Dawqdaq 22 - Akha

¹ Tsawˇ myahˇ muiˬ-euˬ jeˬ hawˇ-eu smˇ muiˬ muiˬ-eu jeˬ-ahˇ nawˇ ya tseˇ geuꞈ ngeh, tsawˇ myahˇ muiˬ-eu jeˬ-ahˇ tseˇ-awˬ.

² Smˇ muiˬ iˇ shaˬ maˬ beu-eu tiˬ tsahˇ jaˆ meh. Nyiˬ gʼaˬ luꞈ-ahˇ Sahˬpaˬ Miˬyehˇ beh-euˬ meh.

³ Nui ma-ahˇ noeˬ-eu deuˬ shaˬ zahˬ-ahˇ haw mawˇ-awˇ jaw dzeuˇ nya kʼawꞈ, nui ma-ahˇ maˬ noeˬ-eu deuˬ nyiˬ paˆ-ehˇ iˇ gʼeh-awˇ, gʼawˬ shaˇ shaˬ-ehˇ gʼeh-iˬ-eu meh.

⁴ Smˇ muiˬ muiˬ-awˇ tsawˇ myahˇ doˆ-eu uˬ taꞈ ziˇ baw ziˇ za nya ni, Sahˬpaˬ Miˬyehˇ ehˇ dawˬ naˇ haˬ-awˇ, nui ma nahˬ yu ni taˬ-awˬ.

⁵ Yawˬ ha-euˬ saꞈ laˇ-ahˇ yawˬ ha gaˬ naˇ, gaˇ pehˇ kahˇ li jaˆ-eu haiˬ-eu deuˬ-ahˇ kʼmˇ taˬ-euˬ lahˇ ju-ahˇ yahˇ-awˬ.

⁶ Zaˬ-ahˇ dehꞈ jeˬ dehꞈ kawˆ mehˬ nehˬ-awˬ. Aˬ yawꞈ-euˬ ziˇ jiˇ ngeh keuˆ ni maˬ ngehˇ leˇ-aˇ.

⁷ Zaˬ coeˬ smˇ muiˬ-euˬ zaˬ kʼaˆ. Dziˇ dzoˆ yaw naꞈ aˬ cawˬ gʼaˬ kʼehˇ.

⁸ Maˬ tsaˬ maˬ dawˇ-eu siˬ yoeˬ sehˬ naˇ, shaˬ zahˬ dehꞈ doˆ laˇ-awˇ, aˬ cawˬ kʼoeˇ taˆ maˬ kʼaˆ dzaˬ nya ni pyeuꞈ laˇ tehꞈ-a.

⁹ Tsawˇ tsiˇ maˬ tsiˇ ni shaˬ zaˬ zahˬ zaˬ-ahˇ bi dzaˬ bi dawˇ-awˬ. Nawˇ guiˬ lahˬ za tehꞈ-a.

¹⁰ Nui ma huiˬ-eu tsawˇ haˬ-ahˇ yahˇ-awˬ. Tsawˇ pyehˇ pyehˇ-eu, ceh dzaˬ-eu, yaˬ kʼehˇ yaˬ-eu heu deuˬ byoˆ-iˇ jiˇ tehꞈ-a.

¹¹ Nui noeˬ hawˇ-eu dawˬ nahˬ-ahˇ nawˇ gaˬ naˇ, sahˬ paˬ nawˬ-ahˇ gʼoeˇ tehꞈ-a.

¹² Siˬ jiˇ mawˇ jiˇ nya-eu Sahˬpaˬ Miˬyehˇ-aˬ, jaˬ myawꞈ-euˬ dawˬ-ahˇ no dzeh-awˇ, yaw tsaˬ yaw dawˇ jeˬ-ahˇ jeˬ hmˬ taˬ-eu meh.

¹³ Laꞈ nyiˇ doˆ-iˇ naˇ aˇ laˬ jaˬ shiˇ kawꞈ laˇ-a ehˇ-eu-aˬ, iˇ kahˇ jawˇ mawꞈ-eu yaw doeˇ-euˬ dawˬ meh.

¹⁴ Aˬ cawˬ-euˬ miˬ sawˇ yo zaˬ-ahˇ bahˬ-eu jeˬ lahˇ ju pyeuꞈ-awˇ, Sahˬpaˬ Miˬyehˇ nui ma pehˇ-eu deuˬ paꞈ leˇ nya-eu meh.

¹⁵ Zaˬ laꞈ kʼoeˇ aˬ dzawˬ aˇ gah nui ma ahˇ-awˇ, daˇ cuiˇ neh mehˬ-awˇ ya teh doˆ-eu meh.

¹⁶ Smˇ muiˬ-ahˇ laꞈ sawˬ biꞈ-awˇ, yaw shaˬ zaˬ deuˬ-euˬ uˬ duˬ-ahˇ dzaˬ naˇ, nawˇ shaˬ le tehꞈ-a.

