Biblia Todo Logo
Bìoball air-loidhne

- Sanasan -

Dawqdaq 1 - Akha


Dawˬ daˬ aˇ poeˬ kʼaˆ-eu gaˇ kawˆ

1 Daˬbiˇ-euˬ aˬ li Iˇsaˬleˬlaˆ sahˬ paˬ Sawˇlaˆmoˬ-euˬ dawˬ daˬ deuˬ.

2 Dawˬ daˬ heu deuˬ-aˬ, zaˬ siˬ tsawˇ gahˇ hawˇ-eu muiˬ dui dui-eu mehˬ-eu tsoˆ-eu dawˬ deuˬ-ahˇ nawˇ siˬ nya-awˇ, dawˬ tsuiꞈ naꞈ dui dui-eu dawˬ deuˬ-ahˇ nawˇ gʼoˆ shaw nya-eu gʼaˇ duˬ pyeuꞈ-eu meh.

3 Nui gahˇ byah-eu laꞈ kʼoeˇ yaw dehꞈ dehꞈ-eu gʼaˇ duˬ maˬ ehˇ, nui ma yaw sui yaw dawˇ laꞈ kʼoeˇ, aˬ cawˬ-ahˇ tsaˬ leˇ tsahˇ leˇ-awˇ dehꞈ-eu gʼaˇ duˬ maˬ ehˇ, dawˬ daˬ heu deuˬ nawˬ-ahˇ mehˬ nehˬ tsoˆ nehˬ nya-eu meh.

4 Maˬ bym maˬ byehˆ-eu deuˬ-ahˇ bi bym bi byehˆ laˇ nya-awˇ, zaˬ guˬ deuˬ-ahˇ gaˇ dahˇ tsoeˬ-eu tsawˇ haˬ bi pyeuꞈ laˇ nya-eu meh.

5 Dawˬ daˬ heu deuˬ-aˬ, nui gahˇ ahˇ-eu deuˬ-ahˇ bi gahˇ dzehˬ laˇ-awˇ, zaˬ siˬ tsawˇ gahˇ byah-eu tsawˇ haˬ deuˬ-ahˇ bi byah dzehˬ laˇ-eu miˇ neh,

6 dawˬ tsuiꞈ naꞈ-eu dawˬ daˬ-ahˇ aˬ yawꞈ maꞈ gʼoˆ shaw nya-awˇ, nui gahˇ byah-eu deuˬ neh tsaˬ dzoˆ dzoˆ-euˬ dawˬ-ahˇ puiˇ pyehˬ nya-eu meh.


Zaˬ guˬ deuˬ-ahˇ mehˬ-eu tsoˆ-eu dawˬ

7 Sahˬpaˬ Miˬyehˇ-ahˇ guˆ-eu jeˬ-aˬ, zaˬ siˬ tsawˇ gahˇ-euˬ duˬ ciˇ meh. Zaˬ siˬ tsawˇ gahˇ hawˇ-eu dawˬ mehˬ dawˬ tsoˆ-ahˇ bye-eu deuˬ-aˬ, aˬ dzawˬ aˇ gah meh.

8 Ngaˬ li-oˇ, nawˬ da dawˬ mehˬ dawˬ tsoˆ tsoˆ gaˇ naˇ haˬ geuꞈ-awˇ, nawˬ ma neh mehˬ nehˬ laꞈ-euˬ dawˬ-ahˇ taˬ byehˇ.

9 Dawˬ kʼoeˇ deuˬ nawˬ-euˬ uˬ duˬ-ahˇ geuꞈ luꞈ-eu aˇ yehˆ hawˇ-eu, nawˬ-euˬ kawˬ lahˇ-ahˇ dah luꞈ-eu lahˇ dah loꞈ-ehˇ, nawˬ-ahˇ bi haw jaˬ-eu meh.

10 Ngaˬ li-oˇ, iˬ baˇ mˇ-eu deuˬ nawˬ-ahˇ muˇ juˇ juˇ ngeh, aˬ yawꞈ maꞈ-ahˇ mehˬ bawˬ taˬ gm.

11 “Oe-awˬ, tsawˇ haˬ sehꞈ kaˇ-euˇ. Iˬ baˇ maˬ ahˇ-eu deuˬ-ahˇ sehꞈ niˇ gʼa kaˇ-euˇ.

12 Shiˇ-eu miˇ kʼahˬ-ahˇ yaw dehꞈ-ehˇ bi myoꞈ ahˇ-euˬ loꞈ-ehˇ jahˇ nehˬ-awˇ, duˬ kʼahˬ-ahˇ ga byoˆ-euˬ loꞈ-ehˇ laˆ deuˬ nehˬ kaˇ-euˇ.

13 Pyuˇ shuiˇ myawˬ gahˬ yawˬ jeˬ na luꞈ za-awˇ, tahˇ joe joe za-euˬ myawˬ gahˬ deuˬ, iˇ kahˇ tiˬ byah baꞈ taˬ kaˇ-euˇ.

14 Nga maꞈ aˇ muˇ-ahˇ uˇ laˇ-awˬ. Pyuˇ pawˬ behˆ tiˬ gaˇ taꞈ ma” lehˇ, aˬ yawꞈ maꞈ nawˬ-ahˇ ehˇ laˇ ngeh,

15 ngaˬ li-oˇ, kʼoeˇ loꞈ-ehˇ ehˇ-eu deuˬ-euˬ meh nah taˬ caw teh. Aˬ yawꞈ maꞈ-euˬ gaˇ ma-ahˇ taˬ cah.

