Dawqdaq 25 - Akha

Sawˇlaˬmoˬ-euˬ dawˬ daˬ nui deuˬ

¹ Dawˬ daˬ heu deuˬ-aˬ, Yuˇdaˆ sahˬ paˬ Heˬsaˬgiˇ-euˬ saˇ naˇ-ahˇ gaˇ mˇ-eu deuˬ neh boꞈ doˆ taˬ-euˬ Sawˇlaˬmoˬ neh daˬ taˬ yaꞈ-euˬ dawˬ daˬ deuˬ meh.

² Miˬyehˇ-aˬ, zaꞈ taˬ nya-eu gʼaˬ pyeuꞈ-eu miˇ neh, aˬ yawꞈ-ahˇ aˬ dui taˬ huiˬ taˬ mahˇ-eu ma. Sahˬ paˬ deuˬ-aˬ, gaˇ kawˆ pah mehˬ-eu miˇ neh, aˬ yawꞈ maꞈ-ahˇ aˬ dui taˬ huiˬ taˬ mahˇ-eu ma.

³ Sahˬ paˬ tiˬ gʼaˬ-euˬ nui noeˬ-ahˇ nawˇ maˬ siˬ jiˇ nya-a. Aˬ yawꞈ-euˬ nui noeˬ mˬ loꞈ-ehˇ goˇ-awˇ, iˬ ma laˆ shaˆ loꞈ-ehˇ naꞈ-eu miˇ neh, aˬ dui maˬ teh miˇ coeˇ-a.

⁴ Pyuˇ pyuˇ kʼoˇ laꞈ kʼoeˇ ahˇ-eu maˬ muiˬ-eu deuˬ kʼaˇ shawˇ doˆ ngeh, ba jiˬ tiˬ gʼaˬ muiˬ dui dui-eu myawˬ guˇ tehˆ doˆ nya-eu meh.

⁵ Sahˬ paˬ-ahˇ maˬ muiˬ maˬ jaˬ-eu nui noeˬ nui duˇ biꞈ luꞈ-eu tsawˇ haˬ deuˬ-ahˇ teh dzeh ngeh, sahˬ paˬ yaw tsaˬ yaw dawˇ laꞈ kʼoeˇ uˆ lahˇ-eu gaˇ kawˆ doˆ laˇ-eu meh.

⁶ Nawˇ sahˬ paˬ-euˬ mehˬ shi yawꞈ leˇ ngeh, yaw bym taˬ geuꞈ.

⁷ Huiˬ-eu gaˇ mˇ-awˬ lehˇ bi ehˇ-eu naˆ maˬ tseˇ, “Nawˇ mˇ luꞈ-eu gaˇ nawˇ naˆ maˬ tseˇ nya-eu gʼaˬ-ahˇ bi mˇ-awˬ” lehˇ bi ehˇ-eu yaˬ dzehˬ meh.

⁸ Nawˇ ya tahˬ puˬ-euˬ tiˬ jeˬ na gaˇ kawˆ-ahˇ, yaˇ kʼaˬ daˇ duˬ-ahˇ tsaꞈ gaˬ leˇ-eu taˬ tehˬ. Nui gʼaˬ nawˇ naˆ maˬ tseˇ duˬ-awˇ, nawˬ neh ehˇ-euˬ dawˬ yaw lehˬ meh lehˇ saˇ kiˇ kamˬ naˇ, nawˇ aˬ joˆ-ehˇ jahˇ nmˇ.

⁹ Nawˬ-euˬ dawˬ peh jawˇ-eu tsawˇ haˬ nehˬ-ehˇ noeˬ beu duˬ jaˆ laˇ naˇ, aˬ cawˬ-ahˇ maˬ siˬ leˇ mi naˆ-ehˇ ciˬ cuˇ ni laˆ tsaˬ geuꞈ-awˬ.

¹⁰ Kʼoeˇ loꞈ-ehˇ maˬ jahˇ tsaˬ geuꞈ nya naˇ, zaꞈ paˬ-ehˇ gʼeh-eu jeˬ-ahˇ nawˇ maˬ zaꞈ nya gaˇ aˬ cawˬ siˬ nya jiˇ-awˇ, daˬ ya ga tehꞈ-a.

¹¹ Gaˇ kawˆ shawˇ jehˆ ni ja duˬ ja mawˇ nehˬ nya-eu jeˬ-aˬ, pyuˇ kʼoeˇ taˆ shuiˇ neh aˇ boꞈ aˇ yehˆ yehˆ daˆ taˬ-euˬ gaˇ duˇ tehꞈ-a.

¹² Naˇ haˬ geuꞈ mawꞈ-eu tsawˇ haˬ tiˬ gʼaˬ yahˇ nya ni, siˬ duˬ mawˇ duˬ haw-euˬ gʼaˬ neh mehˬ nehˬ tsoˆ nehˬ-euˬ dawˬ-aˬ, muiˬ dui dui-eu shuiˇ neh jahˇ taˬ-euˬ laꞈ behˬ hawˇ-eu myawˬ guˇ naˆ maˬ tseˇ aˇ poeˬ kʼaˆ-eu meh.

¹³ Nui kʼahˇ shiˇ coeˇ-eu dawˬ tsaꞈ dawˬ dzawˇ mˇ-eu zaˬ kʼaˆ tiˬ gʼaˬ-aˬ, nahˇ tsaˇ kʼaˆ gaˇ cehˇ diˬ luꞈ ngeh tsehꞈ ngeuˇ ni gʼeh-eu iˇ cuꞈ ya dawˇ-eu loꞈ-ehˇ, yaw sahˇ gʼaˬ nui ma-ahˇ shiˬ deuˬ ni jaˆ-eu meh.