Aˇ poeˬ kʼaˆ-eu dawˬ daˬ smˬ tseˇ dawˬ

¹⁷ Naˬ bawˇ ciˬ kʼmˇ-awˬ. Tsawˇ gahˇ byah-eu deuˬ neh ngehˬ taˬ yaꞈ-euˬ dawˬ nawˬ-ahˇ ngaˇ mehˬ nyaˇ. Aˬ yawꞈ maꞈ-euˬ dawˬ-ahˇ yaw muiˬ paˬ-ehˇ shaˇ noeˬ-awˇ dzaw geuꞈ-awˬ.

¹⁸ Dawˬ heu deuˬ-ahˇ nawˇ juiˇ taˬ-awˇ zmˬ nya naˇ, nawˇ yaw dehꞈ dehꞈ-eu laˬ kʼaˬ cehˇ-eu jeˬ byah tehꞈ-a.

¹⁹ Ngaˇ nawˬ-ahˇ Sahˬpaˬ Miˬyehˇ-ahˇ bi gʼoe mawꞈ-eu ma. Kʼoeˇ miˇ neh dawˬ heu deuˬ nawˬ-ahˇ ngaˇ mehˬ-eu lehˇ gʼeh-eu ma.

²⁰ Nawˬ-euˬ gʼaˇ duˬ dawˬ daˬ smˬ tseˇ dawˬ ngaˇ boꞈ taˬ-euˬ ma. Dawˬ heu deuˬ laꞈ kʼoeˇ zaˬ siˬ tsawˇ gahˇ hawˇ-eu muiˬ dui dui-eu dawˬ mehˬ dawˬ tsoˆ deuˬ ahˇ-eu meh. Yaw tsaˬ yaw dawˇ jeˬ ehˇ-eu aˬ jeˬ-a lehˇ,

²¹ dawˬ heu deuˬ nawˬ-ahˇ mehˬ nehˬ laꞈ tehꞈ-a. Kʼoeˇ naˇ, nawˬ-ahˇ yaw tsaˬ yaw dawˇ jeˬ gaˇ kawˆ naˇ haˬ ngeh, nawˇ ehˇ duˬ nya tehꞈ-a. -1-

-1-

²² Nawˇ gʼeh nya-eu miˇ neh shaˬ zaˬ zahˬ zaˬ-ahˇ taˬ kʼaˬ gʼa. Laꞈ jeuˬ shaˇ kʼaˇ maˬ za-eu deuˬ-ahˇ yaˇ kʼaˬ ja gʼaˬ-eu taˬ leh jeh.

²³ Sahˬpaˬ Miˬyehˇ aˬ yawꞈ maꞈ jawˇ paw pyawˬ-awˇ, aˬ yawꞈ maꞈ-ahˇ laˆ shaˬ-eu tsawˇ haˬ uˬ kʼawˇ deuˬ ni jahˇ kʼoꞈ nehˬ tehꞈ-a. -2-

-2-

²⁴ Nui ma yaw suˬ deuˬ hawˇ-eu yaw haiˬ jeˬ mˇ-eu tsawˇ haˬ deuˬ nehˬ-ehˇ cawˬ taˬ cawˬ.

²⁵ Nawˇ aˬ yawꞈ maꞈ loꞈ-ehˇ pyeuꞈ laˇ-awˇ, maˬ dehꞈ paˇ nya ni shaˬ laˇ tehꞈ-a. -3-

-3-

²⁶ Aˬ cawˬ-euˬ dziˇ dzoˆ tsoeˬ nehˬ ma lehˇ tiˬ jawˇ-iˬ taˬ kamˬ.

²⁷ Aˬ yawꞈ-euˬ dziˇ dzoˆ nawˇ maˬ tsoeˬ tsehˆ nya naˇ, nawˬ-euˬ yuꞈ zaˇ bi baꞈ geuꞈ gaˇ keuˆ tehꞈ-a. -4-

-4-

²⁸ Nawˬ-euˬ aˬ poeˬ aˬ bawˇ deuˬ neh tsaˬ tsoˆ taˬ yaꞈ-euˬ miˇ kaˬ-ahˇ, tiˬ jawˇ-iˬ taˬ laˆ jiˆ. -5-

-5-

²⁹ Gaˇ yaw muiˬ muiˬ-ehˇ mˇ-eu tsawˇ haˬ tiˬ gʼaˬ poˆ doˆ laꞈ-awˬ. Sahˬ paˬ nehˬ-ehˇ gaˇ ya mˇ taꞈ-eu aˬ cawˬ naˆ maˬ tseˇ muiˬ dzehˬ-eu tsawˇ haˬ aˬ geu gʼaˬ-a lehˇ ngaˇ mehˬ nehˬ nyaˇ.