Dawˬmehˬ 7 - Akha

Sahˬpaˬ Miˬyehˇ-euˬ tsawˇ jeuˬ

¹ “Naw maꞈ jawˇ leˇ-eu lehˇ gʼeh-eu miˇ kʼahˬ kʼoeˇ kʼahˬ-ahˇ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ naw maꞈ-ahˇ sheuˬ uˇ gʼeh-awˇ, kʼoeˇ gaˇ jawˇ-eu tsawˇ jeuˬ gʼawˬ mya jeuˬ-ahˇ aˬ yawꞈ teh doˆ tehꞈ-a. Naw maꞈ le-eu nehˬ-ehˇ, naw maꞈ myaˆ maˬ tseˇ myaˬ dzehˬ-awˇ gʼaˬ kʼaˆ dzehˬ-eu tsawˇ jeuˬ shiꞈ jeuˬ-ahˇ aˬ yawꞈ teh doˆ tehꞈ-a. Tsawˇ jeuˬ kʼoeˇ deuˬ-aˬ, Heˬtaˆ tsawˇ jeuˬ, Geuˬgaˬshaˆ tsawˇ jeuˬ, Aˬmoˬ tsawˇ jeuˬ, Kaˬnaˬ tsawˇ jeuˬ Paˬyehˆ tsawˇ jeuˬ, Hiˇbiˇ tsawˇ jeuˬ hawˇ-eu Yeˬbuˇ tsawˇ jeuˬ meh.

² Tsawˇ jeuˬ kʼoeˇ deuˬ naw maꞈ-euˬ laꞈ-ahˇ ahˇ le ni, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ jahˇ-awˇ, aˬ yawꞈ maꞈ dawˬ tawˆ luꞈ-ahˇ naw maꞈ ya sehꞈ meh. Aˬ yawꞈ maꞈ nehˬ-ehˇ saˇ jaˇ taˬ dzaˬ.

³ Gʼawˬ shaˬ kʼawꞈ taˬ gaˬ nehˬ. Aˬ yawꞈ maꞈ nehˬ-ehˇ taˬ sheuˬ dahˬ dzaˬ. Naw maꞈ-euˬ zaˬ deuˬ kʼawꞈ aˬ yawꞈ maꞈ-euˬ zaˬ deuˬ nehˬ-ehˇ taˬ bi sheuˬ dahˬ dzaˬ.

⁴ Aˬ jeˬ miˇ neh ehˇ naˇ, aˬ yawꞈ maꞈ naw maꞈ-euˬ zaˬ deuˬ-ahˇ Sahˬpaˬ Miˬyehˇ-ahˇ sheuˬ gʼawˬ-awˇ, miˬyehˇ nui deuˬ-ahˇ uˬ duˬ bi tahˬ tehꞈ-a. Kʼoeˇ loꞈ-ehˇ pyeuꞈ laˇ naˇ, naw maꞈ-ahˇ Sahˬpaˬ Miˬyehˇ nui ma pehˇ-awˇ, naw maꞈ-ahˇ tiˬ poˆ tehꞈ-ehˇ laˆ luˬ laˆ seˇ nehˬ laꞈ tehꞈ-a.

⁵ Kʼoeˇ miˇ neh, aˬ yawꞈ maꞈ-euˬ lawˇ duˬ deh pyaˆ-awˇ, aˬ yawꞈ maꞈ-euˬ muiˬ-eu shawˇ-eu kʼawˇ zeuˇ deuˬ laˆ cawˆ nehˬ-awˬ. Aˬ yawꞈ maꞈ-euˬ miˬyehˇ ma Aˬsheˇlaˬ-euˬ tahˬ pahˬ aˬ ma mawˇ kawˇ deuˬ kʼawꞈ laˆ cawˆ nehˬ-awˇ, aˬ yawꞈ maꞈ-euˬ tahˬ pahˬ aˬ ma mawˇ kawˇ deuˬ-ahˇ miˬ dzaˬ dzah puiˆ-awˬ.

