Dawqdaq 13 - Akha

¹ Aˬ li yaw gahˇ aˬ da mehˬ gaˇ naˇ haˬ-awˇ, aˬ dzawˬ gʼaˬ yaw lehˬ maˬ geuꞈ mawꞈ-a.

² Dawˬ muiˬ tsawˇ muiˬ-ahˇ mˇ cu-awˇ, tsawˇ doeˇ nui kʼahˇ yaw cawˆ jeˬ tehꞈ meh.

³ Yawˬ ha-euˬ mehˬ laˇ-ahˇ bo nya-eu gʼaˬ ziˇ baw-awˇ, dawˬ ja myaˬ-eu tsawˇ haˬ cawˆ-iˇ-eu meh.

⁴ Yaw doeˇ neh noeˬ tmˬ-euˬ jeˬ tiˬ jawˇ-iˬ maˬ keuˆ le-ehˇ, leh jeh-eu deuˬ-euˬ nui kʼahˇ maˬ lehˬ-iˇ-a.

⁵ Yaw tsaˬ yaw dawˇ tsawˇ haˬ-aˬ, maˬ tsaˬ-eu jeˬ-ahˇ bye-awˇ, haiˬ-eu tsawˇ haˬ daˬ ga-eu jeˬ mˇ doˆ laꞈ-eu meh.

⁶ Muiˬ-eu jaˬ-eu tsawˇ haˬ yaw tsaˬ yaw dawˇ jeˬ neh bi ciˬ tuˇ-awˇ, haiˬ-eu tsawˇ haˬ iˬ baˇ neh bi nawˬ lah-eu meh.

⁷ Smˇ muiˬ geuꞈ-eu iˇ shaˬ deuˬ jawˇ-eu loꞈ-ehˇ, iˇ shaˬ geuꞈ-eu smˇ muiˬ deuˬ jawˇ-eu meh.

⁸ Smˇ muiˬ deuˬ pyuˇ shuiˇ neh uˬ kʼawˇ ya shaˬ piˇ kʼawꞈ, iˇ shaˬ zaˬ-ahˇ muiˇ-eu gʼaˬ maˬ jawˇ-a.

⁹ Yaw tsaˬ yaw dawˇ deuˬ bya dui dui-eu tsiˇ kʼmˬ kʼmˬ ma-ahˇ duˇ-awˇ, yaw haiˬ deuˬ miˆ-iˇ luꞈ-eu tsiˇ du du zaˬ-ahˇ duˇ-eu meh.

¹⁰ Naˬ bawˇ maˬ tsoꞈ-eu iˬ dehˬ iˬ ceh laˆ doˆ-awˇ, aˬ cawˬ mehˬ gaˇ naˇ haˬ geuꞈ-eu deuˬ tsawˇ gahˇ za-eu meh.

¹¹ Yehˬ bawˬ-ehˇ laˆ za-euˬ pyuˇ shuiˇ yaw kawˇ-ehˇ byoˆ le-awˇ, aw lawˆ-ehˇ mˇ jaˆ-euˬ jeˬ lahˬ laˇ-eu meh.

¹² Noeˬ tmˬ-eu jeˬ byoˆ le ngeh, nui ma-ahˇ zaw laˇ-awˇ, nui kʼahˇ byah laˇ ngeh, laˬ kʼaˬ cehˇ dehˆ-euˬ maˬ baw-a.

¹³ Dawˬ mehˬ dawˬ tsoˆ maˬ naˇ haˬ-eu tsawˇ haˬ, shaˬ zahˬ shaˇ pi gaˇ duˇ-awˇ, dawˬ mehˬ dawˬ tsoˆ naˇ haˬ geuꞈ-eu tsawˇ haˬ, guiˬ lahˬ shaˇ baꞈ gaˇ duˇ-eu meh.

¹⁴ Tsawˇ gahˇ ahˇ-eu deuˬ neh mehˬ-euˬ tsoˆ-euˬ dawˬ deuˬ, dehꞈ-eu saꞈ laˇ lawˇ gawˆ yoeˇ gaˇ duˇ-awˇ, shiˇ-eu lahˇ ju-ahˇ sheuˬ dzeuˇ nya-eu meh.

