Dawqdaq 18 - Akha

¹ Aˬ cawˬ-ahˇ maˬ dehꞈ tsaˬ nya-eu tsawˇ haˬ, yawˬ ha nui noeˬ tehꞈ-ehˇ geuꞈ-awˇ, aˬ cawˬ-euˬ dawˬ maˬ geuꞈ-a.

² Aˬ dzawˬ aˇ gah aˬ cawˬ-ahˇ maˬ dzaw geuꞈ-ehˇ, yawˬ ha maˬ gaˇ-eu tehꞈ-ehˇ geuꞈ mawꞈ-eu meh.

³ Yaw haiˬ mehˬ nah shaꞈ dawˇ-eu jeˬ caw-awˇ, daˬ ga miˇ-ahˇ dawˬ doeˇ caw-eu meh.

⁴ Tsawˇ haˬ kʼaˬ meh-ahˇ doˆ le-euˬ dawˬ iˇ cuꞈ tmˬ loꞈ-ehˇ naꞈ-awˇ, zaˬ siˬ tsawˇ gahˇ lawˇ baˬ iˇ yoeˇ ga-eu meh.

⁵ Haiˬ-eu tsawˇ haˬ-euˬ myaˆ pyawˬ-ahˇ haw-awˇ, tsaˬ-eu tsawˇ haˬ-ahˇ guiˇ oꞈ tiꞈ-eu maˬ muiˬ-a.

⁶ Aˬ dzawˬ-euˬ mehˬ luˬ iˬ dehˬ iˬ ceh mehˬ kʼehˬ pyeuꞈ-awˇ, aˇ gah-euˬ kʼaˬ meh daˇ cuiˇ shaˇ diˬ-eu meh.

⁷ Aˬ dzawˬ aˇ gah kʼaˬ meh yawˬ ha-ahˇ laˆ cawˆ-eu duˬ kʼahˬ pyeuꞈ-awˇ, yawˬ ha mehˬ luˬ shaˆ shiˇ lahˇ ju-ahˇ, yawˬ haˇ yawˬ ha paꞈ leˇ-eu meh.

⁸ Dawˬ doeˇ saˆ kʼoeˬ-eu dzaˇ kuiˇ dzaˇ myehˇ-ahˇ duˇ-awˇ, shaˬ yoeˬ shaˬ laꞈ-ahˇ keuˆ ni nyiꞈ leˇ-eu meh.

⁹ Yaw doeˇ doeˇ-eu jeˬ-aˬ, aˬ dzawˬ aˇ gah-ahˇ mehˇ nmˇ jawꞈ-eu meh.

¹⁰ Sahˬpaˬ Miˬyehˇ tsawˇ myahˇ ziꞈ-eu lo guˇ, tsawˇ muiˬ deuˬ-euˬ cehˆ zaꞈ duˬ meh.

¹¹ Smˇ muiˬ aˬ da-euˬ pyuˇ shuiˇ myawˬ gahˬ, ziꞈ dah ni gʼeh-eu meuˬ-ahˇ duˇ-awˇ, maˬ byaˆ-iˇ nya-eu meuˬ lahˇ ma lehˇ noeˬ-eu meh.

¹² Nui ma huiˬ-eu mehˬ nah yaw cawˆ teh-awˇ, nui nahˬ nui yu mehˬ nah taˬ huiˬ taˬ mahˇ-eu jeˬ caw-eu meh.

¹³ Yaˇ kʼaˬ maˬ daˇ mi naˆ-ehˇ maˬ naˇ haˬ duˬ-eu tsawˇ haˬ aˬ dzawˬ aˇ gah-ahˇ duˇ-eu meh.

¹⁴ Dehꞈ mawꞈ-eu nui kʼahˇ naˇ gawˇ-ahˇ kamˬ coeˇ-awˇ, nui ma ga byaˆ-iˇ naˇ, noeˬ tmˬ kʼaˇ maˬ paˇ za meh.

¹⁵ Nui noeˬ dehꞈ-eu tsawˇ haˬ tsawˇ gahˇ za-awˇ, zaˬ siˬ naˬ bawˇ tsawˇ gahˇ ciˬ kʼmˇ-eu meh.

¹⁶ Laꞈ sawˬ biꞈ-eu jeˬ gaˇ ma shaˇ dahˇ-awˇ, yaw huiˬ yaw mahˇ mehˬ shi le keuˆ nya-eu meh.

¹⁷ Aˬ cawˬ laˇ-awˇ maˬ pyehˇ duˬ kʼoeˇ keuˆ ni, yawˬ ja miˇ yawˬ kawˆ tsaˬ-eu meh.

¹⁸ Shehˆ tsaˬ tsaˬ-awˇ jahˇ tsaˬ geuꞈ-eu jeˬ-aˬ, baoˬ huiˬ-eu tsawˇ haˬ deuˬ-euˬ iˬ dehˬ iˬ ceh la miˆ-eu meh.

¹⁹ Mehˇ nmˇ yaw kaˬ ngehˬ gʼeh-eu jeˬ-aˬ, meuˬ meuˬ lahˇ loꞈ-ehˇ ziꞈ dah ni gʼeh-awˇ, mehˇ nmˇ yaw kaˬ ceh dzaˬ-eu jeˬ-aˬ, miˇ kaˬ taw paˆ gaˇ duˇ-eu meh.

²⁰ Mehˬ boeˬ nya-eu uˬ maˆ dehˆ-awˇ, mehˬ luˬ bym-eu hawˬ mehꞈ loꞈ-eu meh.

²¹ Dehꞈ kawˆ shiˇ kawˆ mehˬ laˇ kʼoeˇ taˆ jaˆ-awˇ, yawˬ ha-euˬ dawˬ yawˬ ha-ahˇ yaˇ kʼaˬ daˇ-eu meh.

²² Miˬ zaˬ gʼa mawˇ-euˬ deuˬ muiˬ-eu guiˬ lahˬ za-awˇ, Sahˬpaˬ Miˬyehˇ nui kʼahˇ shiˇ-eu jeˬ za-euˬ meh.

²³ Iˇ shaˬ dawˬ nahˬ yaw byehˆ, smˇ muiˬ dawˬ kʼaˆ yaw gʼahˇ.

²⁴ Cawˬ kʼaˇ ngeuˇ-eu yaw gʼoeˇ maˬ ngeuˇ, cawˬ muiˬ mehˇ nmˇ maˬ tseˇ tawˬ-mˇ jeˇ.