Dawqdaq 12 - Akha

¹ Zaˬ siˬ tsawˇ gahˇ ahˇ-eu tsawˇ haˬ, mehˬ nehˬ tsoˆ-nehˬ gaˇ naˇ haˬ-awˇ, aˬ dzawˬ aˇ gah-ahˇ maˬ mehˬ paˇ nya-a.

² Tsawˇ muiˬ-ahˇ Sahˬpaˬ Miˬyehˇ nui kʼahˇ shiˇ-awˇ, yaw haiˬ jeˬ toˆ-eu tsawˇ doeˇ-ahˇ aˬ yawꞈ bye-eu meh.

³ Yaw haiˬ jeˬ mˇ-awˇ nymˇ dahˬ maˬ laˆ ziꞈ nya-a. Ehˇ kʼawꞈ, yaw tsaˬ yaw dawˇ deuˬ-euˬ dawˬ pehˬ duˬ puˇ, ziꞈ dah ni jaˆ-eu meh.

⁴ Muiˬ-eu miˬ zaˬ-aˬ, yo zaˬ-euˬ kʼahˬ sehˇ pyeuꞈ-awˇ, daˬ ga-eu miˬ zaˬ-aˬ, yo zaˬ-euˬ yoeˬ laꞈ laˆ buꞈ-eu meh.

⁵ Yaw tsaˬ yaw dawˇ tsawˇ haˬ nui ma dawˇ-awˇ, haiˬ-eu tsawˇ haˬ-euˬ mehˬ bawˬ nui gʼoꞈ ahˇ-eu meh.

⁶ Haiˬ-eu tsawˇ haˬ-euˬ dawˬ aˬ cawˬ-ahˇ shiˬ laˆ doˆ-awˇ, yaw tsaˬ yaw dawˇ deuˬ-euˬ kʼaˬ meh aˬ cawˬ-ahˇ ka kʼoꞈ-eu meh.

⁷ Haiˬ-eu tsawˇ haˬ-euˬ tsuiꞈ dahˬ-iˇ-awˇ, yaw tsaˬ yaw dawˇ deuˬ zaˬ oeˬ sahˇ le tehꞈ-a.

⁸ Bawˬ toˆ muiˬ-eu tsawˇ haˬ-ahˇ aˬ cawˬ ja ceuˬ-awˇ, nui noeˬ doeˇ-eu tsawˇ haˬ-ahˇ aˬ cawˬ noeˬ teˬ-eu meh.

⁹ Tsawˇ myahˇ doˆ-awˇ hawˬ mehꞈ shaˬ-eu naˆ maˬ tseˇ, tsawˇ myahˇ teˬ-awˇ hawˬ dzaˬ dehˆ-eu muiˬ dzehˬ meh.

¹⁰ Yaw tsaˬ yaw dawˇ tsawˇ haˬ-aˬ, yawˬ ha-euˬ jeˬ zaˬ-ahˇ ngeh gʼeh-awˇ, haiˬ-eu tsawˇ haˬ-aˬ, yawˬ ha-euˬ jeˬ zaˬ-ahˇ kʼehˬ-eu meh.

¹¹ Miˇ tsaˬ-ahˇ beuˬ nahˇ-eu tsawˇ haˬ, dzaˬ dzaˬ dawˇ dawˇ jaˆ-awˇ, nui loˆ mehˬ nah teh-eu tsawˇ haˬ, gaˇ dahˇ maˬ tsoeˬ-a.

¹² Haiˬ-eu tsawˇ haˬ deuˬ neh ziꞈ dah ni gawˬ taˬ-euˬ nymˇ byaˆ-iˇ-awˇ, yaw tsaˬ yaw dawˇ tsawˇ haˬ duˬ ciˇ ziꞈ dah ni jaˆ tehꞈ-a.

¹³ Haiˬ-eu tsawˇ haˬ yawˬ ha-euˬ mehˬ luˬ neh kʼmˇ-euˬ lahˇ ju-ahˇ paꞈ leˇ-awˇ, yaw tsaˬ yaw dawˇ tsawˇ haˬ deuˬ guˆ-eu gaˆ-eu jeˬ-ahˇ ya buˬ-iˇ tehꞈ-a.

