Dawqdaq 28 - Akha

¹ Maˬ sui maˬ dawˇ-eu tsawˇ haˬ deuˬ-aˬ, aˬ cawˬ maˬ caw teh gaˇ guˆ guˆ-ehˇ cehˆ-eu meh. Ehˇ kʼawꞈ, yaw sui yaw dawˇ tsawˇ haˬ aˇ laˬ jaˬ shiˇ loꞈ-ehˇ kʼaˬ duˬ ni dehꞈ-eu meh.

² Miˇ kʼahˬ zaˬ deuˬ iˬ baˇ mˇ myaˬ-eu miˇ kʼahˬ-aˬ, tiˬ kʼehˬ maˬ taˬ ni dzoeˬ dzaˬ paˇ laˇ-eu meh. Ehˇ kʼawꞈ, nui ma-ahˇ noeˬ-awˇ, zaˬ siˬ tsawˇ gahˇ byah-eu deuˬ dzoeˬ dzaˬ-eu miˇ kʼahˬ-aˬ, nui ma gm-awˇ ziꞈ dah ni jaˆ-eu meh.

³ Yaw shaˬ zaˬ-ahˇ kʼehˬ-eu sahˬ paˬ sahˬ ma-aˬ, sahˬ lahˬ gʼawˬ daˇ-ahˇ laˆ cawˆ-eu uˬ yehˇ bahˬ ma-ahˇ duˇ-eu meh.

⁴ Zahˇ sahˇ kʼoꞈ-ahˇ nawˇ yaw zeu maˬ baw naˇ, haiˬ-eu tsawˇ haˬ deuˬ-ahˇ gʼaˬ baꞈ baꞈ gaˇ duˇ-awˇ, zahˇ sahˇ kʼoꞈ-ahˇ nawˇ yaw zeu baw ngeh, aˬ yawꞈ maꞈ jawˇ paw maˬ pyawˬ gaˇ duˇ-eu meh.

⁵ Haiˬ-eu tsawˇ haˬ deuˬ yaw tsaˬ yaw dawˇ jeˬ-ahˇ maˬ siˬ nya-a. Ehˇ kʼawꞈ, Sahˬpaˬ Miˬyehˇ-ahˇ uˬ duˬ tahˬ-eu tsawˇ haˬ deuˬ yaw tsaˬ yaw dawˇ jeˬ-ahˇ yaw muiˬ paˬ-ehˇ siˬ nya-eu meh.

⁶ Maˬ sui maˬ dawˇ-eu laꞈ kʼoeˇ smˇ muiˬ muiˬ-eu naˆ maˬ tseˇ, yaw sui yaw dawˇ laꞈ kʼoeˇ iˇ shaˬ shaˬ-eu muiˬ dzehˬ meh.

⁷ Miˇ kʼahˬ zahˇ sahˇ kʼoꞈ-ahˇ yaw muiˬ paˬ-ehˇ caw teh-eu zaˬ guˬ-aˬ, tsawˇ gahˇ ahˇ-eu meh. Gaˇ dahˇ maˬ tsoeˬ-eu deuˬ nehˬ-ehˇ cawˬ cawˬ-eu gʼaˬ-aˬ, aˬ da-euˬ nui ma-ahˇ laˆ shaˬ nehˬ-eu meh.

⁸ Nawˇ aˬ cawˬ-ahˇ jiˇ jeuˬ sawˇ-awˇ, yawˬ ha-ahˇ taꞈ-eu jeˬ tehꞈ-ehˇ shaˇ noeˬ-eu miˇ neh, smˇ muiˬ smˇ baw pyeuꞈ laˇ-eu meh. Ehˇ kʼawꞈ ni, nawˇ kʼoeˇ loꞈ-ehˇ mˇ naˇ, nawˬ-euˬ pyuˇ shuiˇ myawˬ gahˬ kʼoeˇ deuˬ, shaˬ zaˬ zahˬ zaˬ-ahˇ gʼawˬ shaˬ gaˬ nya-eu tsawˇ haˬ tiˬ gʼaˬ-euˬ laꞈ-ahˇ ahˇ leˇ jiˇ tehꞈ-a.