⁶ Naw maꞈ-aˬ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ tsawˇ haˬ pyeuꞈ-eu miˇ neh, kʼoeˇ loꞈ-ehˇ jahˇ-awˬ. Maˇ maˇ ni aˬ yawꞈ-euˬ tsawˇ jeuˬ bi pyeuꞈ laˇ-eu gʼaˇ duˬ, tsawˇ jeuˬ heu myaˆ ni gʼeh-eu laꞈ kʼoeˇ, naw maꞈ-ahˇ aˬ yawꞈ tseˇ doˆ-euˬ meh.

⁷ “Aˬ cawˬ tsawˇ jeuˬ naˆ maˬ tseˇ, naw maꞈ tsawˇ haˬ myaˬ dzehˬ-eu miˇ neh, Sahˬpaˬ Miˬyehˇ naw maꞈ-ahˇ gaˬ-awˇ tseˇ doˆ-euˬ maˬ ngeuˇ-a. Naw maꞈ-aˬ, miˇ tsaˬ kʼoeˇ taˆ aˬ cawˬ naˆ maˬ tseˇ cuiˆ dzehˬ-eu tsawˇ jeuˬ pyeuꞈ-eu meh.

⁸ Sahˬpaˬ Miˬyehˇ naw maꞈ-ahˇ gaˬ-awˇ, naw maꞈ-euˬ aˬ poeˬ aˬ bawˇ deuˬ nehˬ-ehˇ dzaˬ taˬ-euˬ saˇ jaˇ-ahˇ ziꞈ luꞈ-eu meh. Teu baˬ da neh, aˬ yawꞈ-euˬ huiˬ-eu baoˬ-ahˇ gʼoe-eu laꞈ kʼoeˇ, naw maꞈ-ahˇ aˬ yawꞈ ka kʼoꞈ-awˇ, Iˇjiˇtuˆ sahˬ paˬ-euˬ zaˬ kʼaˆ ya geuꞈ-eu laꞈ kʼoeˇ naw maꞈ-ahˇ bi buˬ-iˇ laꞈ-euˬ meh.

⁹ Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ tiˬ gʼaˬ tehꞈ-ehˇ aˬ diˇ aˬ maˇ Miˬyehˇ pyeuꞈ-eu gaˇ maˬ ehˇ, aˬ yawꞈ-euˬ saˇ jaˇ ziꞈ-eu jeˬ-ahˇ maˬ ehˇ, naw maꞈ maˬ ngehˇ ni noeˬ keuˆ-awˬ. Aˬ yawꞈ-ahˇ gaˬ-awˇ aˬ yawꞈ-euˬ zahˇ dawˬ kʼoꞈ dawˬ deuˬ-ahˇ naˇ haˬ geuꞈ-eu tsawˇ haˬ deuˬ-ahˇ, tiˬ heˇ ziˇ keuˆ ni aˬ yawꞈ dawˬ ma saˇ jaˇ ziꞈ-awˇ, maˬ tsehˆ leˇ-eu gʼoeˇ-eu gaˬ-eu jeˬ bi mawˇ tehꞈ-a.

¹⁰ Ehˇ kʼawꞈ, aˬ yawꞈ-ahˇ bye-eu tsawˇ haˬ-ahˇ aˬ yawꞈ maˬ nyi naˬ ni kʼehˬ nehˬ kʼaˆ nehˬ tehꞈ-a.

¹¹ Naw maꞈ-ahˇ kʼaˇ mehˬ kʼaˇ tsoˆ nehˬ laꞈ-euˬ jeˬ-ahˇ, nymˬ-mˇ naw maꞈ naˇ haˬ geuꞈ-awˬ. Iˬ nah ngaˇ naw maꞈ-ahˇ biꞈ-euˬ zahˇ dawˬ kʼoꞈ dawˬ dawˬ tawˆ luꞈ-ahˇ naˇ haˬ geuꞈ-awˬ.