¹⁴ Yawˬ ha neh ngehˬ-euˬ tmˇ-euˬ dawˬ yawˬ ha-ahˇ mˇ cu-awˇ yawˬ ha neh mˇ-euˬ gaˇ yawˬ ha jawˇ gaˇ gʼoꞈ kʼoꞈ laˇ tehꞈ-a.

¹⁵ Dawˇ ga deuˬ yaw gahˇ ma lehˇ noeˬ-awˇ, yaw gahˇ deuˬ aˬ cawˬ mehˬ gaˇ naˇ haˬ-eu meh.

¹⁶ Aˬ dzawˬ aˇ gah-euˬ nui pehˇ bya cehˆ ni mawˇ laˇ kʼawꞈ, tsawˇ gahˇ ahˇ-eu deuˬ dawˬ doeˇ oˇ dzeuˇ nya-eu meh.

¹⁷ Dawˬ tsaˬ ngehˬ-eu kʼaˬ meh yaw dawˇ jeˬ doˆ laˇ-awˇ, jaˬ myawꞈ myawꞈ-eu kʼaˬ meh mehˇ shuiˇ doˆ laˇ-eu meh.

¹⁸ Dawˬ doeˇ ngehˬ-eu mi cehˇ coeˇ gaˇ duˇ-awˇ, tsawˇ gahˇ ahˇ-eu dawˬ muiˬ, jaˆ gʼaˬ-ahˇ duˇ-eu meh.

¹⁹ Jaˬ myawꞈ myawꞈ-eu uˬ kʼawˇ deuˬ-awˇ, dawˬ muiˬ tmˇ-eu ziˇ baw-eu meh.

²⁰ Yaw haiˬ jeˬ toˆ-eu nui ma jaˬ myawꞈ myawꞈ-awˇ, yaw tsaˬ jeˬ mˇ-eu nui ma laˬ kʼaˬ cehˇ-eu jeˬ byah-eu meh.

²¹ Tsawˇ muiˬ yaw doeˇ maˬ oꞈ. Tsawˇ doeˇ yaw lehˬ maˬ dzeuˇ.

²² Jaˬ myawꞈ myawꞈ-eu mehˬ laˇ-ahˇ Sahˬpaˬ Miˬyehˇ nui daˆ daˆ-awˇ, saˇ jaˇ ziꞈ-eu deuˬ-ahˇ aˬ yawꞈ nui kʼahˇ shiˇ meh.

²³ Yaw gahˇ deuˬ tsawˇ gahˇ ciˬ zaꞈ-awˇ, dawˇ ga deuˬ lawˇ behˇ baꞈ doˆ-eu meh.

²⁴ Mˇ coeˇ shaˇ coeˇ-eu deuˬ dzoeˬ dzaˬ oꞈ-awˇ, nymˇ gawˬ deuˬ zaˬ kʼaˆ ya geuꞈ-eu meh.

²⁵ Kʼahˬ lahˇ-eu nui ma yawˬ ha-ahˇ kʼehˬ-awˇ, dawˬ muiˬ tmˇ gaˇ nui saˇ caw-eu meh.

²⁶ Yaw tsaˬ yaw dawˇ tsawˇ haˬ gaˇ dawˇ mah mehˬ mehˬ-awˇ, haiˬ-eu tsawˇ haˬ gaˇ bahˬ sheuˬ ahˇ-eu meh.

²⁷ Nymˇ gawˬ shaˬ maˬ mi nya-ehˇ, mˇ gaˇ gaˬ-eu tsawˇ haˬ pyuˇ shuiˇ jaˆ le-eu meh.

²⁸ Yaw tsaˬ yaw dawˇ jeˬ-aˬ, dehꞈ-eu gaˇ ma pyeuꞈ-awˇ, yaw haiˬ jeˬ-aˬ, shiˇ-eu gaˇ dahˬ meh.