Dawˬmehˬ 6 - Akha

Huiˬ dui dui-eu zahˇ dawˬ kʼoꞈ dawˬ

¹ “Heu-aˬ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh ngaˬ-ahˇ dawˬ biꞈ laꞈ-awˇ, naw maꞈ-ahˇ bi mehˬ bi tsoˆ nehˬ laꞈ-euˬ zahˇ dawˬ kʼoꞈdawˬ deuˬ meh. Naw maꞈ jawˇ leˇ-eu lehˇ gʼeh-eu miˇ kʼahˬ kʼoeˇ kʼahˬ laꞈ kʼoeˇ, zahˇ dawˬ kʼoꞈ dawˬ heu deuˬ-ahˇ naw maꞈ caw teh-awˬ.

² Miˇ kʼahˬ kʼoeˇ kʼahˬ laꞈ kʼoeˇ naw maꞈ gʼawˬ myahˇ ni ya dehꞈ ya jawˇ daˆ leꞈ-eu gʼaˇ duˬ, naw maꞈ yaw dehꞈ kʼaˇ dehꞈ kʼoeˇ keuˆ ni, naw maꞈ hawˇ-eu naw maꞈ-euˬ zaˬ deuˬ naw maˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ taˬ huiˬ-awˇ, ngaˇ naw maꞈ-ahˇ biꞈ-eu lehˇ gʼeh-eu aˬ yawꞈ-euˬ zahˇ dawˬ kʼoꞈ dawˬ dawˬ tawˆ luꞈ-ahˇ caw teh-awˬ.

³ Iˇsaˬleˬlaˆ tsawˇ haˬ deuˬ-oˇ, zahˇ dawˬ kʼoꞈ dawˬ heu deuˬ-ahˇ naw maꞈ naˇ haˬ geuꞈ-awˇ, caw teh-awˬ. Kʼoeˇ loꞈ-ehˇ jahˇ naˇ, aˬ dui-euˬ aˬ poeˬ aˬ bawˇ deuˬ-euˬ Miˬyehˇ pyeuꞈ-eu Sahˬpaˬ Miˬyehˇ neh saˇ jaˇ dzaˬ taˬ-euˬ loꞈ-ehˇ, naw maꞈ yaw muiˬ paˬ-ehˇ ya dehꞈ dzaˬ-awˇ, miˇ tsaˬ miˇ muiˬ muiˬ dui dui-awˇ baw le za le-eu miˇ kʼahˬ kʼoeˇ kʼahˬ laꞈ kʼoeˇ, naw maꞈ baoˬ huiˬ-eu tsawˇ jeuˬ pyeuꞈ laˇ tehꞈ-a.

⁴ “Iˇsaˬleˬlaˆ tsawˇ haˬ deuˬ-oˇ, Sahˬpaˬ Miˬyehˇ tiˬ gʼaˬ tehꞈ-ehˇ aˬ dui-euˬ Miˬyehˇ pyeuꞈ-eu gaˇ kawˆ naw maꞈ taˬ ngehˇ.

⁵ Naw maꞈ-euˬ nui ma dawˬ tawˆ luꞈ, naw maꞈ-euˬ saꞈ laˇ dawˬ tawˆ luꞈ hawˇ-eu, naw maꞈ-euˬ gʼaˬ dawˬ tawˆ luꞈ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ gaˬ-awˬ.

⁶ Iˬ nah ngaˇ naw maꞈ-ahˇ biꞈ-euˬ zahˇ dawˬ kʼoꞈ dawˬ heu deuˬ-ahˇ naw maꞈ tiˬ jawˇ-iˬ taˬ ngehˇ,

⁷ Zahˇ dawˬ kʼoꞈ dawˬ kʼoeˇ deuˬ naw maꞈ-euˬ zaˬ deuˬ uˆ deuˬ-ahˇ mehˬ nehˬ tsoˆ nehˬ-awˬ. Iˇ kahˇ jawˇ ngeh maˬ ehˇ, gaˇ mahˇ kaˬ gaˇ ya -iˇ ngeh maˬ ehˇ, gʼaˬ naˬ naˬ luꞈ ngeh maˬ ehˇ, gaˇ mˇ luꞈ ngeh maˬ ehˇ, zahˇ dawˬ kʼoꞈ dawˬ kʼoeˇ deuˬ-ahˇ gui poˆ poˆ-awˬ.

⁸ Kʼoeˇ deuˬ-ahˇ maˬ ya ngehˇ-eu gʼaˇ duˬ, naw maꞈ-euˬ laꞈ du-ahˇ paꞈ-awˇ, naw maꞈ-euˬ naˇ kʼawˇ-ahˇ geuꞈ-awˬ.