⁹ Zahˇ sahˇ kʼoꞈ mehˬ nah maˬ caw teh-eu tsawˇ haˬ-euˬ guiˬ lahˬ shaˇ dawˬ-ahˇ, Miˬyehˇ nui daˆ daˆ-eu meh.

¹⁰ Yaw sui yaw dawˇ tsawˇ haˬ iˬ baˇ mˇ ni nawˇ tsawˇ gahˇ gahˇ naˇ, yawˬ ha neh kʼmˇ taˬ-euˬ lahˇ ju-ahˇ yawˬ ha ya paꞈ leˇ tehꞈ-a. Yaw sui yaw dawˇ gʼaˬ guiˬ lahˬ huiˬ tehꞈ-a.

¹¹ Pyuˇ shuiˇ jaˆ-eu tsawˇ haˬ yawˬ haˇ yawˬ ha yaw gahˇ ma lehˇ noeˬ-eu meh. Ehˇ kʼawꞈ, tsawˇ haˬ jawˬ gʼehˇ haw duˬ nya-eu iˇ shaˬ zaˬ maˬ tawˬ-a.

¹² Tsawˇ muiˬ dzoeˬ dzaˬ oꞈ ngeh kʼaˇ jawˇ kʼaˇ deuˬ bawˬ iˬ gʼeh kʼawꞈ, tsawˇ doeˇ sahˬ paˬ geuꞈ ngeh dawˬ tawˆ luꞈ yahˇ pawˇ byoˆ jiˇ-eu meh.

¹³ Yawˬ ha-euˬ iˬ baˇ laˆ zaꞈ-eu lehˇ leh jeh-eu tsawˇ haˬ tiˬ jawˇ-iˬ maˬ dehꞈ dzaˬ laˇ-a. Yawˬ ha-euˬ iˬ baˇ pah mehˬ-eu tsawˇ haˬ-ahˇ Miˬyehˇ gʼawˬ shaˬ gaˬ nehˬ tehꞈ-a.

¹⁴ Aˬ myah luꞈ Sahˬpaˬ Miˬyehˇ-euˬ ehˇ dawˬ naˇ haˬ-eu tsawˇ haˬ nui saˇ oꞈ-awˇ, nui ma gʼahˇ-eu tsawˇ haˬ kʼoeˇ taˆ guˆ-eu gaˆ-eu jeˬ keuˆ le tehꞈ-a.

¹⁵ Maˬ tsaˬ maˬ dawˇ-eu sahˬ paˬ-aˬ, shaˬ zaˬ zahˬ zaˬ mehˬ shi joeˬ joeˬ-ehˇ cah-eu aˇ laˬ jaˬ shiˇ hawˇ-eu, lmˬ lmˬ-ehˇ oe-eu kʼaˬ hmˇ-ahˇ duˇ-eu meh.

¹⁶ Nui ma-ahˇ maˬ noeˬ-eu sahˬ paˬ-aˬ, gʼawˬ shaˬ maˬ gaˬ ni kʼehˬ-eu kʼaˆ-euˬ meh. Maˬ sui maˬ dawˇ-eu jeˬ-ahˇ bye-eu sahˬ paˬ ziˇ baw-eu meh.

¹⁷ Aˬ cawˬ-ahˇ sehꞈ-eu tsawˇ haˬ-aˬ, yawˬ ha lmˬ bymˇ yawˬ ha duˬ tehˇ tehˬ gaˇ duˇ-eu meh. Aˬ yawꞈ-ahˇ taˬ laˆ tsoeˬ nehˬ.

¹⁸ Yaw sui yaw dawˇ tsawˇ haˬ guˆ-eu gaˆ-eu jeˬ-ahˇ dzeuˇ-iˇ-awˇ, maˬ sui maˬ dawˇ-eu tsawˇ haˬ coˬ-iˇ tehꞈ-a.