Naˇ haˬ geuꞈ-eu jeˬ-euˬ guiˬ lahˬ

¹² “Zahˇ dawˬ kʼoꞈ dawˬ heu deuˬ-ahˇ naw maꞈ naˇ haˬ geuꞈ-awˇ maˬ byehˇ ni caw teh naˇ, naw maꞈ-euˬ aˬ poeˬ aˬ bawˇ deuˬ-ahˇ Sahˬpaˬ Miˬyehˇ neh saˇ jaˇ dzaˬ taˬ-euˬ loꞈ-ehˇ, naw maꞈ nehˬ-ehˇ dzaˬ taˬ-euˬ dawˬ ma saˇ jaˇ-ahˇ aˬ yawꞈ ziꞈ-awˇ, naw maꞈ-ahˇ aˬ yawꞈ-euˬ gʼoeˇ-eu gaˬ-eu jeˬ maˬ tsehˆ leˇ ni bi mawˇ laꞈ tehꞈ-a.

¹³ Naw maꞈ tsawˇ haˬ myaˬ laˇ-awˇ, zaˬ oeˬ sahˇ jawˇ le ni, aˬ yawꞈ naw maꞈ-ahˇ gaˬ-awˇ guiˬ lahˬ biꞈ laꞈ tehꞈ-a. Dzaˬ la gʼo cehˇ, aˬ gaꞈ dzaˇ uiˇ hawˇ-eu, saˬ loˬ tsiˇ za le ni, naw maꞈ-euˬ deh yaˇ hawˇ-eu yaˇ kmˇ deuˬ-ahˇ aˬ yawꞈ guiˬ lahˬ biꞈ laꞈ tehꞈ-a. Mawˇ neˇ hawˇ-eu yawˇ myaˬ laˇ behˇ laˇ ni, naw maꞈ-ahˇ aˬ yawꞈ guiˬ lahˬ biꞈ laꞈ tehꞈ-a. Naw maꞈ-ahˇ biꞈ-eu gʼaˇ duˬ naw maꞈ-euˬ aˬ poeˬ aˬ bawˇ deuˬ-ahˇ aˬ yawꞈ neh saˇ jaˇ dzaˬ taˬ-euˬ guiˬ lahˬ heu deuˬ, aˬ yawꞈ naw maꞈ-ahˇ biꞈ nehˬ laꞈ tehꞈ-a.

¹⁴ Naw maꞈ loꞈ-ehˇ guiˬ lahˬ tiˬ byah tiˬ loꞈ za-euˬ tsawˇ jeuˬ, miˇ tsaˬ kʼoeˇ taˆ maˬ jawˇ-a. Naw maꞈ laꞈ kʼoeˇ maˬ ehˇ, naw maꞈ-euˬ jeˬ zaˬ deuˬ laꞈ kʼoeˇ maˬ ehˇ, maˬ baw aˬ ma hawˇ-eu meh maˇ maˬ jawˇ ni pyeuꞈ-iˇ tehꞈ-a.

¹⁵ Naˇ-eu gawˇ-eu jeˬ dawˬ tawˆ luꞈ, naw maꞈ kʼoeˇ taˆ maˬ bi keuˆ le ni aˬ yawꞈ laˆ tsoeˬ-awˇ, Iˇjiˇtuˆ miˇ kʼahˬ laꞈ kʼoeˇ naw maꞈ puˬ haw mawˇ haw-euˬ guˆ dui dui laˇ paˬ-ehˇ gʼeh-eu shaˬ zahˬ naˇ gawˇ deuˬ, naw maꞈ kʼoeˇ taˆ maˬ bi keuˆ le-aˇ. Ehˇ kʼawꞈ, naw maꞈ-ahˇ muiˇ-eu tsawˇ haˬ dawˬ tawˆ luꞈ kʼoeˇ taˆ, kʼoeˇ loꞈ-ehˇ gʼeh-eu jeˬ aˬ yawꞈ bi keuˆ le tehꞈ-a.