⁹ Naw maꞈ-euˬ nymˇ laˇ gʼoˆ bahˬ-ahˇ maˬ ehˇ, kmˇ cehˇ gʼoˆ shoˆ bahˬ-ahˇ maˬ ehˇ, boꞈ taˬ-awˇ bi jaˆ-awˬ.

Maˬ naˇ haˬ geuꞈ-eu tsawˇ haˬ ya luˬ ya seˇ-iˇ-eu

¹⁰ “Naw maꞈ-euˬ aˬ poeˬ aˬ bawˇ deuˬ pyeuꞈ-eu Aˬbyaˬhaˬ, Iˇtsaˆ, Yaˬkoˆ, aˬ ha maꞈ-ahˇ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh saˇ jaˇ dzaˬ taˬ-euˬ loꞈ-ehˇ, naw maꞈ neh maˬ tsoˆ-euˬ, dzaˬ ngeh maˬ jiˇ dawˇ ngeh maˬ shuꞈ-eu meuˬ meuˬ ma deuˬ jaˆ-eu miˇ kʼahˬ, naw maꞈ-ahˇ aˬ yawꞈ biꞈ nehˬ laꞈ tehꞈ-a.

¹¹ Naw maꞈ neh maˬ poˆ uiˬ-euˬ muiˬ dui dui-eu myawˬ gahˬ deuˬ, nymˇ laꞈ kʼoeˇ jaˆ-awˇ, naw maꞈ neh maˬ duˬ-euˬ lah duˬ deuˬ kʼoeˇ gaˇ jaˆ-eu uˬ taꞈ, naw maꞈ neh maˬ ka-euˬ aˬ gaꞈ yaˇ kmˇ hawˇ-eu saˬ loˬ aˇ siˬ aˇ bawˇ deuˬ kʼawꞈ, jaˆ tehꞈ-a. Miˇ kʼahˬ kʼoeˇ kʼahˬ laꞈ kʼoeˇ, Sahˬpaˬ Miˬyehˇ naw maꞈ-ahˇ sheuˬ uˇ gʼeh ngeh, naw maꞈ kʼaˇ dzaˬ mawꞈ-eu jeˬ ya dzaˬ tehꞈ-a.

¹² Kʼoeˇ ngeh, Iˇjiˇtuˆ miˇ kʼahˬ laꞈ kʼoeˇ naw maꞈ aˬ cawˬ zaˬ kʼaˆ ya geuꞈ luꞈ ngeh, naw maꞈ-ahˇ ka kʼoꞈ le-euˬ Sahˬpaˬ Miˬyehˇ-ahˇ naw maꞈ taˬ ngehˇ.

¹³ Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ guˆ-awˇ, aˬ yawꞈ-ahˇ tehꞈ-ehˇ uˬ duˬ tahˬ-eu laꞈ kʼoeˇ, aˬ yawꞈ-euˬ tsawˇ myahˇ uˬ moˆ tehꞈ-ehˇ naw maꞈ saˇ jaˇ dzaˬ-awˬ.

¹⁴ Miˬyehˇ nui gʼaˬ-ahˇ uˬ duˬ taˬ tahˬ. Naw maꞈ jawˇ-eu jawˬ jawˬ-ehˇ jawˇ luꞈ-eu tsawˇ jeuˬ deuˬ-euˬ miˬyehˇ deuˬ-ahˇ uˬ duˬ taˬ tahˬ.

¹⁵ Miˬyehˇ nui gʼaˬ-ahˇ naw maꞈ uˬ duˬ tahˬ naˇ, Sahˬpaˬ Miˬyehˇ nui ma pehˇ-eu jeˬ miˬ dzaˬ loꞈ-ehˇ naw maꞈ kʼoeˇ taˆ keuˆ le-awˇ, geuꞈ-eu jeˬ maˬ ahˇ-ehˇ pyeuꞈ-iˇ ngeh keuˆ ni, naw maꞈ-ahˇ aˬ yawꞈ laˆ luˬ laˆ seˇ nehˬ laꞈ tehꞈ-a. Aˬ jeˬ miˇ neh ehˇ naˇ, naw maꞈ nehˬ-ehˇ jawˇ-eu naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-aˬ, myaˆ naˆ-eu Miˬyehˇ pyeuꞈ-eu meh.

¹⁶ “Maˬsah lehˇ kuˇ-eu jawˇ duˬ-ahˇ naw maꞈ mˇ-euˬ loꞈ-ehˇ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ lawˬ haw-eu jeˬ naw maꞈ taˬ paˇ mˇ.

¹⁷ Aˬ yawꞈ neh kʼaˇ biꞈ laꞈ-euˬ zahˇ dawˬ kʼoꞈ dawˬ deuˬ-ahˇ naw maꞈ maˬ ngehˇ ni yaw duˬ duˬ-ehˇ caw teh-awˬ.

