Dawqdaq 19 - Akha

¹ Dawˬ ngehˬ bahˬ-eu aˬ dzawˬ aˇ gah-aˬ, maˬ lehˬ maˬ ca-eu tsawˇ shaˬ maˬ tawˬ-a.

² Tsawˇ gahˇ maˬ ahˇ naˇ, nui ma keuˆ kʼawꞈ lawˇ baˬ kaˬ-awˇ, kuiˇ toꞈ ciˬ kawˇ naˇ gaˇ bahˬ bahˬ iˇ nya-eu meh.

³ Bawˬ toˆ maˬ nya shaˬ le ngeh jawˇ, Sahˬpaˬ Miˬyehˇ-ahˇ iˬ baˇ taˬ-eu.

⁴ Smˇ muiˬ zaˬ cawˬ myaˬ laˇ-awˇ, iˇ shaˬ zaˬ cawˬ teˬ le-eu meh.

⁵ Tsawˇ kaˬ yaw lehˬ guiˇ oꞈ-awˇ, jaˬ myawꞈ dawˬ lehˬ maˬ zaꞈ byoˆ nya-a.

⁶ Yawˬ gʼaˬ na luꞈ yaw huiˬ yaw mahˇ-ahˇ myaˆ pyawˬ naˇ mehˇ jahˇ-awˇ, bi dzaˬ bi dawˇ nya-eu tsawˇ haˬ-ahˇ cawˬ cawˬ mawꞈ-eu meh.

⁷ Tsawˇ shaˬ zaˬ-ahˇ mehˇ nmˇ maˬ caw-ehˇ, cawˬ deuˬ dawˬ peh maˬ nyiˬ leˇ-eu miˇ neh, dawˬ gʼoeˇ tehꞈ-ehˇ ngehˬ leˇ kʼawꞈ, myaˆ haw maˬ cawˬ nehˬ-a.

⁸ Zaˬ siˬ tsawˇ gahˇ poˆ-eu tsawˇ haˬ yawˬ haˇ yawˬ ha gaˬ gaˇ duˇ-awˇ, noeˬ siˬ noeˬ mawˇ nya-eu jeˬ ahˇ-eu tsawˇ haˬ baw le za le tehꞈ-a.

⁹ Tsawˇ kaˬ yaw lehˬ guiˇ oꞈ-awˇ, jaˬ myawꞈ dawˬ lehˬ maˬ zaꞈ byoˆ nya-a.

¹⁰ Aˬ dzawˬ nymˇ muiˬ maˬ geuˇ-a. Zaˬ kʼaˆ sahˬ paˬ-ahˇ maˬ uˆ lahˇ nya-a.

¹¹ Nui ma-ahˇ noeˬ-eu tsawˇ haˬ nui pehˇ laꞈ nyiˇ maˬ bi mawˇ-ehˇ, iˬ dehˬ iˬ ceh oˇ dzeuˇ-eu jeˬ, aˬ yawꞈ-euˬ kʼahˬ sehˇ meh.

¹² Sahˬ paˬ-euˬ nui pehˇ kʼaˬ laˬ joeˬ gaˇ duˇ-awˇ, aˬ yawꞈ-euˬ nui gaˬ yaˇ moꞈ-ahˇ ceuˬ ga gaˇ duˇ-eu meh.

¹³ Zaˬ yo aˬ dzawˬ aˬ da-ahˇ laˆ shaˬ-awˇ, miˬ zaˬ-euˬ nui pehˇ uˬ yehˇ yehˇ muˆ-ahˇ duˇ-eu meh.

¹⁴ Pyuˇ shuiˇ,Nymˇ muiˬ aˬ da jeˬ biˇ. Miˬ zaˬ yaw bym Sahˬpaˬ Miˬyehˇ guiˬ lahˬ.

¹⁵ Yaw doeˇ yuꞈ ngeh maˬ dehˆ. Nymˇ gawˬ hawˬ mehꞈ maˬ loꞈ.