¹⁶ Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh naw maꞈ-euˬ laꞈ-ahˇ bi ahˇ le-euˬ tsawˇ jeuˬ dawˬ tawˆ luꞈ-ahˇ, naw maꞈ laˆ luˬ laˆ seˇ nehˬ-awˬ. Aˬ yawꞈ maꞈ-ahˇ gʼawˬ shaˬ taˬ gaˬ. Aˬ yawꞈ maꞈ-euˬ miˬyehˇ deuˬ-ahˇ uˬ duˬ taˬ tahˬ. Aˬ jeˬ miˇ neh ehˇ naˇ, kʼoeˇ loꞈ-ehˇ jahˇ-eu jeˬ-aˬ, naw maꞈ-ahˇ lahˇ ju kʼmˇ gaˇ duˇ-eu meh.

¹⁷ “Tsawˇ haˬ heu deuˬ naw maꞈ myaˆ maˬ tseˇ myaˬ dzehˬ-eu miˇ neh maˬ teh doˆ nya luꞈ-a lehˇ naw maꞈ yawˬ haˇ yawˬ ha taˬ ehˇ.

¹⁸ Aˬ yawꞈ maꞈ-ahˇ taˬ guˆ. Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh Iˇjiˇtuˆ sahˬ paˬ hawˇ-eu aˬ yawꞈ-euˬ tsawˇ haˬ deuˬ-ahˇ jahˇ nehˬ-euˬ gaˇ noeˬ keuˆ-awˬ.

¹⁹ Naw maꞈ-euˬ myaˆ-ahˇ ya mawˇ duˬ-euˬ guˆ dui dui laˇ paˬ-ehˇ gʼeh-eu jeˬ, zahˬ leˇ paˬ-ehˇ gʼeh-eu jeˬ hawˇ-eu kʼaˆ jeˬ-ehˇ gʼeh-eu jeˬ, huiˬ-eu baoˬ hawˇ-eu gʼaˬ, heu deuˬ-ahˇ gʼoe-awˇ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ naw maꞈ-ahˇ bi buˬ-iˇ laꞈ-euˬ gaˇ noeˬ keuˆ-awˬ. Iˇjiˇtuˆ tsawˇ haˬ deuˬ-ahˇ aˬ yawꞈ laˆ luˬ laˆ seˇ nehˬ-euˬ loꞈ-ehˇ, iˬ nah naw maꞈ guˆ luꞈ-eu tsawˇ haˬ dawˬ tawˆ luꞈ-ahˇ aˬ yawꞈ laˆ luˬ laˆ seˇ nehˬ tehꞈ-a.

²⁰ Cehˆ dzeuˇ-euˬ deuˬ hawˇ-eu cehˆ zaꞈ dzuˇ zaꞈ-euˬ tsawˇ haˬ deuˬ-ahˇ laˆ luˬ laˆ seˇ nehˬ-eu gʼaˇ duˬ, Sahˬpaˬ Miˬyehˇ byaˬ duˇ baˬ maꞈ pyehˬ gʼeh leꞈ tehꞈ-a.

²¹ Kʼoeˇ miˇ neh, tsawˇ haˬ kʼoeˇ deuˬ-ahˇ naw maꞈ taˬ guˆ. Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ naw maꞈ nehˬ-ehˇ jawˇ meh. Aˬ yawꞈ-aˬ, huiˬ dui dui-eu Miˬyehˇ pyeuꞈ-awˇ, guˆ laˇ paˬ-ehˇ gʼeh-eu meh.

