˬ-ahˇ gʼawˬ shaˬ gaˬ-eu laꞈ kʼoeˇ haw piˇ-eu sahˬ paˬ dzoeˬ dzaˬ ziꞈ-eu meh.

¹⁵ Zaˬ-ahˇ diˬ diˬ-ehˇ mehˬ nehˬ tsoˆ nehˬ-eu jeˬ-aˬ, zaˬ gʼaˇ duˬ muiˬ-eu meh. Kʼaˇ dehꞈ mawꞈ-eu bi dehꞈ naˇ, aˬ ma-euˬ myaˆ pyawˬ-ahˇ kʼaˬ naˆ sawˆ nya-eu meh.

¹⁶ Haiˬ-eu tsawˇ haˬ deuˬ dzoeˬ dzaˬ ngeh, yaw haiˬ jeˬ byehˬ laˇ-eu meh. Ehˇ kʼawꞈ, yaw tsaˬ yaw dawˇ tsawˇ haˬ deuˬ aˬ yawꞈ maꞈ luˬ-iˇ seˇ-iˇ gaˇ ya mawˇ tehꞈ-a.

¹⁷ Nawˬ li-ahˇ yaw muiˬ paˬ-ehˇ mehˬ nehˬ tsoˆ nehˬ naˇ, nawˇ kʼahˬ sehˇ za tehꞈ-a. Nawˇ bi shaꞈ dawˇ-eu jeˬ aˬ yawꞈ tiˬ jawˇ-iˬ maˬ mˇ-aˇ.

¹⁸ Miˬyehˇ sheuˬ gʼeh-eu mehˬ nah maˬ caw teh-eu tsawˇ jeuˬ-aˬ, zahˇ sahˇ kʼoꞈ maˬ baw ni kʼaˇ dehꞈ mawꞈ-eu dehꞈ-eu meh. Miˬyehˇ-euˬ zahˇ sahˇ kʼoꞈ-ahˇ caw teh-eu tsawˇ haˬ nui saˇ oꞈ-eu meh.

¹⁹ Zaˬ kʼaˆ-ahˇ kʼaˬ meh mehˬ boeˬ neh maˬ mehˬ paˇ nya-a. Aˬ yawꞈ gʼoˆ shaw nya kʼawꞈ, naˬ bawˇ-ahˇ maˬ ahˇ leˇ-a.

²⁰ Maˬ shaˇ noeˬ ni dawˬ ngehˬ-eu tsawˇ haˬ naˆ maˬ tseˇ, aˬ dzawˬ aˇ gah-ahˇ noeˬ tmˬ kʼaˇ za dzehˬ meh.

²¹ Nawˬ-euˬ zaˬ kʼaˆ-ahˇ nyiˇ ngeh neh kʼaˇ geuꞈ mawꞈ-eu jeˬ biꞈ nehˬ naˇ, nawˇ kʼaˇ jaˆ-eu jeˬ dawˬ tawˆ luꞈ bi yuˇ geuꞈ jiˇ-eu aˇ nah keuˆ le tehꞈ-a.

²² Nui ma yaw suˬ deuˬ iˬ dehˬ iˬ ceh hawˇ-eu shaˬ zahˬ gʼawˬ mya jeˬ hehˇ ahˇ laꞈ nya-eu meh.

²³ Nui ma huiˬ-eu mahˇ-eu jeˬ nawˬ-ahˇ laˆ shaˬ-awˇ, nui nahˬ nui yu ahˇ naˇ, aˬ cawˬ nawˬ-ahˇ yaw zeu baw tehꞈ-a.

²⁴ Smˇ kʼoeˬ nehˬ-ehˇ cawˬ cawˬ-eu tsawˇ haˬ yawˬ haˇ yawˬ ha muiˇ gaˇ duˇ-eu meh. Dawˇ coe ni ehˇ doˆ naˇ, kʼehˬ-eu kʼaˆ-eu jeˬ-ahˇ ya daˬ-awˇ, maˬ ehˇ doˆ ni zaꞈ byoˆ naˇ, Miˬyehˇ neh yaˬ kʼehˇ yaˬ-euˬ jeˬ-ahˇ ya daˬ-eu meh.

²⁵ Tsawˇ haˬ zaˬ neh maˬ bi noeˬ doeˇ ni dehꞈ-eu jeˬ guˆ kʼaˇ za-awˇ, Sahˬpaˬ Miˬyehˇ-euˬ nui kʼahˇ dehꞈ byah-eu jeˬ nui saˇ oꞈ-eu meh.

²⁶ Sahˬ paˬ sahˬ ma deuˬ neh gʼawˬ shaˬ bi haw gaˬ-eu jeˬ-ahˇ yawˬ gʼaˬ na luꞈ geuꞈ mawꞈ-eu meh. Ehˇ kʼawꞈ, yaˇ kʼaˬ daˇ nehˬ-eu gʼaˬ Sahˬpaˬ Miˬyehˇ meh.

²⁷ Tsawˇ muiˬ tsawˇ doeˇ-ahˇ bye-awˇ, tsawˇ doeˇ tsawˇ muiˬ-ahˇ bye-eu meh.