16 Yaw haiˬ jeˬ mˇ-eu gʼaˇ duˬ aˬ yawꞈ maꞈ aˬ kuiˇ aˬ laꞈ kawˇ-awˇ, tsawˇ haˬ-ahˇ sehꞈ ngeh kʼahˇ kʼoꞈ-eu maˬ baw-a.

17 Aˇ jiˇ haw luꞈ ngeh lahˇ ju kʼmˇ-eu-aˬ, gaˇ dahˇ maˬ tsoeˬ leˇ-a.

18 Ehˇ kʼawꞈ yawˬ ha uˬ kʼawˇ yawˬ ha laˆ deuˬ-eu lehˇ, tsawˇ haˬ kʼoeˇ deuˬ joe yuꞈ-awˇ loꞈ-eu meh. Yawˬ ha-ahˇ bi pyeuˆ sehꞈ-eu jeˬ beuˆ tahˇ luꞈ-eu meh.

19 Heu-aˬ, yaw haiˬ mˇ-awˇ dehꞈ dzaˬ-eu deuˬ ya iˇ-eu, maˬ law-iˇ nya-eu gaˇ ma meh. Aˬ cawˬ-ahˇ tahˇ joe joe-eu tsawˇ haˬ, yawˬ ha-euˬ saꞈ laˇ maˬ lahˇ dzeuˇ-a.


Zaˬ siˬ tsawˇ gahˇ guˇ-eu dawˬ

20 Naˇ haˬ sheˇ, meuˬ-eu gaˇ ma doe ni zaˬ siˬ tsawˇ gahˇ guˇ luꞈ meh. Lehˆ kawˆ doe ni yaw kʼaˆ-ehˇ guˇ luꞈ meh.

21 Tsawˇ haˬ kʼaˇ uiˬ leˇ gaˇ guˇ-awˇ, lahˇ kʼehˬ doe ni dawˬ ngehˬ luꞈ meh.

22 “Aˬ dzawˬ deuˬ-oˇ, aˇ myah keuˆ ni dzawˬ-eu gʼeh te. Aˇ gah deuˬ-oˇ, aˇ myah keuˆ ni gah-eu gʼeh te. Aˇ myah keuˆ ni zaˬ siˬ tsawˇ gahˇ-ahˇ ja bu-eu gʼeh te.

23 Ngaˇ saˇ kiˇ kamˬ gaˇ naˇ haˬ sheˇ. Ngaˬ-euˬ nui gahˇ naw maꞈ-ahˇ shehˆ daˆ nehˬ-awˇ, ngaˬ-euˬ dawˬ naw maꞈ-ahˇ bi gaˬ le ma.

24 Naw maꞈ-ahˇ ngaˇ kuˇ kʼawꞈ, tiˬ gʼaˬ-iˬ maˬ naˇ haˬ nehˬ laꞈ-ehˇ, ngaˇ laꞈ liˆ liˆ gaˇ tiˬ gʼaˬ-iˬ maˬ haw cawˬ nehˬ laꞈ-eu uˬ taꞈ,

25 ngaˬ neh ja sawˇ nehˬ-euˬ dawˬ-ahˇ maˬ geuꞈ-ehˇ, ngaˬ neh mehˬ nehˬ tsoˆ nehˬ-euˬ jeˬ-ahˇ maˬ naˇ haˬ geuꞈ-eu miˇ neh,

26 Naw maꞈ shaˬ zahˬ naꞈ ngeh ngaˇ uiˇ haw-awˇ, guˆ-eu gaˆ-eu jeˬ keuˆ le ngeh naˬ gʼa ma.

27 Shaˬ zahˬ jaˬ lehˇ lehˇ ma oe-awˇ, guˆ-eu gaˆ-eu jaˬ lehˇ lehˇ zeuˆ keuˆ le ngeh, naw maꞈ laˇ baˇ-iˇ tehꞈ-a.

28 Kʼoeˇ ngeh naw maꞈ ngaˬ-ahˇ kuˇ kʼawꞈ, ngaˇ maˬ naˇ haˬ. Naw maꞈ ngaˬ-ahˇ poˆ sehꞈ leꞈ kʼawꞈ, maˬ poˆ mawˇ nya-aˇ.

29 Zaˬ siˬ tsawˇ gahˇ-ahˇ naw maꞈ bye-awˇ, Sahˬpaˬ Miˬyehˇ-ahˇ guˆ-eu jeˬ-ahˇ maˬ tseˇ geuꞈ-eu uˬ taꞈ,

30 ja sawˇ nehˬ-euˬ dawˬ-ahˇ maˬ naˇ haˬ-ehˇ, dawˬ mehˬ dawˬ tsoˆ maˬ naˇ haˬ-eu miˇ neh,

31 yawˬ ha kʼaˇ sehˬ taˬ-euˬ jeˬ ya yehˬ-awˇ, yawˬ ha neh yaw doeˇ jahˇ-euˬ jeˬ, yawˬ ha-ahˇ gʼoꞈ kʼoꞈ laˇ tehꞈ-a.

32 Yaw haiˬ deuˬ tsawˇ gahˇ-ahˇ bye-eu miˇ neh ya shiˇ-awˇ, aˬ dzawˬ aˇ gah deuˬ kʼaˇ dehꞈ mawꞈ-eu dehꞈ gaˇ shiˇ leˇ tehꞈ-a.

33 Ehˇ kʼawꞈ ngaˬ-euˬ ehˇ dawˬ naˇ haˬ-eu deuˬ ziꞈ dah ni dehꞈ-awˇ, guˆ-eu gaˆ-eu jeˬ maˬ jaˆ-a.”

Akha Bible Revision (Latin Script) © Thailand Bible Society, 2011.

Thailand Bible Society
Lean sinn:



Sanasan