²² Naw maꞈ le gʼeh leꞈ-eu nehˬ-ehˇ, aˬ yawꞈ maꞈ-ahˇ tiˬ jawˇ ui cuiˆ ui cuiˆ-ehˇ Sahˬpaˬ Miˬyehˇ teh doˆ nehˬ tehꞈ-a. Aˬ yawꞈ maꞈ dawˬ tawˆ luꞈ-ahˇ, naw maꞈ tiˬ poˆ tehꞈ-ehˇ maˬ laˆ luˬ maˬ laˆ seˇ nehˬ nya-a. Kʼoeˇ loꞈ-ehˇ jahˇ naˇ, bawˇ tsahˬ jeˬ zaˬ myaˬ dui dui laˇ-awˇ, naw maꞈ-ahˇ laˆ bahˬ tehꞈ-a.

²³ Naw maꞈ-ahˇ muiˇ-eu tsawˇ haˬ kʼoeˇ deuˬ naw maꞈ-euˬ laꞈ-ahˇ ahˇ le ni Sahˬpaˬ Miˬyehˇ jahˇ-awˇ, aˬ yawꞈ maꞈ luˬ-iˇ seˇ-iˇ ngeh keuˆ ni laˆ bahˬ laˆ baˆ nehˬ tehꞈ-a.

²⁴ Aˬ yawꞈ maꞈ-euˬ sahˬ paˬ naw maꞈ-euˬ laꞈ-ahˇ ahˇ le ni aˬ yawꞈ jahˇ tehꞈ-a. Sahˬpaˬ kʼoeˇ deuˬ-ahˇ naw maꞈ sehꞈ-awˇ, aˬ cawˬ aˬ yawꞈ maꞈ-ahˇ ya ngehˇ jiˇ gaˇ keuˆ tehꞈ-a. Tsawˇ haˬ tiˬ gʼaˬ-iˬ naw maꞈ-ahˇ maˬ laˆ tsoeˬ nya-eu uˬ taꞈ, yawˬ gʼaˬ na luꞈ-ahˇ naw maꞈ laˆ luˬ laˆ seˇ nehˬ tehꞈ-a.

²⁵ Aˬ yawꞈ maꞈ-euˬ tahˬ pahˬ aˬ ma mawˇ kawˇ deuˬ miˬ dzaˬ-ahˇ dzah puiˆ dzeh-awˬ. Kʼoeˇ-euˬ kʼoeˇ taˆ jaˆ-eu pyuˇ hawˇ-eu shuiˇ-ahˇ mehˇ juiˇ juiˇ-awˇ, yawˬ ha gʼaˇ duˬ naw maꞈ taˬ yuˇ geuꞈ. Yuˇ geuꞈ naˇ, lahˇ ju kʼmˇ taˬ-euˬ gaˇ naw maꞈ paꞈ leˇ tehꞈ-a. Aˬ jeˬ miˇ neh ehˇ naˇ, kʼoeˇ loꞈ-ehˇ jahˇ-eu jeˬ-ahˇ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ nui daˆ daˆ-eu meh.

²⁶ Tsawˇ haˬ kʼoeˇ deuˬ-euˬ tahˬ pahˬ aˬ ma mawˇ kawˇ deuˬ naw maꞈ-euˬ nymˇ-ahˇ taˬ sha ahˇ. Kʼoeˇ loꞈ-ehˇ jahˇ naˇ, yaˬ kʼehˇ yaˬ-eu jeˬ-ahˇ tsawˇ haˬ kʼoeˇ deuˬ ya daˬ-euˬ loꞈ-ehˇ, naw maꞈ kʼawꞈ ya daˬ tehꞈ-a. Tahˬ pahˬ aˬ ma mawˇ kawˇ kʼoeˇ deuˬ-ahˇ naw maꞈ bye-awˇ, nui daˆ daˆ-awˬ. Aˬ jeˬ miˇ neh ehˇ naˇ, kʼoeˇ-aˬ, Sahˬpaˬ Miˬyehˇ neh yaˬ kʼehˇ yaˬ taˬ-euˬ jeˬ pyeuꞈ-eu meh.