Dawˬmehˬ 34 - Akha

Moˇseˬ ziˇ jiˇ-euˬ

¹ Mawˇbaˆ miˇ kʼahˬ deh ga-ahˇ neh Neˬboˬ gawˬ jawˬ-ahˇ Moˇseˬ daˆ leˇ-awˇ, Yeˬliˇkoˇ meuˬ-euˬ nahˇ ma doˆ kʼehˬ paw jaˆ-eu Piˇsaˬgaˬ gawˬ jawˬ uˬ duˬ daˆ keuˆ leˇ-euˬ meh. Kʼoeˇ gaˇ jawˇ-awˇ, miˇ kʼahˬ kʼoeˇ kʼahˬ kʼahˬ lah ni, Sahˬpaˬ Miˬyehˇ aˬ yawꞈ-ahˇ mehˬ nehˬ-euˬ meh. Laꞈ taˆ paw Daˬ meuˬ-ahˇ keuˆ ni jaˆ-eu Giˇlaˆ miˇ kʼahˬ maˬ ehˇ,

² Naˬtaˬliˇ miˇ kʼahˬ kʼahˬ lah ni maˬ ehˇ, Eˇpaˬleˬ hawˇ-eu Maˬnaˇseˬ miˇ kʼahˬ maˬ ehˇ, nahˇ ma ga kʼehˬ paw Gʼahˇ ceh-eu Iˬ ma laˆ shaˆ-ahˇ keuˆ ni jeˇ-eu Yuˇdaˆ miˇ kʼahˬ maˬ ehˇ,

³ Yuˇdaˆ miˇ kʼahˬ laꞈ oˆ dzaˬ maˬ ehˇ, Zoˇlaˆ meuˬ-ahˇ neh Yeˬliˇkoˇ meuˬ-ahˇ keuˆ ni jaˆ-eu deh ga maˬ ehˇ, daoˇ aˇ bawˇ dehꞈ-eu meuˬ maˬ ehˇ, mehˬ nehˬ-euˬ meh.

⁴ Kʼoeˇ naˇ, Moˇseˬ-ahˇ Sahˬpaˬ Miˬyehˇ ehˇ-eu, “Heu-aˬ, Aˬbyaˬhaˬ, Iˇtsaˆ hawˇ-eu Yaˬkoˆ aˬ ha maꞈ-ahˇ, aˬ yawꞈ maꞈ-euˬ zaˬ deuˬ uˆ deuˬ-ahˇ biꞈ-eu gʼaˇ duˬ ngaˬ neh saˇ jaˇ dzaˬ taˬ-euˬ miˇ kʼahˬ ma. Miˇ kʼahˬ heu nawˬ-ahˇ ngaˇ biꞈ mawꞈ kʼawꞈ, nawˇ maˬ ya uˇ keuˆ leˇ-a.”

⁵ Kʼoeˇ naˇ, Sahˬpaˬ Miˬyehˇ neh ehˇ taˬ-eu loꞈ-ehˇ, Sahˬpaˬ Miˬyehˇ-euˬ zaˬ kʼaˆ Moˇseˬ-aˬ, Mawˇbaˆ miˇ kʼahˬ-ahˇ shiˇ-euˬ meh.

⁶ Behˬpyawˇ meuˬ-euˬ nui baˬ paw jaˆ-eu Mawˇbaˆ miˇ kʼahˬ deh kʼawꞈ tiˬ tsahˇ-ahˇ, Sahˬpaˬ Miˬyehˇ aˬ yawꞈ-ahˇ duˬ pahˬ-euˬ meh. Ehˇ kʼawꞈ, iˬ nah keuˆ ni aˬ yawꞈ-euˬ lmˬ bymˇ tiˬ gʼaˬ-iˬ maˬ siˬ duˬ nya-a.

⁷ Moˇseˬ ziˇ jiˇ ngeh, tiˬ yaˇ nyiˬ tseˇ kʼoꞈ kʼawˆ-awˇ, gʼaˬ maˬ juˬ-iˇ-euˬ uˬ taꞈ, myaˆ nuiˆ kʼawꞈ yaw muiˬ paˬ-ehˇ mawˇ nya-eu meh.

⁸ Mawˇbaˆ deh kʼawꞈ-ahˇ Iˇsaˬleˬlaˆ tsawˇ haˬ deuˬ aˬ yawꞈ gʼaˇ duˬ smˬ tseˇ nah tsawˇ ngoeˇ ngoeˇ-euˬ meh.

⁹ Nuˬ-euˬ aˬ li Yawˇshuˆ-aˬ, noeˬ siˬ noeˬ mawˇ nya-eu tsawˇ gahˇ tiˬ byah ni ahˇ-eu meh. Aˬ jeˬ miˇ neh ehˇ naˇ, Moˇseˬ-euˬ gaˇ bi mˇ daˆ leꞈ-eu gʼaˇ duˬ, aˬ yawꞈ-ahˇ Moˇseˬ tseˇ doˆ-euˬ meh. Iˇsaˬleˬlaˆ tsawˇ haˬ deuˬ Yawˇshuˆ-euˬ ehˇ dawˬ naˇ haˬ-awˇ, Moˇseˬ-ahˇ gʼoe-awˇ Sahˬpaˬ Miˬyehˇ neh aˬ yawꞈ maꞈ-ahˇ biꞈ taˬ-euˬ zahˇ dawˬ kʼoꞈ dawˬ mehˬ nah caw teh-euˬ meh.

¹⁰ Iˇsaˬleˬlaˆ tsawˇ jeuˬ laꞈ kʼoeˇ, Moˇseˬ-ahˇ duˇ-eu Miˬyehˇ gʼaˇ duˬ ngehˬ dah-eu tiˬ gʼaˬ-iˬ maˬ doˆ laˇ haw-aˬ. Sahˬpaˬ Miˬyehˇ myaˆ pyawˬ ciˬ daˬ-awˇ dawˬ ngehˬ cawˬ-euˬ aˬ yawꞈ loꞈ-ehˇ gʼeh-eu tsawˇ haˬ maˬ jawˇ-a.

¹¹ Iˇjiˇtuˆ sahˬ paˬ hawˇ-eu aˬ yawꞈ-euˬ gaˇ mˇ-eu yaw huiˬ yaw mahˇ deuˬ jawˇ gaˇ maˬ ehˇ, aˬ yawꞈ-euˬ miˇ kʼahˬ kʼahˬ lah ni-ahˇ maˬ ehˇ, Moˇseˬ-ahˇ Sahˬpaˬ Miˬyehˇ pyehˬ gʼeh-awˇ bi mˇ mehˬ-euˬ zahˬ laˇ paˬ-ehˇ gʼeh-eu jeˬ hawˇ-eu kʼaˆ jeˬ-ehˇ gʼeh-eu kʼoeˇ deuˬ-ahˇ, Miˬyehˇ gʼaˇ duˬ ngehˬ dah-eu tsawˇ haˬ nui gʼaˬ maˬ mˇ haw-aˬ.

¹² Iˇsaˬleˬlaˆ tsawˇ haˬ dawˬ tawˆ luꞈ mehˬ shi Moˇseˬ neh mˇ-euˬ guˆ dui dui laˇ paˬ-ehˇ gʼeh-eu huiˬ-eu gaˇ deuˬ-ahˇ, Miˬyehˇ gʼaˇ duˬ ngehˬ dah-eu tsawˇ haˬ nui gʼaˬ maˬ mˇ nya-a.