¹⁶ Miˬ yehˇ-euˬ zahˇ dawˬ-ahˇ gʼoe-eu tsawˇ haˬ ziˇ baw-awˇ, zahˇ dawˬ-ahˇ yaw zeu maˬ baw-eu tsawˇ haˬ ziˇ teˬ tehꞈ-a.

¹⁷ Iˇ shaˬ zaˬ-ahˇ gʼawˬ shaˬ gaˬ-eu tsawˇ haˬ, Sahˬpaˬ Miˬyehˇ-ahˇ dziˇ dzoˆ paˇ mehˬ gaˇ duˇ-awˇ, Sahˬpaˬ Miˬyehˇ dziˇ dzoˆ tsoeˬ nehˬ tehꞈ-a.

¹⁸ Aˇ yamˬ tsaˬ ngeh zaˬ-ahˇ mehˬ paˇ tsoˆ paˇ-awˬ. zaˬ cawˆ-iˇ ni gʼaˬ baꞈ taˬ baꞈ.

¹⁹ Nui ma huiˬ-eu tsawˇ haˬ lehˬ-eu shaˬ bymˇ bi tawˆ-awˬ. Aˬ yawꞈ-ahˇ ka kʼoꞈ nehˬ-eu aˇ saˬ saˬ-euˬ maˬ baw-a.

²⁰ Dawˬ mehˬ dawˬ tsoˆ-ahˇ naˇ haˬ geuꞈ naˇ, aˬ kaˇ tiˬ nah zaˬ siˬ tsawˇ gahˇ byah laˇ tehꞈ-a.

²¹ Tsawˇ haˬ zaˬ gaˇ kawˆ aˬ joˆ-ehˇ kawˆ kʼawꞈ, Sahˬpaˬ Miˬyehˇ-euˬ nui kʼahˇ uˬ duˬ duˬ leˇ-eu meh.

²² Tsawˇ haˬ zaˬ saˇ jaˇ ziꞈ gaˇ nui kʼahˇ jaˆ-awˇ, jaˬ myawꞈ zaˬ iˇ shaˬ maˬ tawˬ-a.

²³ Sahˬpaˬ Miˬyehˇ-ahˇ guˆ-eu jeˬ ziˇ baw ziˇ za-awˇ, nui saˇ oꞈ-eu uˬ taꞈ, kʼahˬ lahˇ kʼaˇ maˬ za-a.

²⁴ Nymˇ gawˬ aˬ laꞈ hawˬ gʼawˆ-ahˇ hawˬ tsuˆ-awˇ, kʼaˬ meh-ahˇ maˬ nmꞈ ahˇ nahˇ-a.

²⁵ Zaˬ siˬ zaˬ dawˬ mehˬ dawˬ tsoˆ gʼoˆ geuꞈ nya kʼawꞈ, dawˇ ga deuˬ dzaw geuꞈ nya ni, naˬ lehˬ-ahˇ ya diˬ-eu meh.

²⁶ Aˬ da-ahˇ ceh-awˇ aˬ ma-ahˇ teh-eu aˬ li, paˬ daˬ kʼahˇ daˬ ga-eu zaˬ meh.

²⁷ Dawˬ mehˬ dawˬ tsoˆ maˬ naˇ haˬ ni byehˇ-eu aˬ li, za-euˬ tsawˇ gahˇ byoˆ jiˇ tehꞈ-a.

²⁸ Tsawˇ kaˬ yaw lehˬ, yaw tsaˬ yaw dawˇ-ahˇ ja bu-awˇ, yaw haiˬ-euˬ kʼaˬ meh iˬ baˇ myoꞈ ahˇ tehꞈ-a.

²⁹ Aˬ jaꞈ mehˬ hu guiˇ oꞈ aˬ dzawˬ naˇ kʼah daˇ cuiˇ.