¹⁵ Dehꞈ tsaˬ dehꞈ tsahˇ nya-eu tsawˇ haˬ myaˆ pyawˬ naˇ mehˇ jaˆ-awˇ, saˇ jaˇ maˬ ziꞈ-eu tsawˇ haˬ cawˆ-iˇ-eu gaˇ ma-ahˇ cah luꞈ-eu meh.

¹⁶ Nui ma-ahˇ noeˬ-eu tsawˇ haˬ yawˬ jeˬ na luꞈ shaˇ noeˬ-awˇ mˇ-awˇ, aˬ dzawˬ deuˬ yawˬ ha dawˇ ga ga-eu gaˇ kawˆ, aˬ cawˬ mehˬ shi mˇ mehˬ gaˇ duˇ-eu meh.

¹⁷ Dawˬ tsaꞈ maˬ nya-eu deuˬ gaˇ kawˆ laˆ doˆ-awˇ, dawˬ dzawˇ nya-eu deuˬ laˆ tsaˬ laˆ tsahˇ-eu meh.

¹⁸ Mehˬ nehˬ tsoˆ nehˬ gaˇ maˬ naˇ haˬ-eu tsawˇ haˬ shaˬ le zahˬ le-awˇ, mehˬ gaˇ tsoˆ gaˇ naˇ haˬ-eu tsawˇ haˬ-ahˇ aˬ cawˬ yaw zeu baw tehꞈ-a.

¹⁹ Yawˬ ha-euˬ nui kʼahˇ byah laˇ-eu jeˬ aˇ naˆ ni muiˬ-eu nga. Ehˇ kʼawꞈ, aˬ dzawˬ aˇ gah deuˬ yaw haiˬ jeˬ-ahˇ maˬ byehˇ coeˇ-a.

²⁰ Zaˬ siˬ tsawˇ gahˇ byah-eu deuˬ nehˬ-ehˇ cah-eu tsawˇ haˬ tsawˇ gahˇ ahˇ laˇ-awˇ, aˬ dzawˬ aˇ gah deuˬ nehˬ-ehˇ cawˬ cawˬ-eu tsawˇ haˬ, ya luˬ ya seˇ-iˇ tehꞈ-a.

²¹ Iˬ baˇ mˇ-eu deuˬ-euˬ mehˬ nah guˆ-eu gaˆ-eu jeˬ caw teh-awˇ, yaw tsaˬ yaw dawˇ deuˬ mehˬ shi guiˬ lahˬ keuˆ le tehꞈ-a.

²² Muiˬ-eu jaˬ-eu tsawˇ haˬ oeˬ paˬ oeˬ ma deuˬ-ahˇ jeˬ biˇ biꞈ yaꞈ nya kʼawꞈ, iˬ baˇ mˇ-eu deuˬ-euˬ pyuˇ shuiˇ myawˬ gahˬ yaw tsaˬ yaw dawˇ tsawˇ haˬ-euˬ laꞈ-ahˇ le tehꞈ-a.

²³ Iˇ shaˬ zaˬ deuˬ yaˇ naˆ mˇ-awˇ za le kʼawꞈ, maˬ tsaˬ maˬ dawˇ-eu deuˬ neh bi laˆ byoˆ-eu meh.

²⁴ Daˇ cuiˇ neh maˬ zuiˆ-eu aˬ da-aˬ, yawˬ ha-euˬ aˬ li-ahˇ maˬ gaˬ-a. Yawˬ ha-euˬ zaˬ-ahˇ gaˬ-eu tsawˇ haˬ, yaw kʼaˆ kʼaˆ-ehˇ mehˬ-eu tsoˆ-eu meh.

²⁵ Yaw tsaˬ yaw dawˇ deuˬ ya dzaˬ ya dawˇ dehˆ kʼawꞈ, maˬ tsaˬ maˬ dawˇ-eu deuˬ mehꞈ-eu shuꞈ-eu meh.