¹⁴ Yawˬ ha maˬ mˇ keuˆ nya gaˇ keuˆ ni saˇ jaˇ dzaˬ-eu tsawˇ haˬ-aˬ, uˬ yehˇ maˬ ahˇ-eu mˬ dmˇ hawˇ-eu jaˬ lehˇ-ahˇ duˇ-eu meh.

¹⁵ Oˇ oꞈ-eu jeˬ-aˬ, sahˬ paˬ-euˬ nui ma-ahˇ tsahˇ pyawˇ nya-awˇ, nahˬ yu ni gʼeh-eu dawˬ ngehˬ-eu jeˬ-aˬ, shaˬ yoeˬ-ahˇ kʼoˆ kʼehꞈ nya-eu meh.

¹⁶ Byaˬ byaˬ uiˇ-ahˇ loˬ-eu naˆ maˬ tseˇ maˬ ya dzaˬ-a.

¹⁷ Aˇ dzehˬ dzaˬ dzeuˇ naˇ uˬ pehꞈ pehꞈ-eu meh. Yawˬ ha-ahˇ nymˇ kaˬ taꞈ-eu gʼaˬ jawˇ gaˇ, tiˬ kʼehˬ maˬ taˬ ni dawˬ deh maˬ ya gʼa-a. Tiˬ kʼehˬ maˬ taˬ ni dawˬ deh gʼa naˇ, aˬ yawꞈ nawˬ-ahˇ haw dehˆ-awˇ, maˬ haw nahˇ-ehˇ pyeuꞈ-iˇ tehꞈ-a.

¹⁸ Maˬ ngeuˇ gaˇ smˇ kʼoeˬ lehꞈ-eu jeˬ-aˬ, mi cehˇ, diˬ puˬ hawˇ-eu taˆ dui dui-eu kaˆ myaˬ loꞈ-ehˇ tsawˇ shiˇ uˬ kʼawˇ laˆ deuˬ nya-eu meh.

¹⁹ Shaˬ-eu zahˬ-eu jeˬ puˬ le mawˇ le ngeh, saˇ jaˇ maˬ jawˇ-eu tsawˇ haˬ-ahˇ gʼoe-eu jeˬ-aˬ, seuˬ ga dzaˇ myuˇ myuˇ-awˇ, kuiˇ kuˆ gaˇ ma cah-eu loꞈ-ehˇ doeˇ-eu meh.

²⁰ Nui ma cawˆ luꞈ-eu tsawˇ haˬ mehˬ shi dawˬ caˇ caˇ mehˬ-eu jeˬ-aˬ, tsahˬ gaˆ yamˬ-ahˇ pehˇ kʼahˬ lehˆ neˇ nehˬ-awˇ, maˇ kʼehˬ maˇ naˇ-ahˇ saˬ deuꞈ sawˆ nehˬ gaˇ duˇ-eu meh.

²¹ Nawˬ-ahˇ muiˇ-eu tsawˇ haˬ hawˬ mehꞈ naˇ, hawˬ bi dzaˬ-awˬ.

²² Iˇ cuꞈ mehꞈ naˇ, iˇ cuꞈ bi dawˇ-awˬ. Kʼoeˇ loꞈ-ehˇ jahˇ nehˬ naˇ, aˬ yawꞈ myaˆ pyawˬ taˬ kʼaˇ maˬ za ni pyeuꞈ-iˇ-awˇ, Sahˬpaˬ Miˬyehˇ nawˬ-ahˇ laꞈ sawˬ biꞈ nehˬ laꞈ tehꞈ-a.

²³ Laꞈ taˆ paw neh baw gʼeh leꞈ-eu jaˬ lehˇ uˬ yehˇ hehˇ ahˇ leꞈ-eu yaw duˬ baw-eu loꞈ-ehˇ, ja bu-eu jeˬ iˬ dehˬ iˬ ceh bi keuˆ le-eu yaw duˬ baw-eu meh.

²⁴ Mehˬ boeˬ taˆ-eu miˬ zaˬ nehˬ-ehˇ dahˬ dzaˬ-eu naˆ maˬ tseˇ, nymˇ mˬ-ahˇ daˆ jawˇ leˇ-eu zaˬ dzehˬ-eu meh.

²⁵ Gaˇ mahˇ kaˬ-eu miˇ kʼahˬ-ahˇ neh gaˬ saˬ saˬ le-euˬ dawˬ muiˬ-aˬ, kuˬ byahˬ gui ngeh ya dawˇ aˬ-euˬ iˇ cuꞈ iˇ tsehꞈ tiˬ kʼmˬ-ahˇ duˇ-eu meh.

²⁶ Tsawˇ doeˇ-euˬ bawˬ toˆ mehˬ nah tsawˇ muiˬ caw teh leˇ-eu jeˬ-aˬ, lawˇ gawˆ yaw jawꞈ hawˇ-eu doꞈ dawˆ taˬ-euˬ lah duˬ-ahˇ duˇ-eu meh.

²⁷ Byaˬ byaˬ uiˇ dzaˬ myaˬ naˇ uˬ pehꞈ doˆ le-eu loꞈ-ehˇ, aˬ cawˬ bi ja ceuˬ-eu gʼaˇ duˬ leh jeh-eu jeˬ yaw muiˬ maˬ ngeuˇ-a.

²⁸ Yawˬ ha-euˬ nui ma-ahˇ yawˬ ha maˬ gʼaˬ leˇ naˇ, aˬ cawˬ yaw awˇ laꞈ-ehˇ deuˆ gʼaˬ nya-eu meuˬ lahˇ maˬ gawˬ taˬ-euˬ meuˬ-ahˇ duˇ-eu meh.