¹⁹ Mˇ coeˇ-eu tsawˇ haˬ maˬ dzaˬ ma dawˇ jiˇ coeˇ-ehˇ, maˬ mˇ maˬ shaˇ ni aˇ yamˬ bi dzeuˇ-iˇ-eu tsawˇ haˬ hawˬ mehꞈ shaˬ tehꞈ-a.

²⁰ Yaw sui yaw dawˇ tsawˇ haˬ ya dzaˬ ya dawˇ dehˆ-awˇ, nui saˇ oꞈ gaˇ ya dehꞈ keuˆ tehꞈ-a. Ehˇ kʼawꞈ, tiˬ kʼehˇ kʼehˬ tehꞈ-ehˇ smˇ muiˬ muiˬ laˇ-eu jeˬ-ahˇ poˆ-eu tsawˇ haˬ shaˬ zahˬ maˬ dehꞈ dzeuˇ nya-a.

²¹ Myaˆ pyawˬ huiˬ nyiˇ tseˇ-eu jeˬ yawˬ lehˬ meh. Ehˇ kʼawꞈ, yaˇ kʼaˬ daˇ-eu tsawˇ haˬ tiˬ paˆ na deuˬ-aˬ, laꞈ nmꞈ ui cuiˆ nmꞈ nehˬ gaˇ noeˬ muiˬ-awˇ, huiˬ-eu yaw lehˬ mˇ nya-eu meh.

²² Nui kʼahˇ huiˬ-eu tsawˇ haˬ smˇ muiˬ muiˬ laˇ ni leh jeh dui dui-awˇ, yawˬ ha shaˬ le zahˬ le-eu gaˇ kawˆ-ahˇ maˬ noeˬ mawˇ nya-a.

²³ Ja poeˬ nya-eu gʼaˬ-ahˇ naˆ maˬ tseˇ, mehˬ paˇ tsoˆ paˇ nehˬ-eu gʼaˬ-ahˇ aˬ cawˬ guiˬ lahˬ huiˬ-eu meh.

²⁴ Yawˬ ha aˬ da aˬ ma-euˬ myawˬ kʼoeˬ-eu maˬ lehˬ-aˇ lehˇ noeˬ-eu tsawˇ haˬ-aˬ, smˇ kʼoeˬ kʼoeˬ ma ma-eu tsawˇ haˬ-ahˇ maˬ beu gaˇ-a.

²⁵ Nui kʼahˇ huiˬ-eu tsawˇ haˬ shaˬ zahˬ ya tahˬ puˬ-eu yaw duˬ baw meh. Sahˬpaˬ Miˬyehˇ-ahˇ gʼoe-eu tsawˇ haˬ baw le za le tehꞈ-a.

²⁶ Yawˬ ha-euˬ nui noeˬ-ahˇ gʼoe-awˇ dehꞈ-eu tsawˇ haˬ aˬ dzawˬ aˇ gah meh. Yaw gahˇ gahˇ-ehˇ noeˬ-awˇ, zaˬ siˬ tsawˇ gahˇ ahˇ-eu deuˬ neh mehˬ taˬ yaꞈ-euˬ dawˬ-ahˇ gʼoe-awˇ dehꞈ-awˬ.

²⁷ Iˇ shaˬ zaˬ-ahˇ caw ba nehˬ-awˬ. Nawˇ tiˬ jawˇ-iˬ maˬ shaˬ le-aˇ. Yaw shaˬ zaˬ-ahˇ nawˇ myaˆ haw maˬ cawˬ nehˬ naˇ, aˬ cawˬ yaˬ kʼehˇ yaˬ-eu dawˬ doeˇ maˬ daˬ jiˇ coeˇ-a.

²⁸ Tsawˇ doeˇ dzoeˬ dzaˬ oꞈ ngeh, miˇ kʼahˬ zaˬ yahˇ paw byoˆ jiˇ tehꞈ-a. Ehˇ kʼawꞈ tsawˇ doeˇ dzoeˬ dzaˬ byoˆ ngeh, yaw tsaˬ yaw dawˇ tsawˇ haˬ dzoeˬ dzaˬ paˇ oꞈ tehꞈ-a.