¹⁸ Naw maꞈ yaw muiˬ paˬ-ehˇ ya dehꞈ dzaˬ ni, Sahˬpaˬ Miˬyehˇ neh muiˬ meh tsaˬ meh lehˇ ehˇ taˬ-euˬ jeˬ-ahˇ mˇ-awˬ. Naw maꞈ-euˬ aˬ poeˬ aˬ bawˇ deuˬ-ahˇ Sahˬpaˬ Miˬyehˇ neh saˇ jaˇ dzaˬ taˬ-euˬ baw le za le-eu miˇ kʼahˬ kʼoeˇ kʼahˬ naw maꞈ za tehꞈ-a.

¹⁹ Aˬ yawꞈ neh saˇ jaˇ dzaˬ taˬ-euˬ loꞈ-ehˇ, naw maꞈ-ahˇ muiˇ-eu deuˬ-ahˇ naw maꞈ teh doˆ tehꞈ-a.

²⁰ “ ‘Zahˇ dawˬ kʼoꞈ dawˬ heu deuˬ dawˬ tawˆ luꞈ-ahˇ ya caw teh meh loˇ. Aˬ jeˬ miˇ neh aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ heu loꞈ-ehˇ dawˬ biꞈ laꞈ taˬ’ lehˇ, aˬ kaˇ naw maꞈ-euˬ zaˬ deuˬ naw maꞈ-ahˇ naˇ haˬ laˇ tehꞈ-a. Kʼoeˇ ngeh, heu loꞈ-ehˇ ehˇ mehˬ nehˬ-awˬ.

²¹ ‘Aˇ hu, aˬ dui maꞈ Iˇjiˇtuˆ sahˬ paˬ-euˬ zaˬ kʼaˆ geuꞈ-euˬ ma. Kʼoeˇ ngeh, Sahˬpaˬ Miˬyehˇ-aˬ, aˬ yawꞈ-euˬ huiˬ-eu baoˬ-ahˇ gʼoe-awˇ, aˬ dui-ahˇ ka kʼoꞈ le-euˬ meh.

²² Iˇjiˇtuˆ tsawˇ haˬ deuˬ-ahˇ maˬ ehˇ, aˬ yawꞈ maꞈ-euˬ sahˬ paˬ-ahˇ maˬ ehˇ, sahˬ paˬ-euˬ gaˇ mˇ-eu yaw huiˬ yaw mahˇ deuˬ-ahˇ maˬ ehˇ, zahˬ leˇ paˬ-ehˇ gʼeh-eu jeˬ hawˇ-eu guˆ dui dui laˇ paˬ-ehˇ gʼeh-eu jeˬ Sahˬpaˬ Miˬyehˇ jahˇ nehˬ-euˬ gaˇ, nga maꞈ-euˬ myaˆ nuiˆ neh ya mawˇ duˬ-euˬ ma.

²³ Aˬ dui-euˬ aˬ poeˬ aˬ bawˇ deuˬ-ahˇ aˬ yawꞈ neh saˇ jaˇ dzaˬ taˬ-euˬ loꞈ-ehˇ, aˬ dui maꞈ-ahˇ heu gaˇ sheuˬ keuˆ laꞈ-awˇ, miˇ kʼahˬ heu kʼahˬ biꞈ laꞈ-eu gʼaˇ duˬ, Iˇjiˇtuˆ miˇ kʼahˬ laꞈ kʼoeˇ neh aˬ dui-ahˇ aˬ yawꞈ sheuˬ doˆ laꞈ-euˬ meh.

²⁴ Kʼoeˇ naˇ, zahˇ dawˬ kʼoꞈ dawˬ heu deuˬ dawˬ tawˆ luꞈ-ahˇ caw teh-awˇ, aˬ yawꞈ-ahˇ guˆ-awˬ lehˇ, aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ ehˇ-eu meh. Aˬ dui kʼoeˇ loꞈ-ehˇ jahˇ naˇ, aˬ dui-euˬ tsawˇ jeuˬ-ahˇ aˬ yawꞈ aˬ myah luꞈ haw piˇ-awˇ, bi baw bi za le tehꞈ-a.

²⁵ Miˬyehˇ neh dawˬ kʼaˇ biꞈ taˬ-euˬ jeˬ-ahˇ aˬ dui saˇ jaˇ ziꞈ-eu laꞈ kʼoeˇ yaw muiˬ paˬ-ehˇ naˇ haˬ geuꞈ naˇ, aˬ dui-ahˇ aˬ yawꞈ nui ma tsaˬ tehꞈ-a.’