Dawqdaq 16 - Akha1 Nui noeˬ tsawˇ haˬ-ahˇ oꞈ kʼawꞈ, dawˬ tmˇ Sahˬpaˬ Miˬyehˇ-ahˇ oꞈ-mˇ jeˇ. 2 Yawˬ ha mˇ-euˬ tsaˬ ma lehˇ noeˬ kʼawꞈ, nui ma-ahˇ Sahˬpaˬ Miˬyehˇ saˆ haw-mˇ jeˇ. 3 Yawˬ ha noeˬ taˬ-euˬ jeˬ Sahˬpaˬ Miˬyehˇ-ahˇ a nehˬ naˇ, yaw ha mˇ-euˬ jeˬ guiˬ lahˬ za-eu meh. 4 Yawˬ jeˬ na luꞈ Sahˬpaˬ Miˬyehˇ neh noeˬ tmˬ duˬ beh ahˇ taˬ-awˇ, yaw haiˬ deuˬ-euˬ noeˬ tmˬ duˬ-aˬ, luˬ-iˇ seˇ-iˇ-eu jeˬ meh. 5 Jahˇ gʼeh-eu tsawˇ haˬ-ahˇ Sahˬpaˬ Miˬyehˇ nui daˆ daˆ-awˇ, maˬ kʼehˬ maˬ kʼaˆ-ehˇ maˬ bi dzeuˇ-iˇ-a. 6 Saˇ jaˇ ziꞈ-eu jeˬ baˬ da neh iˬ baˇ pyehˬ nehˬ-eu guiˬ lahˬ za-awˇ, Sahˬpaˬ Miˬyehˇ-ahˇ guˆ-eu jeˬ baˬ da neh, iˬ baˇ-ahˇ gaˇ jaw jaw nya-eu meh. 7 Nawˬ-euˬ dehꞈ jeˬ dehꞈ kʼawˆ Sahˬpaˬ Miˬyehˇ nui kʼahˇ shiˇ naˇ, muiˇ-eu deuˬ nawˬ-ahˇ gʼoeˇ laˇ ni aˬ yawꞈ jahˇ meh. 8 Maˬ tsaˬ maˬ dawˇ-eu laꞈ kʼoeˇ smˇ muiˬ dehꞈ muiˬ-eu naˆ maˬ tseˇ, yaw tsaˬ yaw dawˇ laꞈ kʼoeˇ ui cuiˆ tehꞈ-ehˇ za-eu jeˬ guiˬ lahˬ huiˬ dzehˬ-eu meh. 9 Tsawˇ haˬ zaˬ nui noeˬ bym kʼawꞈ, Sahˬpaˬ Miˬyehˇ neh kʼaˇ sheu pyawˆ-euˬ jeˬ ya geuꞈ-eu meh. 10 Sahˬ paˬ sahˬ ma-ahˇ Miˬyehˇ bi noeˬ doˆ-eu miˇ neh, yaˇ kʼaˬ daˇ-eu maˬ lehˬ maˬ ca-iˇ-a. 11 Tsaˬ-eu paˆ yawˬ hawˇ-eu byah-eu cehˇ daˇ kʼaˆ puˬ, Sahˬpaˬ Miˬyehˇ-euˬ pyeuꞈ-awˇ, pehˬ byah saˆ byah gaˇ aˬ yawꞈ mawˇ mawꞈ-eu meh. 12 Yaw tsaˬ yaw dawˇ jeˬ kʼoeˇ taˆ dzoeˬ dzaˬ ciˬ nuiˇ taˬ-euˬ miˇ neh, yaw haiˬ jeˬ-ahˇ sahˬ paˬ sahˬ ma deuˬ nui daˆ daˆ-eu meh. 13 Tsaˬ-eu dawˇ-eu dawˬ-ahˇ sahˬ paˬ gaˬ mawꞈ-eu loꞈ-ehˇ, yaw tsaˬ yaw dawˇ jeˬ ngehˬ-eu gʼaˬ-ahˇ aˬ yawꞈ taˬ huiˬ-eu meh. 14 Sahˬ paˬ nui pehˇ tsawˇ shiˇ uˬ kʼawˇ shaˇ-eu miˇ neh, tsawˇ gahˇ ahˇ-eu deuˬ sahˬ paˬ-ahˇ dehꞈ tsaˬ-eu meh. 15 Sahˬ paˬ myaˆ pyawˬ shiˬ-eu dehꞈ-eu saꞈ laˇ pyeuꞈ-awˇ, aˬ yawꞈ nui ma tsaˬ-eu jeˬ-aˬ, jawˇ la-ahˇ uˬ yehˇ bi yehˇ le-eu mˬ dmˇ-ahˇ duˇ-eu meh. 16 Zaˬ siˬ tsawˇ gahˇ poˆ-eu-aˬ, shuiˇ-ahˇ poˆ-eu naˆ maˬ tseˇ poeˬ-awˇ, noeˬ siˬ noeˬ mawˇ nya-eu jeˬ-ahˇ za-eu-aˬ, pyuˇ poˆ za-euˬ naˆ maˬ tseˇ gaˇ dahˇ tsoeˬ-eu meh. 17 Tsawˇ muiˬ-euˬ gaˇ jawˬ yaw haiˬ-ahˇ gaˇ jaw jaw-awˇ, yawˬ ha gaˇ ma yawˬ ha yahˇ-awˇ cah naˇ, yawˬ ha-euˬ saꞈ laˇ-ahˇ haw piˇ gaˇ duˇ-eu meh. 18 Nui ma huiˬ-eu mehˬ nah yaw cawˆ jeˬ caw-awˇ, jahˇ gʼeh-eu mehˬ nah daˬ ga-eu jeˬ teh-eu meh. 19 Yaw haiˬ deuˬ nehˬ-ehˇ kʼaˆ dzaˇ biˇ dzaˬ-eu naˆ maˬ tseˇ, tsawˇ shaˬ deuˬ nehˬ-ehˇ nahˬ yu ni dehꞈ-eu muiˬ dzehˬ meh. 20 Dawˬ mehˬ dawˬ tsoˆ naˇ haˬ geuꞈ-eu deuˬ baw le za le-awˇ, Sahˬpaˬ Miˬyehˇ-ahˇ gʼoe-eu deuˬ laˬ kʼaˬ ya cehˇ tehꞈ-a. 21 Nui ma laꞈ kʼoeˇ zaˬ siˬ tsawˇ gahˇ byah-eu gʼaˬ, noeˬ siˬ noeˬ mawˇ nya-eu tsawˇ haˬ lehˇ bi kuˇ-awˇ, naˇ haˬ mawꞈ-eu dawˬ ngehˬ nya-eu tsawˇ haˬ-ahˇ, aˬ cawˬ ya leˇ-eu meh. 22 Zaˬ siˬ tsawˇ gahˇ-aˬ, tsawˇ gahˇ ahˇ-eu deuˬ gʼaˇ duˬ dehꞈ-eu saꞈ laˇ lawˇ baˬ pyeuꞈ-awˇ, aˬ dzawˬ aˇ gah-ahˇ mehˬ paˇ-eu jeˬ-aˬ, aˇ yamˬ laˆ smˬ gaˇ duˇ-eu meh. 23 Zaˬ siˬ tsawˇ gahˇ ahˇ-eu deuˬ dawˬ maˬ ngehˬ mi naˆ-ehˇ, yaw muiˬ paˬ-ehˇ shaˇ noeˬ-eu miˇ neh, kʼaˇ ngehˬ doˆ-euˬ dawˬ naˇ haˬ muiˬ-eu meh. 24 Dawˬ muiˬ tmˇ-eu byaˬ byaˬ uiˇ-ahˇ duˇ-awˇ, nui ma-ahˇ laˬ kʼaˬ bi cehˇ-awˇ, gʼawˇ mawˇ-ahˇ jawˇ saˇ bi doˆ-eu meh. 25 Dehꞈ-eu gaˇ ma duˇ-euˬ gaˇ muiˬ, shiˇ-eu gaˇ ma ngeuˇ law ma jeˇ. 26 Myawˬ kʼaˆ mˇ-eu tsawˇ haˬ hawˬ kuiˇ-awˇ, kʼaˬ meh baˬ da neh gaˇ ya mˇ-eu meh. 27 Haiˬ-eu tsawˇ haˬ aˬ cawˬ-ahˇ mˇ coeˬ-eu toˆ-awˇ, aˬ yawꞈ maꞈ-euˬ dawˬ miˬ dzaˬ doꞈ-eu meh. 28 Tsawˇ doeˇ iˬ dehˬ iˬ ceh laˆ myaˬ-awˇ, dawˬ saˆ saˆ kʼoeˬ-eu jeˬ nui ma laˆ gʼawˬ-eu meh. 29 Haiˬ-eu tsawˇ haˬ deuˬ yawˬ ha-euˬ cawˬ-ahˇ mehˇ shuiˇ shuiˇ-awˇ, cawˆ-iˇ-eu gaˇ ma-ahˇ sheuˬ gʼeh-eu meh. 30 Myaˆ nuiˆ kʼoˆ tehˆ myawˆ myawˆ-ehˇ tehˆ-eu tsawˇ haˬ maˬ muiˬ-eu jeˬ shaˇ sawˇ luꞈ-awˇ, mehˬ luˬ tsehꞈ tehˬ-eu tsawˇ haˬ yaw haiˬ jeˬ mˇ-eu gʼeh-eu meh. 31 Yaw tsaˬ yaw dawˇ tsawˇ haˬ ziˇ baw-awˇ, uˬ duˬ dehꞈ pyuˇ-eu jeˬ yaw shehꞈ kʼahˬ sehˇ tiˬ jeˬ meh. 32 Oˇ dzeuˇ nya-eu jeˬ-aˬ, aˬ cawˬ-ahˇ gʼaˬ leˇ-eu jeˬ naˆ maˬ tseˇ muiˬ-awˇ, meuˬ meuˬ lah-ehˇ deuˆ gʼaˬ-eu naˆ maˬ tseˇ, yawˬ ha-euˬ nui ma-ahˇ gʼaˬ leˇ-eu poeˬ dzehˬ meh. 33 Tsawˇ haˬ zaˬ ja maw maw nya kʼawꞈ, yaw muiˬ yaw doeˇ jahˇ tsehˆ-eu jeˬ, Miˬyehˇ-euˬ laꞈ-ahˇ jaˆ-eu meh. |
Akha Bible Revision (Latin Script) © Thailand Bible Society, 2011.
Thailand Bible Society